1. a) ¿Diosta servijcuna Babiloniamanta llujshina cashcataca ima shinataj yachanchij? b) ¿Ima tapuicunamantataj yachashun?

ÑAUPA yachaipica Diosta servijcuna Babilonia jatun pueblopi prezu shina cashcatami yacharcanchij. Pero paicunaca mana unaita prezu shina causana carcacunachu. ¿Imamantataj chaita ninchij? Jehová Diosca paita servijcunataca panda religioncunamanta “llujshichij” nircami (Apocalipsis 18:4-ta leyipai). Chaimantami Diosta servijcunaca Babilonia jatun pueblomanta llujshina cashcata yachanchij. Paicuna Babiloniamanta ima hora llujshishcata manaraj yachashpami cai tapuicunamanta yachashun: ¿Manaraj 1914 huatapi Estudiantes de la Bibliacunaca ima shinataj Babilonia jatun pueblohuan mana chagrurisha nishcata ricuchircacuna? ¿Primera Guerra Mundialpi huillashpa catingapajca imatataj rurarcacuna? ¿Paicunapaj yuyaita cambiana cashcamantachu Babilonia jatun pueblopi prezu shina carcacuna?

2. ¿Jesusta catinchij nij tucushcacuna llullacunata yachachicushcata ricushpaca Estudiantes de la Bibliacunaca imatataj rurarcacuna?

² Manaraj Primera Guerra Mundial callarijpimi huauqui Russellpish paipaj compañerocunapish Jesusta catinchij nij tucushcacuna llullacunata yachachicushcata ricurcacuna (“Alli entendishunchij” nishca cuadrota ricui). Chaimantami paicunahuan ña mana chagrurisha nircacuna. 1879 huatapica La Torre del Vigía de  Sión revistapica cashnami nirca: “Huaquin religioncunaca Jesuspaj novia shinami canchij nincunami. Pero chai religioncunaca gobiernocunahuanmi chagrurishca can. Chaimantami Bibliapica paicunataca huainayashpa causaj huarmi shinami can nin. Chai religioncunaca Babilonia jatun pueblopaj lado tucushcatami ricuchincuna” nircami (Apocalipsis 17:1, 2-ta leyipai).

3. ¿Estudiantes de la Bibliacunaca panda religioncunahuan ña mana chagrurisha nishcataca ima shinataj ricuchircacuna? (Página 27-pi tiyaj dibujota ricui).

³ Diosta servijcuna panda religioncunahuan chagrurishpa catijpica Diospaj ñaupajpica mana alli ricurinmanchu carcacuna. Chaimantami paicunaca iglesiacunaman cartacunata cachashpa cancunahuanca ña mana catisha ninchijchu nircacuna. Huaquincunaca iglesiapi tiyaj gentecunapaj ñaupajpimi cartacunataca sinchita leyircacuna. Cartacunata mana leyichun saquijpica cada uno leyichunmi cartacunata cacharcacuna. Chashnami Estudiantes de la Bibliacunaca panda religioncunahuan ña mana chagrurisha nishcata ricuchircacuna. Paicuna ñaupa huatacuna huashaman chashna rurashca cajpica paicunataca huañuchinmanmi carcacuna. Pero 1870 huatapica achca gobiernocunaca panda religioncunataca ña mana ayudacurcacunachu. Chaimantami gentecunaca mana manchashpa Bibliamanta parlai tucurcacuna. Iglesiapaj yachachishcacunatapish ña mana catisha nishcatami huillai tucurcacuna.

4. ¿Primera Guerra Mundialpica Estudiantes de la Bibliacunaca gentecuna imata yachachuntaj munarcacuna?

⁴ Estudiantes de la Bibliacunaca paicunapaj ñaupa religionpi cajcunaman, familiacunaman, amigocunaman panda religionmanta caruyashcata huillashpallaca mana saquirircacunachu. Paicunaca panda religioncuna huainayaj huarmi shina cashcata tucui gentecuna yachachunmi munarcacuna. Chaimantami Estudiantes de la Bibliacunaca diciembre de 1917 huatamanta 1918 callari huatacamaca 10 millón tratadocunata gentecunaman curcacuna. Chai tratadoca “La caída de Babilonia” nishca tematami charirca. Chai tratadohuan huillashpami panda religioncuna mana alli cashcata ricuchircacuna. Chaimantami religioncunata pushajcunaca achcata pˈiñarircacuna. Pero Estudiantes de la Bibliacunaca mana manchashpami huillashpa catircacuna. Paicunaca: “Runacunata cazunapaj randica, Taita Diostami” cazurcacuna (Hechos 5:29). Caipi yachashca shinaca Primera Guerra Mundialpica Diosta servijcunaca mana Babilonia jatun pueblopi prezu shina causai callarircacunachu. Ashtahuanpish Babilonia jatun pueblopi prezu shina cashcamantami llujshicurcacuna. Shinallataj shujtaj gentecunapish panda religionmanta llujshichunmi ayudacurcacuna.

5. ¿Primera Guerra Mundialpi Estudiantes de la Bibliacuna tucui shunguhuan huillashcataca ima shinataj yachanchij?

⁵ Primera Guerra Mundialpi Diosta servijcuna mana tucui shunguhuan huillashcamantami Diosca pˈiñarishca canga nishpami yuyarcanchij. Chaimantami Jehová Diosca paicunataca asha tiempota Babilonia jatun pueblopi prezu shina charishca canga nishpami yuyarcanchij. Pero chai tiempopi causaj huauquicuna panicunaca: “1914 huatamanta 1918 huatacamami tucui shunguhuan huillashpa catingapaj esforzarircanchij” nircacunami. Chai tiempopi Estudiantes de la Bibliacunahuan ima tucushcata yachashpaca Bibliapaj huaquin yuyaicunatami alli entendishun.

6. ¿Primera Guerra Mundialpica Estudiantes de la Bibliacunaca ima jarcaicunatataj charircacuna?

⁶ Primera Guerra Mundialpica Estudiantes de la Bibliacunaca huillashpami catircacuna. Pero  huaquin jarcaicunatami charircacuna. Paicunaca librocunallahuanmi huillashpa purijcuna carca. Chaimantami Bibliallahuan ima shina huillanataca mana yacharcacuna. Mandajcuna The Finished Mystery (El misterio terminado) nishca librohuan ama huillanguichij nijpica huaquincunapajca sinchimi carca. Shinallataj 1918 huatapica gripe españolami tucui gentecunata japi callarirca. Chaimantami shujtaj ladoman huillanaman rinaca paicunapajca sinchi carca. Chashna jahuapish Estudiantes de la Bibliacunaca tucui shunguhuanmi huillashpa catircacuna.

7. ¿Estudiantes de la Bibliacuna tucui shunguhuan huillashcataca ima shinataj yachanchij?

⁷ 1914 huatapica Estudiantes de la Bibliacunaca ashallami tiyarca. Paicunaca “Foto-Drama de la Creación” nishca peliculatami ricuchircacuna. Chai tiempopica chashna laya peliculacunaca mana tiyarcachu. Chai peliculapica fotocunatami ricuchij carca, gentecuna parlashcapishmi uyarij carca. Shinallataj chai peliculapica Adán causai callarishcamanta, jahua pachapi Jesús mandanata tucuchingacamami ricuchirca. Cai peliculataca 1914 huatapimi 9 millón yalli gentecuna punta cutin ricurcacuna. Chai peliculata ricujcunaca cunan tiempopi tiyaj testigocunamanta ashtahuan yallimi carcacuna. Estados Unidos llajtapica 1916 huatapimi 809 mil yalli gentecuna tandanacuicunaman rircacuna. Cutin 1918 huatapica, casi 950 mil gentecunami tandanacuicunaman rircacuna. Estudiantes de la Bibliacunaca tucui shunguhuanmi Diospaj Shimita huillarcacuna.

8. ¿Ñaupajman pushaj huauquicunaca Diosta servijcunataca ima shinataj ayudarcacuna?

⁸ Chai tiempopi jatun macanacui tiyajpipish ñaupajman pushaj huauquicunaca publicacioncunata huauquicunaman panicunaman cungapajmi esforzarircacuna. Shinallataj paicunataca achcatami animarcacuna. Chashna ayudashcamantami huauquicuna panicunaca huillashpa catircacuna. Chai tiempopica huauqui Richard H. Barberca tucui shunguhuanmi Diosta servirca. Paica cashnami nirca:  “Superintendentecuna congregacioncunata visitachun, The Watch Tower (La Atalaya) nishca revista tiyashpa catichunpishmi ayudarcanchij. Canadá llajtapi mandajcuna chai revistata mana charinachu canguichij nijpipish cachanataca manataj saquircanchijchu. Huaquin huauquicuna panicuna charishca El misterio terminado nishca librotami quichushcacuna carca. Chaimantami shujtaj mushuj librocunata cutin cacharcanchij. Shinallataj huauqui Rutherfordca Estados Unidospimi chˈican chˈican llajtacunapi jatun tandanacuicunata rurachun nirca. Diosta servijcunata animachunmi huauquicunata conferenciacunata cunaman cachachun mingarca” nircami.

9. a) ¿Estudiantes de la Bibliacunaca imamantataj paicunapaj yuyaita cambiana carca? b) ¿Imatataj paicunamantaca mana yuyana canchij?

⁹ ¿Imamantataj Estudiantes de la Bibliacunaca paicunapaj yuyaita cambiana carca? Paicunaca gobiernocunata ima shina cazuna cashcataca manaraj alli entendircacunachu (Romanos 13:1). Chaimantami huaquinpica gobiernocunata ayudajcuna carca. 30 de mayo de 1918 huatapica Estados Unidos llajtapaj presidenteca macanacuicuna ama tiyachun, tranquilo causai tiyachun mañaichij nircami. Chaimantami La Atalaya nishca revistapica Diosta servijcunataca cancunapish mañanami canguichij nircami. Shinallataj huaquin huauqui panicunaca cullquita cushpami guerracuna tiyachun ayudarcacuna. Shujtajcunaca chai guerrapi macanacunamanmi rircacuna. Chai tiempopi Estudiantes de la Bibliacunaca paicunapaj yuyaitami cambiana carcacuna. Pero ¿imatataj paicunamantaca mana yuyana canchij? Paicunapaj yuyaita cambiana cashcamanta Babiloniapi prezu shina cashcataca mana yuyanachu canchij. Ashtahuanpish paicunaca Primera Guerra Mundialpica ñami panda religioncunamanta caruyacurcacuna (Lucas 12:47, 48-ta leyipai).

10. ¿Huaquincunaca guerraman rishpapish imatataj mana rurarcacuna?

¹⁰ Estudiantes de la Bibliacunaca gobiernocunata ima shina cazuna cashcataca manaraj alli entendircacunachu. Pero shujtajcunata mana huañuchina cashcataca allimi yacharcacuna. Chaimanta huaquin huauquicunaca guerraman rishpa armacunata apashpa purishpapish gentecunataca mana huañuchircacunachu. Gentecunata mana huañuchisha nishcamantaca paicunataca enemigocuna huañuchichunmi saquircacuna.

11. ¿Diosta servijcunata llaquichingapajca leycunata churajcunaca imatataj rurasha nircacuna?

¹¹ Huauquicuna panicuna Diosta cazushcamantaca Diabloca pˈiñarircami. Chaimantami gobiernocunaman yuyachirca leycunata churashpa Diosta servijcunata llaquichichun (Salmo 94:20). Shuj soldadoca huauqui Rutherfordmanpish paipaj compañeromanpish cashnami nirca: “Leycunata churaj gentecunaca guerraman mana risha nij Estudiantes de la Bibliacunata huañuchingapajmi shuj leyta churasha nircacuna. Pero Estados Unidospaj presidente mana munashcamantami chai leyta mana churarcacuna. Cashna cajpipish cancunataca llaquichishuntajmi” nircami.

12, 13. a) ¿Imamantataj huauqui Rutherfordtapish shujtaj 7 huauquicunatapish achca huatacunata carcelpi churasha nircacuna? b) ¿Carcelpi cashpapish Diosta tucui shunguhuan cazushcataca ima shinataj yachanchij?

¹² Chai tiempopica huauqui Rutherfordca shujtaj 7 huauquicunahuanmi Estudiantes de la Bibliacunata ñaupajman pushajcuna carca. Autoridadcunaca paicunata llaquichisha nishpami juiciopi churarca. Juezca Estudiantes de la Bibliacunataca: “Cancunaca soldadocunatapish yalli millaicunami canguichij. Gobiernotapish, soldacunatapish, iglesiapi pushajcunatapish  cˈamishcanguichijmi” nircami. Chaimantami autoridadcunaca chai 8 huauquicunataca Atlanta llajtapi carcelpi churarca. Paicunaca chaipi achca huatacunata saquirichunmi munarcacuna. Pero Primera Guerra Mundial tucurijpica paicuna mana culpata charishcata ricushpami autoridadcunaca carcelmanta llujshichirca.

¹³ Carcelpi cashpapish cai 8 huauquicunaca Diostami tucui shunguhuan cazurcacuna. ¿Chaitaca ima shinataj yachanchij? Paicunaca Estados Unidos presidenteman shuj cartata cachashpami carcelmanta llujshichichun mañarcacuna. Paicunaca chai cartapica: “Bibliapica shujtajcunata huañuchichunca mana mandanchu. Diosta mana cazujpica paipaj ñaupajpimi mana alli ricurishun. Diosca ñucanchijta chingachingami. Chaimantami ñucanchijca shujtajcunataca mana huañuchi tucunchij” nircacuna. Chashna rurashpaca cai 8 huauquicunaca mana manchashcatami ricuchircacuna. Jehová Diostapish tucui shunguhuan cazushcatami ricuchircacuna.

14. ¿1914 huatamanta 1919 huatacamaca Malaquías parlashca shimicunaca ima shinataj pajtarirca?

¹⁴ (Malaquías 3:1-3-ta leyipai). Cai versocunapica 1914 huatamanta 1919 huata callaricama Estudiantes de la Bibliacunahuan ima tucushcatami parlan. Jehová Diospish, Jesuspish ‘levitacuna’ ima shina cashcata ricunamanmi ‘shamurcacuna’. Cai levitacunaca ungidocunatami ricuchin. Jehová paicunapaj yuyaita cambiachun ayudashca qˈuipaca ungidocunamanca shujtaj trabajota rurachunmi mingarca. 1919 huatapica Jesusca “alli cazuj, alli yuyaiyuj servij” nishpami huaquin huauquicunata shutichirca. Jesusca paicunatami Diosta servijcunaman yachachichun, ñaupajman pushachun mingarca (Mateo 24:45). Diosta servijcunaca Babiloniapaj maquimantaca ñami llujshircacuna. Chai punllamantami Diospaj munaimanta ashtahuan yachai tucushcanchij, Diostapish ashtahuan cˈuyai tucushcanchij. Dios chashna bendiciashcamantaca paitami pagui ninchij ^[1](urapi tiyaj notata ricui).

15. ¿Babilonia jatun pueblomanta llujshishcamantaca ima shinataj pagui nishcata ricuchinchij?

¹⁵ Babilonia jatun pueblopaj maquimanta llujshishcamantaca achcatami cushicunchij. Satanasca ñucanchij Diosta servishpa catichunca mana jarcai tucushcachu. Jehová Dios Babiloniapaj maquimanta ñucanchijta imamanta cacharishcataca mana cungarinachu canchij (2 Corintios 6:1). Jehová Diosca tucui gentecuna quishpirichunmi munan. Pero panda religioncunaca achca gentecunatami paicunapaj maquipi charicuncuna. Chai gentecunatami panda religionmanta llujshichun ayudana canchij. Cai yachaipi estudiashca Diosta servijcunapaj ejemplota catishpami ayudai tucushun.