1. ¿Pablo nishca shinaca imamantataj cunan tiempopica caishuj chaishuj ashtahuan animanacuna canchij?

CUNAN punllacunapicarin ashtahuanmi caishuj chaishuj animanacuna canchij. ¿Imamanta? Judapi causaj Jesusta catijcunamanca apóstol Pabloca: “Cꞌuyajcuna cangapaj, allita rurangapaj caishuj chaishuj animanacunata ama cungarishunchijchu. Tandanacuicunaman rinata saquijcuna shina ama cashunchijchu, ashtahuanpish Diospaj punlla quichquiyamucushcata yachashpacarin caishuj chaishuj animanacushunchij” nircami (Hebreos 10:24, 25, NM). Jesusta catijcunaca 5 huatacuna qꞌuipami Jehová Dios Jerusalenta llaquichina punlla chayamucushcata ricui callarircacuna. Jesús huillashca señalcuna pajtari callaricushcata ricushpami Jerusalenmanta llujshishpa miticunaman rina cashcata intindircacuna (Lucas 21:20-22; Hechos 2:19, 20). Huata 70-tapimi Jehová Diospaj punllaca chayarca. Chai huatapimi romanocunaca Jerusalén llajtata tucuchircacuna.

2. ¿Imamantataj cunan punllacunapica shujtajcunata animangapaj ashtahuan preocuparina canchij?

² Ñucanchijpish Jehová Diospaj punlla ña quichquiyamucushcatami  yachanchij. Chai punllaca ‘jatun mancharina punllami’ canga (Joel 2:11). Sofonías 1:14-pi nishca shimicunapish cunan punllacunami pajtaricun. Chai versopica: “Dios jatunta llaquichina punllaca ñallamari chayamucun. Chai punllaca ñallamari pajtamucun” ninmi. Chaimantami Pablo nishcata pajtachina canchij. Paica: “Cꞌuyajcuna cangapaj, allita rurangapaj caishuj chaishuj animanacunata ama cungarishunchijchu” nircami (Hebreos 10:24). Shinashpaca ñucanchij huauqui panicuna ima shina cajta ricurayanami canchij. Chashnami paicuna animota cuchun minishticujpica utca ayudai tucushun.

3. ¿Animota cunamantaca apóstol Pabloca imatataj yachachirca? (Página 21-pi tiyaj dibujota ricui).

³ Bibliapica: “Ima llaquimanta shungu pꞌaquirijpica, ima yuyaipish chingarinmi. Shina cajpipish cꞌuyaihuan rimashca shimicunaca cushichinmari” ninmi (Proverbios 12:25). Huaquinpica llaquillami sintirinchij. Chaimantami tucuicuna cushichij shimicunahuan animachun minishtinchij. Pabloca animota cujcunapish animachunmi minishtin nishpami yachachirca. Romapi causaj Jesusta catijcunamanca: ‘Cancuna ashtahuan alli crijcuna tucuchunmi Diospaj espíritu cushcata cungapaj cancunata ricunaman shamusha nini. Ña cancunahuan cashpaca, cancunapish ñucapish chaillatataj crij cashcamanta caishuj chaishuj yuyachinacushpa cushicungapajmi chashnaca nini’ nishpami escribirca (Romanos 1:11, 12, QC, 1989). Caipi ricushca shinaca apóstol Pablopish huaquinpica paita animachunmi minishtirca (Romanos 15:30-32-ta leyipai).

4, 5. a) ¿Picunataj animota cuchun minishtincuna? b) ¿Imamantataj paicunata animana canchij?

⁴ Cunan punllapish precursorcuna, misionerocuna, superintendente de circuito huauquicuna paicunapaj huarmicunapish, traducina oficinacunapi trabajajcunapish, Betelpi trabajajcunapish felicitachun, animachunmi minishtincuna. Diosta ashtahuan sirvingapajmi paicunaca achca sacrificiocunata rurashcacuna. Shujtaj huauqui panicunapish paicuna shinallatajmi Diosta sirvishcacuna. Pero paicunapaj causaipi ima cambiocuna tiyashcamantami cunanca ña mana chashna sirvi tucuncuna. Paicunapish animota cuchunmi minishtincuna.

⁵ Bibliapica Diosta sirvijcunapuralla cazarachun nishpami yachachin. Chaita pajtachinata munashcamantami achca huauqui panicunaca manaraj cazarashcacuna. Paicunatapish animachichunmi minishtincuna (1 Corintios 7:39). Huarmicunapish paicunapaj cusacuna ‘ñuca cꞌuyashca huarmisita, canca yallitaj valishcami cangui’ nishpa animachunmi minishtincuna (Proverbios 31:28, 29, 31). Shinallataj maijancunaca Diosta ama sirvichun catirashpa llaquichijpipish o ima ungüita charishpapish Diosta sirvishpami caticuncuna. Paicunatapish animanami canchij (2 Tesalonicenses 1:3-5). Tucui shunguhuan sirvishpa catishcamantami Jehová Diospish Jesuspish chai huauqui panicunata cushichincuna (2 Tesalonicenses 2:16, 17-ta leyipai).

6. ¿Isaías 32:1, 2 nishca shinaca ancianocunaca imatataj rurana can?

⁶ (Isaías 32:1, 2-ta leyipai *). Sinchi punllacunapimi causacunchij. Chaimantami rato llaquirinchij o desanimarinchij. Jesucristoca pai churashca mandajcunahuanmi ñucanchijta animan, ñaupajman pushanpish. ¿Picunataj chai churashca mandajcunaca can? Tucui muyundij Allpapi tiyaj anciano huauquicunami can. Maijancunaca ungidocunami can. Cutin shujtajcunaca shujtaj ovejacuna nishca grupomantami  can. Cai huauqui ancianocunaca ‘cashna chashna crishpami catina canguichij’ nishpa mana mandancunachu. Chaipaj randica cushicushpami animancuna. Chashnami cushilla Diosta sirvishpa catichun, Diosmanta ama caruyachunpish ayudancuna (2 Corintios 1:24).

7, 8. ¿Sumaj shimicunahuan animashca jahuapish ancianocunaca ima shinataj animana can?

⁷ Ancianocunaca apóstol Pablo shina animashpaca allitami rurancuna. Tesalónica llajtapi causaj Jesusta catijcunamanca Pabloca: “Cancunata ñucanchij yallitaj cꞌuyashcamantaca, Taita Diospaj alli huillaillataca mana huillashun nircanchijchu. Ashtahuanpish ñucanchij causaitapishmari cushun nircanchij. Chashnami ñucanchijpajca yallitaj cꞌuyashca tucushcanguichij” nishpami escribirca (1 Tesalonicenses 2:8).

⁸ Ancianocunaca sumaj shimicunahuanmi animai tucuncuna. Pero, ¿imatataj ashtahuan rurana can? Pabloca: ‘Mana charijcunaman cunata yuyaringuichij. Imatapish cujmi, cushcata japijta yalli cushicun nishpa Mandaj Jesús nishcatapish yuyaringuichij’ nircami (Hechos 20:35). Pabloca cushichij shimicunahuan animashpapish ruraicunahuanmi animarca. Chaimantami: “Ñucapaj imalla tiyashcacunataca, cushicuihuan tucuchishallami. Cancunapaj almacunata cꞌuyashcamantaca ñucallatajpish tucurishallami” nircami (2 Corintios 12:15). Apóstol Pablo rurashca shinallatajmi ancianocunaca ruraicunahuan shujtajcunata animana can. Chashnami shungumanta shujtajcunamanta preocuparishcata ricuchincuna (1 Corintios 14:3).

9. ¿Huauqui panicuna consejota chasquishpa animarichunca ancianocunaca ima shinataj consejana can?

⁹ Huauqui panicunata sinchiyachingapajca huaquinpica ancianocunaca consejotami cuna can. Huauqui panicuna consejota chasquishpa animarichunca ancianocunaca Biblia yachachishca shinami consejana can. Jesusllatajmi ña causarishca qꞌuipaca shuj alli ejemplota curca. Paica Éfeso, Pérgamo y Tiatira pueblocunapi sirvij huauqui panicunatami consejana carca. Pero manaraj consejashpami paicunataca cꞌuyaihuan felicitarca (Apocalipsis 2:1-5, 12, 13, 18, 19). Shinallataj Laodicea pueblopi causaj huauqui panicunamanca: ‘Ñucaca, ñuca cꞌuyashcacunatami tucuicunata sinchita rimani, disciplinani. Chaimanta mana alli ruracushcamanta cutirishpa, ñucapajlla cana yuyailla cai’ nircami (Apocalipsis 3:19). Caipi ricushca shinaca Jesuspaj ejemplota catishpami ancianocunaca consejana can.

10. ¿Caishuj chaishuj sinchiyanacungapajca imatataj tucuicuna rurai tucunchij?

¹⁰ ¿Ancianocunallachu huauqui panicunata animana can? Mana. Pabloca Diosta tucui sirvijcunataca: “Cancunapaj shimimantaca, ima mapa shimicuna ama llujshichun. Ashtahuanpish uyajcuna sinchiyachun allicunallata rimaichij” nircami (Efesios 4:29). Chaimantami caishuj huauqui panicuna imata minishtishcata ricurayana canchij. Judá llajtapi causajcunamanpish “irquiyashca maquicunata, mana cuyuri tucuj cunguricunata jatarichichij. Shinallataj cojopish ñanmanta ama llujshichun, ashtahuanpish alliyachun cancunapaj huishtu ñancunata derechaichij” nircami (Hebreos 12:12, 13). Jovencunapishmi sinchiyachij shimicunahuan shujtajcunata animai tucuncuna.

11. Martaca llaquilla cashpaca ¿ima shinataj ayudata chasquirca?

¹¹ Cunanca Marta shuti panimanta parlashun * (urapi tiyaj notata ricui). Cai panica achca llaqui llaquillami carca. Paica: “Shuj punllaca Jehová Diostami ayudachun mañarcani. Chai qꞌuipallami shuj yuyajlla panihuan tupanacurcani. Paica ñucata llaquishpami cꞌuyaihuan tratarca. Ñucaca chaitami minishticurcani. Shinallataj chai panica ñuca layallataj chashna pasashcatami parlarca. Chashnami ña mana ñucalla  sintirircani” nishpami escribirca. Chai yuyajlla panica sinchiyachij shimicunahuan parlashpami Martataca achcata ayudarca.

12, 13. ¿Ima shinataj Filipenses 2:1-4-pi nishcata pajtachi tucunchij?

¹² Filipos llajtapi causaj huauqui panicunamanca Pabloca: ‘Cristomanta cushicuna, cꞌuyaihuan animachina, espiritumanta shuj yuyailla cana, ucu shungumanta cꞌuyanacuna, llaquij canapish tiyajpica, chai shinallataj cashcata yuyashpa, chai cꞌuyaillahuantaj cꞌuyanacushpa, shuj munailla, shuj shinalla yuyashpa ñucata ashtahuan cushichipaichij. Imata rurashpapish mishanacushpa yanga jatun tucunapajllaca ama ruraichijchu. Chaipaj randica, ama jatun tucushpa caishujcunaca canta yalli cashcata yuyashpa, caishuj chaishuj cꞌuyanacuichij. Quiquinpajlla alli canata ama mashcaichijchu. Ashtahuanpish caishujcunapaj alli canata mashcaichij’ nircami (Filipenses 2:1-4).

¹³ Cai versocuna ricuchishca shinaca huauqui panicunata animangapajmi imata ruranata ricurayana canchij. Shinallataj paicunapaj alli amigo tucushpami cꞌuyaita ricuchina canchij. Llaquilla cajpipish cushichinami canchij.

14. ¿Ima shinataj cushichi tucunchij?

¹⁴ Shujtajcunata Diosta rijsichun ayudanaca shuj sumaj bendicionmi can. Paicuna Diosta sirvishpa caticujta uyashpaca ¿manachu cushilla sintirinchij? Apóstol Juanca: “Ñuca huahuacuna mana llullapi nishca shina puricun nijta uyashpami, tucuimanta yalli jatunta cushicuni” nircami (3 Juan 4). Achca precursorcunaca: “Ñucahuan Bibliamanta ñaupa yachacujcuna, tucui shunguhuan Diosta sirvishpa caticujta uyashpa, maijancunacarin precursor cashcata yachashpaca achcatami contentarini” nincunami. Shuj precursor llaquilla, desanimado  cashcata ricushpaca shujtajcunata ima shina ayudashcatami yuyachi tucunchij. Chashnami paita cushichi tucunchij.

15. ¿Tucui shunguhuan Diosta sirvishpa catijcunataca ima shinataj animai tucunchij?

¹⁵ Achca superintendente huauquicunaca cashnami nin: “Maijan huauqui panicunaca paicunapaj congregacionta visitashcamantami shuj notitata escribishpa ñucanchijta agradecishcacuna. Chaita chasquishpaca ñucapish ñuca huarmipish cushillami sintirishcanchij” nincunami. Ancianocunapish, misionerocunapish, precursorcunapish, betelitacunapish tucui shunguhuan Diosta sirvishpa catishcamanta felicitajpica allimi sintiringacuna.

16. ¿Shujtajcunata animana sinchi ricurijpica imatataj rurai tucunchij?

¹⁶ “Shujtajcunahuan parlangapaj manchaita charishcamanta ñucaca mana animai tucunichu” nishpachari yuyanchij. Pero mana chashna yuyanachu canchij. Shujtajcunata animanaca mana sinchi canchu. Por ejemplo, shuj huauquita saludashpaca cushilla ñahuihuan saludangapajmi esforzari tucunchij. Mana chashnallataj tigrachijpica tal vez ima problemata charishcamantachari pihuan parlanata minishtin. Chaimantami paita alli uyashpa alli sintirichun ayudai tucunchij (Santiago 1:19).

17. ¿Shuj huauquica shuj joven huauquitaca ima shinataj animarca?

¹⁷ Cunanca shuj joven huauquimanta parlashun. Paica Henri shutimi can. Paipaj familiacuna Diosmanta caruyashcamantami llaquilla, desanimado carca. Paipaj yayaca alli anciano cashpapish Diosmantami caruyarca. Shuj superintendente huauquica Henrita animangapajca shuj cafecitota ubyanamanmi invitarca. Henri ima shina sintirishcata  parlajpica paica allimi uyarca. Superintendente huauquihuan parlashca qꞌuipaca Henrica paipaj familia Jehovaman cutin tigrachunca Diosta tucui shunguhuan sirvishpa catina cashcatami intindirca. Shinallataj Salmo 46, Sofonías 3:17 y Marcos 10:29, 30 versocunata leyishpami alli sintirirca.

18. a) ¿Rey Salomonca imatataj nirca? b) ¿Apóstol Pablopish imatataj consejarca?

¹⁸ ¿Henri huauquimantapish Marta panimantapish imatataj yachanchij? Tucuicunami llaquilla cajcunataca animai tucunchij. Rey Salomonca: “Alli punllapitaj yuyaita cushcaca sumajmari” nishpami escribirca. Shinallataj: “Cushijlla ñahuihuan ricujpica, shungupish cushicunmi. Cushicunata huillashcacarin shaicushca cajpipish, mushuj yuyaita cunmi” nishpami escribirca (Proverbios 15:23, 30). Pi llaquilla cajpica ¿imatataj rurai tucunchij? Huillaj revistamantami huaquin yuyaicunata leyi tucunchij, mana cashpaca jw.org paginamantami huaquin yuyaicunata leyi tucunchij. Apóstol Pabloca: “Cancuna tucui imalla yachashcata caishuj chaishuj yachachinacuichij yuyachinacuichij. Salmocunata, cantanacunata, Diosta yuyarishpa sumaj cantocunatapish Diosta diosolopagui nishpa tucui shunguhuan cantaichij” nircami (Colosenses 3:16, Biblia en Quichua Chimborazo Dios Rimashca Shimicunami, 1973; Hechos 16:25). Ima shinami ricunchij Diosta alabangapaj cantocunata tandalla cantashpaca allimi sintirishun.

19. a) ¿Imamantataj caishuj chaishuj ashtahuan animanacuna canchij? b) ¿Imatataj rurana canchij?

¹⁹ Diospaj jatun punlla qꞌuichquiyamucushcamantami caishuj chaishuj ashtahuan animanacuna canchij (Hebreos 10:25, NM). Pabloca: “Ima shina cunan ruracushca shinallataj, caishuj chaishujta animachichij caishuj chaishujta sinchiyachichij” nircami. Chaimanta apóstol Pablo mandashcata cazushpa caishuj chaishuj animanacushunchij (1 Tesalonicenses 5:11).