¿Jesusca huañugrishpaca imamantataj Salmo 22:1-pi nishca shimicunata nirca?

Jesusca ña huañugrishpaca Mateo 27:46-pi nishca shimicunatami nirca. Chaipica: ‘Ñuca Dioslla, ñuca Dioslla, ¿ima nishpataj ñucataca saquihuanguiyari?’ nircami. Chashna nishpaca Salmo 22:1-pi David nishca shimicunatami pajtachirca (Marcos 15:34). Pero Jesusca chashna nishpaca Jehová Diospi crinata saquishcataca mana nisha nicurcachu. Paica allimi yacharca tucuicunamanta huañunata (Mateo 16:21; 20:28). Pai huañucun horas Jehová Dios paita ayudanata saquinatapish allimi yacharca (Job 1:10). Shinallataj Diospaj munaita pajtachingapajpish decididomi carca. Chashnami Jesusca llaquinaita huañunata yachashpapish Jehová Diostaca tucuipi cazushcata ricuchirca (Marcos 14:35, 36).

Shinaca ¿Jesusca Salmo 22:1-pi nishca shimicunata nishpaca imatashi nisha nicurca? Mana tucuita alli intindishpapish 6 yuyaicunata ricushun. *

Jesusca Salmo 22:1-pi nishca shimicunata nishpaca paita huañuchicun horas Jehová Dios mana ayudanatami nisha nicushcanga. Jesusca runacuna laya tucushpa tucui gentecunamanta huañunataca allimi yacharca. Pero pai huañucun horasca Yayitu Diosca paitaca mana ayudarcachu (Hebreos 2:9).

Jesusca Salmo 22:1-ta nicushpaca gentecuna tucui Salmo 22-ta yuyarichunmi nicushcanga.  Chai tiempopica judiocunaca achca salmocunatami de memoria yachajcuna carca. Jesús chashna yuyachijpica paicunaca Salmo 22-taca tucuimi yuyarishcangacuna. Tal vez Jesús chashna yuyachijpica paipaj discipulocunaca Salmo 22-pi pai huañunamanta parlashca profeciacunatami yuyarishcangacuna (Salmo 22:7, 8, 15, 16, 18, 24). Shinallataj Salmo 22-ta yuyarishpaca Jehová Dioslla tucui Allpata mandana profeciamantami yuyarishcangacuna (Salmo 22:27-31).

David nishca shimicunata nishpaca Jesusca ima culpata mana charishcata ricuchingapajmi nisha nicushcanga. Jesusca manaraj huañushpaca yangamanta juchachishcacunatami ahuantana carca (Mateo 26:65, 66). Paitaca leycunapi nishca shinaca mana juzgarcachu. Ashtahuanpish paitaca tuta japishpami rato juzgarcacuna (Mateo 26:59; Marcos 14:56-59). Chaimantami Jesusca Jehová Diostaca: ‘¿Imamantataj ñucataca saquingui? Imata mana rurashcanica’ nicuj shina cashcanga.

Jesusca Salmo 22:1-pi nishcacunata nicushpaca llaquicunahuan cashpapish Jehová Diospaj ñaupajpi alli ricurinatami nicushcanga. Davidpish llaquicunahuan cashpaca Diospaj ñaupajpica allimi ricurirca. Davidca Jehová Dios paita sirvijcunata quishpichinapimi confiarca. Chashna confiajpimi Jehová Diosca paita bendiciarca (Salmo 22:23, 24, 27). Jesuspish caspipi llaquinaita huañucushpapish Diospaj ñaupajpica allimi ricurishpa catirca (Mateo 21:9).

Shinallataj Jesusca cai shimicunata nishpaca paipaj Yaya paita saquijpi llaquilla sintirishcata ricuchingapajmi nicushcanga. Adán y Eva, Jehová Diosta mana cazushcamantami Jesusca llaquinaita sufrishpa huañuna carca. Pero Yayitu Diospaj munaica mana chashnachu carca. Jesusca ima mana allicunataca mana rurarcachu. Pero paica Diablo llulla cashcata ricuchingapaj, gentecunata quishpichingapajmi llaquinaita huañuna carca (Marcos 8:31; 1 Pedro 2:21-24). Jesús huañugricujpica punta cutinmi paipaj Yayaca paita cuidanata saquirca.

Jesusca Salmo 22:1-ta nishpaca paipaj discipulocuna pai imamanta huañuna cashcata intindichunmi nicushcanga. * Jesusca pai caspipi huañushcamanta shujtajcuna paipi mana crinatami yacharca (1 Corintios 1:23). Pero paipaj discipulocunaca Jesús imamanta huañushcatami alli intindircacuna (Gálatas 3:13, 14). Chaimantami paipaj discipulocunaca paitaca shuhuata shinaca mana ricurcacuna. Ashtahuanpish paitaca shuj Quishpichijta shinami ricurcacuna.

Jesusca Salmo 22:1-ta imamanta nishca cashpapish Jehová Diospaj munaita pajtachingapaj caspipi huañuna cashcataca allimi yacharca. Chaimantami paica ña huañugrishpaca ‘ña tucuchishcanimi’ nirca (Juan 19:30; Lucas 22:37). Jesús huañucujpica Jehová Diosca paita cuidanatami saquirca. Chashnami Jesusca Dios mingashcacunata pajtachirca. Shinallataj Dios Quillcachishcacunapi Mesiasmanta parlaj tucui profeciacunatami pajtachirca (Lucas 24:44).