¿Imamantataj humildes cana canchij?
“Alli yachaica mana jatun tucushcacunahuanmi tiyan” (PROVERBIOS 11:2).
CANTO 38 Y 11
1, 2. ¿Diosca imamantataj Saultaca ña mana mandanguichu nirca? (Jahuapi tiyaj dibujota ricui).
JEHOVÁ DIOSCA Saultaca rey cachunmi agllarca (1 Samuel 9:1, 2, 21; 10:20-24). Callaripi Saúl humilde cashpapish qꞌuipaca jatunmi tucurca. Shuj punllaca achca filisteo soldadocunami israelitacunahuan macanacungapaj shamurcacuna. Saulca manaraj chai filisteocunahuan macanacushpami Samuel chayashpa Diosman cunata rupachichun shuyana carca. Pero achca israelitacunaca manchashpami Saulta saquishpa rircacuna. Chaita ricushpami Saulca Samuelta mana shuyashpa pairaj Diosman cunata rupachirca. Dios chaita rurachunca paitaca mana mandarcachu. Chaimanta Diosca pꞌiñarircami (1 Samuel 13:5-9).
2 Samuel chayashpaca Diosta mana cazushcamantami Saultaca rimarca. Pero Saulca pandarishcanimi ninapaj randica shujtajcunatami juchachirca (1 Samuel 13:10-14). Chai punllamantami Saulca jatun tucushpa mana allicunata rurai callarirca. Chaimantami Jehová Diosca ña mana mandanguichu nirca (1 Samuel 15:22, 23). Callaripi Saúl alli runa cashpapish qꞌuipaca mana alli runami tucurca. Chaimantami paipaj causaipica llaquicunata charirca (1 Samuel 31:1-6).
3. a) ¿Achca gentecunaca imatataj nincuna? b) ¿Cai yachaipica ima tapuicunamantataj yachashun?
3 Achca gentecunaca jatun tucushpami: “Alli causangapajca shujtajcunamanta yallimi cana canchij” nincunami. Shuj rijsishca político runaca: ‘Ñucaca mana humilde canichu. Chashnami catisha nini’ nircami. Diosta servijcunaca cai tapuicunapimi yuyana canchij: ¿Imamantataj humildes cana canchij?¿Humildecunaca ima shinataj can? ¿Humildes cashpaca imatataj mana rurana canchij? Cai yachaipica cai tapuicunamantami yachashun. Pero ¿humildes cana sinchi laya ricurijpica imatataj rurana canchij? Chaitaca catij yachaipimi yachashun.
¿IMAMANTATAJ HUMILDES CANA CANCHIJ?
4. ¿Maijancunaca imatataj rurancuna?
4 Bibliapica jatun tucushcacunaca mana humilde cashcatami ricuchincuna ninmi (Proverbios 11:2-ta leyipai). Davidca Diostaca: “Cambajta rurajtaca jatun tucunamanta huaquichihuailla” nishpami mañarca (Salmo 19:13). Maijancunaca jatun tucushca cashcamanta o mana pacienciata charishcamantachari shujtajcuna rurana cashcata paicunaraj rurancuna. Juchayujcuna cashcamantami maipica chaita rurashcanchij. Pero cutin cutin chaita rurashpaca rey Saúl shinami Diosta pꞌiñachishun. Bibliapica: ‘Jehová Diosca jatun tucushcacunataca sinchitami riman’ ninmi (Salmo 119:21). Jehová Dios imamanta chaita rurashcata ricushun.
5. ¿Imamantataj shujtajcunata yalli cashcata mana yuyana canchij?
5 Shujtajcunata yalli cashcata yuyashpa, imatapish rurashpaca mandaj Jehová Diostami mana respetashcata ricuchishun. Shinallataj shujtajcunapaj ñaupajpica pingaipimi saquirishun (Lucas 14:8, 9). Ashtahuanpish shujtajcuna rurana cashcata ñucanchijraj rurashpaca paicunahuanmi problemacunata charishun (Proverbios 13:10). Chaimantami Jehová Diosca mana jatun tucunachu canguichij nin.
¿HUMILDECUNACA IMA SHINATAJ CAN?
6, 7. ¿Humildecunaca ima shinataj can?
6 Humildecunaca shujtajcuna paicunata yalli cashcatami yuyancuna (Filipenses 2:3). Chashnallataj mana tucuita rurai tucushcata, imapipish pandarijlla cashcatami yachancuna. Shujtajcuna imata nijpica uyancunami, paicunamantapish yachanata munancunami. Chashna humilde cajcunaca Jehová Diospaj ñaupajpica allimi ricurincuna.
7 Bibliapi nishca shinaca humildecunaca tucuita rurai tucushcataca mana yuyanchu. Paicunaca shujtajcuna rurana cashcataca mana ruranchu. Chaimantami shujtajcunata cꞌuyaihuan, respetohuan tratancuna.
8. ¿Mana cuidarishpaca imatataj rurai callarishun?
8 Mana cuidarishpaca jatun tucushunmi. Por ejemplo, congregacionpi ima mingashcata pajtachina cashcamanta o ñucanchij amigocuna chai mingashcata pajtachina cashcamantachari, shujtajcunata yalli cashcata yuyai callarishun (Romanos 12:16). Shinallataj ñucanchij rurashcata ricuchunllachari imatapish rurai callarishun (1 Timoteo 2:9, 10). Ashtahuancarin shujtajcuna imata ruranata o imata mana ruranatami ni callarishun (1 Corintios 4:6).
9. ¿Imamantataj huaquincunaca jatun tucushcacuna?
9 Mana alli munaicunamanta mana jarcarishpaca jatun tucushcami cashun. Shujtajcuna paicunata alabachun munashcamanta, envidiata charishcamanta o pꞌiñarishca cashcamantami achcacunaca jatun tucushcacuna. Bibliapica huaquincunaca jatun tucushcatami huillan. Por ejemplo, Absalón, Uzías Nabucodonosorpish jatun tucushcatami ricuchircacuna. Chaimantami Jehová Diosca paicunata mana jatun tucushca cana canguichijchu nirca (2 Samuel 15:1-6; 18:9-17; 2 Crónicas 26:16-21; Daniel 5:18-21).
10. ¿Imamantataj shujtajcunapaj ruraicunata mana juzgana canchij? Shuj ejemplomanta parlai.
10 Maijancunaca mana cuentata cushpachari paicuna mana rurana cashcata rurancuna. Abimelecpish Pedropish imata rurashcata yuyarishun (Génesis 20:2-7; Mateo 26:31-35). ¿Abimelecpish Pedropish jatun tucushcacunachu carca? ¿Tucuita mana yachashcamanta o mana alli yuyashcamantachu paicunaca chashna rurashcacuna canga? Ñucanchijca gentecunapaj shungupi ima tiyashcataca mana yachanchijchu. Chaimanta paicuna imamanta chashna rurashcataca mana juzganachu canchij (Santiago 4:12-ta leyipai).
TUCUICUNAMI DIOSPAJ PUEBLOPI AYUDAI PUDINCHIJ
11. ¿Humildes cashpaca imatataj rurashun?
11 Diosca tucuitami ordenpi charin. Chaimantami cada unoman chꞌican chꞌican ruraicunata congregacionpi pajtachichun churashca. Humildes cashpaca chai ruraicunata pajtachishunmi. Tucuicunami congregacionpi ayudai pudinchij. Jehová Diosca chꞌican chꞌican ruraicunata alli rurachunmi cada unoman yuyaita cushca. Chashnallataj chai ruraicunahuan imata ruranata ñucanchijllataj decidichunmi saquishca. Pero humildes cashpaca imata ruranata alli yachashpapish Dios munashca shinami rurashun. Diosca paita jatunyachichun, shujtajcunata ayudachunmi munan (Romanos 12:4-8; 1 Pedro 4:10-ta leyipai).
Jehová Dios imata rurachun mingajpica Jesustami yuyarina canchij. (Párrafo 12 al 14-ta ricui).
12, 13. ¿Ñucanchij causaipi cambiocuna tiyajpica imatataj yuyarina canchij?
12 Tiempohuanca Jehová Diosca shujtaj trabajota rurachunchari minganga. Jesusta yuyarishun. Callaripica Jesusca paipaj Yayallahuanmi jahua pachapi causarca (Proverbios 8:22). Qꞌuipaca angelcunatapish, cai Allpatapish, gentecunatapish rurashpami Diosta ayudarca (Colosenses 1:16). Achca huatacuna qꞌuipaca Diosca cai Allpamanmi Jesustaca cacharca. Cai Allpapica tucui gentecuna shinallatajmi paica huahua shina huacharirca, huiñarcapish (Filipenses 2:7). Huañushca qꞌuipaca Jesusca jahua pachamanmi tigrarca. Qꞌuipaca 1914 huatapimi rey tucurca (Hebreos 2:9). Huaranga huatacunata mandashca qꞌuipaca paipaj Yayamanmi mandanata tigrachinga. Chai punllamantami Diosca “tucuipi, tucuicunata mandanga” (1 Corintios 15:28).
13 Ima decisionta japishcamantachari causaipica cambiocuna tiyan. Por ejemplo, cazaranatachari decidircanchij. O huahuacunata charinatachari decidircanchij. Mana cashpaca huatacuna pasajpica Diosta ashtahuan servingapaj minishtirishcallahuan causanatachari decidircanchij. Shinallataj joven cashcamanta o sano cashcamantachari Jehová Diosta ashtahuan servi tucunchij. Cutin yuyajlla cashcamanta o ungushca cashcamantachari Diosta servingapaj mana tanto rurai tucunchij. Chashna cajpipish Jehová Diosca paita ima shina alli servi tucushcataca yachanmi. Paica ñucanchij mana rurai pudishcataca mana mañanchu. Ashtahuanpish rurai pudishcallahuan paita servijpica cushicunmi (Hebreos 6:10).
14. ¿Diospaj pueblopi imata rurachun mingajpica imatataj rurana canchij?
14 Jesusca paipaj Yaya ima mingashcatami tucuita cushilla pajtachirca. Ñucanchijpish chaillatatajmi rurai tucunchij (Proverbios 8:30, 31). Humildes cashpaca congregacionpi imata rurachun mingajpica cushillami chasquishun. Shujtajcunaman huaquin ruraicunata mingajpica mana pꞌiñarinachu canchij. Ashtahuanpish Diospaj pueblo ucupi imata rurachun mingajpica cushillami sintirishun. Shinallataj humilde cashpaca huauqui panicunata respetashpami ayudashun. Paicunamanpish Jehová Dios chꞌican chꞌican ruraicunata mingajpica allimi sintirishun (Romanos 12:10).
¿HUMILDES CASHPACA IMATA ASHTAHUAN RURASHUN?
15. ¿Gedeonmantaca imatataj yachanchij?
15 Gedeonca humilde runami carca. Paimantaca ¿imatataj yachanchij? Shuj punllaca Jehová Diosca Gedeontaca enemigocunamanta israelitacunata salvachunmi mandarca. Pero Gedeonca: ‘Manasespaj familiapuramantaca ñuca huasi ucupuracunaca tucuimanta yalli huajchacunami canchij. Ñuca yayapaj huasipipish ñucamari tucuicunapaj qꞌuipa cani’ nishpami cutichirca (Jueces 6:15). Chashna jahuapish Gedeonca Diospi shunguta churashpami pai mandashcata rurasha nirca. Chaimanta Dios mingashcata alli entendishca qꞌuipaca ñucata ayudahuai nishpami Diosta mañarca (Jueces 6:36-40). Gedeonca mana manchaj runami carca. Paica alli yuyashpami imatapish ruraj carca (Jueces 6:11, 27). Gentecuna Gedeonta mandaj cachun nijpipish paica mana nircami. Ashtahuanpish Dios mingashcata pajtachishca qꞌuipaca paica paipaj huasimanmi tigrarca (Jueces 8:22, 23, 29).
16, 17. ¿Diosta ashtahuan servisha nishpaca humilde huauqui o panica imatataj yuyarina can?
16 Congregación ucupi imata rurachun mingajpi chaita chasquishpa, o ashtahuan ayudasha nishpaca ¿jatun tucushca cashcatachu ricuchinchij? Mana. Bibliapica Jehová Diosta ashtahuan servina, huauquicunata panicunatapish ayudanaca allimi can ninmi (1 Timoteo 4:13-15). Pero mana congregacionpi mingashcacunata chasquishpallachu Diosta ashtahuan servicushcata ricuchinchij. Tucuicunami ashtahuan alli crijcuna cangapaj esfozari tucunchij. Shinallataj Dios yuyaita cujpimi huaquin cosascunata rurangapaj alli canchij. Chai cosascunata ashtahuan alli rurangapajmi esfozari tucunchij. Chashnami Diosta alli servishun, shujtajcunatapish ayudashun.
17 ¿Diospaj pueblopi imata rurachun mingasha nijpica imatataj rurana canchij? Humildecuna cashpaca manaraj ari nishpami imapi ayudagrishcata yachangapaj alli tapunaraj canchij. Shinallataj Diostami mañana canchij. Chai mingashcata pajtachi tucushcata o mana pajtachi tucushcatapish allimi ricuna canchij. Por ejemplo, “¿shujtaj minishtirishca cosascunata rurangapaj tiempota, fuerzasta charishachu? o ¿congregacionpi ña ruracushca huaquin ruraicunata shujtajcunaman mingai tucunichu?” nishpami yuyana canchij. Alli yuyashca qꞌuipaca chai mushuj mingashcata mana pajtachi tucushcatachari ricushun. Humildes cashpaca ñucanchijman mingasha nishcataca manachari chasquishun.
18. a) ¿Diospaj pueblopi imata rurachun mingajpica imatataj rurana canchij? b) ¿Romanos 12:3 versopica imatataj ñucanchijman yachachin?
18 Jehová Diosca humilde shunguhuanmi paita servichun munan (Miqueas 6:8, NM). Chaimanta Diospaj pueblopi imata rurachun mingajpica Gedeón shinami Dios ñucanchijta ayudachun paita mañana canchij. Jehová Diospaj yachachishcacunatapish yuyarinami canchij. Paica Bibliahuan, publicacioncunahuan, tandanacuicunahuan, shujtaj ayudacunahuanpishmi ñucanchijman yachachin. Jehová Diosca mana jatun tucushpami ñucanchijta ayudan. Dios ayudajllapimi paita servingapaj imatapish alli rurai tucunchij. Chaitaca mana cungarinachu canchij (Salmo 18:35). Chashnallataj humilde cashpaca shujtajcunamanta yalli cashcataca mana yuyashunchu (Romanos 12:3-ta leyipai).
19. ¿Imamantataj humildes cana canchij?
19 Humildes cashpaca Jehová Dios tucuita ruraj cashcamanta, Jatun Dios cashcamantami paillata jatunyachishun (Apocalipsis 4:11). Humildes cashpami Dios paipaj pueblopi imata rurachun mingajpipish cushilla rurashun. Chashnallataj huauqui panicunapaj yuyaicunata respetashpaca tandallami causashun. Ashtahuanpish llaquipi ama urmangapajca manaraj imata rurashpami alli yuyashun. Jehová Diosca humilde gentecunataca cꞌuyanmi. Chaimantami Diosta servijcunaca humildes cana canchij. Pero ¿humildes cana sinchi laya ricurijpica imatataj rurana canchij? Chaitaca catij yachaipimi ricushun.
