1, 2. ¿Jesuspaj chaqui sarushcataca ima shinataj catina canchij? Shuj ejemplomanta parlai.

CAIPI yuyashun. Achca grupocunachari paseanaman rishpaca shuj chaquishca, shitashca pambata rincuna. Paicunata rijsichij runami chaipica pushan. Pero paicunaca chaipi puricushpachari ñapish pushajtaca utca chingachincuna. Pero paita catingapajca pushaj maitami sarushpa rishcata ricushpami catincuna.

² Ñucanchijpish cai millai mundopica chaquishca, shitashca pambapi puricuj shinami causanchij. Ama ima tucuchunca Jesusmi ñucanchijta pushacun. Paipaj chaqui sarushcata caticuj shinami ñucanchijpish ñaupajman caticunchij (1 Pedro 2:21, NVI, 1999). Bibliamanta parlaj shuj libroca: ‘Apóstol Pedroca Jesustaca paseanaman rijcunata pushajhuanmi chꞌimbapurarca. Paseanaman rijcunata pushaj shinami Jesuspish ñucanchij paita catichunca paipaj chaqui sarushcacunata saquishca’ ninmi. ¿Cai chaqui sarushcacunaca imataj can? ¿Imamantataj Jesuspaj chaqui sarushcacunata catina canchij? ¿Caitaca ima shinataj pajtachina canchij?

3. ¿Pipaj chaqui sarushcata catinaca imatataj nisha nin?

³ ¿Pipaj chaqui sarushcata catinaca imatataj nisha nin? Maipica Bibliapica purina o chaqui sarushca nishpaca maijanpish paipaj causaipi imata rurashcatami ricuchin (Génesis 6:9; Proverbios 4:26). Shinaca pipaj chaqui sarushcata catina nishpaca paipaj ejemplota catinatami nisha nin.

4. ¿Jesuspaj chaqui sarushcata catinaca imatataj nisha nin?

 ⁴ ¿Jesuspaj chaqui sarushcata catina nishpaca imatataj nisha nin? Caica Jesuspaj ejemplota catinatami nisha nin. 1 Pedro 2:21-pica apóstol Pedroca, ima shinami Jesusca achca llaquicunata charishpa ahuantarca. Chashnallataj ñucanchijpish achca llaquicunata charishpa ahuantachunmi animacurca. Pero Jesusca mana chaillatachu rurarca (1 Pedro 2:18-25). Jesusca paipaj tucui causaipimi paipaj nishcacunahuan, alli ruraicunahuan ñucanchijmanca alli ejemplota saquirca.

5. ¿Juchayujcuna cashpapish Jesuspaj ejemplota catingapajca imatataj rurana canchij?

⁵ Juchayujcuna cashpapish Jesuspaj ejemplotami cati tucunchij. Apóstol Pedroca Jesuspaj chaqui sarushcata catina nishpaca tucuipi mana pandarishpa Jesuspaj ejemplota catinataca mana nisha nicurcachu. Ashtahuanpish paita catingapaj esforzarinatami nisha nicurca. Apóstol Juanpish Jesucristo causashca shina causachunmi animarca. Ñucanchijpish chaita rurangapajmi esforzarina canchij (1 Juan 2:6).

6, 7. ¿Imamantataj Jesuspaj ejemplota catina canchij?

⁶ Jesuspaj ejemplota catishpaca Jehová Diospajmanmi cꞌuchuyashun. ¿Imamantataj chashna ninchij? Puntapica, Jesuspaj ejemplota catishpaca Dios munashca shinami causashun (Juan 8:29). Chashnami Jehová Diostaca cushichishun. Shinallataj Jesuspaj ejemplota catijpica Jehová Diosca ñucanchij amigomi tucunga (Santiago 4:8).

⁷ Ishquipica, Jesusca Jehová Diospaj ejemplotami catirca. Chaimantami paica: “Pipish ñucata rijsijca, ñuca Yayatapish ñami rijsin” nirca (Juan 14:9). Ñucanchijpish Jehová Dios shina cꞌuyaj, llaquij, mana pꞌiñarij  cangapajca Jesuspaj ejemplotami catina canchij. Por ejemplo, Jesusca leprahuan caj runatapish, ungushca caj huarmitapish llaquishpami jambirca. Huañuipi familiata chingachijcunatapish cꞌuyaihuanmi tratarca (Marcos 1:40, 41; 5:25-34; Juan 11:33-35). Ñucanchijpish Jehová Dios shina cangapaj esforzarishpaca paipajmanmi ashtahuan cꞌuchuyashun.

8. ¿Cai pachapaj ruraicunapi ama chagruringapajca imamantataj Jesuspaj ejemplota catina canchij?

⁸ Jesuspaj ejemplota catishpaca cai mundopaj ruraicunapica mana chagrurishunchu. Jesusca huañunapaj ashalla horascuna faltajpica: “Cai pachata mandajtaca ñami misharcani” nircami (Juan 16:33). ¿Paica caita nishpaca imatataj nisha nirca? Paica cai mundopaj ruraicunapi, yuyaicunapi mana chagrurishcatami nisha nicurca. Jesusca cai Allpapi cashpaca Jehová Diospaj shutita jatunyachina yuyailla, paipaj Gobiernota apoyana yuyaillami causarca. Ñucanchijpish cai pachapaj ruraicunapi ama chagruringapajca Jehová Diosta sirvina yuyaillami causana canchij. Chashnami Jesús shina cai pachataca mishashun (1 Juan 5:5).

9. ¿Huiñai causaita charingapajca imatataj rurana canchij?

⁹ Jesuspaj ejemplota catishpaca huiñai causaitami charishun. Shuj charij joven, Jesusta huiñai causaita charingapajca imatataj rurana cani nishpa tapujpica Jesusca: “Ñucata catingui” nircami (Mateo 19:16-21). Shinallataj paipi mana crij judiocunamanpish Jesusca: ‘Ñuca ovejacunaca ñucata catinllami. Ñucaca paicunamanca huiñai causaitami cuni’ nircami (Juan 10:24-29). Sanedrinpi sirvij Nicodemopish Jesús ima yachachishcacunatami yachasha nirca. Chaimi Jesusca: ‘Ñucapi feta churajca huiñai causaitami charinga’ nirca (Juan 3:16). Ñucanchijpish Jesuspi feta charishcata ricuchingapajca pai yachachishcacunatami pajtachina canchij. Chaita rurashpaca huiñai causaiman apaj ñanpimi purishpa catishun (Mateo 7:14).

10. ¿Jesusta alli rijsingapajca imatataj rurana canchij? (Juan 17:3).

¹⁰ Jesuspaj ejemplota alli catingapajca paitami alli rijsina canchij (Juan 17:3-ta liyipai). * Chaipajca Jesús ima shina cashcata, imata yuyashcata, imata yachachishcatami yachashpa catina canchij. Achca huatacunata Diosta sirvishpapish ashalla huatacunata sirvishpapish Jehová Diosta, Jesusta alli rijsingapajmi esforzarina canchij.

11. ¿Mateo, Marcos, Lucas, Juan librocunapica imatataj yachai tucunchij?

¹¹ Jehová Diosca ñucanchijta achcata cꞌuyashpami paipaj Churita ashtahuan rijsichunca  Mateo, Marcos, Lucas, Juan librocunata quillcachishca. Chaipimi Jesuspaj causaimanta, pai huillashcamanta, pai imata rurashcamanta, ima shina sintirishcamanta yachai tucunchij (Hebreos 12:3). Chai librocunamanta yachanaca Jesuspaj sarushcata ricucuj shinami can. Chai librocunata alli estudiashpaca Jesustami ashtahuan rijsishun. Paipaj alli ejemplotapishmi catishun.

12. ¿Mateo, Marcos, Lucas, Juan librocunata alli estudiangapajca imatataj rurana canchij?

¹² Mateo, Marcos, Lucas, Juan librocunata liyishpallaca mana saquirinachu canchij. Ashtahuanpish alli estudiangapaj, yachacushcapi cutin cutin yuyangapajmi tiempota surcuna canchij (Josué 1:8-ta ricui). Caita ima shina pajtachinata yachangapajca cunanca ishqui yuyaicunata ricushun.

13. ¿Mateo, Marcos, Lucas, Juan librocunata liyicushpaca chaipi cashca shina yuyangapajca imatataj rurana canchij?

¹³ Puntaca, cai librocunata liyicushpaca chaipi cashcata shinami yuyana canchij. Chaipajca chaipi parlaj gentecunamanta, lugarcunamanta, ñaupajman ima tucushcamanta, qꞌuipaman ima tucushcamantami ñucanchij publicacioncunapi investigana canchij. Shinallataj Mateo, Marcos, Lucas, Juan librocunatami chꞌimbapurashpa alli liyina canchij. Chashnami cai librocunapi nishcacunataca alli intindishun. Maipica cai chuscu librocunapurapica shuj libropi nishcacunaca caishuj libropica mana tiyanchu.

14, 15. ¿Jesuspaj causaimanta yachachishcacunata pajtachingapajca imatataj rurana canchij?

¹⁴ Ishquipica, Jesuspaj causaimanta yachashcacunatami ñucanchij causaipi pajtachina canchij (Juan 13:17). Jesús yachachishcacunata pajtachingapajca cashna nishpa tapurishunchij: ¿Cai yachachishcacunataca ima shinataj ñuca causaipi pajtachisha? ¿Shujtajcunatapish ima shinataj ayudasha? Qꞌuipaca pita ayudana oportunidadta charishpaca Jesusmanta imata yachashcatami cꞌuyaihuan parlana canchij.

 ¹⁵ Cai ishqui yuyaicunata alli intindingapajca viuda huarmimanta Jesús ima nishcata yachashun.

16. Marcos 12:41-pi ima tucushcata parlai.

¹⁶ Huata 33-pi 11 de nisán punllapi ñucanchijpish chaipi cashcata shina yuyashunchij (Marcos 12:41-ta liyipai). Jesús huañunapajca casi shuj semanami faltan. Paica 11 de Nisantaca casi tucui punllami templopi yachachishpa pasacun. Chaimi religionta pushajcunaca Jesusta yangamanta juchachishpa pandachisha nincuna. Shinallataj paitaca achca tapuicunatapishmi rurancuna (Marcos 11:27-33; 12:13-34). Chaimi Jesusca maipimi huarmicuna pasan chai patioman rin. Chai patiopica cullquicunata churana caja ladollapimi tiyashpa saquirin. Paica charij runacuna cullquita cajapi churajtami ricun. Chai runacuna cullquita churajpica Jesusca tal vez chꞌilin nijtami uyan.

17. Marcos 12:42-pi nishca shinaca ¿chai viuda huajcha huarmica imatataj rurarca?

¹⁷ (Marcos 12:42-ta liyipai). Qꞌuipaca Jesusca shuj viuda huajcha huarmitami ricun (Lucas 21:2). Cai huarmipaj causaica sinchimi can. Causangapajpish cullquitaca casi mana charinchu. Pero cashna mana charishpapish paica Diospaj templopi tiyaj cajapimi ishqui uchilla moneditacunata cun. Chai ishqui monedacuna uchilla cashcamantami tal vez mana chꞌilin nin. Pero Jesusca cai ishqui monedacuna ishqui leptón cashcataca allimi yachan. Chai tiempopica chai cullquica casi imapaj mana valijchu carca. Chaimantami shuj pajarota randingapajllapish mana alcanzaj carca.

18. Marcos 12:43, 44-pi nishca shinaca ¿Jesusca viuda huarmi cullquita cushcamantaca imatataj nirca?

¹⁸ (Marcos 12:43, 44-ta liyipai). Jesusca cai viuda huarmi imata rurashcata ricushpaca mancharishcami saquirin. Chaimi paica paipaj discipulocunataca cai huarmi imata rurashcata shamuichij ricunguichij nishpaca: ‘Cai huajcha viudami, ofrendataca tucui shujtajcunamanta yallita churan. Tucui caishujcunaca achcata charishpapish, puchushcallatami churancuna. Ashtahuanpish paica, huajcha cashpapish, pai causanapaj tucui charishcatamari churan’ nirca. Cai huajcha viuda huarmica chashna cullquita churashpaca Jehová paita ayudanapi, cuidanapimi confiarca (Salmo 26:3).

19. ¿Jesús, viuda huarmita ricushpa paimanta ima nishcamantaca imatataj yachanchij?

¹⁹ Ima yachashcata ñucanchij causaipi pajtachishunchij. Cashna nishpa tapurishunchij: ¿Jesús, viuda huarmita ricushpa paimanta ima nishcamantaca imatataj yachanchij? Caipi yuyashun. Cai huajcha huarmica Jehová Diosmanca ashtahuanmi cusha nishcanga. Pero paica imalla charishcataca tucuimi curca. Jesuspish cai huarmi cushcacunamanta Jehová Dios valorashcataca allimi yacharca. ¿Caimantaca imatataj yachanchij? Jehová Diosca tucui almahuan, tucui shunguhuan sirvichunmi munan (Mateo 22:37; Colosenses 3:23). Chaimanta predicangapaj, tandanacuicunaman ringapaj fuerzasta, tiempota surcushunchij. Chaita rurajpica Jehová Diosca cushillami sintiringa.

20. ¿Viuda huarmimanta yachashcataca ima shinataj pajtachina canchij?

²⁰ ¿Viuda huarmimanta imata yachashcataca ima shinataj pajtachina canchij? Ñucanchij huauqui panicunapi yuyashunchij. Por ejemplo, maijan huauqui panicunaca mayorlla, ungushca cashcamantachari ña mana ñaupa laya imata rurai tucuncuna. Tal vez paicunaca ña mana tantochari predicai tucuncuna.  Mana cashpaca tucui tandanacuicunamanpish manachari ri tucuncuna. Chaimi paicunaca imapaj mana valishca shina sintirincuna. Chaimantami paicunataca cushichij shimicunahuan animana canchij (Efesios 4:29). Cai huajcha huarmimanta imata yachashcatapish parlashunchij. Chashna animajpica cai huauqui panicunaca Jehová Dios paicunata achcata valorashcatami cuentata cungacuna (Proverbios 15:23; 1 Tesalonicenses 5:11). Huauqui panicuna Jehová Diosta sirvingapaj esforzarijpi, paicunata felicitashpaca Jesuspaj ejemplotami catinchij.

21. ¿Canca imata rurangapajtaj decidido cangui?

²¹ Mateo, Marcos, Lucas, Juan librocunapi Jesuspaj causaimanta yachashpa agradecidos cashunchij. Chaita yachashpaca Jesuspaj ejemplotami catishun. Chaimanta ñucanchijllataj o ñucanchij familiacunahuan cai librocunamanta yachangapaj tiempota surcushunchij. Cai librocunata liyicushpaca ñucanchijpish chaipi cashcata shina yuyashunchij. Y chai yachashcacunataca ñucanchij causaipi pajtachishunchij. Caicamaca Jesús imacunallata rurashcamantami yachashcanchij. Catij yachaipica Jesús caspipi huarcushca cashpa imata nishcamantami yachashun.