1, 2. a) ¿Elifazpish Bildadpish Diosta servinamantaca imatataj nircacuna? b) ¿Diosca cai quimsa runacunataca imatataj nirca?

JOBCA Diosta alli servij runami carca. Shuj punllaca quimsa runacunami paihuan parlanacunaman rirca. Chai runacunaca Elifaz, Bildad, Zofar shuticunami carca. Elifazca Jobtaca cashnami tapurca: ‘¿Runaca, yachaj cashpapish Taita Diospajca ima allita ruranchu? ¿Cashcata rurajmi cani, allita rurajmi cani nishcallamantachu, Diosca canpi cushicunga? ¿Chaimanta ima allita japingachu?’ nircami (Job 22:1-3). Elifazca ñucanchij rurashcacuna Diospajca mana valishcatami yuyarca. Chaimantami chashna tapurca. Cutin Bildadca Jobtaca ‘Diosca ni pita alli cashcata shina ricunchu’ nircami (Job 25:4-ta leyipai).

² Elifazpish Bildadpish Jobmanca Diosta servinaca yanga cashcatami crichisha nirca. Diospaj ñaupajpica polilla cꞌuru layallami canchij nircami (Job 4:19; 25:6). Chai runacunaca humildes cashca shinami ricurircacuna (Job 22:29). Ñucanchijca Diospaj ñaupajpi uchillami canchij. Shuj urcu  jahuamanta ricujpi o shuj avionpaj ventanamanta ricujpica tucui imapish uchillami ricurin. Chashna ricushpami ñucanchijca uchilla mana imapaj valishca laya ricurinchij. Pero, ¿Diosca chashnachu ñucanchijta ricun? ¿Paita ashtahuan servingapaj achca esfuerzota rurajpipish mana valishcata shinachu ricun? Mana chashnachu ricun. Chaimantami Jehová Diosca Elifazta, Bildadta Zofartapish ‘cancunaca llullacunatami nircanguichij’ nircami. Qꞌuipaca Jobtaca canca ñucata ‘alli servij’ cashcamanta cushicunimi nircami (Job 42:7, 8). Tucui gentecunami Diospaj ñaupajpica achca valishca canchij.

3. a) ¿Elihuca imatataj tapurca? b) ¿Chashna tapushpaca imatataj nisha nicurca?

³ Elifaspish Bildadpish Zofarpish Jobhuan parlanacujtami joven Elihuca uyacurca. Chai runacuna parlashca qꞌuipaca Elihuca Jobtaca cashnami tapurca: ‘Cashcata ruraj cashpapish ¿imatataj paimanca cunguiyari? ¿Mana cashpaca imatataj cambaj maquimantaca Diosca japinga?’ nircami (Job 35:7). Elihú cashna tapushpaca ¿Diospaj ñaupajpi ñucanchij ruraicuna mana valishcatachu nisha nicurca? Mana. Elihú chashna tapujpica Jehová Diosca chai quimsa runacunata shina mana rimarcachu. Shinashpaca ¿Elihuca imataj nisha nicurca? Jehová Diosca paita adorachunca ni pita mana minishtishcatami nisha nicurca. Diosca ñucanchijmanta imata mana minishtinchu, imata rurajpipish paica mana ashtahuan charij tucungachu, mana ashtahuan poderyuj tucungachu. Ashtahuanpish ñucanchij imata rurai tucungapajca Diosmi yuyaita cushca. Paica ñucanchij alli ruraicunatami ricun.

4. ¿Shujtajcunamanta allita rurajpica Diosca ima shinataj sintirin?

⁴ Ñucanchij huauquicunata panicunata cꞌuyaita ricuchijpica Diosca ricucunmi. Paicunamanta ima allicunata rurajpica Diosca paimanta chashna ruracushca layami sintirin. Proverbios 19:17-pica cashnami nin: “Maijanpish huajcha runata llaquishpa imata cushpaca, Mandaj Diosman mañachishca shinami. Chai allita rurashcamantaca, cutichishcami canga” ninmi. Shujtajcunata llaquishpa imata cujpica Diosca ricunmi. Paica tucuita ruraj Diosmi can. Chashna jahuapish, shujtajcunamanta allita rurajpica paica ñucanchijman dibiyashca shinami sintirin. Chaimantami achcata bendiciashpa pagan. Jesuspish shujtajcunapaj allita rurajpica Diosca achcata bendiciaj cashcatami yachachirca (Lucas 14:13, 14-ta leyipai).

5. ¿Ima tapuicunamantataj yachagrinchij?

⁵ Ñaupa tiempopica Diosca Isaiastaca ñucamanta huillagri nishpami mañarca (Isaías 6:8-10). Isaiasca cushicushpami: “Caipimi cani, ñucata cachahuai” nirca. Cunan punllacunapish Diosca paipaj ruraicunapi ayudachunmi mañan. Achca huauqui panicunami Isaías laya ari nishcacuna. Maipi cashpapish, imata rurashpapish, sinchi ricurijpipish Diosta tucui shunguhuan servisha nishcacunami. Pero huaquincunaca cashnami tapurishcacuna: “Jehová Dios paipaj pueblopi ayudachun saquishcamantaca achcatami agradicini. Pero ¿Jehová Diosca ñuca rurashcata valichinchu? ¿Diosca paipajta mana rurajpipish manachu paillataj  rurai tucunga?” nishpami tapurishcacuna. Cai tapuicunata cutichingapajca Barac runamanta Débora huarmimantapish ashata parlashun.

6. ¿Rey Jabinpaj soldadocunaca imamantataj jahualla mishana laya ricurirca?

⁶ Baracca soldadocunata pushaj israelitami carca. Cutin Débora huarmica profetami carca. 20 huatacunatami Canaán llajtamanta rey Jabinca israelitacunata llaquichishca carca. Rey Jabinpaj soldadocunaca yallitaj millaicunami carca. Chaimantami israelitacunaca miticushca ucumantapish llujshinata mancharcacuna. Rey Jabinca 900 macanacuna carrocunatami charirca. Pero israelitacunaca macanacungapaj alli armacunataca mana charircacunachu (Jueces 4:1-3, 13; 5:6-8) * (urapi tiyaj notata ricui).

7, 8. a) ¿Baractaca imata rurachuntaj Diosca mandarca? b) ¿Ima shinataj israelitacunaca rey Jabinpaj soldadocunata misharca? (Página 27-pi tiyaj dibujota ricui).

⁷ Rey Jabinpaj soldadocunahuan ricujpica israelitacunaca jahualla mishana layami ricurirca. Pero Jehová Diosca Débora huarmitami Baracman cashna nichun cacharca. ‘Tabor urcuman rishpa cambaj gentecunata tandachi. Neftalipaj, Zabulonpaj aillucunamanta, 10 mil cꞌaricunata canhuan richun tandachi. Ñucaca jatun mandaj Jabinpaj soldadocunata, mandaj Sisaratami Cisón jatun yacuman paipaj carrocunandij, soldadocunandij cambajman shamuchun yuyaita cugrini. Chaipimi paicunataca cambaj maquipimi churasha’ nircami (Jueces 4:4-7).

⁸ Macanacuipaj gentecunata minishticushcata tucuicunamanmi yachaj chayachishca carca. Chaimantami 10 mil cꞌaricuna Tabor urcupi tandanacurcacuna. Tandacushca qꞌuipaca chai 10 mil cꞌaricunaca Taanac shuti quingripimi Jabinpaj soldadocunahuan macanacunaman rirca (Jueces 4:14-16-ta leyipai). ¿Israel cꞌaricunataca Diosca ayudarcachu? Ari. ¿Ima shinataj ayudarca? Diosca animalta tamyachijpimi macanacuna pambaca ñapish lodoyarca. Chaimi Baracpish Israel cꞌaricunapish Haróset pambacunacama Sisaratapish, paipaj soldadocunatapish 24 kilometrocunata catishpa rirca. Harosetman manaraj chayashpaca Sisarapaj carroca lodopi pambarishpa, mana puri tucushcamantami Sísara runaca Zaananim pushtucama callpashpa rirca. Chaiman chayashpaca Jael huarmipaj carpa huasipimi pacatucurca. Sísara runaca yallitaj shaicushca cashcamantami dormishca saquirirca. Jael chaita ricushpaca manchaita ladoman saquishpami Sisarataca huañuchirca (Jueces 4:17-21). Jehová Diosmi israelitacunata mishachirca * (urapi tiyaj notata ricui).

9. ¿Jueces 5:20, 21 parlashca shimicunaca imatataj yachachin?

⁹ Jueces capítulo 4-pi parlashca macanacuimantaca capítulo 5-pimi imalla tucushcata ashtahuan parlan. Por ejemplo, Jueces 5:20, 21-pica caitami nin: ‘Jahua pachamanta luzerocunapish macanacurcami.  Luzerocunapish paicuna tiyanamantami Sisarahuan macanacurca. Cisón jatun yacu, pꞌichajtami aparca’ ninmi. Cai shimicunaca ¿israelitacunata angelcuna ayudashcatachu nicun? o ¿jahua pachamanta rumicuna tamyashcatachu nicun? Chaitaca Bibliaca mana huillanchu. Pero Jehová Diosmi minishtishca horaspi, chai pambapitaj animalta tamyachishpa israelitacunata ayudashcanga. Jueces 4:14, 15-pica quimsa cutinmi cai macanacuita Jehová Dios mishachishcata nin. Chashna tamyashcamantaca chai 900 carrocunaca pambarishpami mana puri tucurcacuna. Chai 10 mil cꞌaricunamantaca shujllapish ‘ñucanchijllamantami cai macanacuitaca misharcanchij’ mana ni tucurcacunachu.

10, 11. ¿Meroztaca imamantataj llaqui tucushca cachun nishpa cantarcacuna?

¹⁰ Cai macanacuita mishashca qꞌuipa ima tucushcata ricushun. Deborapish Baracpish Jehová Diosta alabangapajmi cashna cantarcacuna: “Mandaj Diospaj angelca: ‘Meroz llajtataca llaqui tucushca canman nichij. Chaipi causajcunataca jatunta llaquichishcataj cachun nichij. Paicunallatajmi Mandaj Diostapish paipaj soldadocunatapish mana ayudarcacuna’” nishpa cantarcacuna (Jueces 5:23).

¹¹ Merozca llaqui tucushca cachun nishcamantami cai pushtuca tucui chingarishcanga. Meroz llajtapi causajcunaca manachari Baracpaj soldadocunahuan macanacunaman risha nishcanga. Yuyarishun, 10 mil cꞌaricunami cananeocunahuan macanacunaman rircacuna. Merozpi causajcunapish macanacunaman rina cashcatami uyashcacuna canga. Shinallataj cai llajtatachari Sisarapish pasashca canga. Sísara callpashpa pasacujta ricushpaca Meroz gentecunaca paita japinachari carca. Pero japinapaj randica ricushpallami saquirishcacuna canga. Jehovata ayudanapaj randica cai gentecunaca mana imata rurarcacunachu. Imata rurashca cajpica Jehová Diosca bendicianmanmi carca. Meroz gentecunaca mana Jael huarmi shinachu carca. Jael huarmica mana manchashpami Sisarata huañuchirca (Jueces 5:24-27).

12. a) ¿Jueces 5:9, 10-pica ima ishqui laya gentecunamantataj parlan? b) ¿Imatataj cai versocunapica yachanchij?

¹² Barac runahuan rij 10 mil cꞌaricunaca macanacunaman mana rij gentecuna layaca mana carcachu. Baracpish Deborapish Israel soldadocunata pushajcuna ‘paicunapaj munaimanta macanacuiman llujshishcamantami’ felicitarca. Chai 10 mil cꞌaricunaca ‘yuraj burrocunapi purijcuna’ shina importante gentecuna laya mana yuyarcacunachu. Bibliapi nishca shinaca chai importante casha nij gentecunaca ‘alfombrapi tiyarijcunami carca, maimanpish chaquillahuan purijcunami’ carca. Chai gentecunaca paicunalla alli causanata munajcunami carca. Pero macanacunaman rij 10 mil cꞌaricunaca paicunapaj munaimantami rumi junda Tabor urcupi, Cisón quingripi macanacunaman rirca. Cutin alli causanata munaj gentecunataca ‘yuyarichij’ nishpami Baracpish Deborapish sinchita rimarcacuna. Jehová Diosta ayudai pudishpapish mana imata rurashcamantami chashna rimarcacuna (Jueces 5: 9, 10, NM). Cunan punllacunapish, “¿Diosta servingapajca imatataj ruracuni?” nishpami alli yuyarina canchij.

13. a) ¿Rubén, Dan, Aser familiacunaca ima shinataj causajcuna carca? b) ¿Zabulón, Neftalí familiacunaca ima shinataj carca?

 ¹³ Macanacuiman rij 10 mil cꞌaricunaca Jehová Dios tucuicunamanta yalli alli mandaj cashcatami ricurcacuna. Shinallataj ‘Dios mishachishcatami’ shujtajcunaman parlai tucurcacuna (Jueces 5:11). Pero Rubén, Dan y Aser familiacunaca Diosta servinapaj randica paicunapaj animalcunata atindishpalla, barcocunapi trabajashpallami causajcuna carca (Jueces 5:15-17). Cutin Zabulón y Neftalí familiacunaca huañuna cashpapish Deboratapish Baractapishmi ayudarcacuna (Jueces 5:18). ¿Imatataj caipica yachashcanchij? Jehová Dios ayudachun minishtijpica partecunaca ayudasha nircacunami, pero caishuj partecunaca mana ayudasha nircacunachu.

14. ¿Cunan punllapica ima shinataj Jehová Diosta apoyanchij?

¹⁴ Cunan punllapica Jehová Diosta ayudangapajca mana macanacunaman rinachu canchij. Mana manchashpa cushicuihuan Diosmanta yachachishpami Diosta apoyanchij. Cunancarin Diosta ashtahuan servingapajmi esforzarina canchij. Achca huauqui panicunaca chꞌican chꞌican ruraicunapimi Diospaj pueblopi servicun. Por ejemplo, achcacunaca precursorcuna, betelitacunami can. Mana cashpaca Tandanacuna Huasicunata shayachishpami ayudancuna. Cutin shujtajcunaca jovencuna cashpapish, yuyajcuna cashpapish jatun tandanacuicunapimi ayudancuna. Huaquin ancianocunacarin Comités de Enlace con los Hospitales nishcacunapi, jatun tandanacuicunatapish organizashpami ayudancuna. Maipi cashpapish imata rurashpapish paita servinata munajpica Jehová Diosca cushicunmi. Ñucanchij alli rurashcacunata manataj cungaringachu (Hebreos 6:10).

15. ¿Diosta mana tucui shunguhuan servicushcataca ima shinataj yachai tucunchij?

¹⁵ Tucuicunami Diosta ashtahuan servingapaj  imata ruracushcata ricuna canchij. Chaimanta, “¿ñuca rurana trabajotaca shujtajcuna rurachunchu saquini? ¿Diosta servinata yuyanapaj randica cosascunata charinallapichu yuyacuni?” nishpa yuyarishunchij. Chashnallataj “¿Barac shina, Débora shina, Jael shina, 10 mil cꞌaricuna shinachu mana manchashpa tucui ñuca charishcacunahuan Diosta servicuni?” nishpami yuyana canchij. Ashtahuan alli causasha nishpa cullquita ganangapaj ¿caru llajtacunaman rinata yuyacunguichu? Chaita rurasha nicushpaca: “Ñuca familiapajpish, huauqui panicunapajpish, caita rurana alli canata o mana alli canata entendichihuai” nishpa Diosta mañanami cangui * (urapi tiyaj notata ricui).

16. ¿Jehová Diosmantaca imatataj rurai tucunchij?

¹⁶ Jehová Diosca paita ayudachunmi invitan. Adán y Eva causashca punllamantami Diabloca gentecunata Diosmanta caruyachisha nishca. Pero Jehová Diosta apoyashpaca paipaj lado tucushcatami ricuchishun. Diospi tucui shunguhuan crishcamantami paita apoyasha ninchij. Chashnami Jehovata cushichinchij (Proverbios 23:15, 16). Ñucanchijcuna tucuipi cazujpica Diablo nishcacuna llulla cashcatami Diosca ricuchi tucunga (Proverbios 27:11). Tucuipi cazujpica paica allimi ricun.

17. ¿Jueces 5:31-pica qꞌuipa punllacunapica ima tucunatataj yachachin?

¹⁷ Ñallami Diosta servijcunalla cai Allpapica causanga. Chai punlla chayamuchunmi shuyacunchij. Ñucanchijpish Débora, Barac shinami sintirishun. Paicunaca: “Mandaj Dioslla, canta pꞌiñajcunaca tucuicuna chingarishca cachun. Canta cꞌuyajcunaca achijlla inti llujshicuj shina ashtahuan achijyachicuj cachun” nishpami cantarcacuna (Jueces 5:31). Cai mundopi tiyashca mana alli ruraicunata Jehová tucuchijpica Débora, Barac shinami sintirishun. Armagedón callarijpica Diosca paipaj enemigocunata tucuchingapajca gentecunapaj ayudataca mana mañangachu. Ashtahuanpish casijlla shayashpami Jehová Dios ima shina ‘quishpichijta ricushun’ (2 Crónicas 20:17). Chai punlla chayamungacamaca mana manchashpa cushicuihuan Jehová Diosta apoyashpa catishunchij.

18. ¿Diosta tucui shunguhuan servijpica shujtajcunapish imatataj rurasha ningacuna?

¹⁸ Macanacui tucurishca qꞌuipaca Deborapish Baracpish Jehová Diosllatami cantashpa alabarcacuna. Paicunaca: “Tucui israelcunapish paicunapaj munaimanta macanacuiman llujshishcamanta, Mandaj Diostaca tucuicuna alabaichij” nishpami cantarcacuna (Jueces 5:1, 2). Ñucanchijpish Dios munashca shinami servi tucunchij. Chashna rurajpica shujtajcunapish chashnallatajchari Diosta servisha ningacuna.