1. ¿Efesios 6:10 al 13-pica Yaya Diosmantaca imatataj yachachin?

JEHOVÁ DIOSCA cꞌuyajmi can. Chaimantami Diablopish, demoniocunapish ñucanchijta ama pandachichun imata rurana cashcata yachachin (Efesios 6:10-13-ta liyipai). Diospaj ayudata chasquishpa, paipi tucui shunguhuan confiashpaca Diablo ñucanchijta pandachichunca mana saquishunchu. Apóstol Pablo shinami Diospi tucui shunguhuan confiana canchij. Pabloca: “Dios ñucanchijhuan cajpica ¿pitaj ñucanchijtaca imata ni tucungari?” nircami (Romanos 8:31).

2. ¿Cai yachaipica imatataj yachashun?

² Diosta sirvijcunaca Diablopaj, demoniocunapaj ruraicunamantaca mana parlanchijchu. Chaipaj randica Jehová Diosmanta yachanapi, paipajta ruranapimi ocuparinchij (Salmo 25:5). Pero Diablo ñucanchijta ama pandachichunca pai ima shina pandachij cashcatami yachana canchij (2 Corintios 2:11). Cai yachaipica Diablopish, demoniocunapish gentecunata pandachingapaj imallata rurashcatami yachashun. Shinallataj chai trampacunapi ama urmangapaj imata rurana cashcatami yachashun.

3, 4. a) ¿Demoniocunapaj ruraicunaca imallataj can? b) ¿Diabloca mashna gentecunatataj pandachishca?

³ ¿Diablopish, demoniocunapish gentecunataca ima shinataj pandachicun? Por ejemplo, maijancunaca: “Ñucanchijca podertami charinchij. Chaimantami estrellacunata ricushpa, adivinashpa imalla tucunataca yachai tucunchij”  nincunami. Cutin shujtajcunaca: “Huañushcacunahuanmi parlai tucunchij” nincunami. Maijancunarin: “Magiata rurashpami shujtajcunata llaquichi tucunchij” nincunami. *

⁴ Diabloca muyundij Allpapimi achca gentecunata pandachicun (Apocalipsis 12:9). Chaimantami maipi causashpapish Diablopaj ruraicunamantaca cuidarina canchij. Shuj organización nishca shinaca, Ecuador llajtapi, shujtaj 17 llajtacunapica quimsa gentecunamantaca shujmi magiapi crin. Shinallataj chai llajtacunapica quimsa gentecunamantaca shujmi, “huañushcacunahuanca parlai tucunchij” nin. Cutin shuj organización nishca shinaca, Africapi tiyaj 18 llajtacunapica casi tucuicunami brujeriacunapi crincuna.

5. ¿Jehová Diosca ima shinataj Diablopaj ruraicunata ricun?

⁵ Diosca ‘mana llullaj’ Diosmi can (Salmo 31:5, QC, 1989). Chaimantami paica tucui Diablopaj ruraicunata pꞌiñan. Israelitacunamanca Diosca: “Cancunapuramanta maijanpish rurashcalla dioscunaman paipaj churita cashpa, ushushita cashpa cushpa rupachijca ama tiyachun. Shinallataj adivinaj canata, brujo canata, yumbu canata, muspachij canata yachashpa rurajcunaca ama tiyachun. Muspachij yumbupish, adivinajpish, ima shinapish muspachijpish, huañushcacunata tapujpish ama tiyachun. Maijanpish chashna rurajcunaca Mandaj Diospajca millananami” nircami (Deuteronomio 18:10-12). Cunan punllacunapica Diosta sirvijcunaca israelitacunaman cushca leycunataca mana cazunchijchu. Pero Diosca Diablopaj ruraicunataca ñaupa punllacunapi shinallatajmi pꞌiñan (Malaquías 3:6).

6. a) ¿Diabloca gentecunataca ima shinataj llaquichicun? b) ¿Eclesiastés 9:5-pica huañushcacunamantaca imatataj yachachin?

⁶ Diabloca gentecunataca achcatami llaquichicun. Paica, almaca causashpami catin nishpami llullan (Eclesiastés 9:5-ta liyipai). Shinallataj Diabloca gentecuna manchaita charichun, Diosmantapish caruyachunmi munan. Ashtahuancarin Diabloca, gentecuna Diospi confianapaj randica demoniocunapi confiachunmi munan. Chaimantami Diosca, demoniocunapaj ruraicunapica amataj chagruringuichij nin.

7. ¿Diosca ñucanchijmanca imatataj yachachin?

⁷ Diablopish, demoniocunapish ñucanchijta ama pandachichunmi Jehová Diosca imata rurana cashcata yachachin. Caimanta ashtahuan yachashun.

8. a) ¿Diablo ama pandachichunca imatataj rurana canchij? b) ¿Salmo 146:4-pica huañushcacunamantaca imatataj yachachin?

⁸ Diospaj Shimita liyishunchij, liyishcapipish alli yuyashunchij. Bibliaca shuj espada shinami can. Chaipimi Diablo nishcacuna llulla cashcata yachachin (Efesios 6:17). Por ejemplo, Bibliapica, huañushcacunaca ni pihuan mana parlai tucunchu ninmi (Salmo 146:4-ta liyipai). Shinallataj Bibliapica, Diosllami shamuj punllacunapi imalla tucunataca yachan ninmi  (Isaías 45:21; 46:10). Cada punlla Bibliata liyishpa, chaipi nishcacunata alli intindishpaca Diablopaj llullacunataca mana crishunchu.

9. ¿Ima ruraicunapitaj mana chagrurina canchij?

⁹ Diablopaj ruraicunamanta caruyashunchij. Cai mana alli ruraicunapi chagrurishpaca achca llaquicunatami charishun. Ashtahuancarin Diablopaj, demoniocunapaj partemi tucushun. Chaimantami brujocunapajman mana rina canchij. Huañushcacunahuanpish mana parlanachu canchij. Yachai 16-pi yachashca shinaca huaquin gentecunaca almaca mana huañunchu nishpami huaquin costumbrecunata rurancuna. Pero ñucanchijca chai costumbrecunapica mana participanachu canchij. Shamuj punllacunapi imalla tucunata yachangapajpish adivinajcunapajmanca mana rinachu canchij (Isaías 8:19).

10, 11. a) ¿Diosmanta yachashpaca Éfeso llajtapi causajcunaca imatataj rurarcacuna? b) ¿1 Corintios 10:21-pi nishca shinaca imatataj rurana canchij?

¹⁰ Diablopaj ruraicunahuan chagrushca cosascunata ñutushpa shitashunchij. Ñaupa tiempopica Éfeso llajtapi causajcunaca Diablopaj ruraicunapimi chagrurijcuna carca. Pero Diosmanta yachashpaca, ‘brujianata yachachij librocunata apamushpami tucui gentecunapaj ñaupajpi rupachircacuna’ (Hechos 19:19). Chai librocunaca achca cullquimi valij carca. Chashnapish shujtajcunaman convidanapaj randi o cꞌatunapaj randica tucuimi rupachircacuna. Chashnami Jehová Diospaj ñaupajpi alli casha nishcata ricuchircacuna.

¹¹ Tal vez huaira ama shitachun, ama ojiachun nishpami puca puchcata o cai laya shujtaj cosascunata charinchij. Pero Efesopi causajcuna shinami ñucanchijpish chai  cosascunata ñutushpa chingachina canchij (1 Corintios 10:21-ta liyipai *).

12. ¿Imatataj tapurina canchij?

¹² Imata ricunata, imata pugllanata alli agllashunchij. Mana tucui ricunacuna, uyanacunachu Diablopaj ruraicunahuan chagrurishca can. Shinapish achca librocunapi, revistacunapi, musicacunapi, Internetpica Diablomanta, demoniocunamantami parlan. Shinallataj huaquin programacunapi, peliculacunapi, pugllaicunapica zombismanta, vampiros * nishcacunamantami parlan. Chai programacunapica magiata rurana, shujtajcunata brujianaca shuj pugllaillami can nincunami. ¿Ñucanchijpish cai mana alli cosascunata ricushpa, uyashpachu cushicunchij? Tucuicunami Diospaj ñaupajpi alli ricurisha ninchij. Chaimanta, Dios millanayachishca cosascunahuanca amataj cushicushunchij (Hechos 24:16). *

13. ¿Imatataj mana rurana canchij?

¹³ Demoniocunapaj ruraicunamanta ama parlashunchij. Tucuipimi Jesuspaj ejemplota catina canchij (1 Pedro 2:21). Jesusca jahua pachapi causashpaca Diablopish demoniocunapish millai cosascunata rurashcatami ricurca. Pero Jesús cai  Allpaman shamushpaca, Diablopish, demoniocunapish caitami chaitami rurancuna nishpaca mana parlarcachu. Chaipaj randica Jehová Diosmanta yachachinapimi ocuparirca. Ñucanchijpish Diablopaj ruraicunamanta parlanapaj randica Diosmantami parlana canchij (Salmo 45:1).

14, 15. a) ¿Demoniocunataca imamantataj mana manchana canchij? b) ¿Jehová Dios ñucanchijta cuidacushcataca ima shinataj yachanchij?

¹⁴ Diablota, demoniocunata ama manchashunchij. Llaquicunaca mana yuyashcapimi japi tucun. Pero cai tucui llaquicunata charishpaca Diablomantami shamun nishpaca mana yuyanachu canchij. Bibliapica: “Llaquicunaca mana yuyashcapimi japinlla” ninmi (Eclesiastés 9:11, NM). Jehová Diosca demoniocunata yallimi tucui poderta charin. Chaimantami Diablo, Jobta huañuchichunca mana saquirca (Job 2:6). Moisespaj punllacunapipish Diosca magiata rurajcunata yalli poderta charishcatami ricuchirca (Éxodo 8:18; 9:11). Achca huatacuna qꞌuipaca Jehová Dios poderta cujpimi Jesusca Diablota, demoniocunatapish cai Allpaman shitarca. Paicuna ñucanchijta ama llaquichichunca Jesusca ñallami jatun jutcupi paicunata huichcanga (Apocalipsis 12:9; 20:2, 3).

¹⁵ Cunan punllacunapica muyundij Allpapimi Jehovamanta yachachicunchij (Mateo 28:19, 20). Caita rurashpami Diablo llulla cashcata ricuchinchij. Diabloca tucui podertaca mana charinchu. Chaimantami Diosmanta yachachichunca mana jarcai tucun. Diablota, demoniocunataca ama manchashunchijchu. Diosta tucuipi cazujpica demoniocunaca mana llaquichi tucungachu. Jehovami ñucanchijtaca cuidacun. Bibliapica: “Diosca tucui shunguhuan paita cazujcunapaj allita rurashpa, tucuita rurai tucuj cashcata ricuchingapajmi, tucui cai pachata ricuracun” ninmi (2 Crónicas 16:9).

16, 17. ¿Shuj panica ima jarcaicunatataj chꞌimbapurarca?

¹⁶ Huaquin costumbrecuna mana alli cajpipish familiacunaca, “cai costumbrepi  mana participashpaca llaquicunatami charingui” ningacunami. Paicuna chashna nijpipish chai costumbrecunapi mana participajpica Diosmi bendicianga. Cunanca Ghana llajtapi causaj Erica panimanta yachashun. Paica 21 huatacunata charishpami Bibliamanta yachai callarirca. Paipaj yayaca brujomi carca. Erica causan llajtapica maijancunaca animalcunata huañuchishpami chai aichataca yanga dioscunaman ofrendata shina cuncuna. Chai qꞌuipaca paicunapishmi chai aichataca micuncuna. Erica chai costumbrepi mana participasha nijpimi paipaj familiacunaca: “Ñucanchij dioscunatami cꞌamishcangui. Cambaj culpamantami dioscunaca ungüicunata cachashpa llaquichinga” nircacuna.

¹⁷ Ericapaj familiacuna chai costumbrepi participachun obligasha nijpipish paica mana participarcachu. Chaimi paipaj familiacunaca ña mana ñucanchij familiachu cangui nishpa huasimanta llujchishpa cacharcacuna. Pai tucui charishca cosascunatapishmi rupachircacuna. Pero Jehová Diosca paitaca manataj saquircachu. Huauqui panicunaca paicunapaj huasicunapimi chasquircacuna. Paicunami Ericapaj mushuj familia tucurca (Marcos 10:29, 30). Familiacuna llaquichicujpipish cai panica bautizarircami. Cunanca precursora regularmi can. Paica: “Demoniocunataca ña mana manchanichu. Ñuca familiacunapish Bibliamanta yachashpa demoniocunata ama manchachunmi cada punlla Yayitu Diosta mañani” ninmi.

18. Jehová Diospi tucui shunguhuan confiashpaca ¿ima bendicioncunatataj chasquishun?

¹⁸ Mana tucuicunachu Erica shina jatun llaquicunata charishun. Shinapish tucuicunami demoniocunapaj ruraicunata mishana canchij. Jehová Diospi tucui shunguhuan confiashpaca achca bendicioncunatami chasquishun. Por ejemplo, Diablopaj llullacunataca mana crishunchu. Shinallataj demoniocunata manchashcamanta Diosta sirvinataca mana saquishunchu. Tucuimanta yallica Jehová Diospaj alli amigomi tucushun. Bibliapica: ‘Chaimanta Diosta cazuichij, Diablotaca ama ricunachichijchu. Chashna rurajpica paica miticungallami. Diosman cꞌuchuyaichij, paipish cancunapajman cꞌuchuyangami’ ninmi (Santiago 4:7, 8).