1, 2. a) ¿Diosca imatataj ñucanchijman huillashca? b) ¿Isaías 46:10, 11; 55:11-pica imatataj nin?

BIBLIAPICA “Imapish manaraj tiyajpimi Taita Diosca jahua pachatapish, cai pachatapish rurarca” ninmi (Génesis 1:1, QC, 1989). Diospaj rurashcacunamantaca ashallatami yachanchij. Por ejemplo, jahua pachapi tucui imalla tiyashcacunamanta ashallatami yachanchij (Eclesiastés 3:11). Jehová Diosca cai Allpata imapaj rurashcata, gentecuna ima shina causachun munashcatami huillashca. Diosca gentecunata rurashpaca pai layatami rurarca. Paica gentecuna cai Allpapi cushilla causachunmi munarca (Génesis 1:26). Gentecunapish Diospaj huahuacunami canman carca, Diospish paipaj Yayami canman carca.

² Génesis capítulo 3-pica shuj problema tiyashcamanta Diospaj munai mana pajtarishcatami huillan (Génesis 3:1-7). Pero Jehová Diosca ima problematapish allichi pudinmi. Paipaj munaita pajtachichunca ni pi mana jarcai  tucunchu (Isaías 46:10, 11; 55:11, QC, 1989). Diospaj munai pai rurasha nishca punllapi pajtarinataca tucui shunguhuanmi crina canchij.

3. a) ¿Bibliata alli entendingapajca ima yachaicunatataj yachana cashcanchij? b) ¿Cai yachaipica imamantataj cai yachaicunamanta parlagrinchij? c) ¿Ima tapuicunamantataj yachashun?

³ Bibliata yachai callarishpaca Jehová Dios cai Allpatapish ñucanchijtapish imapaj rurashcatami yachashca cashun. Shinallataj Diospaj munai pajtarichun Jesús imata rurashcatami yachashca cashun. Cai yachaicuna minishtirishca cashcamantaca ¿manachu shujtaj gentecunamanpish yachachisha ninchij? Cai punllacunapi Jesús huañushcata yuyaringapaj invitacushcamantaca caicunamantami yachachi pudinchij (Lucas 22:19, 20). Gentecuna Jesús huañushcata yuyaringapaj tandanacuiman shamushpaca Diospaj munai maijan cashcata ashtahuanmi yachangacuna. Paicuna chai tandanacuiman shamuchun ima tapuicunata ruranatami alli yuyarina canchij. Cai yachaipica cai quimsa tapuicunamantami yachashun: 1) ¿Jehová Diosca cai Allpatapish, gentecunatapish imapajtaj rurarca? 2) ¿Diospaj munaica imamantataj mana pajtarirca? 3) ¿Diospaj munai pajtarichunca Jesusca imamantataj huañuna carca?

4. ¿Dios rurashcacunaca ima shinataj pai ‘tucuita rurai tucuj cashcata huillan’?

⁴ Yaya Diosca tucuita alli, yallitaj sumajtami rurashca (Génesis 1:31; Jeremías 10:12). Ñucanchij alli causachun munashcamantami Jehová Diosca tucuita sumajta, mana maipish cachun rurashca. Chashnallataj Jehová Diosca paipaj rurashcacunata ricushpa cushilla sintirichunmi ñucanchijtaca rurashca. Por ejemplo, ñucanchij cuerpo ucu ima shina cajta yachashpa, cunanlla huacharishca huahuata ricushpa, Inti ima shina huashicujta ricushpaca ¿manachu cushilla sintirinchij? (Salmo 19:1; 104:24-ta leyipai).

5. ¿Jehová Diosca imalla tiyashcacunataca ima shinataj rurashca?

⁵ ¿Jehová Diosca imalla tiyashcacunataca ima shinataj rurashca? Jahua pachapi tiyashcacunatapish cai Allpapi tiyashcacunatapish mana maipish cachun rurashcachu. Gentecunamanpish leycunatami cushca (Salmo 19:7-9). Cashna rurashcamantami tucui ordenpi can. Por ejemplo, Jehová Diosca cai mundopi yacucuna ama maitapish richun, huairapish cai Allpallapi saquirichunmi rurashca. Yaya Dios cashna mana rurashca cajpica cai Allpapi causaica mana tiyanmanchu. Caita yachashpami Jehová Diosca Allpatapish, gentecunatapish mana yangamanta rurashcata yachanchij. Chaimantami Diosmanta huillacushpaca pai tucuita rurashcata yachachina canchij (Apocalipsis 4:11).

6, 7. ¿Adán Evataca Diosca ima shinataj rurarca?

⁶ Yaya Diosca tucui gentecuna cai Allpapi huiñaita causachunmi munarca (Génesis 1:28; Salmo 37:29). ¿Jehová Dios alli cashcamantaca Adán Evataca ima shinataj rurarca? (Santiago 1:17-ta leyipai). Ima ruranata paicunallataj agllachun, alli yuyachun, cꞌuyaita ricuchichun, amigocunatapish charichunmi rurarca. Diosca  Adanhuan parlashpami paita ima shina cazunata yachachirca. Shinallataj paillataj ima shina cuidarinata, Allpatapish, animalcunatapish ima shina cuidanatami yachachirca (Génesis 2:15-17, 19, 20). Diosca Adán Evataca paicuna ricuchun, munachun, uyachun, mutquichun, imatapish japishpa sintichunmi rurarca. Chashnami paraisopica cushilla causai pudircacuna. Diosca paicunamanca alhaja trabajocunatapishmi curca. Chashnallataj Adán Evaca achca mushuj cosascunatapish yachashpami catina carca.

⁷ Jehová Diosca Adán Evataca jucha illaj huahuacunata charichunmi rurarca. Paicunapaj huahuacunapish cai mundopi mirarishpa jundarichunmi Taita Diosca munarca. Paica Adán Evata cꞌuyashca shinami, yaya mamacunapish paicunapaj huahuacunata cꞌuyachun munarca. Adanman Evamanca cai Allpatapish, caipi tucui ima tiyashcacunatapishmi curca. Paicunaca cai Allpapimi huiñaita causana carca (Salmo 115:16).

8. ¿Jehová Diosca imamantataj Génesis 2:16, 17-pi tiyaj leyta Adán Evaman curca?

⁸ Diospaj munaica chai ratoca mana pajtarircachu. ¿Imamantataj mana pajtarirca? Jehová Diosca tucuita paicuna munashca shina mana rurana cashcata yachachunmi Adán Evamanca shuj leyta curca. Diosca cashnami nirca: “Cai huertapi tiyaj tucui yuracunapi pꞌucushcacunataca micunguilla. Ashtahuanpish huerta chaupipi tiyaj yuraca allita mana allita yachaj chayachijmi. Chai yuramantaca ama micungui. Chai yuramanta micushpaca, chai punllallatajmi huañungui” nircami (Génesis 2:16, 17). Chai leyta entendinaca jahuallami carca. Ashtahuanpish Edén huertapica achca micunacunami tiyarca. Chaimantami chai leyta cazunaca mana sinchi carca.

9, 10. a) ¿Diabloca imatataj Diosmanta nirca? b) ¿Adán Evaca pitataj cazurcacuna? (Página 3-pi tiyaj dibujota ricui).

⁹ Jehová Diosta ama cazuchunca Diabloca shuj culebrata rimachishpami Evata pandachirca (Génesis 3:1-5-ta leyipai; Apocalipsis 12:9). Tucui yuracunamanta ama micungui nishpaca Diosca mana allita rurashcatami Diabloca ricuchisha nirca. Diabloca ‘¿cancunapaj munaita manachu Diosca rurachun saquin?’ nicuj layami carca. Qꞌuipaca llullashpami Evamanca: “Cancunaca mana huañunguichijchu” nirca. Shinallataj Diosta cazunata mana minishtirishca cashcata yuyachunmi, Diabloca: ‘Chai yuramanta micushpaca cancunapaj ñahuicuna pascarinataca Diosca yachanmi’ nirca. Chashna nishpaca, ‘cancuna ashtahuan yachaj tucunataca Diosca yachanmi. Chaimantami ama micunguichij nishpa mandarca’ nicuj layami carca. Ashtahuanpish Diabloca llullashpami: ‘Chai yuramanta micushpaca Taita Dios shina allitapish, mana allitapish yachaj tucunguichijmi’ nirca.

¹⁰ Diosta cazunata o culebrata cazunatami Adán Evaca agllana carca. Pero Diosta mana cazunatami paicunaca agllarcacuna. Jehová Dios paicunapaj Yaya cachunpish mana munashcatami  ricuchircacuna. Chashnami Diablopaj lado tucurcacuna. Chai punllamantami paicunataca Yaya Diosca ña mana cuidarca (Génesis 3:6-13).

11. ¿Adán Eva juchata rurashcamanta Jehová Dios mana imata rurashca cajpica imataj tucunman carca?

¹¹ Adán Evaca Diosta mana cazushcamantami juchayujcuna tucurca. Diosca millaitaca pꞌiñanmi. Bibliapica: ‘Diosca jucha illaj cashcamantami millaitaca manataj ricunayachin’ ninmi. Chaimantami paicunaca Diospaj enemigocuna tucurca (Habacuc 1:13). Adán Eva juchata rurashcamanta Jehová Dios mana imata rurashca cajpica jahua pachapi causajcunapish cai Allpapi causajcunapish paicunapura mana tranquilo, tandalla causanmanchu carca. Shinallataj angelcunapish gentecunapish Yaya Dios nishcacunata crinachu canchij nishpami yuyarinman carca. Pero Jehová Diosca paillataj churashca leycunataca mana shujtajyachinchu (Salmo 119:142). Adán Eva paicunallataj imatapish decidi tucushpapish Diosta mana cazushcamantaca llaquicunata charinami carca. Achca huatacuna qꞌuipaca huañurcacunami. ‘Ñutu allpallamantataj cashcamantaca ñutu allpallatajmi tucurcacuna’ (Génesis 3:19).

12. ¿Adán Evapaj huahuacunaca imataj tucurca?

¹² Ama micuchun nishca yuramanta Adán Eva micushcamantaca Diosca paipaj familiapurapi cachun ña mana saquircachu. Chaimantami Edén huertamanta paicunata llujshichishpa cacharca. Chaiman cutin tigrachunpish ña mana saquircachu (Génesis 3:23, 24). Diosca paita mana cazushcamantaca Adán Eva llaquicunata apachunmi saquirca (Deuteronomio 32:4, 5-ta leyipai). Paicunaca Jehová Dios shina tucuipi llaquij canata, cꞌuyaj canata ña mana ricuchi tucurcacunachu. Adanpish paipaj huahuacunapish ña mana huiñaita causai pudircacunachu. Ashtahuanpish paipaj culpamantami paicunapaj huahuacunaca juchayuj tucushpa huañuna carca (Romanos 5:12). Adanpish Evapish jucha illaj huahuacunata mana chari pudircacunachu. Paicunapaj huahua huahuacunapish juchayujmi huacharina carca. Adanta Evata Diosmanta caruyachishca punllamantapachami Diabloca tucui gentecunata Diosmanta caruyachisha nicun (Juan 8:44).

13. ¿Adán Eva paimanta caruyashca cajpipish Diosca imatataj mana munarca?

¹³ Adanpish Evapish paimanta caruyashca cajpipish Jehová Diosca gentecunata cꞌuyashpami catirca. Diosca gentecuna paimanta caruyashpa huañuchunca mana munarcachu (2 Pedro 3:9, NM).  Gentecuna paipajman cꞌuchuyachunca imata ruranatami Jehová Diosca chai ratollataj ricurca. Paillataj churashca leycunata mana huashaman saquishpa imata rurashcata ricushun.

14. a) ¿Juan 3:16-pi nishca shinaca juchamanta huañuimanta quishpichingapajca Diosca imatataj rurarca? b) ¿Ima tapuitataj gentecunaman yachachi tucunchij?

¹⁴ Jesús huañushcata yuyaringapaj invitacujpica maijancunaca Juan 3:16-tami (leyipai) ña yachancuna. Pero ¿Jesús huañushcamantaca imamantataj huiñai causaita chari tucunchij? Cai tapuitami gentecunaman yachachi tucunchij. Chaipajca Jesús huañushcata yuyarina tandanacuiman invitacushpa, ña chai tandanacuipi cashpa, o chai tandanacui qꞌuipa paicunata visitashpami, yachachi tucunchij. Paicuna Jesús imamanta huañushcata alli entendishpaca Jehová Dios tucuita yachaj cashcata, ñucanchijta cꞌuyashcatapishmi ricungacuna. ¿Jesús huañushcamanta paicunahuan parlanacushpa imallatataj yachachi tucunchij?

15. ¿Jucha illaj runa cashpaca Jesusca imatataj rurarca?

¹⁵ Ñucanchijta quishpichingapajca Diosca jucha illaj runatami curca. Chai jucha illaj runaca Diostami tucuipi cazuna carca. Shinallataj tucui shungumantami gentecunamanta huañuna carca (Romanos 5:17-19). Chaipajca Jehová Diosca paipaj punta Churi Jesustami agllarca. Paipaj Churitami jahua pachamanta cai Allpaman cacharca (Juan 1:14). Chashnami Adán shina Jesusca jucha illaj runa tucurca. Jesusca jucha  illaj gentecunaman Dios cushca leycunatami cazurca. Chai leycunataca Adanca mana cazurcachu. Cutin Jesusca sinchi llaquicunata charishpapish Diospaj mandashcacunataca siempremi cazurca.

16. ¿Imamantataj Jesucristoca huañuna carca?

¹⁶ Jesús paipaj jucha illaj causaita cushcamantami juchamanta huañuimanta ñucanchijta quishpichirca. Adán mana rurashcatami Jesusca rurarca. Paica tucuipimi Diosta cazurca (1 Timoteo 2:6, NM). Jesús huañushcamantami cꞌaricunapish, huarmicunapish, huahuacunapish huiñai causaita chari tucunchij (Mateo 20:28). Ña ricushca shinaca Diospaj munai pajtarichunca Jesusca huañunami carca (2 Corintios 1:19, 20).

17. ¿Jesús huañushcamanta imatataj chari pudishun?

¹⁷ Diosca ñucanchijta achcata cꞌuyashcamantami paipaj cꞌuyashca Churita ñucanchijmanta huañuchun cacharca (1 Pedro 1:19; 1 Juan 4:9, 10). Jesús huañushcamantami Adanpaj randi ñucanchij yaya shina tucurca (1 Corintios 15:45). Shinallataj huiñai causaita chari pudishun, Diospaj familiapurapipishmi cutin cai tucushun. Jesús huañushcamantami shamuj punllacunapica jucha illaj cashun. Jehová Diospish paipaj leycunata mana huashaman saquishpami cutin paipaj familiapurapi cachun ñucanchijta chasquinga. Diosta cazushpa jucha illaj canata yachashpaca ¿manachu cushilla sintirinchij? Jahua pachapipish cai Allpapipish causajcunaca shujlla familiami cashun. Tucuicunami Diospaj huahuacuna cashun (Romanos 8:21).

18. ¿Diosca ima horataj “tucuipi tucuicunata mandanga”?

¹⁸ Ñucanchij punta yaya mamacuna Diosta mana cazushca cajpipish Diosca gentecunata cꞌuyashpami catirca. Chaimantami ñucanchijmanta huañuchun paipaj Churita cacharca. Juchayujcuna cajpipish Diabloca Diosmanta caruyachunca mana obligai tucunchu. Jesús huañushcamantami Jehová Diosca ñucanchijtaca cashcata rurajcuna cachun ayudanga. Tucuicuna Jesusta rijsishcamanta, paipi crishcamanta huiñai causaita charishpaca ¿manachu cushilla sintirishun? (Juan 6:40). Ñucanchijta cꞌuyaj Jehová Diosca paipaj munaitaca pajtachingatajmi. Gentecuna jucha illaj tucuchunpishmi Diosca ayudanga. Chashnami “Diosca tucuipi, tucuicunata mandanga” (1 Corintios 15:28).

19. a) ¿Jesucristo huañushcamantaca ima shinataj pagui nishcata ricuchinchij? ( “Alli shungu cajcunata mashcashunchij” nishca cuadrota ricui) b) ¿Catij yachaipica imatataj yachashun?

¹⁹ Jesús huañushcataca shujtajcunaman huillanami canchij. Chashnami paipaj Churita cushcamanta Diosta pagui nishcata ricuchishun. Dios ñucanchijta cꞌuyashpa paipaj shujlla Churita cushcamanta huiñai causaita chari tucushcataca tucuicunami yachana can. Shinapish Jesús huañushcamantaca mana huiñai causaillatachu charishun. Ashtahuanpish Jesuspaj huañuica Edén huertapi Diablo nishcacuna llulla cashcatami ricuchirca. Shamuj yachaipica caimantami ashtahuan yachashun.