1, 2. a) ¿Jehová Diosca ñucanchijta quishpichingapajca imatataj rurarca? b) ¿Jesusca imamantataj huañuna carca?

ADÁN juchata rurashcamantami paipish, paipaj huahuacunapish huiñaita causanata chingachircacuna. Adanca paillatajmi juchata rurarca, chaimantami huañurca. Pero paipaj huahuacunaca Adán juchata rurashcamantaca mana ima culpata charircacunachu (Romanos 5:12, 14). Pero, ¿Jehová Diosca Adanpaj huahua huahuacunata quishpichingapajca imatataj rurarca? Jehová Diosca Adanpaj culpamanta huañuimanta, juchamanta quishpichingapajmi paipaj Churita curca (Génesis 3:15; Marcos 10:45; Juan 6:51).

² ¿Jesusca imamantataj huañuna carca? Moisesman cushca leypica shuj causaita chingachijpica caishuj causaihuanmi pagana carca (Éxodo 21:23, 24). Shinallataj Adán jucha illaj causaita pirdishcamantami Jesusca paipaj jucha illaj causaita cuna carca (Romanos 5:17). Jesusca paipaj causaita cushpami jucha illaj causaita randij shina carca (1 Corintios 15:22). Chashnami Jesuspi crijcunaca huiñai causaita chari tucuncuna. Chaimantami Jesusca paipi crijcunapaj ‘huiñaita causaj Yaya’ can (Isaías 9:6; Romanos 3:23, 24).

3. Juan 14:31 y 15:13-pi nishca shinaca ¿Jesusca imamantataj paipaj jucha illaj causaita ñucanchijmanta curca?

³ Jesusca Jehová Diosta cꞌuyashpa, ñucanchijta cꞌuyashpami  paipaj causaita curca (Juan 14:31; 15:13-ta liyipai). Shinallataj paica huañungacamami Jehová Diospaj munaita rurarca. Chaimantami Jehová Dios munashca shina huiñai causaita charishun. Cai yachaipimi Jesús huañungapaj llaquinaita sufrichun Jehová Dios imamanta saquishcata ricushun. Shinallataj apóstol Juanpish Jesús huañushcamanta ima shina agradicishcata, ñucanchijpish Jehová Diosta, Jesusta ima shina agradicinatami ricushun.

4. ¿Jesustaca ima shinataj huañuchircacuna?

⁴ ¿Jesusca huañuna ñaupallaca ima laya llaquicunatataj charirca? Paitaca Romamanta soldadocunaca prezu apashpami sinchita macarcacuna. Pero Jesusca angelcunata paita ayudachun mañanapaj randica chai llaquitaca aparcallami (Mateo 26:52-54; Juan 18:3; 19:1). Cai contracunaca Jesustaca manchanaita macashpami chugrichircacuna. Qꞌuipaca paita huañuchina lugarcama caspita apachunmi chashna chugrichishca jahuapi apachircacuna. Paicunaca Jesús mana apai tucushcata ricushpami shujtaj runa chai caspita apachun obligarcacuna (Mateo 27:32). Ña Jesusta huañuchina lugarman chayashpaca contracunaca maquipi, chaquipi clavashpami shuj caspipi huarcurcacuna. Pai huarcushca cashcamantami paipaj chaqui, maquica ashtahuan jutcurirca. Contracuna Jesusmanta burlarishpa llaquichicujpimi Jesuspaj amigocuna, paipaj mamaca achcata huacacurcacuna (Lucas 23:32-38; Juan 19:25). Paica huarcushca cashcamantami samaitaca mana aisai tucushcanga. Jesusca huaquin horascunatami chashna sufricurca. Paica Jehová Diosta tucuipi cazushcata yachashpami Jehová Diosta mañashpa umata huarcushpa huañurcalla (Marcos 15:37; Lucas 23:46; Juan 10:17, 18; 19:30).

5. ¿Jesusca imamantataj ashtahuan preocuparirca?

⁵ Jesusca paita llaquinaita llaquichishpa huañuchinataca allimi yacharca. Pero chaimantaca mana preocuparircachu. Ashtahuancarin contracuna Diostami cꞌamicungui, paitaca mana respetanguichu ninata yachashpami ashtahuan preocuparirca (Mateo 26:64-66). Jesusca chashna paita yangamanta juchachichunca mana munarcachu. Chaimantami Jehová Diostaca cashna llaquimanta anchuchichun mañarca (Mateo 26:38, 39, 42). Shinapish ¿Jehová Diosca imamantataj paipaj Churi llaquita apachun, huañuchunca saquirca? Caimanta quimsa yuyaicunata ricushun.

6. ¿Jesusca imamantataj shuj caspipi huarcushca huañuna carca?

⁶ Judiocunaca Dios cushca mandashcacunata cazushun nishpapish paicunaca mana cazurcacunachu. Chaimantami paicunaca huañuiman, llaquiman condenashcacuna carca. Shinallataj Adanpaj culpamantapishmi paicunaca huañuiman, juchaman condenashcacuna carca (Romanos 5:12). Moisesman cushca leypica shuj runa jatun juchata rurashpaca huañunami carca. Cai runa huañujpica maipica paitaca caspipimi huarcujcuna carca (Deuteronomio 21:22, 23; 27:26). * Judiocuna ama llaquiman, huañuiman condenashca cachunmi Jesusca paicunamanta shuj caspipi huarcushca huañuna carca. Paica judiocunapaj randimi chashna  llaquichichun saquina carca (Gálatas 3:10, 13).

7. ¿Jehová Diosca imamantataj paipaj Churi shuj caspipi llaquinaita huañuchun saquirca?

⁷ Chashnallatajmi Jehová Diosca paipaj Churitaca sacerdotecunata mandaj cachun yachachingapaj chashna llaquinaita huañuchun saquirca. Jesusca cashna llaquicunahuan cashpa Jehová Diosta cazuna mana jahualla cashcatami intindirca. Paica Jehová Diosta rogashpa, huacashpami cutin cutin mañarca. Chaimantami Jesusca Diosta sirvijcuna llaquicunahuan cajpipish ima shina sintirishcata intindin, ima shina ayudanatapish yachan. Caita yachashcamantaca cushillami sintirinchij (Hebreos 2:17, 18; 4:14-16; 5:7-10).

8. ¿Jehová Diosca paipaj Churi achca llaquicunata charichunca imamantataj saquirca?

⁸ Diabloca Diosta sirvijcunataca: “Yaya Dios bendiciajllapimi sirvinguichij, cancunaca Adán shina Diostaca mana cꞌuyanguichijchu” nishpami juchachin (Job 1:9-11; 2:4, 5). Pero Jesusca sinchi llaquicunata charishpapish huañuna horascamami Jehová Diostaca tucuipi sirvirca. Chashnami paica ricuchirca runacunapish Jehová Diostaca cꞌuyaimanta sirvi tucushcata. Shinallataj Diablo llulla cashcatapishmi ricuchirca. Jehová Diosca paipaj Churi huañuna horascama paita sirvinata yachashpami cashna llaquicunata charichun saquirca.

9. ¿Apóstol Juanca ima alli ejemplotataj curca?

⁹ Jesús huañushcapi feta churajcunaca llaquicuna tiyajpipish, jarcaicuna tiyajpipish paicunaca tucui causaipimi Jehová Diosmanta predicashpa caticushcacuna. Apóstol Juanpaj ejemplopi yuyashun. Paica Jesús tucuicunamanta huañushcatami 60 huatacunata yalli huillashcanga. Pai 100 huatacunata charijpica Roma llajtata mandaj gobiernoca Jehová Diosmanta, Jesusmanta huillacushcamantami Patmos islaman prezu cacharca (Apocalipsis 1:9). Apóstol Juanca sinchi feta charishpa, llaquicunata ahuantashpaca ñucanchijman alli ejemplotami cushca.

10. ¿Juanca ima shinataj Jesús huañushcamanta agradicishcata ricuchirca?

¹⁰ Apóstol Juanca pai quillcashca librocunapica Jesusta cꞌuyashcata, pai huañushcamanta achca cutin agradicishcatami ricuchirca. Paica 100 yalli cutincunami Jesús huañushcamanta beneficiari tucushcataca quillcarca. Por ejemplo, Juanca: “Maijan juchallishpaca, ñucanchijmanta Yayahuan rimajtami charinchij. Paica cashcata ruraj Jesucristomi” nishpami quillcarca (1 Juan 2:1, 2). Shinallataj Jesusmantapish huillana importante cashcatami quillcarca (Apocalipsis 19:10). Chashnami Juanca Jesús paipaj causaita cushcamanta shungumanta agradicishcata ricuchirca. ¿Ñucanchijpish ima shinataj chashnallataj shungumanta agradicishcata ricuchina canchij?

11. ¿Tentacioncunapi ama urmangapajca imatataj rurana canchij?

¹¹ Jesús huañushcata agradicishpaca tentacioncunapi mana urmangapajmi esforzarina canchij. Maijan gentecunaca: “Juchapi ama urmangapajca mana esforzarinachu canchij. Diosca perdonangallami” nishpami yuyancuna. Pero ñucanchijca mana chashna yuyanachu canchij. Chaipaj randica ima tentacioncuna ricurijpica: “Jehová Diospish, Jesuspish ñucanchijta ayudangapajmi  tucuita rurashca. ¿Maitataj paicunataca llaquichishunyari?” nishpami yuyana canchij. Shinallataj Jehová Diostaca ama tentacionpi urmangapajmi ayudahuai nishpa mañana canchij (Mateo 6:13).

12. ¿1 Juan 3:16-18-pi nishcacunataca ima shinataj pajtachina canchij?

¹² Jesús huañushcata agradicishpaca ñucanchij huauqui panicunatami cꞌuyashun. Jesusca ñucanchij huauqui panicunata cꞌuyashcamantami paipaj causaitapish curca. Chaitaca mana cungarinachu canchij (1 Juan 3:16-18-ta liyipai). Chaimantami ñucanchij huauqui panicunataca alli tratashpa paicunaman cꞌuyaita ricuchina canchij (Efesios 4:29, 31–5:2). Por ejemplo, paicuna ungujpi, jatun terremoto tiyashcamanta o acapana tiyashcamanta llaquicunahuan chꞌimbapuracujpimi paicunataca ayudana canchij. Pero ¿huauqui panicuna ñucanchijta llaquichijpica ima shinataj paicunata cꞌuyashcata ricuchishun?

13. ¿Imamantataj perdonana canchij?

¹³ ¿Pi ñucanchijta llaquichijpica resintirishca saquirishcanchijchu? (Levítico 19:18). Chashna resintirishca saquirishpaca cai consejopimi yuyana canchij. Colosenses 3:13-pica: “Maijan caishujta pꞌiñashpa juchachijpica, caishuj chaishuj ahuantanacushpa, ima shinami cancunata Cristo perdonarca, chai shinallataj caishuj chaishuj perdonanacuichij” ninmi. Huauqui panicunata siempre perdonashpaca Jesús ñucanchijmanta huañushcatami agradicishcata ricuchishun. ¿Jehová Dios paipaj Churita cushcamantaca ima shinataj ashtahuan agradicina canchij?

14. ¿Cada punlla imata rurangapajtaj esforzarina canchij?

¹⁴ Jesusta cushcamantami Jehová Diosta cada punlla agradicina canchij. India llajtamanta 83 huatacunata charij pani Joannaca: “Jesús huañushcamanta Jehová Diosta cada punlla agradicinataca manataj saquinichu” ninmi. Ñucanchijpish imapi pandarishpaca cada punllami Jehová Diostaca perdonachun mañana canchij. Jatun juchapi urmashpaca congregacionta pushaj huauquicunamanpishmi huillana canchij. Paicunami alli uyashpa Bibliahuan consejangacuna. Shinallataj Jesús ñucanchijmanta huañushcamanta Yayitu Dios perdonachunmi mañangacuna (Santiago 5:14-16).

15. ¿Imamantataj Jesús huañushcamanta estudiana canchij?

 ¹⁵ Jesús huañushcata ñucanchij yuyaipi charishunchij. 73 huatacunata charij pani Rajamanica: “Jesús paipaj causaita cungapaj llaquinaita sufrishcamanta liyicushpaca ñuca ñahuimi huiqui muyurin” ninmi. Ñucanchijpish Jesús paipaj causaita cungapaj llaquinaita sufrishcapi yuyacushpaca chashnallatajmi sintirishcanchij. Pero cutin cutin chashna yuyashpaca Jehová Diosta, Jesustami ashtahuan cꞌuyashun. Chaimanta Bibliapi Jesús ñucanchijmanta ima shina huañushcata ashtahuan yachangapajca tiempota surcushunchij.

16. ¿Jesús tucuicunamanta huañushcataca imamantataj yachachina canchij? (Página 1-pi tiyaj fotota ricui).

¹⁶ Jesús ñucanchijta quishpichingapaj huañushcata gentecunaman yachachishunchij. Chashnami paita agradicishcata ricuchishun. Jesús ima shina huañushcata yachachingapajca achca publicacioncuna, videocunami tiyan. Por ejemplo, Alli huillaicuna nishca folletopi, Lección 4-pica “¿Jesusca pitaj can?” nishca yachaitami ricuchi tucunchij. Mana cashpaca Bibliamanta yachashunchij nishca libropi capítulo 5-pi “¿Jesusca imamantataj huañuna carca?” nishcata ricuchishunchij. Shinallataj cada huata Jesús huañushcata yuyarina tandanacuiman rishpa, shujtajcunatapish chaiman richun invitashpaca paita agradicishcatami ricuchinchij. Jehová Diosca ñucanchijmanca paipaj Churimanta yachachina regalotami cushca.

17. ¿Jesús paipaj causaita cushcamantaca imamantataj valorana canchij?

¹⁷ Ña yachashca shinaca Jesús paipaj causaita cushcamantami valorana, agradicina canchij. Jesús huañushcamantami juchayujcuna cashpapish Jehová Dioshuan alli apanacui tucunchij. Paimantami Diablopaj ruraicunatapish Jehová Diosca tucui tucuchinga (1 Juan 3:8). Shinallataj Jesús huañushcamantami paita sirvijcuna paraíso Allpapi cushilla causachun saquinga. Chaimanta cada punlla Jehová Diosta, Jesusta agradicishcata ricuchishunchij.