¿JUICIO PUNLLACA ima shinashi canga? Tauca gentecunaca Juicio Punllapica achca almacunami imallata rurashcata ricuchingapaj Diospaj ñaupajpi canga ninmi. Chai punllapica huaquincunaca jahua pachapi cushilla causanamanmi ringacuna, cutin shutajcunaca huiñai huiñaita llaquita apanamanmi ringacuna ninmi. Shinapish Juicio Punllapi ima tucunataca Bibliami alli yachachin. Chai punllaca cushicuna punlla, callaripi laya tucui gentecuna jucha illaj tucuna punlla cashcatami yachachin.

Apocalipsis 20:11, 12-pica Juicio Punllamanta parlashpaca apóstol Juanca: “Yurajlla jatun tiyarinatapish chai jahuapi tiyacujtapishmi ricurcani. Paipaj ñaupajmantaca allpa pachapish cielopish tucuimi chingarirca. Cutinca ña manataj ricurircachu. Huañushcacunataca jatuncunatapish uchillacunatapish Diospaj ñaupajpi shayacujtami ricurcani. Librocunapish pascashcami carca. Causanaman rinapaj shujtaj libropish pascashcami carca. Huañushcacunaca paicuna ima shina cashcata librocunapi quillcashca shinallatajmi ricuchishca carca” ninmi. ¿Yurajlla jatun tiyarinapi tiyacujca pitaj can?

Jehová Diosmi tucui gentecunapaj Juez can. Shinapish gentecunata juzgachunca shujtajmanmi mingashca. Hechos 17:31-pica apóstol Pabloca ninmi: ‘Tucui cai pachapi causajcunata paicuna ima shina cashcata ricuchingapajca ñami shuj punllata agllashcata  charin. Tucui chaicunata rurashpa ricuchij cachunca pai agllashca runatami huañushcacunapaj chaupimanta causachishpa ricuchirca’ ninmi. Chai agllashca runaca huañushcacunamanta jatarishca Jesusmi can (Juan 5:22). ¿Juicio Punllaca ima horastaj callaringa? ¿Jucio Punllaca mashna tiempotaj canga?

Apocalipsis libropi nishca shinaca, Diablopaj mana alli ruraicunaca Armagedón jatun macanacuipimi tucuringa. Chai qˈuipami Juicio Punllaca callaringa (Apocalipsis 16:14, 16; 19:19–20:3). * Shinallataj Armagedón jatun macanacui qˈuipami Diablopish, supaicunapish huaranga huatacunacama huichcashca canga. Chaipimi cai pachamanta agllashca 144.000 gentecunaca ‘Cristohuan huaranga huatacunata mandashpa’ juzgangacuna (Apocalipsis 14:1-3; 20:1-4; Romanos 8:17). Shinashpaca Juicio Punllapica achca trabajomi tiyanga, mana 24 horasllachu canga. Ashtahuanpish huaranga huatacunami canga.

Chai huaranga huatacunapimi Jesusca ‘huañushcacunamanpish causajcunamanpish paicuna imalla rurashcata ricuchinga’ (2 Timoteo 4:1). “Causajcuna” nishpaca Armagedón jatun macanacuipi quishpirishca achca gentecunamantami parlacun (Apocalipsis 7:9-17). Shinallataj apóstol Juanca: “Huañushcacunataca Diospaj ñaupajpi shayacujtami ricurcani” nircami. Jesús yachachishca shinaca huañushcacunaca causachishcami canga (Juan 5:28, 29; Hechos 24:15). ¿Tucui gentecunata juzgangapajca imataj ayudanga?

Apóstol Juanca: “Librocunapish pascashcami carca. Huañushcacunaca paicuna ima shina cashcata librocunapi quillcashca shinallatajmi ricuchishca carca” nircami (Apocalipsis 20:12). ¿Chai librocunaca causacushparaj gentecuna imata rurashcatachu ricuchinga? Mana, gentecunaca causacushparaj imata rurashcataca mana ricuchingachu. ¿Imamantataj chashna ninchij? Bibliapica: “huañujca, juchamantaca cacharichishcami” can ninmi (Romanos 6:7). Shinashpaca huañushpaca tucui juchacunatami paganchij. Chai mushuj librocunaca Diospaj mushuj mandashcacunatami charinga. Huañuimanta jatarijcunapish, Armagedón jatun macanacuimanta quishpirijcunapish huiñaita causangapajca, Diospaj mandashcacunata  pajtachinami canga. Chai mandashcacunaca huaranga huatapi Dios cushca mushuj mandashcacunatapishmi charinga. Shinashpaca huaranga huatacunapi imata rurashcata ricushpami cada unota juzganga.

Juicio Punllapica achca huaranga huaranga gentecunami Diospaj munaita yachashpa pai mandashcata cazui tucungacuna. Gentecuna Diospaj munaita rijsichunca achcatami yachachina canga. Chai punllacunapica ‘cai pachapi causajcunaca cashcata rurana ima cashcatami yachangacuna’ (Isaías 26:9). Shinapish mana tucui gentecunachu Diospaj munaita rurasha ninga. Isaías 26:10-pica: “Yallitaj millaita rurajta paita llaquishpa mana imata rurajpica, cashcata ruraj canataca mana yachangachu. Cashcata rurajcunapaj llajtapi cashpapish millaita rurangallami. Mandaj Dios jatun mandaj cashcataca mana ricungachu” ninmi. Chai millai gentecunaca Juicio Punllapimi tucuchishca canga (Isaías 65:20).

Juicio Punlla tucurinapajca, tucui gentecunami Adán y Eva chingachishca jucha illaj causaita charishun (1 Corintios 15:24-28). Chai qˈuipaca Diablomi cacharichishca canga. Chaipimi Diabloca achca gentecunata pandachinga (Apocalipsis 20:3, 7-10). Diablota mana catij gentecunaca, cai shimicuna pajtarijtami ricungacuna: “Allita rurajcunallami cai llajtapica causangacuna. Ima pandata mana rurajcunallami cai allpamantaca mana chingaringacuna. Ashtahuanpish Diosta mana manchajcunaca, cai llajtamanta llujshichishpa cachashcami canga. Mana cazujcunapish, sapimantami aisashpa shitashca cangacuna” (Proverbios 2:21, 22). Shinashpaca Juicio Punllaca Diosta cazuj gentecunapajca sumaj bendicionmi canga.