1, 2. Jesusca huañungapaj ashalla horascuna faltajpica ¿imapitaj yuyacurca?

JESUSCA huañungapaj ashalla horascuna faltajpica ¿imapitaj yuyacurca? Paipaj contracunami llaquinaita huañuchigrircacuna. Shinallataj paipaj Yayata cꞌuyashcamantami tucuipi cushichinata munarca. Chaimantami llaqui horaspi Diosta cazushpa, Diablopaj nishcacuna llulla cashcata ricuchisha nirca. Chaita rurashpa Diosta jatunyachi tucushcataca allimi yacharca. Jesusca gentecunatapish achcatami cꞌuyarca. Chaimi paicuna huiñai causaita charichunca huañuna horascama Diosta cazusha nirca.

² Chai tucuita yuyaipi charishpapish Jesusca tranquilomi sintirirca. Paica Diospaj ñaupajpi alli ricurishcamantami chashna tranquilo sintirirca (Filipenses 4:6, 7). Jesusca paita catijcunataca: “Ñuca sumaj causaitami cuni” nircami (Juan 14:27). ‘Diospaj sumaj causaica’ ¿imataj can? Diospaj ñaupajpi alli ricurijcunaca llaquicunata charishpapish tranquilomi sintirincuna. Chaitami Bibliapica ‘Diospaj sumaj causai’ nin.

3. ¿Cai yachaipica imatataj ricugrinchij?

³ Jesús charishca llaquicunataca pi mana apashunchu. Shinapish Jesusta catijcunaca shujtaj llaquicunatami charishun (Mateo 16:24, 25, NM; Juan 15:20). Chaimantami huaquinpica Jesús shina sustarishca cashun. Pero ama dimastij sustaringapajca ¿imatataj rurana canchij? Cai yachaipica Jesusca sumajta causangapaj imata rurashcatami ricugrinchij.  Shinallataj ñucanchijpish llaquicunata charishpaca tranquilo sintiringapaj imata rurana cashcatami ricugrinchij.

4. Jesusca manaraj huañushpaca ¿ima shinataj 1 Tesalonicenses 5:17-pi nishcata pajtachirca?

⁴ (1 Tesalonicenses 5:17-ta liyipai). Jesusca pai huañuna punllapica achca cutinmi Diosta mañarca. Por ejemplo, pai huañushcata ima shina yuyarina cashcata yachachicushpami manaraj tandata, vinota pasachishpa Diosta mañarca (1 Corintios 11:23-25). Qꞌuipaca pascua micuita rurashca lugarmanta manaraj rishpami paita catijcunahuan Diosta mañarca (Juan 17:1-26). Chai huashaca paita catijcunandij Getsemaní shuti huertaman chayashpami tauca cutin Diosta mañarca (Mateo 26:36-39, 42, 44). Ña huañucushpapish Diostami mañarca (Lucas 23:46).

5. ¿Jesusta catijcunaca imamantataj mancharcacuna?

⁵ Jesusca chai tutaca Diosta mañanata mana saquishcamantami llaquicunata ahuantarca. Pero apostolcunaca mana chaita rurarcachu. Chaimantami llaquicuna japijpica mancharcacuna (Mateo 26:40, 41, 43, 45, 56). Ñucanchijpish Jesús shina Diosta mañarashpami llaquicunata ahuantashun. Pero Diosmanca ¿imatataj mañai pudinchij? Ricushun.

6. ¿Diospi tucui shunguhuan crishpaca imamantataj tranquilo sintirishun?

⁶ Diabloca Jesusta catijcunatami llaquichisha ninga (Lucas 22:31). Chaimantami tucui shunguhuan Diosta paipi cringapaj mañana canchij (Lucas 17:5; Juan 14:1). Diospi tucui shunguhuan crishpaca llaquicuna jahuanpi jahuanpi japijpipish  tranquilomi sintirishun. Llaquicunata allichingapaj ña tucuita rurashca huashaca Diospaj maquipimi saquina canchij. Paimi ñucanchijta ima shina ayudanata alli yachan (1 Pedro 5:6, 7).

7. ¿Huauqui Robertmantaca imatataj yachanchij?

⁷ Ima llaquicuna ricurijpipish Diosta mañashpaca tranquilomi sintirishun. 80 huatacunata charij huauqui Robertmanta yachashun. Paica ancianomi can. Robertca: “Shuj tiempoca cullquita mana charircanichu. Anciano canatapishmi saquircani. Pero Filipenses 4:6, 7-pi ima nishcata yuyarishpami cai llaquicunata chꞌimbapurarcani. Llaquicunamanta sustari callarishpaca Jehová Diostami mañani. Diosta ashtahuan mañashpaca tranquilomi sintirini” ninmi.

8. Juan 8:29-pi nishca shinaca ¿Jesusca imamantataj tranquilo sintirirca?

⁸ (Juan 8:29-ta liyipai). Jesusca paita llaquichicujpipish tranquilomi sintirirca. Paica llaquicuna horaspimi Diosta tucui shunguhuan cazurca. Paipaj Yayata cushichicushcamantami tranquilo sintirirca. Shinallataj Jehová Diosta cꞌuyashcamantami paita sirvina yuyailla causarca. Por ejemplo, Jesusca jahua pachapi cashpaca paipaj Yayatami tucuita rurashpa ayudarca (Proverbios 8:30). Cutin cai Allpapi cashpaca tucui shunguhuanmi paipaj Yayamanta yachachirca (Mateo 6:9; Juan 5:17). Chaimantami contento sintirirca (Juan 4:34-36).

9. Predicacionpi ocupado cashpaca ¿imamantataj tranquilo sintirinchij?

 ⁹ Jesús shina cashcataca ¿ima shinataj ricuchishun? Pai shinami Diosta tucui shunguhuan cazuna canchij. Diospajta ruranapipish ocupadomi cana canchij (1 Corintios 15:58, NM). Huillanaman rishpaca ñucanchij problemacunamantaca mana llaquiricushunchu (Hechos 18:5). Por ejemplo, predicacionpica gentecunaca ñucanchijtapish yallimi problemacunata charishcata ricunchij. Pero chai gentecuna Diosta cꞌuyai callarishpa, paita cazushpaca paicunapaj causaica allimi rin. Chaimi cushilla causancuna. Chaita ricushpami ñucanchijtapish Jehová Dios cuidanata tucui shunguhuan crinchij. Chaimantami tranquilo sintirinchij. Shuj panica depresión ungüitami charin. Chaimantami huaquinpica mana imapaj valishca laya sintirin. Paica: “Predicacionpi ocupada cashcamantami Jehová Diospajman ashtahuan cꞌuchuyashcani. Chaimi tranquila sintirini” ninmi.

10. ¿Pani Brendamantaca imatataj yachacunchij?

¹⁰ Cunanca Brenda shuti panimanta yachashun. Paipish paipaj ushushipish ancha ungüihuanmi can. Pani Brendaca silla de ruedaspimi purin. Fuerzapish tucurij layami sintirin. Chashna jahuapish huasin huasin rishpami Diospaj Shimita huillan. Cartacunahuanpishmi Diospaj Shimita huillan. Paica: “Cunan tiempopi ñuca ungüipaj mana jambi tiyashcatami intindircani. Chaimi predicanallapi yuyaita churashcani. Predicashpami gentecunata ima shina ayudanata yuyani. Shamuj punllapi shuj sumaj esperanzata charinapipish yuyani. Chashnami ñuca preocupacioncunata cungarini” ninmi.

11-13. a) Apostolcunapish, shujtajcunapish Jesuspaj alli amigocuna cashcataca ¿ima shinataj ricuchircacuna? b) Amigocuna mana saquishpa ayudajpica Jesusca ¿ima shinataj sintirirca?

¹¹ Jesusca Diosmanta huillacushpaca achca llaquicunatami charirca. Chashna jahuapish apostolcunaca paita mana saquircachu. Proverbios 18:24–pica: “Maijancunaca quiquin huauquindijtapish yallimi apanacuncuna” ninmi. Cai verso nishca shinami apostolcunaca Jesuspaj alli amigo cashcata ricuchircacuna. Chaimi Jesusca paicunatapish achcata cꞌuyarca. Chai tiempopica Jesuspaj propio huauquicunaca mana paipi crircacunachu (Juan 7:3-5). Huaquinpicarin paipaj familiaca locomi can nircacunami (Marcos 3:21). Pero apostolcunaca mana chashna carcacunachu. Chaimi pai huañuna tutaca Jesusca: “Ima llaquicunahuan cajpipish, cancunaca ñucahuanmari canguichij” nirca (Lucas 22:28).

¹² Apostolcuna pandarijpipish Jesusca mana chaita ricucurcachu. Chaipaj randica paipi tucui shunguhuan crishcatami ricucurca (Mateo 26:40; Marcos 10:13, 14; Juan 6:66-69). Chaimi último tutata paicunahuan cashpaca: “Cancunamanca ñuca Yaya imallata ruracujtaca tucuitami yachachircani. Chaimanta cancunaca ñucahuan alli apanacujcunami canguichij” nirca (Juan 15:15). Paipaj amigocunapish Diosmanta huillacujta ricushpami Jesusca cushilla sintirirca (Lucas 10:17, 21).

¹³ Jesús predicashpa catichunca achca cꞌaricuna, huarmicunami paita ayudarca. Por ejemplo, huaquincunaca paicunapaj huasipi micuchunmi cayarcacuna (Lucas 10:38-42; Juan 12:1, 2). Shujtajcunaca  paihuanmi viajaj carca. Imalla charishcacunatapish cushpami ayudarcacuna (Lucas 8:3). Jesusca alli amigo cashcamantami alli amigocunata charirca. Paica shujtajcunapaj allicunata rurajmi carca. Mana rurai tucushcataca mana mañajchu carca. Ashtahuancarin paipaj amigocuna juchayuj cashpapish ayudashcamantami agradicirca. Amigocuna chashna ayudajpimi Jesusca tranquilo sintirij carca.

14, 15. a) ¿Alli amigocunata charingapajca imatataj rurana canchij? b) ¿Alli amigocunaca ima shinataj ayudancuna?

¹⁴ Alli amigocunaca Diosta tucui shunguhuan cazuchunmi ayudan. Chashna amigocunata charingapajca ñucanchijrajmi alli amigocuna cana canchij (Mateo 7:12). Por ejemplo, Bibliapica: ‘Shujtajcunata ayudangapaj tucuita ruraichij. Imata mana charijcunamanpish cuichij’ ninmi (Efesios 4:28). ¿Ñucanchij huauqui panicuna imapi ayudachun minishtinchu? Shuj huauqui o panichari huasimanta mana llujshi pudin. Paicuna imata randishpa cuchun minishtijpica shungumantami ayudana canchij. Cutin shuj familia cullquita mana charijpica micunatami cuna canchij. Chashnallataj ¿Internetpi jw.org^® paginaman, JW Library^® programaman yaicunata yachanchijchu? ¿Chaipi imalla tiyajta yachanchijchu? Chaita yachashpaca huauqui panicunapish chaiman yaicuchun yachachishunchij. Shujtajcunata chashna ayudashpaca contentomi sintirishun (Hechos 20:35).

 ¹⁵ Llaquicunata charijpica ñucanchij amigocunaca mana saquingachu. Ashtahuanpish tranquilo sintirichunmi ayudangacuna. Por ejemplo, Job runa ima shina sintirishcata parlajpica Eliú runaca allimi uyarca. Ñucanchijpish ima shina sintirishcata amigocunaman huillajpica pacienciahuanmi uyangacuna (Job 32:4). Shinapish paicuna ñucanchijpaj randi ima decisioncunata agllachunca mana shuyanachu canchij. Ashtahuanpish paicuna Bibliahuan ima consejota cujpica cazunami canchij. Chaimi yachaisapa runa shina cashun (Proverbios 15:22). Cutin imata minishticushpaca rey David shina cashunchij. Paica amigocuna ayudasha nijpica mana jatun tucushpami ayudachun saquirca (2 Samuel 17:27-29). Chashna amigocunaca Dios cushca regalo shinami can (Santiago 1:17).

16. ¿Jesusmantaca imamantataj tranquilo causai tucunchij?

¹⁶ (Filipenses 4:6, 7-ta liyipai). Diosca, cushi causaica Jesusmantami shamun ninmi. ¿Imamantataj chashna nin? Yuyashun. Diosca Jesusmantami ñucanchij juchacunata perdonai tucun. Caita yachashpaca ¿manachu cushilla sintirinchij? (1 Juan 2:12). Shinallataj Jesús jahua pachapi ña mandacushcata yachashpa, Diablopaj ruraicunata ñalla tucuchigrishcata yachashpami tranquilo sintirinchij (Isaías 65:17; 1 Juan 3:8; Apocalipsis 21:3, 4). Ashtahuancarin mana manchashpa predicachun Jesús ayudacushcata yachashpami cushilla sintirinchij (Mateo 28:19, 20). Cushilla sintirishcamanta, esperanzata charishcamanta, manchaita ña mana charishcamantaca sumajtami causanchij ¿nachu?

17. a) Tranquilo sintiringapajca ¿imatataj rurana canchij? b) Juan 16:33-pica ¿imatataj yachachin?

¹⁷ Cai temapi yachashca shinaca tranquilo causangapajca Jesuspaj ejemplotami catina canchij. Chaimantami Diostaca punllanta mañana canchij. Pai mandashcatapish tucui shunguhuanmi cazuna canchij. Predicacionpipish ocupadosmi causana canchij. Amigocuna ayudasha nijpipish diosolopagui ninami canchij. Chaita rurajpimi Diospaj sumaj causaica ñucanchij shunguta, yuyaita huaquichinga. Shinallataj Jesús layami ima llaquicunatapish ahuantashun (Juan 16:33-ta liyipai).