1. a) ¿Diosta sirvijcunaca imatataj rurasha ninchij? (Página 1-pi tiyaj dibujota ricui). b) ¿Imamantataj Jesús mandashcataca pajtachisha ninchij?

JESUCRISTOCA paita catijcunataca: “Cai pachapi tucui causajcunapajman rishpa, ñuca yachacujcuna tucuchun yachachigrichij” nishpami mandarca (Mateo 28:19). Ñucanchijcunaca ima shina huillanataca allimi yachana canchij. ¿Imamanta? Diospaj punllaca ñallami chayamucun. Chaimantami cai mandashcataca alli pajtachisha ninchij (2 Timoteo 4:5). Pero achcata predicanata munashpapish huaquinpica sinchimi ricurin.

2. ¿Huaquinpica Diosta alli sirvinaca imamantataj sinchi can?

² Huaquin ruraicunami ñucanchij tiempota, fuerzata quichun. Por ejemplo, familiata mantiningapajca achca horascunatachari trabajana canchij o paicunatami cuidana canchij. Huasipipish shujtaj ruraicunapichari ocuparinchij. Mana cashpaca yuyajlla, ungushca, yallitaj llaquillachari canchij. Cashna laya llaquicunata chꞌimbapuracushpapish Diosta alli sirvingapajca ¿imatataj rurana canchij?

3. ¿Mateo 13:23-pi Jesús nishcaca imatataj ricuchin?

³ Jesusca tucuicuna achca horascunata mana huillai tucushcataca allimi yacharca (Mateo 13:23-ta liyipai). Chaimantami mana tanto huillai tucushpaca mana llaquirina canchij. Pero yuyarishunchij, tucui shunguhuan Diospaj Shimita huillangapaj esfuerzota rurajpica Yaya Diosca cushillami sintiringa (Hebreos 6:10-12). Mana tanto huillai tucushpapish ¿Diosta ashtahuan sirvingapajca imatataj rurai  tucunchij? Shinallataj alli yachachijcuna cangapaj, Diospajta rurana yuyailla causangapajca ¿imatataj rurana canchij? Manaraj caimanta yachashpa Diosta sirvingapaj imata rurana cashcata ricushunchij.

4. ¿Diosta tucui shunguhuan sirvingapajca imatataj rurana canchij?

⁴ Jehová Diosta, gentecunatapish cꞌuyashcamantami huillanchij, yachachinchij. Shinallataj Diosmanta huillashpami paita tucui shunguhuan sirvicushcata ricuchinchij (Marcos 12:30, 31; Colosenses 3:23). Pero Diosca mashna horascunata paipaj obrata ruracushcataca * mana ricucunchu. Ashtahuanpish imamanta paita sirvicushcatami ricucun. Diosta sirvingapajca tucui ñucanchij fuerzatami cuna canchij. Diosmanta huillanami tucuimanta yalli valishca can. Chaimantami tucui gentecunaman Diospaj Shimimanta huillana canchij.

5, 6. ¿Diosmanta huillanata tucui shunguhuan munashcataca ima shinataj ricuchishun? Shuj chꞌimbapuraihuan parlai.

⁵ Cai chꞌimbapuraipi yuyashun. Shuj jovenca guitarrapi tocanatami achcata munan. Pero mantiniringapajca lunes a viernesmi shuj tiendapi trabajan. Chaipi achca punllacunata trabajashpapish guitarrapi tocana yuyaillami causan. Chaimantami guitarrata alli tocaj cangapajca tiempo tiyashca horas practican. Ashalla horasta practicai tucushpapish cushillami sintirin.

⁶ Ñucanchijpish Diospaj Shimita huillanata munashpapish manachari achca tiempota charinchij. Shinapish chaita ruranatami tucui shunguhuan munanchij. Chaimantami alli huillajcuna cangapaj esforzarinchij. Pero huillangapaj mana achca tiempota charishpapish ¿Diospaj obrataca ima shinataj apoyai tucunchij?

7, 8. ¿Jesús shina huillangapajca imatataj rurana canchij?

⁷ Jesuspajca Diospaj Gobiernomanta huillanami tucuimanta yalli valishca carca  (Juan 4:34, 35). Chaimi caruta rishpa achca gentecunaman huillarca. Shinallataj huasin huasin rishpa, gentecuna tiyan lugarcunapipishmi huillarca. Paipaj tucui causaipimi chaita rurarca. Jesusca ñucanchijmanca alaja ejemplotami saquishca.

⁸ ¿Jesús shina huillangapajca imatataj rurana canchij? Pai shinami maipi cashpapish, ima hora cajpipish Diospaj Gobiernomanta huillana canchij. Shinallataj ashtahuan huillangapajmi huaquin ruraicunata ladoman saquina canchij (Marcos 6:31-34; 1 Pedro 2:21). Maijan huauqui panicunaca precursores especiales, regulares o auxiliaresmi tucushcacuna. Shujtajcunaca huillajcuna minishtirishca ladocunapi Diospaj Shimita huillangapajmi rincuna. Mana cashpaca shujtaj shimitami yachancuna. Pero achca huauqui panicunaca cashna shina mana huillai tucuncunachu. Chashnapish paicunaca Diospaj Shimita huillangapajmi tucuita rurancuna. Achcacuna cashcamantami tucui precursorescunata yalli mundo enteropi huillancuna. Ima laya huillajpipish Yayitu Diosca mana rurai pudishcataca mana mañanchu. Ashtahuanpish ‘alli huillaita huillashpami’ cushilla causachun munan (1 Timoteo 1:11, NM; Deuteronomio 30:11).

9. a) Apóstol Pabloca trabajana cashpapish Diosmanta huillana ashtahuan valishca cashcataca ¿ima shinataj ricuchirca? b) ¿Hechos 28:16, 30 y 31-pi nishca shinaca Pabloca imatataj ruraj carca?

⁹ Apóstol Pablomantapish yachashun. Corinto llajtaman cutin rishpaca ashalla cullquitami charirca. Pero huauqui panicuna paiman ama cullquita cuchunmi carpa huasicunata rurashpa trabajarca (2 Corintios 11:7). Pabloca minishtirishcallata charingapajmi trabajarca. Chashnami Diosmanta huillai tucurca. Paica Diosmanta huillana valishca cashcata yachashpami tucui sabadocuna huillaj carca. Ña cullquita charishpaca “Taita Diospaj Shimita huillana yuyailla tucushpami, judiocunamanca Jesusca Quishpichij Cristomi nishpa huillacurcalla” (Hechos 18:3-5; 2 Corintios 11:9). Qꞌuipa huatacunaca Pablotaca Roma llajtapimi paipaj huasillapitaj ishqui huatacunata prezushpa churarca. Chaipi cashpapish paica visitajcunamanmi Diosmanta huillaj carca. Huauqui panicunapajpishmi cartacunata quillcaj carca (Hechos 28:16, 30, 31-ta liyipai). Chashnami Diosmanta huillanata mana pi jarcachun saquirca. Shinallataj paica: ‘Chaimantami cai ruranataca mana shaicunchij’ nircami (2 Corintios 4:1). Ñucanchijpish trabajanami canchij. Pero Pablo shinami Diosmanta huillana tucuimanta yalli valishca cashcata ricuchina canchij.

10, 11. Ungushca cashpapish Diospaj Shimita alli huillangapajca ¿imatataj rurana canchij?

¹⁰ Huasin huasin Diospaj Shimita huillanata munashpapish ungushca cashpa, yuyajlla cashpaca ¿imatataj rurashun? Shujtaj layami huillai tucunchij. Apostolcunapaj punllacunapica Diosta sirvijcunaca maipi cashpapish predicanata mana saquircacunachu. Shinallataj huasin huasin rishpa, gentecuna tiyan ladocunapimi huillajcuna carca (Hechos 17:17; 20:20). Cutin mana achcata puri tucushpaca ¿imatataj rurashun? Gentecuna maita pasajta ricushpami chaipi tiyarishpa paicunaman huillai tucunchij. Chashnallataj telefonopi cayashpa, cartacunata rurashpa, imata ruracushpapishmi huillana canchij. Chashna shina huillashpami achca huauqui panicunaca ungushca cashpa, ima llaquicunata charishpapish cushilla sintirincuna.

¹¹ Apóstol Pablopi cutin yuyashun. Shuj cutinca huauqui panicunata visitanaman  rishpami ungurca. Chaimi Diosca fuerzasta cushpa ayudarca (2 Corintios 4:7). Pabloca ungushca cashpapish Galacia llajtapi causajcunamanmi Diospaj Shimita huillarca. Paica: “Alli huillaita cancunaman callaripi huillashpaca, aichapi ungushca cashpapishmi huillarcani” nircami (Gálatas 4:13). Ñucanchijpish ungushca cashpapish Diosmantami huillai pudinchij. Yuyashun. Diospaj Shimita huillanaman rishpaca doctorcunahuan, enfermerocunahuanca paicunapaj huasipi mana tupanchijchu. Pero ungushca cashcamanta hospitalman rina tucujpica paicunamanmi huillai tucunchij.

12. Jesusca ‘cambaj ñahuica allimi cana can’ nishpaca ¿imatataj nisha nirca?

¹² Jesusca: “Cuerpopaj luzca ñahuimi. Cambaj ñahui alli cajpica, tucui cuerpo luzhuan jundami canga” nircami (Mateo 6:22). ¿Cai shimicunaca imatataj nisha nin? Achca ruraicunapi ocuparinapaj randica, Diospajta ruranapi ocuparina cashcatami nisha nicun. Jesusca Diospajta rurana yuyaillami causarca. Paipaj discipulocunamanpish chashna causachunmi yachachirca. Ñucanchijpish “Diospaj Gobiernotami punta lugarpi churana” canchij. Shinami Diospajta  rurana yuyailla causacushcata ricuchishun (Mateo 6:33, NM).

13. Diospajta rurana yuyailla causangapajca ¿imatataj rurana canchij?

¹³ Huaquin pugllaicuna, ricunacuna, uyanacunaca tiempotami quichun. Chaicunata ladoman saquishpami ashtahuan predicana canchij. Shinallataj pudishpaca ashalla horascunata trabajashpami ashtahuan predicana canchij. Chashnami gentecuna Diosta rijsichun, paita cꞌuyachun ayudashun. * Ashtahuanpish Diospajta rurana yuyailla causacushcatami ricuchishun.

14. Diospaj Shimita ashtahuan huillangapajca shuj cusa huarmica ¿imatataj rurarca?

¹⁴ Cunanca huauqui Elías, paipaj huarmimanta parlashun. Huauqui Eliasca ancianomi can. Paica: “Ñucanchijca precursores mana cai pudishpapish Diostami ashtahuan sirvisha nircanchij. Chaimantami huillanaman ashtahuan llujshingapajca trabajopi ñucanchij jefecunahuan parlarcanchij. Imapipish ña mana tanto cullquita gastarcanchijchu. Ima ricunacuna, pugllanacuna achca horascunata quichushcamantapishmi chaicunata saquircanchij. Chaita rurashcamantami chishicunaca huillanaman ri pudircanchij. Bibliamanta ashtahuan yachacujcunatapishmi charircanchij. Huaquinpicarin chaupi semanacunaca quillapi ishqui cutinmi predicacionman llujshircanchij. Chashnami contentos purircanchij” ninmi.

15, 16. 1 Timoteo 4:13, 15-pi nishca shinaca ashtahuan alli huillajcuna, alli yachachijcuna cangapajca ¿imatataj rurana canchij? (“ Diospaj Shimita ashtahuan alli huillangapajca ¿imatataj rurana cangui?” nishcatapish ricui).

¹⁵ Huaquin gentecunaca alli trabajador cangapajca chai trabajomantami ashtahuan  yachashpa catincuna. Ñucanchijpish Diospaj Shimita alli yachachingapajmi imata rurana cashcata ashtahuan yachashpa catina canchij (Proverbios 1:5; 1 Timoteo 4:13, 15-ta liyipai). Chashnami tucui shunguhuan Diospajta ruracushcata ricuchishun.

¹⁶ Alli yachachijcuna cangapajca ¿imatataj rurana canchij? Jesús shina causashunchij huillashunchij nishca tandanacuita alli uyashunchij. Chai tandanacuipimi ima shina huillanata maijancunaca ricuchincuna. Paicuna tucuchijpica tandanacuita pushajmi paicunaman consejocunata cun. Ñucanchijpish alli huillangapajca chai consejotami alli uyana canchij. Huillacushpaca tandanacuipi uyashca consejotami practicapi churana canchij. ¿Imallatataj ashtahuan rurana canchij? Publicadorcuna huillanaman llujshichunmi cada unota shuj grupopi churan. Chai grupota pushaj huauquimi ñucanchijcuna alli huillaj cachun ayudai tucun. Chaimantami ñucahuan huillanaman llujshihuai nishpa paita mañanalla canchij. Shinallataj experienciata charij huauqui panicunata, precursorcunata, superintendentetapishmi chaillatataj mañai pudinchij. Chaita rurashpami librocunahuan, folletocunahuan, videocunahuan cushilla huillashun.

17. ¿Diosta alli sirvishpaca ima shinataj sintirinchij?

¹⁷ Ñucanchijca “Diospajta paihuan rurajcunami canchij”. Chaica shuj jatun bendicionmi can (1 Corintios 3:9). Ima ashtahuan importante cashcata mana cungarishpa, Diosta sirvina yuyailla causashpaca cushicuihuanmi paipajta rurashun (Filipenses 1:10, NM; Salmo 100:2). Ima problemata charishpapish, imata mana rurai tucushpapish Yayitu Diosca paipaj Shimita alli huillachunmi fuerzata cunga (2 Corintios 4:1, 7; 6:4). Shinallataj ashallata o achcata predicai tucushpapish tucui shunguhuan rurashpaca cushillami sintirishun (Gálatas 6:4). Ashtahuancarin Diospaj Shimita alli huillashpaca Jehová Diostapish, gentecunatapish cꞌuyashcatami ricuchishun. Bibliapica: “Chashna rurashpaca canllatajpish quishpiringuimi, can huillashcata uyajcunapish quishpiringami” ninmi (1 Timoteo 4:16).