1. ¿Adán Eva juchapi urmashca qꞌuipaca Jehová Diosca ima shinataj gentecunata animashca?

JEHOVÁ Diosca cushichij Diosmi can. Paica Adán Eva juchapi urmashca punllamantami gentecunata animashpa, cushichishpa ayudacushca. ¿Ima shinataj ayudacushca? Adán Eva juchapi urmajpica chai ratomi shuj profecía pajtarinata huillarca. Chai profeciata intindishpami Adanpaj huahua huahuacunaca shuj esperanzata charina carca. Génesis 3:15-pimi chai profeciamanta parlacun. Chaipica Diablopish, paipaj mana alli ruraicunapish tucurinatami huillacun (1 Juan 3:8; Apocalipsis 12:9).

2. ¿Jehová Diosca ima shinataj Noeta animarca?

² Noeca Diosta mana sirvij gentecunapurapimi causarca. Paillami paipaj familiandij Diosta sirvijcuna carca. Gentecunaca  millaicuna, huainayajcunami carca. Chaita ricushpaca Noeca desanimarinmanmi carca (Génesis 6:4, 5, 11; Judas 6). Pero Jehová Diosmi paita sirvishpa catichun sinchiyachishpa ayudarca (Génesis 6:9). Diosca Noetaca mana alli gentecunataca tucuchigrinimi nircami. Ashtahuanpish paipaj familia quishpirichun imata ruranatami huillarca (Génesis 6:13-18). Chashnami Jehová Diosca Noetaca achcata animarca.

3. ¿Jehová Diosca ima shinataj Josueta animarca? (Página 15-pi tiyaj dibujota ricui).

³ Achca huatacuna qꞌuipaca Josuepishmi animota minishtirca. ¿Imamanta? Jehová Diosca pai cusha nishca llajtaman israelitacunata pushachunmi Josuetaca mingarca. Shinapish chai llajtaman yaicungapajca chaipi causacuj sinchi soldadocunatami mishana carca. Chaimantami Josueca sustarishca carca. Chaita ricushpami Diosca Moisestaca: ‘Josueta animachishpa sinchiyachi. Paimi cai gentecunata pushashpa Jordanta chꞌimbanga. Paimi cunan can ricugrin llajtataca paicunaman cunga’ nircami (Deuteronomio 3:28). Qꞌuipaca Jehovallatajmi Josuetaca: “Cꞌari cꞌari cai, ama manchaichu nishpami mandani. Ama manchanguichu, shaicurishpa ama saquiringuichu. Ñuca canta Mandaj Diosca can maita rijpipish canhuanmi casha” nishpami animarca (Josué 1:1, 9).

4, 5. a) ¿Ñaupa punllacunapica Jehová Diosca ima shinataj israelitacunataca animarca? b) ¿Jehová Diosca ima shinataj paipaj churita animarca?

⁴ Jehová Diosca mana shuj o ishquillatachu animarca. Ashtahuanpish tucui paita sirvijcunatami animarca. Por ejemplo, israelitacunaca Babiloniamanmi prezu apashca cagrircacuna. Chaimantami paicunaca animota cuchun minishtigrircacuna. Chaita yachashpami Diosca: ‘Ñuca cancunahuan cashcamanta ama manchaichijchu, ama shaicurichijchu. Ñucami cancunaman fuerzata cuj Taita Dios cani. Cancunataca ayudacushallami. Ñuca alli maquipi cashcata rurajhuanmi cancunataca charirasha’ nircami (Isaías 41:10). Jesusta punta catijcunapish Jehová Diosca animashpa ayudanatami crircacuna. Cunan punllacunapi Diosta sirvijcunapish chaillatatajmi crinchij (2 Corintios 1:3, 4-ta leyipai).

⁵ Jehová Diosca paipaj churi Jesusmanpishmi animota cushpa ayudarca. ¿Ima shina? Jesús bautizarijpica jahua pachamantami Jehová Diosca: “Caimi ñuca cꞌuyashca Churi. Paipimi cushicuni” nircami (Mateo 3:17). Cai shimicunaca tucui shunguhuan huillashpa catichunmi Jesusta animarca.

6. Talentocunamanta Jesús parlashpaca ¿imata rurachuntaj animarca?

⁶ Jesusca paipaj Yaya Jehová animashca shinami shujtajcunata animarca. Por ejemplo, talentocunamanta parlashpami paita catijcunataca Diosta sirvishpa catichun animarca. Chai parlopica amoca paita alli sirvijcunataca: “Allimi rurashcangui, canca allita ruraj, alli cazujmi cangui. Cai ashalla talentohuanpish allita rurashcamanta, ashtahuan yallitami mingasha. Cambaj amohuan cushicunaman yaicui” nircami (Mateo 25:21, 23).

7. a) ¿Jesusca ima shinataj paipaj apostolcunata animarca? b) ¿Jesusca ima shinataj Pedrota animarca?

⁷ Jesuspaj apostolcunaca pitaj ashtahuan yalli can nishpami paicunapura cutin cutin pꞌiñacujcunaca carca. Chashnapish Jesusca pacienciahuanmi humildecuna cachun, mana jatun tucushpa shujtajcunata sirvichun animarca (Lucas 22:24-26). Pedropish cutin cutinmi pandarirca (Mateo 16:21-23; 26:31-35, 75). Shinapish Jesusca paita mana  saquishpami animota curca. Ashtahuanpish huauqui panicunata sinchiyachichunmi mingarca (Juan 21:16).

8. ¿Soldadocunata mandajcunatapish Jerusalenpi tucui causajcunatapish animangapajca Ezequiasca imatataj nirca?

⁸ Jesús ima shina animanatami yachachirca. Pero cai Allpaman manaraj shamujpimi Diosta sirvijcunaca shujtajcunata animana cashcata alli intindircacuna. Asiriocuna Jerusalén llajtata llaquichisha nijpi, Ezequías imata rurashcata ricushun. Paica soldadocunata mandajcunatapish, Jerusalenpi tucui causajcunatapish tandachishpami sinchiyachij shimicunata nishpa animarca (2 Crónicas 32:6-8-ta leyipai).

9. ¿Shujtajcunata animangapajca imatataj Jobmanta yachanchij?

⁹ Cunanca Jobmanta parlashun. Paica yallitaj llaquillami carca. Chashna cajta ricushpami quimsa cꞌaricunaca paita cushichinaman shamurcacuna. Pero cushichinapaj randica sinchita rimashpami ashtahuan paita llaquichircacuna. Job llaquilla cashpapish ima shina animota cuna cashcatami chai cꞌaricunaman yachachirca. Chaimantami cancuna cashpaca allita rimashpami cushichishpa ayudaniman nircami (Job 16:1-5). Chai pasashca qꞌuipami Eliú runapish, Jehovapish Jobta animashpa ayudarcacuna (Job 33:24, 25; 36:1, 11; 42:7, 10).

10, 11. a) ¿Jeftepaj ushushica imamantataj animota cuchun, cushichichun minishtirca? b) ¿Cunan punllacunapica picunataj felicitachun, animachun minishtincuna?

¹⁰ Jefté runapaj ushushipish animota cuchunmi minishtirca. Jefteca juezmi carca. Paica Amón llajta soldadocunahuanmi macanacugrirca. Chaimantami Diostaca: ‘Amonitacunata mishachun ayudajpi, chaimanta tigrajpi ñucata tupanaman ñuca huasimanta punta llujshijtaca cambaj carpa huasipimi sirvichun cusha’ nircami. Jehová Diosca macanacuita mishachunca ayudarcami. Jefté huasiman tigrajpica paipaj shujlla ushushimi tupanaman llujshirca. Chaita ricushpaca Jefteca shungu nanarishpami llaquirirca. Llaquilla cashpapish paipaj ushushita Diospaj carpa huasipi tucui vida sirvichun cachashpami, Jefteca pai nishcata pajtachirca (Jueces 11:30-35).

¹¹ Jeftepajca chaita ruranaca sinchimi carca. Pero paipaj ushushipajmi ashtahuan sinchi cashca canga. Sinchi cajpipish paipaj yaya nishcatami pajtachirca (Jueces 11:36, 37). ¿Imamantataj sinchi carca? Paica mana cazarai tucurcachu, huahuacunatapish mana chari tucurcachu. Paipaj familiapaj shutipish chingarinami carca. Chaimantami cushichichun, animachun minishtirca. Israelpi causaj solteracunaca cada huatami chuscu punllacunata Jeftepaj ushushita cushichinaman rijcuna carca. (Jueces 11:39, 40, NM). Cunan punllacunapica Diosta ashtahuan sirvingapajmi achca huauqui panicunaca soltero catincuna. Paicunapish felicitachun, animachunmi minishtincuna (1 Corintios 7:32-35).

12, 13. ¿Pedroca ima shinataj huauqui panicunata animarca?

¹² Huañungapaj ashalla horascuna faltajpimi Jesusca Pedrotaca: ‘Simón, Simón, cancunataca trigota shina shushungapajmi Satanasca mañarca. Ashtahuanpish crij cashcata saquisha ama nichunmi, ñucaca canmantaca Taita Diosta mañarcani. Ña cutin ñucaman can cutirishpaca, ñucata alli catijcuna cachun cambaj huauquicunatapish cushichingui’ nircami (Lucas 22:31, 32).

 ¹³ Pedroca, Jesusta punta catijcunapajca shuj sinchi pilar shinami tucurca (Gálatas 2:9). ¿Imamantataj chaita ninchij? Pedroca Pentecostés fiestapipish, qꞌuipa punllacunapipish mana manchashpami Diosmanta parlarca. Chashnami huauqui panicunata animarca. Achca huatacunata Diosta sirvishca qꞌuipaca huauqui panicunaman shuj cartata escribishpaca cashnami nirca: ‘Cai asha quillcata quillcashpami cancunapajman cachani. Caita quillcashpaca, Dios cancunata mana cꞌuyaipajta cꞌuyashcata yuyachishpami, chai cꞌuyaimantaca amataj anchurichun animani’ nircami (1 Pedro 5:12). Pedro escribishca cartacunaca tauca huatacunatami Jesusta catijcunataca achcata animashca. Cunan punllacunapipish Dios cusha nishcacuna pajtaringacama shuyashpa catichunmi Pedropaj cartacunaca animashpa catin (2 Pedro 3:13).

14, 15. ¿Apóstol Juan escribishcacunaca ima shinataj achca huatacunata Jesusta catijcunataca animashca?

¹⁴ Apóstol Juanpish Jesusta punta catijcunapajca shuj sinchi pilar shinami tucurca. Paica Jesús imalla rurashcatami escribirca. Pai escribishca libroca Bibliapica Juan shutillatajmi can. Chai libropi Jesusmanta escribishcacunaca Jesusta catijcunataca tauca huatacunatami achcata animashca. Cunan punllacunapipish ñucanchijta animashpami catin. Por ejemplo, Jesusca caishuj chaishuj cꞌuyanacushpami ñuca catijcuna cashcata ricuchinguichij nircami. Chai shimicunaca Juan librollapimi tiyan (Juan 13:34, 35-ta leyipai).

 ¹⁵ Juanca quimsa cartacunatapishmi escribirca. Chai cartacunapica shujtaj valishca yachaicunami tiyan. Por ejemplo, huaquinpica ñucanchij pandarishcamanta llaquillami sintirinchij. Shinapish 1 Juan 1:7-pica ‘Jesucristopaj yahuarmi, ñucanchij tucui juchacunataca pꞌichan’ ninmi. Chaita leyishpaca ¿manachu alli sintirinchij? Cutin pandarishcamanta arrepintirishpapish, shungupi mana alli sintirishpaca 1 Juan 3:20-pi nishcata leyishpaca ashtahuan allimi sintirinchij ¿nachu? Chai versopica: ‘Dioscarin ñucanchij shungutapish yallimi’ ninmi. Shinallataj Juanllami “Diosca cꞌuyajmari” nishpa escribirca (1 Juan 4:8, 16). 2 Juan y 3 Juan cartacunapica Diosta sirvishpa catijcunatami felicitan (2 Juan 4; 3 Juan 3, 4).

16, 17. ¿Apóstol Pabloca ima shinataj huauqui panicunataca animarca?

¹⁶ Apóstol Pablopishmi huauqui panicunata animashpa achcata ayudarca. Jesús huañushca asha tiempo qꞌuipaca casi tucui apostolcunami Jerusalenpi cashca yuyachirca. Chai tiempopica cuerpo gobernantepi sirvij huauquicunaca Jerusalenpimi carca (Hechos 8:14; 15:2). Judá llajtapi Jesusta catijcunaca shujlla Dios tiyashcata crij gentecunamanmi Jesusmanta huillajcuna carca. Pero Diospaj espirituca Pablotaca Grecia llajtaman, Roma llajtamanmi cacharca. Chai llajtacunapica gentecunaca achca dioscunatami adorajcuna carca (Gálatas 2:7-9; 1 Timoteo 2:7).

¹⁷ Pabloca cunan Turquía shuti nishca  llajtapimi purirca. Shinallataj Grecia, Italia llajtacunapipishmi carca. Chai llajtacunapica mushuj congregacioncunatami callarichirca. Chaipi mushuj huauqui panicunaca achca animota cuchunmi minishtircacuna. Paicunataca ‘paicunapaj quiquin llajtapi causajcunallatajmi llaquichijcuna’ carca (1 Tesalonicenses 2:14). Huata 50-pica Pabloca Tesalónica llajtapi causaj huauqui panicunamanmi shuj cartata escribirca. Chai cartapica: ‘Taita Diosta ñucanchij mañacushpaca, tucui cancunata mana cungashpami Diosta pagui nicunchijlla. Cancunaca crishcamantami allicunata rurashpa, cꞌuyaihuan trabajashpa, ahuantashpa caticunguichij’ nircami (1 Tesalonicenses 1:2, 3). Ashtahuanpish Pabloca chai cartallapitajmi: “Ima shina cunan ruracushca shinallataj, caishuj chaishujta animachichij caishuj chaishujta sinchiyachichij” nishpami mandarca (1 Tesalonicenses 5:11).

18. ¿Cuerpo gobernantepi sirvij huauquicunaca ima shinataj Felipeta apoyarcacuna?

¹⁸ Primer siglopica Jehová Diosca Jesusta catijcunata, congregacioncunata pushajcunatapish animangapajmi cuerpo gobernantepi sirvij huauquicunata utilizarca. Samariapi causajcunaman Felipe Jesusmanta huillacujpica cuerpo gobernantepi sirvij huauquicunaca achcatami paita apoyarcacuna. ¿Ima shinataj Felipeta apoyarcacuna? Samariapi Jesusta mushuj catijcunaca Diospaj espirituta manaraj chasquishcacunachu carca. Chaimantami Diospaj espirituta chasquichun, paicunamanta Diosta mañachun Pedrotapish Juantapish cacharcacuna (Hechos 8:5, 14-17). Cuerpo gobernantepi sirvij huauquicuna ima shina apoyajta ricushpaca Felipepish, Samariapi Jesusta mushuj catijcunapish achca animarishcami sintirishcacuna canga.

19. ¿Cuerpo gobernantepi sirvij huauquicunapaj cartata leyishpaca ima shinataj sintirircacuna?

¹⁹ Qꞌuipaca cuerpo gobernantepi sirvij huauquicunaca shuj alli decisiontami japina carca. Huaquincunaca paicunataca: ¿Moisesman cushca leypi nishca shina, mana judío caj huauquicunaca circuncisionta ruranachu can? nishpami tapurcacuna (Hechos 15:1, 2). Chaimantami paicunaca Jehová Diosta mañarcacuna, paipaj espíritu santohuan ayudachun. Shinallataj Diospaj shimipi imata nishcatapish allimi estudiarcacuna. Chashnami circunsicionta ña mana ruranata cashcata decidircacuna. Chai decisionta tucuicunaman huillangapajmi shuj cartata escribircacuna. Chai cartataca congregacioncunamanmi cacharcacuna. Chai cartata leyishpaca Jesusta catijcunaca ‘achcatami cushicurcacuna’ (Hechos 15:27-32).

20. a) ¿Cunan punllacunapica Cuerpo Gobernantepi sirvij huauquicunaca ima shinataj huauqui panicunata animan? b) ¿Catij temapica imatataj yachashun?

²⁰ Cunan punllacunapica Testigo de Jehovacunapaj Cuerpo Gobernantepi sirvij huauquicunaca Betelpi sirvijcunata, construccionpi trabajaj huauqui panicunata, misionerocunata, chashna laya sirvijcunata, muyundij Allpapi tucui huauqui panicunatapishmi animota cushpa ayudancuna. Primer siglopi shinallatajmi animota chasquishpaca cushilla sintirinchij. Jehová Diosca paimanta caruyashcacunapish paipajman tigrachunmi munan. Chaimantami Cuerpo Gobernantepi sirvij huauquicunaca Jehová Diospajman tigrachun paicunata animangapaj 2015 huatapica Jehová desea que vuelva nishca folletota llujchircacuna. Shinapish ¿Diospaj pueblopica pushaj huauquicunallachu Jehová shina shujtajcunata animana can? Chaitaca catij temapimi yachashun.