CAMBAJ Bibliata Salmo 83:18-pi pascai (huaquin Bibliacunapica 82:19-pimi can). ¿Chaipica imatataj nin? Traducción del Nuevo Mundo de las Santas Escrituras Bibliapica: “Cambaj shuti Jehová cashcata gentecuna yachachun. Canllami Allpa jahuapica ashtahuan Jatun Dios cangui” ninmi. Shujtaj Bibliacunapipish chashnallatajmi nin. Shinapish achca Bibliacunapica Jehová shutita anchuchishpami Mandaj Dios, Jatun Dios nishpa churashcacuna. Shinashpaca ¿cai versopica Jehová shutichu ricurina can o titulocunallachu ricurina can?

Cai versopica shuj shutimi ricurin. Bibliata hebreo rimaipi quillcachishcacunapica shuj sumaj shutimi ricurin. Chai shutitaca hebreo rimaipica יהוה  (YHWH) letracunahuanmi quillcashcacuna. Quichuapica chai shutitaca Jehová o Yavé ninchijmi. ¿Bibliapica chai shutica shuj cutinllachu ricurin? Mana. Hebreo rimaipi quillcachishcacunapica casi 7.000 cutinmi ricurin.

¿Diospaj shutica valishcachu can? Ima shina mañana cashcata yachachicushpaca Jesusca cashnami callarirca: ‘Jahua pachapi caj ñucanchij Yaya, cambaj jucha illaj shutica alli nishca cachun’ nircami (Mateo 6:9). Chai mañaita yachachishca qˈuipa punllacunapica: ‘¡Yayitolla, Cambaj shutita sumajyachilla! nircami. Chashna nijpica jahua pachamantaca: “Ña sumajyachircanimi, cutinpish sumajyachigrinimi” nishpa rimashcami uyarirca’ (Juan 12:28, NVI). Shina cajpica Diospaj shutica valishcami can. Shinashpaca ¿imamantataj huaquin traducijcunaca Diospaj shutita Bibliamanta anchuchishca?

Paicunaca cai yuyaicunatami catishca canga. Puntapica, Diospaj shutita ima shina ninata mana alli yachanchijchu nincunami. Ñaupa hebreo rimaitaca a, e, i, o, u letracuna illajmi quillcajcuna cashca. YHWH letracunata ima shina ninata mana yachanchijchu nincunami. Chaimantami tauca gentecunaca Diospaj  shutita mana ninachu canchij nin. ¿Ima shina ninata mana yachashcallamantachu Diospaj shutita cungarina canchij? Mana. Yuyashun: Bibliata quillcachishca punllacunapica Jesús shutitaca Yeshúa o Yehoshúa nijcunami cashca canga. Jesús shutita ima shina ninata mana alli yachashpapish, cunan punllacunapica muyundij Allpapimi Jesús shutitaca chˈican chˈican shimicunapi parlancuna. Shinallataj caru llajtaman can rijpica cambaj shutica shujtaj layami uyaringa. Shinashpaca Diospaj shutita ñaupa punllacunapi ima shina nijcuna cashcata mana alli yachashpapish Diospaj shutita ninami canchij.

Ishquipica, judiocunapaj panda yuyaita catishpami Diospaj shutita Bibliamanta anchuchishcacuna. Judiocunaca Éxodo 20:7-tami panda entendishcacuna. Chaipica cashnami nin: “Ñuca canta Mandaj Diospaj shutitaca, ama yangamanta rimanguichu. Ñucaca maijanpish ñuca shutita yangamanta rimajtaca Ilaquichishatajmi” ninmi. Chaimantami Diospaj shutita mana ninachu canchij nincuna.

Éxodo 20:7-pica Diospaj shutita ama yangamanta rimachun ninmi. Shinapish Diospaj shutitaca respetohuan ninallami canchij. Hebreo rimaipi Ñaupa Testamentota quillcajcunaca Diosta alli servijcuna, Dios mandashcata cazujcunami carca. ¿Paicunaca Diospaj shutita cungarircacunachu? Mana, ashtahuanpish cutin cutinmi Diospaj shutita nircacuna. Por ejemplo, taucapurapi sinchita cantana salmocunapimi Diospaj shutita nircacuna. Jehová Diosllatajmi paitaca shutipi alabachun mandarca. Paita servijcunaca cazurcacunami (Salmo 148:5, 13). Shinashpaca, cunan punllacunapi Jesusta catijcunapish Jesús shinami respetohuan Diospaj shutita ninchij.

Diospaj shutita anchuchishpa shujtaj titulocunata churashpaca traducijcunaca mana allitami rurancuna. Diosca carupi cashca shina, mana rijsipaj cashca shinami rurancuna. Shinapish Bibliapica Dioshuan alli ‘apanacuchunmi’ yachachin (Salmo 25:14). Shuj alli amigota yuyari. ¿Paipaj shutita mana yachashpaca paihuan alli apanacunguimanchu? Mana. Dioshuanpish chashnallatajmi can. Diospaj shutita mana yachashpaca Dioshuan mana alli apanacushunchu. Ashtahuanpish Diospaj shutita huashaman saquijcunaca, chai shuti ima nisha nishcata mana yachancunachu. ¿Diospaj shutica imatataj nisha nin?

Ima shutitaj cangui nishpa Moisés tapujpica, Jehová Diosca:  “Ñucaca ñucami cani” nircami (Éxodo 3:14). Tauca Bibliacunapimi chashnallataj nin. Shinapish Rotherham traducishca Bibliapica: “Ñucaca ñuca ima tucusha nishcami tucusha” ninmi. Shinashpaca Jehová Diosca paipaj munaita pajtachingapajca paillataj tucui laya tucuna podertami charin. Pai rurashcacunapish paipaj munaita pajtachichun ima tucuna cajpica chaillataj tucuchunmi ayudan.

Shuj chˈimbapuraita rurashun: Canca imapish tucuna poderta charishpaca, ¿ima shinataj cambaj amigocunata ayudanguiman? Shuj amigo ungushca cajpica, alli doctor tucushpami paita jambinguiman. Cutin shujtaj amigo huajcha saquirijpica, charij runa tucushpami paita ayudanguiman. Shinapish ñucanchijca imapish tucuna podertaca mana charinchijchu. Bibliamanta ashtahuan yachashpaca Jehová Diosca imapish tucuna poderta charishcata, paita servijcunatapish paipaj poderhuan ayudasha nishcatami entendingui (2 Crónicas 16:9). Diospaj shutita mana rijsijcunaca pai chashna alli Dios cashcataca mana yachancunachu.

Shinashpaca Diospaj shutica Bibliapi ricurinami can. Jehová shuti ima nisha nishcata yachashpa, Diosta adorangapaj paipaj shutita nishpaca jahuallami paipajman cˈuchuyashun. *