1-3. a) ¿Judá llajtamanta profetaca imatataj rurarca? b) ¿Diosta mana cazushcamantaca Judá llajtamanta profetaca imataj tucurca? (Jahuapi tiyaj dibujota ricui).

ISRAEL LLAJTAMANTA mandaj Jeroboamca (Jeroboán) Betel llajtapi panda dioscunata adorangapajmi shuj altarta rurarca. Chaimantami Jehová Diosca Judá llajtamanta shuj profetata pai ima nishcata huillachun Jeroboampajman cacharca. Diospaj profetaca humilde cashcamantami Dios nishcata huillarca. Chai profetaca Jeroboamtaca sinchitami rimarca. Chaita uyashpaca mandaj Jeroboamca achcatami pꞌiñarirca. Pero Jehová Diosca paipaj profeta ama ima tucuchunmi cuidarca (1 Reyes 13:1-10).

² Jehová Diosca chai profetataca: ‘Israel llajtapica ama imata micungui, ama imata uyangui, cambaj huasiman tigrangapajca shujtaj ñanta ringui’ nircami. Ña huasiman tigracushpaca chai profetaca shuj yuyajlla runahuanmi tupanacurca. Chai yuyaj runaca llullashpami cashna nirca: “Mandaj Dios cachajpi shuj ángel shamushpami ñucataca, ‘chai runataca cambaj huasiman pushamushpa micunatapish carai, yacutapish ubyachi’ nishpa mandarca” nircami. Chashna nijpica Yaya Diosta mana cazushpami chai profetaca yuyaj runahuan  rirca. Chaita ricushpaca Jehová Diosca pꞌiñarircami. Chai profeta paipaj huasiman tigracujpica shuj leonmi paita huañuchirca (1 Reyes 13:11-24).

³ Chai profeta Diosta cazunapaj randi imamanta chai yuyaj runata cazushcataca Bibliaca mana huillanchu. Chashnapish Jehová ‘Dioshuan purishpa’ humilde cashcataca mana ricuchircachu (Miqueas 6:8-ta leyipai *). Bibliapica ‘Dioshuan purina’ nishpaca paipi shunguta churana, pai ñucanchijta pushachun saquina, paita cazuna cashcatami nin. Humilde runaca Diosta cutin cutin mañana cashcatami yachan. Judá llajtamanta profeta humilde cashpaca Dios nishcacunata alli entendichichunmi Diosllatataj tapunman carca. Huaquinpica ñucanchijpish sinchi decisioncunatami agllana canchij. Chaipajca Jehová Dios imata rurachun nishcata manachari alli yachanchij. Pero humildes cashpaca imapi ama pandaringapaj Dios ñucanchijta ayudachunmi paita mañana canchij.

4. ¿Cai yachaipica imatataj ricushun?

⁴ Ñaupa yachaipica humilde cana ima nisha nishcata, imamanta humilde cana cashcatami yacharcanchij. Pero ¿ashtahuan humilde cangapajca imatataj rurai tucunchij? Shinallataj ¿humildes cashcata o mana humildes cashcataca ima shinataj yachai tucunchij? Chaitaca cai yachaipimi ricushun (Proverbios 11:2).

5, 6. ¿Humilde cashcataca Barzilaica ima shinataj ricuchirca?

⁵ Diospaj pueblo ucupi shujtaj ruraicunata rurachun mingajpi o ñucanchij causaipi cambiocuna tiyajpica, humilde cashcata o mana humilde cashcatami ricuchi tucunchij. Barzilai runapaj causaimanta yachashun. Paica Davidta llaquij, cazuj runami carca. Barzilai 80 huatacunata charijpica rey Davidca: ‘Ñuca huasipi causanaman jaculla’ nircami. Barzilaica Davidpaj huasipi causana sumaj cashcata yacharcami. Pero rey Davidtaca: ‘Ñucapaj randi Quimam (Kimham) runata cambaj huasipi causanaman pushapailla’ nircami. Quimam runaca Barzilaipaj churimi cashcanga (2 Samuel 19:31-37).

⁶ ¿Barzilaica Davidpaj huasipi imatapish mana rurasha nishcamantachu mana risha nirca? o ¿tranquilo causaita charisha nishcamantachu mana risha nirca? Paica humilde runami carca. Yuyajlla cashcamanta ña mana tanto rurai tucushcatami yacharca. Chaimantami Davidhuan causanaman mana risha nirca. Ñucanchijpish Barzilai shinami humildes cana canchij. Bibliapica cashnami nin: “Cancuna ima shina causacushcataca, tucuicuna alli yuyarichij. Chashna tucui imapish cancunapaj causaipi alli cajpica, pi shujtaj ima shina cashcata ama ricushpa, quiquin ima shina rurashcallahuan cushi caichijlla. Tucuicunami paicuna ima shina causashca shinallataj chasquingacuna” nin (Gálatas 6:4, 5, QC, 1989). Ñucanchijca ashtahuan ruraicunata mingachun munashcallamanta o rijsishca canata munashcallamantaca Diostaca mana servisha ninchijchu. Shinallataj shujtajcunahuan mana comparashun ninchijchu. Chaipaj randica Diostami tucui shunguhuan servishun ninchij (Gálatas 5:26). Humildes cashpaca huauquicunahuan panicunahuan tandalla cashpami Jehová Diosta jatunyachishun, shujtajcunatapish ayudashun (1 Corintios 10:31).

7, 8. ¿Humilde cashpaca imatataj rurana canchij?

⁷ Ashtahuan ruraicunata chasquishpaca humilde canaca sinchichari ricuringa. Chashna cajpica Nehemiastami yuyarina canchij. Jerusalén llajtapi gentecuna problemacunata charishcata  yachaj yachashpaca Nehemiasca paicunata ayudachunmi Jehová Diosta mañarca (Nehemías 1:4, 11). Diosca Nehemías mañashcataca cutichircami. Chaimanta Rey Artajerjesca Jerusalenpi Nehemiasta mandaj cachunmi churarca. Nehemiasca mandaj cashpapish, charij runa cashpapish mana paillapichu shunguta churarca. Paica Diospaj leycunatami siempre leyij carca. Dios paita ayudachunmi saquij carca (Nehemías 8:1, 8, 9). Nehemías mandaj cashpapish mana paillapajchu imatapish mashcaj carca. Shinallataj Jerusalenpi causajcunataca nunca mana llaquichircachu (Nehemías 5:14-19).

⁸ Ashtahuan ruraicunata chasquishpa o shujtaj ruraicunata mingajpica Nehemías shinami humildes cana canchij. Imata alli rurajcuna cashpapish, experienciata charishpapish humilde cashpaca mana ñucanchijllapi shunguta churashunchu. Pero mana cuidarishpaca ñucanchijllapi shunguta churai callarishun. Por ejemplo, ¿can anciano cashpaca Diosta mana mañashpachu congregacionpi ruraicunata allichingui? o ¿ñucanchij decisioncunata agllashca qꞌuipachu Dios ñucanchijta ayudachun mañanchij? Huaquin cosascunata ña achca cutin rurashca cashpapish humildes cashpaca mana ñucanchijllapi shunguta churashunchu. Chashnallataj imata ruranata alli yachashpapish Jehová ñucanchijta yalli alli rurai tucushcataca manataj cungarinachu canchij (Proverbios 3:5, 6-ta leyipai). Cunan tiempopica achca gentecunaca mitsacunami can. Paicunaca shujtajcunata yallimi casha nincuna. Shinapish Diosta servijcunaca mana chashna canchijchu. Ñucanchijman imata rurachun mingajpipish huauquicunata panicunata o familiacunata yalli cashcataca mana yuyanachu canchij. Ashtahuanpish tandallami paicunahuan trabajanchij (1 Timoteo 3:15).

9, 10. ¿Shujtajcuna ñucanchijmanta mana allita rimajpica imatataj rurashun?

⁹ Shujtajcuna ñucanchijmanta mana allita rimajpica achcatami llaquirinchij. Ana huarmita yuyarishun. Paipaj cusaca Anataca achcatami cꞌuyarca. Pero Anaca huahuacunata mana chari pudishcamantami achcata llaquirirca. Ashtahuanpish paipaj cusapaj caishuj huarmica paitaca burlarishpami chanzata ruraj carca. Shuj punllaca Anaca llaquilla cashcamantami Diospaj huasiman rishpa Diosta mañarca. Diosta mañashpa Ana huacacujta Elí runa ricushpaca machaj cashcata yuyashpami paita rimarca. Ana pꞌiñarinapaj randica respetohuanmi Eliman ima tucushcata huillarca. Qꞌuipaca Anaca mañashpami Diosta cꞌuyashcata, paipi tucui shunguta churashcata ricuchirca (1 Samuel 1:5-7, 12-16; 2:1-10).

¹⁰ Humildecuna cashpaca allita rurashpami millai ruraicunataca mishashun (Romanos 12:21). Satanás cai mundota mandacushcamantami mana alli gentecuna tiyan. Chaimanta ñucanchijta mana alli rimajpipish ama yallitaj pꞌiñaringapajmi esforzarina canchij (Salmo 37:1). Huauqui panicunahuan problemacunata charishpacarin llaquillami sintirinchijman. Chashna sintirishpaca Jesustami yuyarina canchij. Bibliapica contracuna Jesusta ajajpica paica mana chashnallataj tigrachircachu ninmi. Chaipaj randica “tucui imatapish cashcata ricuchij Diospaj maquipimi mingarca” (1 Pedro 2:23). Jesusca humildemi carca. Chaimanta gentecuna mana alli tratajpi Jehovallataj ricunatami tucui shunguhuan crirca (Romanos 12:19). Ñucanchijpish humildesmi cana canchij. Maijanpish ñucanchijta llaquichijpipish mana chashnallataj ruranachu canchij (1 Pedro 3:8, 9).

11, 12. a) ¿Shujtajcuna ñucanchijta jatunyachijpi humildes cashpaca imatataj rurashun? b) ¿Humildes cashpaca ima shinataj churarishun? c) ¿Humildes cashpaca ima shinataj cashun?

 ¹¹ Shujtajcuna allitami rurashcangui nishpa yallitaj alabajpi, humilde canaca sinchichari ricuringa. Ester huarmita yuyarishun. Paica Persia llajtapimi causarca. Sumaj huarmimi carca. Rey Asueropajman richunca Estertapish shujtaj huarmicunatapish shuj huatatami mishqui jambijcunahuan sumajyachirca. Chai qꞌuipaca reyca Estertami reina cachun agllarca. Esterca paita alli tratajpipish mana paillapi yuyajchu carca. Ashtahuanpish humilde, alli huarmi cashpami catirca (Ester 2:9, 12, 15, 17).

¹² Humildes cashpaca mana maipish cachun churarishunchu, allicunami cashun. Chashnami ñucanchijllatataj, shujtajcunatapish respetashcata ricuchishun. Chashnallataj jatun tucushpa ñucanchij rurashcata shujtajcuna ricuchunlla munanapaj randica mana pꞌiñarij, alli shungumi cana canchij (1 Pedro 3:3, 4-ta leyipai; Jeremías 9:23, 24). Ñucanchij rurashcacunahuan rimashcacunahuanmi jatun tucushca cashcata o humildes cashcata ricuchinchij. Por ejemplo, ¿imata yachashcamanta, imata rurashcamanta o ima laya gentecunata rijsishcamantachu ñucanchij importante cashcata shujtajcuna yuyachun munanchij? Huaquinpica shujtajcuna ñucanchijta ayudajpipish ñucanchijllami rurarcanchij nishpami jatun tucunchij. Chashna cashpaca Jesustami yuyarina canchij. Paica yachaisapa cashcamanta shujtajcuna paita jatunyachichunmi munanman carca. Pero mana chaita rurarcachu. Ashtahuanpish Jesusca Diospaj Shimita yachachishpami gentecuna Jehová Diosllata jatunyachichun munaj carca (Juan 8:28).

13, 14. ¿Humildes cashpaca ima shinataj decidishun?

¹³ Imata decidishpapish o shujtajcuna imata decidijpipish humildes cashcatami ricuchina canchij. Apóstol Pablota yuyarishun. Pabloca Jehová Dios mingashcata pajtachinapaj Jerusalén llajtaman tigracushpaca Cesarea llajtapimi asha punllacunata saquirirca. Chaipimi shuj profetaca: ‘Jerusalenman rijpica contracunaca cantaca japingami’ nircami. Jerusalenpica Pablotaca huañuchinmanmi carcacuna. Chaimantami huauquicunaca ama richun nircacuna. Paicuna chashna nijpipish Pabloca Jerusalenman rircami. ¿Paillapi confiashcamantachu Pabloca rirca? Mana. Paica Jehová Diospi tucui shunguta churaj, humilde runami carca. Cesareamanta huauquicunapish humildes cashcamantami Pablo richun saquircalla (Hechos 21:10-14).

¹⁴ Shamuj punllapi ima tucunata mana yachanchijchu. Pero humildes cashpaca imatapish allimi decidishun. Por ejemplo, ashtahuanchari Diosta servinata yuyacunchij. Mana cashpaca ñucanchij yaya mamacuna ungujpi ayudachun minishtijpi imatashi rurashun nishpachari yuyanchij. Shinallataj ungüi japijpi o yuyajyashpaca ima shinataj cuidarisha nishpachari yuyanchij. Caicunamanta sustarishpa Diosta mañashpapish shamuj punllapi chai llaquicunata ima shina allichinataca mana tucuita yachai tucunchijchu (Eclesiastés 8:16, 17). Pero ¿humildes cashpaca imatataj rurana canchij? Yaya Diospimi confiana canchij, mana tucuita rurai tucushcatapish yuyarinami canchij. Chashnallataj chai llaquita ima shina allichinata alli yuyarinami canchij, shujtajcuna ñucanchijman consejota cuchunpish mañanami canchij. Ashtahuantajca Diostami ayudahuai nishpa mañana canchij. Chai huashaca Diospaj espíritu santo ñucanchijta ayudachunmi saquina canchij (Eclesiastés 11:4-6-ta leyipai). Jehová Diosca ñucanchij decidishcata bendiciai tucunmi o shujtaj decisionta japichunmi ayudai tucun (Proverbios 16:3, 9).

15. ¿Ama jatun tucungapajca imamantataj Diosta yuyarina canchij?

¹⁵ ¿Ashtahuan humildes cangapajca imatataj rurai tucunchij? Chuscu yuyaicunata ricushun. Jehová Dios ima shina cashcatami yuyarina canchij. Pai tucuita yachaj, Jatun Dios cashcata yuyarishpaca ñucanchijca imata mana yachashcatami entendinchij (Isaías 8:13). Ñucanchijca mana shujtaj gentecunata o angelcunatachu servinchij. Ashtahuanpish Yaya Diostami servinchij. ‘Tucuita rurai tucuj Diospaj maquipi cashcata’ yuyarishpaca mana jatun tucushunchu (1 Pedro 5:6).

16. ¿Imamantataj Jehová ñucanchijta cꞌuyashcata yuyarina canchij?

¹⁶ Ama jatun tucungapajca Jehová Dios ñucanchijta achcata cꞌuyashcatami yuyarina canchij. Apóstol Pabloca congregacionpi huauquicuna panicunaca cuerpopaj partecuna shinami can nircami. Diosca ñucanchij cuerpopi cada partecuna imata rurana cashcatami huillarca (1 Corintios 12:23, 24). Jehová Diospajca cada unomi valishca canchij. Diosca paita servichun ñucanchij rurashcataca shujtajcunapaj rurashcahuan mana comparanchu. Pandarijpipish ñucanchijmantaca mana caruyanchu. Caita yachashpaca ¿manachu cushilla sintirinchij?

17. ¿Imamantataj shujtajcuna imata alli rurashcallata ricuna canchij?

¹⁷ Ama jatun tucungapajca Dios shinami shujtajcuna imata alli rurashcallata ricuna canchij. Shujtajcuna ñucanchij rurashcallata ricuchunca mana munanchijchu. Chashnallataj paicuna imata rurana cashcata nishpallaca mana purinachu canchij. Chaipaj randica consejocunata cuchunmi shujtajcunata mañana canchij, paicuna nishcataca allimi uyana canchij (Proverbios 13:10). Shinallataj shuj huauquiman o paniman imata rurachun mingajpica cushillami cana canchij. Ñucanchij huauquicunahuan panicunahuan tandalla paita servichun saquishcamantaca Diosta pagui ninami canchij (1 Pedro 5:9).

18. ¿Ima alli cashcata ima mana alli cashcata yachangapajca imatataj rurana canchij?

¹⁸ Ama jatun tucungapajca ima alli cashcata, ima mana alli cashcatami alli yachana canchij. Chaipajca Bibliapi nishcacunatami cazuna canchij. Chashnami Jehová ima shina cashcata, imata yuyashcatapish yachashun. Jehová Dios yuyashca shina ñucanchijpish yuyashpaca alli decisioncunatami agllashun. Chashnami Diospaj ñaupajpi alli ricurishun. Diospaj mandashcacunata estudiashpa, paita mañashpa, ima estudiashcatapish pajtachishpaca ima alli cashcata ima mana alli cashcataca allimi yachashun. Chashnallataj ñucanchijllapi yuyanapaj randica shujtajcunapimi yuyashun (1 Timoteo 1:5). Caita rurajpica Diosca ‘alli crijcuna cachun, ama jatun tucuchunmi ayudasha’ nin (1 Pedro 5:10, QC, 1989).

19. ¿Cunanpish shamuj punllacunapish humildes cangapajca imatataj rurana canchij?

¹⁹ Punta parrafocunapi parlashca Judá llajtamanta profetata yuyarishun. Paica mana humilde cashcamantami Diospaj ñaupajpi mana alli ricurirca, huañurcapish. Pero shujtaj alli cꞌaricuna huarmicunapish Yaya Diosta tucui shunguhuanmi servircacuna. Humildes cana sinchi laya ricurijpica paicunapaj ejemplota yuyarinami canchij. Chashnami mana jatun tucushun. Achca huatacunata Diosta servicushpaca ashtahuanmi paipi shunguta churana canchij (Proverbios 8:13). Ima problemacunata charishpapish Dioshuan puricushca shinami paita servishpa causana canchij. Diosta servishcamantaca cushillami sintirinchij. Chaimanta cai yachaipi imata yachashcata cazushunchij. Chashnami humildes cashun, Jehová Diostapish huiñai huiñaicamami servishun.