BIBLIATA quillcashca hebreo rimaipi scheʼóhl, griego rimaipi háides shimicunaca 70 cutin yallimi Bibliapica ricurin. Chai shimicunaca huañuimanta parlajpimi Bibliapi ricurin. Chai shimicunataca huaquin Bibliacunapica “pambana jutcu”, “infierno”, “jutcu” nishpami churashcacuna. Shinapish scheʼóhl shimipish háides shimipish imata nisha nishcataca, shujtaj shimicunapica mana ni tucushcacunachu. Chaimantami quichua Bibliacunapipish “Seol” y “Hades” nishpa churashcacuna. Shinapish ¿chai shimicunaca imatataj nisha nin? Chai shimicunamanta huaquin versocuna imata yachachijta ricushun.

Eclesiastés 9:10-pica: ‘Canpish Seolman ringuillatajmi. Chaipica imata rurana mana tiyanchu. Imata yuyanapish, imata yachanapish, alli yachaipish mana tiyanchu’ ninmi. ¿Seol shimica huañushcacunata pambana jutcumantachu parlacun? Mana. Bibliapica huañushcacunata pambana jutcumanta parlangapajca mana scheʼóhl o háides shimicunatachu churan. Ashtahuanpish hebreo rimaipipish, griego rimaipipish shujtaj shimicunatami churan (Génesis 23:7-9; Mateo 28:1). Shinallataj “Seol” shimica mana achca gentecunata churana panteonmanta o achca gentecunata pambana jatun jutcumantachu parlacun (Génesis 49:30, 31).

¿Shinashpaca “Seol” shimipish “Hades” shimipish imatataj Bibliapica nisha nin? Mana shuj jatun jutcuchu can. Por ejemplo, Isaías 5:14-pica: ‘Seolpish tiyashcata millpungapajmi huijsata jatunyachinga. Shimitapish yallitajmi pascanga’ ninmi. Seolca achca huañushcacunatami millpushca, ashtahuanmi mashcashpa caticun (Proverbios 30:15, 16). Panteoncunaca jundangacamallami huañushcacunata chasquin. Shinapish, ‘Seolca manataj shaicunchu’ ninmi (Proverbios 27:20). Shinashpaca Seolpi o Hadespica huañushcacunaca manataj jundanchu. Mana shuj jatun pambana jutcu o jatun pambachu can. Ashtahuanpish huañushcacuna dormicuj shina cashcata ricuchingapajllami can.

 Huañushcacuna causarina cashcata Bibliapi yachashpami, Seol o Hades imata nisha nishcata alli entendinchij (Job 14:13; Hechos 2:31; Apocalipsis 20:13). * Seolpi o Hadespica Jehová Diosta servishpa o paita mana servishpa huañujcunapishmi dormicuncuna (Génesis 37:35; Salmo 55:15). Chaimantami Bibliapica ‘cashcata rurajcunatapish, mana cashcata rurajcunatapish Taita Diosca causachingami’ nin (Hechos 24:15).