DIMASTIJ preocuparishcamantami maipica shungupi yallitaj llaquilla sintirinchij (Proverbios 12:25). ¿Canpish achca problemacunata charishcamanta “chaitaca mana ahuantashachu” nishpa yuyashcanguichu? Casi la mayoriami chashna sintirinchij. Maijancunaca shuj familiata huañuipi chingachishcamanta o jatun tamya, terremoto tiyashcamanta o shujtaj llaquicunata charishcamantami paicunaca shaicushca o yallitaj preocuparishca sintirishcacuna. ¿Ama yallitaj preocuparingapajca imatataj rurana canchij? a

Davidpaj ejemplomanta yachashpaca imamanta mana yallitaj preocuparinatami ricushun. Davidca paipaj causaipica achca llaquicunatami charirca (1 Samuel 17:34, 35; 18:10, 11). Pero ¿paica ama yallitaj preocuparingapajca imatataj rurarca? ¿Ñucanchijpish paipaj ejemplomantaca imatataj yachai tucunchij?

Davidca chꞌican chꞌican llaquicunamantami preocuparirca. Por ejemplo, Davidtaca rey Saulmi huañuchisha nirca. Chaimantami paica rey Saulmanta miticuna carca. Cutin shuj punllaca David paipaj runacunahuan paicunapaj huasicunaman tigrajpica, contracunaca ima tiyashca cosascunata shuhuashpa, huasicunatapish rupachishpa, familiacunatapish apashpami rishcacuna carca. ¿Chaita ricushpaca Davidca ima shinataj sintirishcanga? Bibliapica: ‘Davidpish, paihuan cajcunapish tucuicuna mana ashtahuan huacai tucujta jatunta caparishpami huacarcacuna’ ninmi (1 Samuel 30:1-6). Davidhuan caj runacunapish Davidtaca rumicunahuan shitashpami huañuchisha nircacuna. Davidca cai tucui llaquicunata charishcamantami yallitaj preocuparishca sintirishcanga.

¿Davidca imatataj rurarca? Paica ama yallitaj preocuparingapaj, Diospaj ayudata charingapajmi siempre Diosta mañaj carca. Shinallataj ñaupa punllacunapi Yayitu Dios ima shina paita ayudashcapimi yuyaj carca (1 Samuel 17:37; Salmo 18:2, 6). Davidca Jehová Dios imata rurachun nishcatami tapurca. Jehová Dios ima nishcata yachashpaca chai ratomi pajtachirca. Davidca Jehová Diospi confiashcamantami paipaj runacunandij familiacunata, imalla quichushca cosascunata cutin japircacuna (1 Samuel 30:7-9, 18, 19). Caipi ricushca shinaca Davidca Jehová Diostami mañarca. Paita ima shina ayudashcapimi yuyarca. Dios ima nishcata yachashpaca chai ratomi pajtachirca. ¿Davidpaj ejemplomantaca imatataj yachai tucunchij? Imata ruranata ricushun.

1. Diosta mañashunchij. Yallitaj preocuparishca cashpaca Jehová Diostami ama yallitaj preocuparingapaj ayudachun mañai tucunchij. Ñucanchij imamanta preocupado cashcataca Jehová Diosmanca achca tiempotami parlai tucunchij. Chashna huillashpaca tranquilosmi sintirishun. Shinallataj ashalla tiempota o shimi ucullapimi Yayitu Diostaca ayudachun mañai tucunchij. Yayitu Diosta siempre mañashpaca David shinami paipi confiashcata ricuchishun. Davidca: “Mandaj Dioslla, ñuca jatun rumilla. Ñuca miticuna sinchi huasilla, ñucata quishpichijlla” nircami (Salmo 18:2). Kahlia shuti precursoraca:  “Ñucaca Diosta mañashpaca Jehová Dios ima yuyashca shinami ñucapish yuyani. Pai ayudanapimi confiani. Chaimantami tranquila sintirini” ninmi. Ñucanchijpish Jehová Diosta mañashpaca tranquilosmi sintirishun. Chaica shuj valishca regalomi can.

2. Jehová Dios ima shina ayudashcapi yuyashunchij. Jehová Dios ñaupa punllacunapi paita sirvijcunata ima shina ayudashcapi, ñucanchijtapish ima shina ayudashcapi yuyashpaca Jehová Diospimi ashtahuan confiashun, tranquilosmi sintirishun (Salmo 18:17-19). Joshua shuti pushaj ancianoca: “Jehová Dios ñuca mañashcacunata ima shina cutichishcatami siempre yuyarini. Chashnami ñuca ima mañashcata Diosllataj cutichij cashcata yachani” ninmi. Jehová Dios ñucanchijta ima shina ayudashcata yuyarishpaca tranquilosmi sintirishun. Ama yallitaj preocuparingapajpish fuerzatami charishun.

3. Dios ima nishcata pajtachishunchij. Imata manaraj decidishpaca Bibliapi ima yachachishcatami ricunaraj canchij (Salmo 19:7, 11). Huaquincunaca versocunata alli investigashpami paicunapaj causaipi ima shina pajtachinata alli ricuncuna. Jarrod shuti shuj ancianoca: “Bibliata alli investigashpaca Jehová Dios imata nisha nishcatami alli intindini. Intindishpaca chaitaca cushillami shungumanta pajtachini” ninmi. Ñucanchijpish Bibliapi Diospaj ayudata mashcashpa, paipaj mandashcacunata cazushpaca yallitaj preocuparinamantami jarcarishun.

Davidca ama yallitaj preocuparingapaj Diospaj ayudata minishtishcataca allimi yacharca. Paica Jehová Dios paita ayudashcamantami agradicirca. Chaimi Davidca: “Ñuca Dioshuanca jatun pircacunatapish urmachishpa llaquichingapaj yaicushallami” nirca. Shinallataj Davidca: ‘Jehová Diosmi paipaj poderhuan ñucataca chumbillichin’ nircami (Salmo 18:29, 32). Maipica problemacunata ahuantana o chꞌimbapuranaca shuj jatun pirca shinami sinchi ricurin. Pero Jehová Diospaj ayudahuanmi chaitaca mishai tucunchij. Chaipajca Jehová Diostami mañana canchij, pai ima shina ayudashcapipishmi yuyana canchij, Jehová Dios munashca shinapishmi pajtachina canchij. Chaita rurajpica Jehová Diosca ñucanchijmanca ama yallitaj preocuparichunmi fuerzasta cushpa ayudanga.