1. ¿Jehová Diosca ñucanchijtaca ima layataj rurashca?

JEHOVÁ DIOSCA ñucanchijtaca sumajtami rurashca. Chaimantami problemacunata charishpaca alli yuyashpa allichi tucunchij. Shamuj punllacunapipish imata ruranataca alli yuyashpami agllai tucunchij (Proverbios 2:11). Shinallataj Diosca imata yuyashcataca ñucanchij pajtachi tucuchunmi rurashca (Filipenses 2:13). Ashtahuanpish ñucanchijcuna ima alli cashcata, ima mana alli cashcataca shungupi sintichunmi rurashca. Chaimantami juchata ruranamanta caruyanchij. Pandarishpapish ama chaillatataj rurangapaj imata ruranatami yachanchij (Romanos 2:15).

2. ¿Jehová Diosca imatataj rurachun nin?

² Jehová Diosca ñucanchijta cꞌuyashcamanta, alli causachun munashcamantami imatapish alli yuyashpa rurachun nin. Eclesiastés 9:10-pica: “Imata ruranatapish cambaj maquipi  tiyacujtaca fuerza tiyashcahuan rurailla” ninmi. Chashnallataj Diospaj Shimipica: ‘Ima ruranata charishpaca tucuicunapaj allita rurashunchij. Tucuicunami Diosmantaca chꞌican chꞌican rurai tucunata chasquircanchij. Chai rurai tucunahuanca caishuj chaishujpaj allita rurashunchij’ ninmi (Gálatas 6:10; 1 Pedro 4:10). Cai versocunapi ricushca shinaca Jehová Diosca shujtajcunapaj ñucanchijpajpish allita rurachun ninmi.

3. ¿Imatataj mana rurai tucunchij?

³ Jehová Diosca ñucanchijcuna mana tucuita rurai tucushcataca yachanmi. Por ejemplo, juchatapish huañuitapish mana chingachi tucunchijchu (1 Reyes 8:46). Shinallataj shujtajcunapaj randi imatapish mana agllai tucunchijchu, paicuna ima shina causanata mana ni tucunchijchu. Cada unomi imatapish agllai tucun. Chashnallataj mashnata yachashpapish mashnata causashpapish Diospaj yuyaica ñucanchijpaj yuyaimanta ashtahuan yallimi (Isaías 55:9).

4. ¿Cai yachaipica imatataj yachashun?

⁴ Jehová Dios alli ñanta pushachunmi saquina canchij. Chashnallataj ñucanchij imata mana rurai tucujpica pai ayudanatami crina canchij. Chashna jahuapish Jehová Diosca problemacunata ima shina allichinata, shujtajcunata ima shina ayudanata yuyachunmi munan. Bibliapica: ‘Jehová Diospi shunguta churashpa, imatapish allita rurai, cambaj rurashcacunahuan paita cazushcata ricuchi’ ninmi (Salmo 37:3, NM). Cai versopi nishca shinaca Diospi shunguta churashpami allita rurashpa causana canchij. Ñucanchij rurashcacunahuanpish paita cazushcatami ricuchina canchij. Chaita rurangapajca Noemanta, Davidmanta, shujtaj  alli servijcunamantapish yachashun. Paicunaca Diospimi tucui shunguta churarcacuna. Chashnallataj huaquinpica mana tucuita rurai tucushpapish imacunata rurai tucushcatami yachashun.

5. ¿Noé causacun punllacunaca ima shinataj carca?

⁵ Noé causacun punllacunapica gentecunaca huainayashpa macanacushpami causarcacuna (Génesis 6:4, 9-13). Paica chai millai gentecunata Jehová Dios shuj punlla tucuchina cashcataca yacharcami. Pero chai punlla chayangacama gentecuna ima shina causacujta ricushpaca Noeca llaquirishcangami. Noeca huaquin cosascunata mana rurai tucushcata yachashpapish shujtaj cosascunata rurai tucushcata yacharcami.

6, 7. a) ¿Imacunatataj Noeca mana rurai tucurca? b) ¿Imamantataj Noepaj punllacunapi laya canchij?

⁶ ¿Imacunatataj Noeca mana rurai tucurca? Noeca Dios imata ruragrishcatami gentecunaman huillarca. Pero gentecuna uyachunca paica mana obligai tucurcachu. Chashnallataj yacu juillu pai munashca punlla chayamuchunpish mana agllai tucurcachu. Ashtahuanpish Jehová Dios pai agllashca punllapi millai gentecunata tucuchinataj cashcatami tucui shunguhuan crina carca (Génesis 6:17).

⁷ Ñucanchijpish millai gentecunapaj chaupipimi causacunchij. Chai millai gentecunata Dios tucuchinatami yachanchij (1 Juan 2:17). Pero gentecuna ‘alli huillaicunata’ uyachunca mana obligai tucunchijchu. ‘Jatun llaqui punlla’ ima hora chayamunatapish mana agllai tucunchijchu (Mateo 24:14, 21).  Noé shinami ñucanchijpish Dios millai gentecunata tucuchinataj cashcata tucui shunguhuan crina canchij. Chai punlla shamunata, mana uniyanatapish crinami canchij (Salmo 37:10, 11; Habacuc 2:3).

8. ¿Imacunatataj Noeca rurai tucurca? (Página 3-pi tiyaj dibujota ricui).

⁸ ¿Imacunatataj Noeca rurai tucurca? Noeca pai mana rurai tucushcata yuyarishpa llaquiricunapaj randica imata rurai tucushcatami rurarca. Por ejemplo, Noeca Diospi crishcamantami millaicunataca Diosca ñallami tucuchigrin nishpa huillarca (2 Pedro 2:5). Chaita rurashpami Dios cusha nishcacunata crishpa catirca. Shinallataj Dios mandashca shinami arcatapish rurarca (Hebreos 11:7-ta leyipai).

9. ¿Noé shina imatataj rurana canchij?

⁹ Ñucanchijpish Noé shinami ‘Jehová Diospajta rurashpa’ causanchij (1 Corintios 15:58, NM). Por ejemplo, huaquincunaca Tandanacuna Huasicunata, Jatun Tandanacuna Huasicunatapish shayachishpa, allichishpami ayudancuna. Shujtajcunaca Betel Huasicunapi, Traducina Huasicunapimi ayudancuna. Pero tucuimanta yallica Diospaj Shimita huillashpami purinchij. Chashnami Dios cusha nishcacunata tucui shunguhuan crishpa causanchij. Shuj panica cashnami nin: “Shujtaj gentecunaman Dios cusha nishcacunamanta parlajpica, paicunaca ñucanchij problemacunaca nunca mana tucuringachu nincunami. Pero paicuna chashna nijpipish shuj punlla ñucanchij problemacuna tucurinataj cashcata yachanchijmi. Huillanaman rishpaca ashtahuanmi Dios cusha nishcacunata crinchij. Shinami huiñai causaiman apaj ñanpi callpacuj shina Diosta servishpa causanchij” ninmi (1 Corintios 9:24).

10. ¿Davidca imatataj rurarca?

¹⁰ Rey Davidca Diospimi tucui shunguta churarca. Chaimantami Diosca paita achcata cꞌuyarca (Hechos 13:22). Chashnapish Davidca Betsabé (Bat-seba) huarmihuanmi juchapi urmarca. Chai huarmipaj cusaca Urías shutimi carca. Davidca shuj cartata quillcashpa, chai cartata Joab runaman cuchunmi Urías runallahuantaj cacharca. Chai cartapica Davidca: ‘Uriastaca ashtahuan sinchita macanacuna puntapi churashpa huañuchun saquinami canguichij’ nishcami carca. Chashnami Uriasca macanacuipi huañurca (2 Samuel 11:1-21). Pero qꞌuipa punllacunaca Davidca paipaj juchacunataca mana pacai tucurcachu (Marcos 4:22). Chaipica ¿imatashi Davidca rurashca canga?

11, 12. a) ¿Davidca juchapi urmashca jahuaca imatataj mana rurai tucurca? b) ¿Ñucanchij arrepentirijpica Diosca imatataj ruranga?

¹¹ ¿Imatataj Davidca mana rurai tucurca? Davidca juchapi urmashcamantaca huaquin llaquicunata apashpami causarca. Chai llaquicunamanta quishpiringapajca mana imata rurai tucurcachu (2 Samuel 12:10-12, 14). Pero Davidca tucui shunguhuanmi arrepentirirca. Arrepentirishca qꞌuipaca Jehová Dios paita perdonaj cashcata,  paipaj llaquicunatapish ahuantanapaj ayudana cashcatami crina carca.

¹² Juchayujcuna cashcamantaca huaquinpica jatun juchacunapimi urmanchij. Chaimantachari llaquicunata apashun. Ashtahuanpish chai llaquicunamantaca manachari quishpirishun (Gálatas 6:7). Diosca juchacunamanta arrepentirijpica llaquicunata ahuantachunmi ayudasha nin. Chaimantami Dios ñucanchijta ayudanata tucui shunguhuan crinchij (Isaías 1:18, 19; Hechos 3:19-ta leyipai).

13. ¿Dioshuan alli cangapajca Davidca imatataj rurarca?

¹³ ¿Imatataj Davidca rurai tucurca? Davidca Dioshuanmi alli casha nirca. Chaimantami Dios paita ayudachun saquirca. Por ejemplo, profeta Natán cunajpica paica uyarcami (2 Samuel 12:13). Davidca paipaj juchacunataca Diosmanmi huillarca. Chashnami Dioshuan alli casha nishcata ricuchirca (Salmo 51:1-17). Paica juchata rurashcamanta yallitaj culparinapaj randica imata pandarishcatami ña mana tigra rurarca. Achca huatacuna qꞌuipaca Diosta alli servishpami Davidca huañurca. Diosca paitaca alli runa cashca shinami cunancama yuyarin (Hebreos 11:32-34).

14. ¿David shina imatataj rurana canchij?

¹⁴ David shina juchata rurashpaca shungumanta arrepentirinami canchij. Chai qꞌuipaca ñucanchij juchacunata Diosman huillashpami perdonahuai nishpa paita mañana canchij (1 Juan 1:9). Ancianocunahuanpish parlanami canchij. Paicunaca cutin Dioshuan alli tucuchunmi ayudai tucun (Santiago 5:14-16-ta leyipai). Diosca juchacunamanta arrepintirijpica perdonasha ninmi. Chaimantami pai ñucanchijta ayudachun saquina canchij. Chashnami pai perdonaj cashcata tucui shunguhuan crishcata ricuchinchij. Imapi pandarishpaca chaillatataj mana tigra ruranachu canchij. Ashtahuanpish Yaya Diospi shunguta churashpami paita servishpa causana canchij (Hebreos 12:12, 13).

15. ¿Ana huarmimantaca imatataj yachanchij?

¹⁵ Shujtaj cꞌaricunapish huarmicunapish Diospimi tucui shunguta churarcacuna. Pero paicunapish llaquicunata charircacunami. Chashna jahuapish paicuna imata rurai tucushcataca rurarcacunami. Anamanta parlashun. Anaca huahuacunata mana chari pudircachu. Chashnapish Yaya Diosca ñucata ayudanga nishpami paipi tucui shunguta churarca. Chaimantami Anaca Diosta adorangapaj Diospaj huasiman purij carca. Chaipica pai ima shina sintirishcata Yaya Diosmanmi huillaj carca (1 Samuel 1:9-11). ¿Anamantaca imatataj yachanchij? Ñucanchijpish ungüita o shujtaj problemacunatachari charinchij. Chai problemacunataca manachari allichi tucunchij. Chashna causacushpaca ñucanchijta llaquij Yaya Diosmanmi problemacunata mingana canchij (1 Pedro 5:6, 7). Chashnallataj tandanacuiman, jatun tandanacuicunaman rishpa, Broadcasting programata ricushpami Jehová ñucanchijta ayudachun saquishcata ricuchinchij (Hebreos 10:24, 25).

16. ¿Samuelmantaca yaya mamacunaca imatataj yachai tucun?

 ¹⁶ Cunanca Samuelmantami parlashun. Samuelca paipaj huahuacuna jatunyajpica Diosta servichunca mana obligai tucurcachu (1 Samuel 8:1-3). Chashna cajpipish Samuelca paipaj llaquicunataca Diospaj maquipimi mingarca. Diosmanta ama caruyangapajpish tucui pai rurai tucushcatami rurarca (Proverbios 27:11). Cunan punllacunapish huaquin yaya mamacuna Diosta tucui shunguhuan servijpipish paicunapaj huahuacunaca Diosmanta caruyashcacunami. Chashna cajpipish Jesús chingarishca churimanta parlashca shina, Jehová juchacunamanta arrepentirijcunataca perdonaj cashcatami crincuna (Lucas 15:20). Ashtahuanpish Diosta servij yaya mamacunaca Diosta tucui shunguhuan cazungapajmi esforzarincuna. Chashnami paicunapaj huahuacuna Jehová Diosta cutin servichun ayudangacuna.

17. ¿Jesús parlashca huajcha huarmimantaca imatataj yachai tucunchij?

¹⁷ Shuj huajcha viudamantapish yachashun. Paica Jesús causashca punllacunapimi causarca (Lucas 21:1-4-ta leyipai). Cai huarmica huaquin gentecuna Diospaj huasipi mana allicunata ama rurachunca mana jarcai tucurcachu. Shinallataj ama pobrella causangapajpish mana imata rurai tucurcachu (Mateo 21:12, 13). Cashna jahuapish pai tucui charishca ishqui uchilla cullquitami Diospaj huasipi churarca. Chashnami Diosllataj paiman tucui ima minishtishcata cunata crirca. Chai huajcha huarmica Yaya Diospi tucui shunguta churashcatami ricuchirca. Ñucanchijpish cai huajcha huarmi shinami Yaya Diosta servishpa causajpica paillataj tucui ima minishtishcata cunata crinchij. Chashnami Diospi tucui shunguta churashcata ricuchinchij (Mateo 6:33).

18. ¿Malcolm shuti huauquimantaca imatataj yachanchij?

¹⁸ Cunan tiempopish achca huauqui panicunaca Diospimi shunguta churancuna. Paicunaca imata mana rurai tucushcata yuyaricunapaj randica imata rurai tucushcatami rurancuna. Malcolm shuti huauquimanta parlashun. Paica paipaj huarmindijmi Diosta servicushpa llaqui causaitapish alli causaitapish charircacuna. Cai huauquica cashnami nirca: “Maipica imata tucunata mana yachanchijchu, problemacunapish ricurinllami. Pero Jehová Diospi tucui shunguta churajpica paica ñucanchijta bendicianmi. Chaimanta Yaya Diosta ashtahuan servishpa causangapajca paita ayudahuai nishpami mañana canchij. Imata mana rurai tucushcata yuyaricunapaj randica imata rurai tucushcata rurashunchij” nircami. Huauqui Malcolmca 2015 huatapimi Diosta alli servishpa huañurca  * (urapi tiyaj notata ricui).

19. a) ¿Imamantataj ‘alli cazuj, alli yuyaiyuj servij’ nishca huauquicunaca cai huatapajca Salmo 37:3-ta agllashcacuna? b) ¿Salmo 37:3-taca ima shinataj ñucanchij causaipi pajtachi tucunchij?

¹⁹ Llaqui punllacunapi causacushcamantami problemacunaca ricurishpa catinga (2 Timoteo 3:1, 13). Pero chai problemacunamantaca mana yallitaj sustarinachu canchij. Ashtahuanpish Yaya Diospi shunguta churashpa, ñucanchij imata rurai tucushcata rurashunchij. Chaimanta cai huatapajca Salmo 37 verso 3-tami agllashcanchij. Chaipica: ‘Jehová Diospi shunguta churashpa imatapish allita rurai’ ninmi.