1. ¿Jesús huañushcamantaca ima bendicioncunatataj charishun?

JESÚS huañushcamanta achca bendicioncunatami charishun. Por ejemplo, shuj punllaca Adanpaj huahua huahuacunaca Diospaj familiapurapimi cai tucushun (“Alli entendishunchij” nishca cuadrota ricui). Shinallataj Jesús huañushcamantami Diosta cazujcunaca huiñaita cushilla causashun. Pero ¿Jesús huañushcamantaca jahua pachapipish cai Allpapipish imataj ashtahuan tucuna carca? (Hebreos 1:8, 9).

2. a) ¿Jesusca Yaya Diosta ima shina mañanata yachachicushpaca imallatataj nirca? (Jahuapi tiyaj dibujota ricui). b) ¿Cai yachaipica imatataj ricushun?

² Jesús huañuna punlla ishqui huatacuna illajpimi Jesusca paipaj catijcunaman ima shina mañana cashcata yachachirca. Paica, ‘Diospaj shuti alli nishca cachun, Diospaj Mandana o Gobierno shamuchun, Diospaj munai jahua pachapipish cai pachapipish pajtarichun nishpa mañanguichij’ nircami (Mateo 6:9, 10). Cai yachaipica Jesuspaj huañui Diospaj shuti alli nishca cachun ayudashcata, Diospaj Mandana tiyachun ima shina ayudashcatami ricushun. Shinallataj Jesús huañushcamanta Diospaj munai pajtarichun ayudashcatapishmi ricushun.

3. a) ¿Diospaj shutica imatataj yachachin? b) ¿Imata nishpataj Diabloca Diospaj shutita pingaipi churarca?

³ Jesusca Diospaj shuti alli nishca cachun nishpami mañarca. Chaita mañashpaca Diospaj shuti jucha illaj o mapa illaj cashcamanta respetana cashcatami entendichisha nirca. Diospaj shutica Dios ima laya cashcatami ricuchin. Paillami tucuimanta yalli poderta charin. Cashcata ruraj Diospish can. Jesusca Jehová Diostaca ‘Jucha illaj Yayami’ nircami (Juan 17:11). Jehová Dios jucha illaj cashcamantami imata rurashpapish allita ruran. Paipaj leycunapish mana pandarinchu. Edén huertapica Diabloca, gentecunamanca Diosca leycunata mana churanachu can nircami. Chashna llullacunata nishpami Diospaj shutita pingaipi churarca (Génesis 3:1-5).

4. ¿Jesusca ima shinataj Diospaj shutita jatunyachirca?

⁴ Jesusca mana Diablo shinachu carca. Paica Diostaca tucui shunguhuanmi cꞌuyarca. Chaimantami Diospaj shuti alli nishca cachun tucuita alli rurarca (Juan 17:25, 26, NM). Jesusca Diosmanta yachachishpa, allita rurashpami Diospaj shutita jatunyachirca. Shinami Diospaj leycuna alli cashcata, Dios imata mañashpaca ñucanchijllapajtaj alli cashcata ricuchirca (Salmo 40:8-10-ta leyipai). Huañuna horascama manchanaita Diablo llaquichijpipish Jesusca siempremi Diosta cazurca. Paica jucha illaj gentecunaman cushca leycunata tucuipi cazunalla cashcatami ricuchirca.

5. ¿Diospaj shutitaca ima shinataj jatunyachinchij?

⁵ Ñucanchij rurashcacunahuanmi Diosta cꞌuyashcata paipaj shutita jatunyachishcata ricuchinchij. Diosca jucha illaj cachunmi munan (1 Pedro 1:15, 16-ta leyipai). Chaimantami Diosllata adorana canchij. Tucui shunguhuanmi paipaj mandashcacunata cazuna canchij. Ñucanchijta llaquichijpipish Jehová Dios mandashca shinami causana canchij. Chashna causashpaca paipaj shutitami jatunyachinchij (Mateo 5:14-16). Chashnallataj Dios cushca leycunaca alli cashcata, Diablopish llulla cashcatapishmi ricuchinchij. Juchayuj cashcamantaca pandarishunmi. Pero pandarishpaca arrepentirinami canchij. Diospaj shutipish ama pingaipi saquirichunmi mana allita ruranataca saquina canchij (Salmo 79:9).

6. ¿Juchayujcuna cajpipish imamantataj Diosca cashcata rurajcuna shina ñucanchijta chasquin?

⁶ Ungidocuna cashpapish o ‘shujtaj ovejacuna’ cashpapish Jesús huañushcata tucui shunguhuan crijpica Jehová Diosca ñucanchij juchacunatami perdonan. Diosca paillata servijcunataca alli ñahuihuanmi ricun. Diosca cashcata rurajcunami canguichij nishpami ungidocunataca paipaj huahuacunata shina chasquin. Shinallataj “shujtaj ovejacunatapish” cashcata rurajcunami canguichij nishpami paipaj amigocunata shina chasquin (Juan 10:16; Romanos 5:1, 2; Santiago 2:21-25). Jesús huañushcamantami cunan punllapish Diospaj ñaupajpi alli ricuri tucunchij, paipaj shutitapish jatunyachi tucunchij.

7. ¿Jesús huañushcamanta Diospaj Mandana ucupica ima bendicioncunataj tiyanga?

⁷ Jesusca ‘Cambaj Mandana shamuchun nishpami Diosta mañana canguichij’ nirca. Jehová Diosca paipaj Mandanapi mandachunca Jesustapish 144.000 gentecunatapishmi agllashca. Jesús huañushcamantami cai agllashca gentecunaca jahua pachapi causari tucuncuna (Apocalipsis 5:9, 10; 14:1). Paicunaca mandajcuna, curacunapishmi canga. Cai 144.000 agllashcacunaca 1.000 huatacunatami Jesushuan cai Allpata mandangacuna. Jesús mandacujpimi Diosca cai Allpa shuj paraíso tucuchun, gentecunapish jucha illaj tucuchun ayudanga.  Chashnami jahua pachapi causajcunapish cai Allpapi causajcunapish shujlla familia tucunga (Apocalipsis 5:13; 20:6). Jesusca Diablota tucuchingami. Paipaj culpamanta tiyashca llaquicunatapish tucuchingami (Génesis 3:15).

8. a) Jesusca Dios churashca Mandana importante cashcata ricuchingapajca ¿imatataj rurarca? b) ¿Jesustapish ungidocunatapish ayudangapajca imatataj rurana canchij?

⁸ Jesusca paita catijcunaman Dios churashca Mandana importante cashcata ricuchingapajca ¿imatataj rurarca? Jesusca bautizarishca qꞌuipallami “Dios mandagrin alli huillaitaca” tucui ladocunapi huillarca (Lucas 4:43). Shinallataj paita catijcunamanca ‘ñucamanta cai pachapi tiyaj tucui llajtacunapi huillanguichij’ nircami (Hechos 1:6-8). Cunan punllacunapica huillanaman rijpimi gentecunaca Jesús imamanta huañushcata yachai tucun. Diosta servijcunapish cai tucuncuna. Tucui shunguhuan huillanaman llujshishpami tucui gentecuna Diosmanta yachachun Jesustapish ungidocunatapish ayudacushcata ricuchinchij (Mateo 24:14; 25:40).

9. ¿Diospaj munai pajtarinataj cashcataca imamantataj crinchij?

⁹ ‘Cambaj munai pajtarichun’ nishpaca ¿Jesusca imatataj nicurca? Jehová Diosca pai imata rurasha nishcataca pajtachintajmi (Isaías 55:11). Diablo paipaj enemigo tucujpipish Diosca paipaj munaitaca mana cambiashcachu. ¿Diospaj munaica maijantaj carca? Paica, Adán Evapaj jucha illaj huahuacuna tucui Allpapi causachunmi munarca (Génesis 1:28). Adán Eva huahuacunata mana charishpa huañushca cajpica Diospaj munaica mana pajtarinmanchu carca. Chaimantami Diosca huahuacunata charichun saquirca. Jesús huañushcamantami gentecunaca Jesuspi crishpa jucha illaj cai tucun, huiñai causaitapish chari tucun. Jehová Diosca ñucanchijtaca achcatami cꞌuyan. Chaimantami callaripi pai munashca shina causachun munan.

10. ¿Jesús huañushcamantaca huañushcacunaca imataj tucunga?

¹⁰ Achca gentecunami Diosta mana rijsishpa huañushcacuna. ¿Paicunaca imataj tucunga? Gentecuna huañuchunca Diosca mana munanchu. Chaimantami gentecunata causachinga. Jesús huañushcamantami gentecunaca causaringa. Gentecuna causarishpaca Diosmanta yachashpami huiñai causaita charinga (Hechos 24:15). Jehová Diosca causaita cuj Dios cashcamantami tucui causarishcacunapaj Yaya tucunga (Salmo 36:9). Chaimantami Jesusca Diostaca jahua pachapi caj ñucanchij Yaya nirca (Mateo 6:9). Diosmi Jesustaca huañushcacunata causachichun mingarca. Chaimantami Jesusca: “Ñucamari causachijpish, causaita cujpish cani” nirca (Juan 6:40, 44; 11:25).

11. ¿‘Yallitaj achca gentecunapajca’ Jehová Diosca imatataj munan?

¹¹ Jesusca: “Taita Dios munashcata maijanpish cazujcunami ñuca huauqui, ñuca pani, ñuca mamaca” can nircami (Marcos 3:35). Jehová Diosca tucui llajtacunamanta, familiapuramanta, chꞌican chꞌican rimaicunamanta paita servijcuna tucuchunmi munan. Bibliapica paicunaca ‘pi mana yupaipaj yallitaj achca gentecunami’ can ninmi. Paicunaca Jesús huañushcata crishpami Diosta cazusha nincuna. Shinallataj ‘¡jatun tiyarinapi tiyacuj ñucanchij Diospish, Ovejapish paicunallami quishpichin!’ nishpami Diosta alabancuna (Apocalipsis 7:9, 10).

12. ¿Mateo 6:9, 10-pi Jesús nishcacunamantaca imatataj yachanchij?

¹² Mateo 6:9, 10-pi Jesús nishcacunata yuyarishpami Jehová Dios ima shina cashcata, paipaj  munai maijan cashcatapish ricushcanchij. Cutin yuyarishun: 1) Diospaj shuti alli nishca cachunmi paipaj shutita jatunyachina canchij (Isaías 8:13). Chashnallataj Jesús huañushcamantami quishpiri tucunchij. Jesuspaj shutica “Jehová Diosca quishpichij” cashcatami ricuchin. Ashtahuanpish Jesuspaj huañuica Diospaj shuti alli nishca cachunmi ayudan. 2) Jesús mandacujpimi Jehová Diosca cazuj gentecunata bendicianga. 3) Diospaj munai pajtarichunpish ni pi mana jarcai tucunchu (Salmo 135:6; Isaías 46:9, 10).

13. ¿Imamantataj bautizarinchij?

¹³ Jesús huañushcamanta Diosta pagui nishcata ricuchingapajca paillata servisha nishpami bautizarina canchij. Chashnami Jesús huañushcata tucui shunguhuan crishcata, “Jehová Diospajlla” cashcatapish ricuchinchij (Romanos 14:8, NM). Bautizarishpaca ‘alli yuyaita’ cuhuai nishpami Diosta mañacunchij (1 Pedro 3:21). Cutin Jehová Diosca Jesús huañushcamantami ñucanchijman bendicioncunata cun. Chaimantami pai imata cusha nishcata cunataj cashcata crinchij (Romanos 8:32).

14. ¿Diosca imamantataj shujtajcunata cꞌuyachun nin?

¹⁴ Jehová Diosca imata rurashpapish cꞌuyaihuanmi ruran. Chashnallatajmi paita servijcunapish cꞌuyanacushpa causachun munan (1 Juan 4:8-11). Tucuicunata cꞌuyashpami Yaya Diospaj huahuacuna casha nishcata ricuchinchij (Mateo 5:43-48). Diospaj Shimipica tucuimanta yallica Jehová Diostami cꞌuyana canguichij ninmi. Shinallataj shujtajcunatapish cꞌuyanami canguichij ninmi (Mateo 22:37-40). Diosmanta yachachishpami shujtajcunata cꞌuyashcata ricuchinchij. Huauquicunata panicunata cꞌuyashpaca Jehová Diostapish ‘ashtahuanmi’ cꞌuyashun (1 Juan 4:12, 20, QC, 1989).

15. a) ¿Cunan punllacunapi ima bendicioncunatataj chasquinchij? b) ¿Shamuj punllacunapica ima bendicioncunatataj chasquishun?

¹⁵ Jehová Dios ñucanchij ‘juchacunata pꞌichachunca’ Jesús ñucanchijmanta huañushcatami crina canchij. Paica tucui ñucanchij juchacunatami shungumanta perdonai tucun (Hechos 3:19-21-ta leyipai). Ña yachashca shinaca Jesús huañushcamantami huaquin  gentecunata jahua pachapi causachun, paipaj huahuacuna tucuchunpish Diosca agllan. Paicunataca ungidocuna nishpami rijsinchij (Romanos 8:15-17). Shinallataj Jehová Diosca ‘shujtaj ovejacunatapish’ cai Allpapi paipaj familia tucuchunmi invitan. Paicuna jucha illaj tucushca qꞌuipaca Diabloca paicunata último cutinmi umasha ninga. Diablo umasha nijpipish Diosta cazushpa catijcunaca Diospaj huahuacunami tucunga (Romanos 8:20, 21; Apocalipsis 20:7-9). Diosca siempremi paipaj huahuacunata cꞌuyanga. Ashtahuanpish Jesús huañushcamantami huiñaicama bendicioncunata chasquishpa catishun (Hebreos 9:12). Jehová Diosca paipaj Churitami ñucanchijmanta huañuchun curca. Chaica shuj valishca regalo shinami can. Chai regalotaca ni pi mana quichui tucunchu.

16. a) ¿Jesús huañushcamantaca imatataj charishun? b) ¿Diabloca imatataj ña mana rurai tucun?

¹⁶ Juchacunamanta arrepentirijpica shuj punlla Diospaj familia ucupi cachunca Diabloca mana jarcai tucungachu. Jesusca shuj “cutinllami huiñaipaj paillataj curishpa huañurca”. Chaimantami Jesusca ñucanchijmanta ña mana tigra huañungachu (Hebreos 9:24-26). Adanpaj culpamantami huañunchij. Pero Jesús huañushcamantami huiñai causaita charishun. Shinallataj Jesús huañushcamantami Diabloca ñucanchijta ña mana mandai tucun, huañuitapish ña mana manchanchijchu (Hebreos 2:14, 15).

17. ¿Diosta cꞌuyashpaca imatataj rurana canchij?

¹⁷ Diospaj nishcacuna pajtarinataca tucui shunguhuanmi crinchij. Jahua pachapipish, cai Allpapipish tucui pai rurashcacunaca mana cambianchu. Chashnallataj Jehová Dios imata nishpaca mana cambianchu. Paica siempremi pai nishcacunataca pajtachintaj (Malaquías 3:6). Jehová Diosca causaita cushca jahuapish ñucanchijta cꞌuyanmi. Diospaj Shimipica: “Dios ñucanchijta cꞌuyashcataca yachanchij, crinchij. Diosca cꞌuyajmi” can ninmi (1 Juan 4:16). Jehová imata nishpaca pajtachinmi. Chaimantami ñalla cai Allpata shuj paraisota ruranga. Chaipica tucuicunami Jehová Dios cꞌuyashca shina caishujhuan chaishujhuan cꞌuyanacushpa causashun. Jahua pachapi causajcunapish, cai Allpapi causajcunapish cashna nishpami Yaya Diosta alabangacuna: “Allimari cangui nishca canapish, sumajmari cangui nishca canapish, yachajmari cangui nishca canapish, pagui nishca canapish, alli nishca canapish, tucui imatapish jahualla rurai tucuj nishca canapish ñucanchij Diospajca huiñai huiñaita cachun. ¡Chashna cachun!” ningacuna (Apocalipsis 7:12).