YACHAI 17
Jehová Diosca cantami cꞌuyan
“Mandaj Diosca paipaj cajcunahuanmi cushicun” (SALMO 149:4).
CANTO 108 Jehová Diosca tucuicunatami cꞌuyan
CAITAMI YACHASHUN *
Jehová Diosca paipaj pueblomantaca achcatami cushicun. (Párrafo 1-ta ricui).
1. ¿Jehová Diosca imamantataj paita sirvijcunamantaca cushicun?
JEHOVÁ DIOSCA ñucanchij alli ruraicunatami valoran. Chaimantami paita sirvijcunamantaca cushicun (Salmo 149:4). Ñucanchijpish paipaj amigos cachunmi saquin. Paimanta manataj caruyajpica paipish ñucanchijmantaca manataj caruyangachu. Chaita yachashpaca cushillami sintirinchij (Juan 6:44).
2. ¿Huaquin huauqui panicunaca imamantataj Jehová Diosca mana cꞌuyanchu nishpa yuyancuna?
2 Maijan huauqui panicunaca: “Jehová Diosca paipaj pueblotaca cꞌuyanmi pero ñucataca mana cꞌuyanchu” nishpachari yuyancuna. ¿Imamantataj chashna yuyancuna? Oksana shuti panica huahuaraj cashpami sinchi llaquicunata charirca. * Paica: “Ñucaca bautizarishpaca precursorami tucurcani. Chaimantami cushilla sintirircani. Pero ña 15 huatacuna qꞌuipaca huahuaraj cashpa llaquicunata charishcatami yuyari callarircani. Chaimi Jehová Diosca ñucataca mana cꞌuyanchu, ñuca paita sirvishcacunatapish mana chasquinchu nishpa yuyai callarircani” ninmi. Yua shuti panipish huahuaraj cashpami llaquicunata charirca. Paica: “Shungumantami ñuca causaitaca Jehová Diosman mingarcani. Pero Jehová Diosca ñucataca mana cꞌuyangachu nishpami yuyaj carcani” ninmi.
3. ¿Cai yachaipica ima tapuicunatataj yachashun?
3 Ñucanchijpish cai ishqui panicuna shinami Jehová Diostaca shungumanta cꞌuyanchij. Pero huaquinpica Diosca ñucanchijtaca mana cꞌuyanchu nishpami yuyai callarishun. Cai yachaipica cai catij ishqui tapuicunatami yachashun. ¿Jehová Dios ñucanchijta cꞌuyashcataca imamantataj crina canchij? ¿Chaita cringapajca imatataj rurana canchij?
JEHOVÁ DIOSCA MANA CꞌUYANCHU NISHPA AMA YUYASHUNCHIJ
4. ¿Imamantataj Jehová Diosca mana cꞌuyanchu nishpa mana dudana canchij?
4 Jehová Dios ñucanchijta cꞌuyashcata tucui shunguhuan crishpaca ima llaquicunata charishpapish tucui shunguhuanmi paita sirvishun (Proverbios 24:10). Pero Jehová Diosca ñucanchijta mana cꞌuyanchu nishpa dudai callarishpaca desanimarishunmi. Chashna desanimarijpica Diablomi ñucanchijtaca jahualla pandachisha ninga (Efesios 6:16).
5. ¿Huaquin huauqui panicunaca Jehová Diosca mana cꞌuyanchu nishpa dudai callarishcamantaca imataj tucushcacuna?
5 Huaquin huauqui panicunaca Jehová Diosca ñucanchijtaca mana cꞌuyanchu nishpami dudai callarishcacuna. Chaimantami paicunapaj feca chiriyashca. Congregacionta pushaj huauqui Jamesca: “Ñucaca Betelpi sirvishpapish, shujtaj shimipi predicashpapish Jehová Diosca ñuca sirvishcacunataca mana chasquingachu, ñuca mañashcatapish mana uyangachu nishpami dudai callarircani” ninmi. Tiempo completota sirvij pani Evapish: “Jehová Diosca mana cꞌuyanchu nishpa dudai callarishpaca paita cushilla sirvinatami saquishun” ninmi. Shinallataj huauqui Michaelpish congregacionta pushaj, precursormi can. Paica: “Jehová Diosca ñucanchijmanta mana preocuparinchu nishpa dudai callarishpaca paimantami asha asha cꞌaruyashun” ninmi.
6. ¿Desanimachij yuyaicunata ama charingapajca imatataj rurana canchij?
6 Cai huauqui panicuna nishca shinaca ñucanchij fe ama chiriyachunca Jehová Diosca mana cꞌuyanchu nishpaca mana yuyanachu canchij. Chaimanta desanimachij yuyaicunata ama charingapajca Jehová Diostami ayudachun mañana canchij. Chashna mañajpica Yayitu Diosca shungupipish, yuyaipipish tranquilo sintirichunmi ayudanga (Salmo 139:23; Filipenses 4:6, 7). Ñaupa punllacunapish, cunan punllacunapish Diosta sirvijcunaca desanimachij yuyaicunata ama charingapajmi esforzarishcacuna. Paicunamantami achcata yachai tucunchij. Cunanca apóstol Pablopaj ejemplomanta yachashunchij.
APÓSTOL PABLOPAJ EJEMPLOMANTA YACHASHUNCHIJ
7. ¿Pablopish ima problemahuantaj chꞌimbapurana carca?
7 Ñucanchijca maipica achca mingashcacunata charishcamanta, chaita mana tucuita pajtachi tucushcamantami desanimarinchij. Apóstol Pablopish congregacionpi achca mingashcacunata pajtachinata charishcamanta, huauqui panicuna yuyailla cashcamantami preocuparirca (2 Corintios 11:23-28). Cutin maipica ancha ungüihuan cashcamantami llaquilla sintirinchij. Apóstol Pablopish ancha ungüimanta mana alliyai tucushcamantachari llaquilla sintirirca (2 Corintios 12:7-10). Shinallataj tal vez maipica cutin cutin pandarishcamantami desanimados sintirinchij. Pablopish juchayuj cashcamantami cada punlla allita rurangapajca esforzarina carca (Romanos 7:21-24).
8. ¿Apóstol Pabloca llaquicunahuan cashpapish imacunatataj alli yacharca?
8 Apóstol Pabloca cashna llaquicunata charishpapish Yayitu Diostami sirvishpa catirca. Paica juchayuj cashcata yachashpapish paita quishpichingapaj Jehová Dios, Jesusta cushcatami alli intindirca. Shinallataj Jesuspi feta churajcunaca tucuicuna huiñai causaita chari tucushcatami alli intindirca (Juan 3:16; Romanos 6:23). Ashtahuanpish jatun juchacunamanta arrepintirijcunata Jehová Dios perdonanatami tucui shunguhuan crirca (Salmo 86:5). Caicunata alli intindishpami Pabloca cushilla sintirirca.
9. ¿Gálatas 2:20-pi Pablo nishcacunaca imatataj yachachin?
9 Apóstol Pabloca Jehová Dios, Jesusta paimanta huañuchun cushcamantami paita achcata cꞌuyashcata crirca (Gálatas 2:20-ta liyipai). * Gálatas 2:20-pica apóstol Pabloca: “Diospaj Churica ñucata c’uyashpami paipaj causaita ñucamanta curca” nircami. Chashnami Jehová Dios huauqui panicunatapish, paitapish cꞌuyashcata intindirca. Chaimantami Romapi causaj huauqui panicunataca ‘ñucanchij juchayujcuna cajpiraj Cristo ñucanchijmanta huañujpimi Diosca ñucanchijta cꞌuyaj cashcata ricuchin’ nircami (Romanos 5:8).
10. ¿Romanos 8:38, 39-pica imatataj yachanchij?
10 (Romanos 8:38, 39-ta liyipai). Apóstol Pabloca Jehová Dios paita cꞌuyashcataca tucui shunguhuanmi crirca. Paica Diospaj cꞌuyaimantaca pi mana anchuchi tucungachu nishpami quillcarca. Shinallataj paica Jehová Dios israelitacuna pandarijpipish paicunata pacienciahuan perdonashcata, paicunaman cꞌuyaita ricuchishcataca allimi yacharca. Chaimantami paica: “Jehová Diosca paipaj Churitami ñucamanta huañuchun curca. Pai ñucata cꞌuyashcataca mana dudanichu” nirca (Romanos 8:32).
Jehová Diosca ñucanchij pandarishcacunallataca mana ricunchu. Ashtahuanpish cunanmanta paita sirvingapaj esforzarishcatami valoran. (Párrafo 11-ta ricui). *
11. 1 Timoteo 1:12 al 15-pi nishca shinaca ¿apóstol Pabloca imamantataj Jehová Dios paita cꞌuyashcata tucui shunguhuan crirca?
11 (1 Timoteo 1:12-15-ta liyipai). Apóstol Pabloca Diosta manaraj rijsishpaca Diosta sirvijcunatami catirashpa llaquichishpa carcelpi churarca. Shinallataj maijancunatacarin huañuchishpami ayudarca (Hechos 26:10, 11). Chaita rurashcata yuyarishpami Apóstol Pabloca imapaj mana valishca shina sintirishcanga. Caipi yuyashun, Apóstol Pabloca Diosta manaraj rijsishpaca Diosta sirvij cusa huarmitami huañuchichun apoyashcanga. Pero qꞌuipaca ¿paicunapaj churita rijsishpaca ima shinashi sintirishcanga? Pabloca llaquillami sintirishcanga. Pero pai ima rurashcapi yuyailla canapaj randica Jesús paipaj juchacunamanta huañushcatami tucui shunguhuan crirca. Chaimi Pabloca Diosca yallitaj llaquij cashcatami ñucamanca ricuchirca nirca (1 Corintios 15:3, 10). ¿Apóstol Pablomantaca imatataj yachanchij? Ñucanchijpish Jesús cada unomanta huañushcatami tucui shunguhuan crina canchij. Chashnami Jehová Dioshuanca alli apanacushun (Hechos 3:19). Jehová Diosca ñucanchij imapi pandarishcacunallataca mana ricunchu. Paica cunanmanta paita sirvingapaj esforzarishcatami ricun (Isaías 1:18).
12. 1 Juan 3:19, 20-pi nishca shinaca ¿imapaj mana valishca shina sintirishpaca imatataj rurana canchij?
12 Maipica ñucanchij shungu pandachijlla cashcamantami imapaj mana valishca shina sintirinchij (1 Juan 3:19, 20-ta liyipai). Chaimantachari Jesús ñucanchijmanta huañushca cajpipish Yaya Diosca mana perdonangachu nishpa yuyashun. Chashna sintirishpaca Jehová Dios ñucanchij shunguta yalli yachaj cashcatami yuyarina canchij. Jehová Diosca mana llaquingachu, mana perdonangachu nishpa yuyanapaj randica pai ñucanchijta cꞌuyaj, perdonaj cashcatami tucui shunguhuan crina canchij. Caita cringapajca cada punllami Bibliata estudiana canchij. Shinallataj Yayitu Diostami mañana canchij. Huauqui panicunahuanpish pasangapajmi tiempota surcuna canchij. Imamanta caita rurana cashcata ricushun.
¿JEHOVÁ DIOS ÑUCANCHIJTA CꞌUYASHCATA CRINGAPAJCA IMATATAJ RURANA CANCHIJ?
13. ¿Imamantataj Bibliata estudiana canchij? (“ Diospaj Shimimi ñucanchijta ayudan” nishca recuadrota ricui).
13 Bibliata cada punlla estudiashunchij. Cada punlla Bibliata estudiashpaca Jehová Diostami ashtahuan alli rijsishun. Pai ñucanchijta cꞌuyaj cashcatapishmi yachashun. Chashnami pandachij yuyaicunata ñucanchij shungumanta anchuchishun (2 Timoteo 3:16). Congregacionta pushaj huauqui Kevinca maipica imapaj mana valishca shinami sintirirca. Paica: “Salmo 103-ta liyishpa chaipi cutin cutin yuyashpami Jehová Dios ima shina cꞌuyaj, llaquij, mana pꞌiñarij cashcata cuentata curcani” ninmi. Párrafo 5-pi parlashca pani Evapish: “Chishita Jehová Dios cꞌuyaj, llaquij, ñucanchijta intindij cashcata yuyarishpaca ñuca shungupimi tranquila sintirini. Ñuca fepishmi sinchiyan” ninmi.
14. ¿Imamantataj Diosta mañana canchij?
14 Diosta mañanata amataj saquishunchij (1 Tesalonicenses 5:17). Dioshuan alli apanacungapajca ñucanchij ima shina sintirishcata, ima shina yuyashcata, imamanta preocuparishcatami shuj amigoman shina tucuita huillana canchij. Chashnami paipi confiashcata ricuchishun (Salmo 94:17-19; 1 Juan 5:14, 15). Párrafo 2-pi parlashca pani Yuaca: “Jehová Diosta mañacushpaca shuj jefeman punllapi imata rurashcata parlacuj shinaca mana parlanichu. Ashtahuanpish Jehová Dios shuj cꞌuyaj yaya shina cashcamantami paimanca ñuca ima shina sintirishcataca shungumanta tucuita parlani” ninmi (“ ¿Ñachu liyishcangui?” nishca recuadrota ricui).
15. ¿Jehová Diosca ñucanchijta cꞌuyashcamantaca imatataj cushca?
15 Huauqui panicunahuan pasangapaj tiempota surcushunchij. Jehová Diosca ñucanchijta cꞌuyashcamantami shuj familiata shina huauqui panicunataca cushca. Paicunaca ñucanchijtami cꞌuyancuna. Chaimantami shuj sumaj valishca regalo can (Proverbios 17:17; Santiago 1:17). Apóstol Pabloca Colosaspi tiyaj congregacionman cartata quillcacushpaca huaquin huauquicunami ñucata animashca, cushichishca nircami (Colosenses 4:10, 11). Jesucristopish paipaj amigocuna, angelcuna ayudachunmi minishtirca. Chaimantami paicuna ayudajpica shungumanta agradicirca (Lucas 22:28, 43).
16. ¿Jehová Dios ñucanchijta cꞌuyashcataca huauqui panicunaca ima shinataj ricuchincuna?
16 Huauqui panicunapaj ayudatami mashcana canchij. Ñucanchijca desanimachij yuyaicunata charishpaca sinchi feta charij huauqui panicunahuanmi parlana canchij. Chaita rurashpaca mana sinchi feta charishcataca mana ricuchishunchu. Ashtahuanpish paicunapaj ayudata mañajpica ñucanchijtami sinchiyachingacuna. Párrafo 5-pi parlashca huauqui Jamesca: “Ñuca llaquilla, desanimarishca sintirishpaca congregacionpi sinchi feta charij huauqui panicunamanmi ima shina sintirishcata parlani. Paicunami ñucataca alli uyancuna, pacienciahuan ayudancuna. Shinallataj ñucatapish achcata cꞌuyashcatami ricuchincuna. Chashnami Jehová Dios ñucamanta preocuparishcata, ñucata cꞌuyashcata cuentata cuni” ninmi. Chaimanta congregacionpi alli amigocunata charinami valishca can.
JEHOVÁ DIOSPAJ CꞌUYAIMANTA AMATAJ CARUYASHUNCHIJ
17, 18. ¿Imamantataj Diablopaj llullacunata mana crina canchij?
17 Diabloca allita ruranata saquichun, Diosca ñucanchijtaca mana cꞌuyanchu, juchayuj cashcamanta mana perdonangachu nishpa yuyachunmi munan. Pero ña ricushca shinaca chaica Diablopaj llullami can.
18 Jehová Diosca paita sirvijcunataca cada unotami achcata cꞌuyan. Shinallataj paita sirvijcunataca tucui allita rurashcacunamantami valoran. Ñucanchijpish Jesús shinallataj Jehová Diosta tucuipi cazujpica paica ñucanchijta cꞌuyanataca manataj saquingachu (Juan 15:10). Chaimanta Diablopish, ñucanchij shungupish Jehová Diosca mana cꞌuyanchu nishpa pandachisha nijpica amataj crishunchij. Chaipaj randica Jehová Dios ñucanchijmanta preocuparij, cꞌuyaj cashcata tucui shunguhuan crishunchij. Jehová Diosca paipaj pueblomanta, canmantapish achcatami cushicun.
CANTO 141 Causaica Dios cushca regalomi
^ par. 5 Maijan huauqui panicunaca: “Jehová Diosca mana cꞌuyanchu” nishpami yuyancuna. Cai yachaipimi Jehová Dios cada unota cꞌuyashcata yachashun. Shinallataj chaita tucui shunguhuan cringapaj imata rurana cashcatami yachashun.
^ par. 2 Cai yachaipica huaquin shuticunatami cambiashcanchij.
^ par. 9 Gálatas 2:20, NWT: “Cristohuanmi caspipi clavashca cani. Ña mana ñucapajllaca causanichu. Ashtahuanpish Cristomi ñucahuan shuj shinalla causan. Cunanca Diospaj Churipi crishca shinami causani. Paica ñucata cꞌuyashpami paipaj causaita ñucamanta curca”.
^ par. 68 FOTOCUNAMANTA: Pabloca Jehová Diosta manaraj rijsishpaca huauqui panicunatami prezupi churarca. Pero Jesusta rijsishpaca huauqui panicunatami animashpa sinchiyachirca. Chaicunamanta maijan huauqui panicunaca Pablo catirashpa llaquichishca familiacunami cashcanga.
