1. ¿Imata rurashpataj cushilla sintirinchij?

 JEHOVÁ DIOSCA ñucanchijcuna cushilla cachunmi munan. Chaimantami paipaj espíritu santota cushpa cushilla sintirichun ayudan (Gálatas 5:22). Pero cushilla sintiringapajca ñucanchij huauqui panicunatami ayudana canchij. Diosta sirvinapipishmi ocupados cana canchij (Hechos 20:35).

2, 3. a) Gálatas 6:4-pi nishca shinaca ¿cushilla sintiringapajca ima ishqui yuyaicunatataj pajtachina canchij? b) ¿Cai yachaipica imatataj yachashun?

² ¿Imata rurashpataj cushilla sintirishun? Apóstol Pabloca ishqui yuyaicunata pajtachichunmi yachachirca (Gálatas 6:4-ta liyipai). Puntaca, cushilla sintiringapajca tucui pudishcahuanmi Jehová Diosta sirvina canchij. Chaitaca tucuicunami pajtachi tucunchij (Mateo 22:36-38). Ishquipica, cushilla sintiringapajca shujtajcunahuanca mana compararinachu canchij. Tal vez ñucanchijca alli saludta charishpa o imata alli rurashpaca Jehová Diostami agradicina canchij. Paimi chai tucui allicunata cushca. Cutin shujtaj huauqui panicuna Diosta sirvinapi ñucanchijta yalli imata alli rurajpica paicunamantami cushiyarina canchij. Chai huauqui panicunaca paicunallataj jatunyarinapaj randica Jehová Diosta sirvinapimi ocuparincuna. Chaimantami paicunata envidianapaj randica paicunamanta yachana canchij.

³ Cai yachaipica ñucanchij munashca shina Jehová Diosta mana sirvi tucushpapish ima shina mana desanimarinatami yachashun. Shinallataj ñucanchij yachashcahuan, imata rurai  tucushcahuan Jehová Diosta sirvinata, shujtajcunamantapish imata yachai tucushcatami ricushun.

4. ¿Maipica imamantataj desanimarinchij? Pani Carolpaj ejemplomanta parlai.

⁴ Huaquin huauqui panicunaca mayorlla cashcamanta o ungushca cashcamantami Jehová Diostaca paicuna munashca shina ña mana sirvi tucuncuna. Pani Carolpaj ejemplopi yuyashunchij. Paica maipimi huillana minishtirin lugarpimi sirvinaman rirca. Chaipica 35 Bibliamanta estudiocunata charishpami achca gentecunata bautizarichun ayudarca. Pero qꞌuipaca ungurishpami huasimanta ña mana llujshi tucurca. Paica: “Ñuca ungushca cashcamantami shujtaj turi ñañacuna shina Diosta mana sirvi tucuni. Chaimantami maipica Diosta mana alli sirvicushcata yuyani. Ñuca munashca shina Diosta mana sirvi tucushpaca desanimarishcami sintirini” ninmi. Pani Carolca tucui pudishcata rurashpami Jehová Diosta sirvishpa caticun. Chaica allimi can. Yayitu Jehová Dioscarin cꞌuyaj cashcamantami paitaca achcata valoran.

5. a) ¿Diosta sirvinapi ñucanchij munashca shina mana rurai tucushpaca imatataj tapurina canchij? b) ¿Fotocunapi ricushca shinaca cai huauquica ima shinataj paipaj tucui causaipi tucui pudishcahuan Jehová Diosta sirvirca?

⁵ Ñucanchij munashca shina Jehová Diosta mana sirvi tucushpaca cashna nishpa tapurishunchij: “¿Jehová Diosca imata rurachuntaj munan?”. Paica tucui pudishcahuan paita sirvichunmi munan. Cai catij ejemplopi yuyashunchij. Shuj panica 40 huatacunata charishpami tucui pudishcahuan Jehová Diosta sirvirca. Pero ña 80 huatacunata charishpa, pai munashca shina mana sirvi tucushcamantami desanimarishca sintirin. Paica: “Ñaupa laya Diosta mana sirvi tucushcamantami cunanca Jehová Diosca ñucata mana valichinga” nishpami yuyan. Pero ¿chaica ciertochu canga? Mana. Cai panica 40 huatacunata charishpapish, 80 huatacunata charishpapish tucui pudishcahuanmi Jehová Diosta sirvishpa catishca. Chaimi Jehová Diosca paitaca achcata valoran. Ñucanchijpish tucui pudishcahuan Jehová Diosta sirvishpa catijpica Jehová Diosca ñucanchijtaca: “Allitami ruracungui” nishpami valoranga (Mateo 25:20-23-ta ricui).

6. ¿Mariapaj ejemplomantaca imatataj yachanchij?

⁶ Yayitu Diosta cushilla sirvingapajca imata mana rurai tucushcapi mana yuyanachu canchij. Ashtahuanpish imata rurai pudishcata pajtachingapajmi esforzarina canchij. Pani Mariapaj ejemplopi yuyashunchij. Paica ungushca cashcamantami mana tanto predicai tucun. Chaimantami callaripica llaquilla, desanimarida sintirirca. Pero qꞌuipaca camapi caj shuj ungushca panita animanatami decidirca. Paica: “Chai ñañapaj huasiman rishpami telefonopi cayashpa, cartacunata rurashpa paihuan predicaj carcani. Chai ñañata ayudashcamantami ñuca huasimanca cushilla tigraj carcani” ninmi. Ñucanchijpish Yayitu Diosta sirvingapaj tucui pudishcata rurashpaca cushillami sintirishun. Cunanca imacunata alli ruranata yachashpaca ima shina Jehová Diosta sirvinata ricushunchij.

7. ¿Apóstol Pedroca ima consejotataj curca?

⁷ Apóstol Pedroca ñucanchij yachashcahuan, imata rurai tucushcahuan Jehová Diosta, shujtajcunatapish sirvichunmi animarca. Paica: “Tucuicunami Diosmantaca  chꞌican chꞌican rurai tucunata chasquircanguichij. Chai rurai tucunahuanca caishuj chaishujpaj allita ruraichij” nircami (1 Pedro 4:10). Chaimantami “ñuca allita rurashcamantaca shujtajcunami envidianga, o paicunatami desanimachisha” nishpaca mana yuyana canchij. Ashtahuanpish ñucanchij yachashcahuanmi Jehová Diosta sirvingapaj esforzarina canchij.

8. 1 Corintios 4:6, 7-pi nishca shinaca ¿imamantataj mana yanga atirina canchij?

⁸ Ñucanchij yachashcahuan o ima rurai tucushcahuan Jehová Diosta sirvishpapish mana yanga atirinachu canchij (1 Corintios 4:6, 7-ta liyipai). Por ejemplo, quizás canca Bibliamanta estudiocunata callarichinataca allimi yachangui. Pero chaita yachashpapish shujtajcunataca mana pingachinachu cangui. Caipi yuyashunchij. Canca predicacushpaca Bibliamanta shuj estudiotami callarichingui. Chaimi ima tucushcata shujtaj huauqui panicunaman huillanata munangui. Pero ña huauqui panicunahuan cajpica, shuj panichari predicacushpa shuj revistata saquishcata huillan. ¿Chaita uyashpaca imatataj ruranguiman? ¿Canca shuj Bibliamanta estudiota callarichishcatachu huillanguiman? Pani ama desanimarichunca shujtaj punllapimi cambaj experienciata huillana cangui. Chashnami cꞌuyaj cashcata ricuchingui. Shinapish Bibliamanta estudiocunata callarichinataca manataj saquinachu cangui.

9. ¿Imata rurai tucushpaca imatataj yuyarina canchij?

⁹ Jehová Dios ayudashcamanta imatapish rurai tucushcatami yuyarina canchij. Chaimantami ima yachashcahuan o ima rurai tucushcahuan mana jatunyarina canchij (Filipenses 2:3). Ashtahuanpish huauqui panicunata animangapaj, Jehová Diosta jatunyachingapajmi esforzarina canchij. Chashnami cushilla sintirishun.

10. ¿Imamantataj shujtajcunahuan mana compararina canchij?

¹⁰ Shujtajcunahuanpish mana compararinachu canchij. Por ejemplo, shuj huauquica alli conferenciacunatachari cun. Chaimantami shujtaj huauquita yalli conferenciata cuj cashcata yuyan. Pero caishuj huauquica alli conferenciacunata mana cuj cashpapish shujtajcunata alli puzachij, paipaj huahuacunata alli huiñachij, predicacionpipish alli yachachijchari can. Cai huauqui shinallatajmi shujtaj huauqui panicunapish Jehová Diosta sirvingapaj, shujtajcunata ayudangapaj esforzarincuna. Paicunamantami achcata agradicinchij.

11. ¿Imamantataj Jesuspaj ejemplota catina canchij?

¹¹ Shujtajcunahuan mana compararina cashpapish paicunapaj alli ejemplomantami yachana canchij. Jesuspaj ejemplopi yuyashunchij. Ñucanchijca juchayujcuna cashpapish Jesuspaj alli cualidadcunamanta, paipaj ruraicunamantami yachana canchij (1 Pedro 2:21). Paipaj alli ejemplota catishpaca Diosta alli sirvijcuna, alli yachachijcunami cashun.

12, 13. ¿Rey Davidmantaca imatataj yachai tucunchij?

¹² Bibliapica Diosta alli sirvijcunamantami parlan. Paicunapaj alli ejemplomantapishmi yachai tucunchij (Hebreos 6:12). Rey Davidpi yuyashun. Diosca Davidmanta parlashpaca: “Paica ñuca shungu munashca shina cazujmi” nircami (Hechos 13:22). Shinapish Davidca huaquin juchacunapimi urmarca. Chashnapish paica alli ejemplotami ñucanchijman saquirca. ¿Imamantataj chashna ninchij? Jehová Dios, Davidta corregijpica paica mana quejarishpami chai correccionta chasquirca. Juchacunapi urmashcamantapish shungumantami arrepintirirca. Chaimantami Diosca Davidta perdonarca (Salmo 51:3, 4, 10-12).

¹³ Davidpaj ejemplopi yuyashpaca cashna nishpa tapurishunchij: “¿Pi ñucata consejajpica ima shinataj chasquini? ¿Quejarishpachu caita chaita nini? ¿Shujtajcunatachu culpani? ¿Cutin tigra ama pandaringapajchu esforzarini?”. Bibliapi parlaj Diosta sirvijcunamanta yachashpapish cashna nishpa tapurishunchij: “¿Paicuna shina ima llaquicunahuantaj chꞌimbapuracuni? ¿Paicunaca ima cualidadcunatataj ricuchircacuna? ¿Paicunapaj alli ejemplotaca ima shinataj catisha?”.

14. ¿Ñucanchij huauqui panicunamantaca imatataj yachai tucunchij?

¹⁴ Ñucanchij congregacionpi sirvij mayorllacunamanta, jovenllacunamantapishmi achcata yachai tucunchij. Por ejemplo, huaquin jovencunataca escuelapica paicunapaj compañerocunachari mana allicunata rurachun animancuna. Cutin shujtaj huauqui panicunataca paicunapaj familiacunachari Diosta ama sirvichun jarcancuna. Shujtajcunapish ungushcacunachari cancuna. Paicuna ima shina ahuantajta ricushpami ñucanchijpish ima llaquita charishpaca ahuantai tucushun. Chaimantami cai huauqui panicunataca achcata valoranchij (Hebreos 13:7; Santiago 1:2, 3).

15. ¿Jehová Diosta cushilla sirvichunca apóstol Pabloca ima consejotataj curca?

¹⁵ Diosta sirvingapaj tucui pudishcata rurashpaca congregacionpica tucuicunami tandalla cashun. Apostolcuna causashca tiempopica huauqui panicunaca chaitami rurarcacuna. Paicunaca congregacionpica chꞌican chꞌican ruraicunatami pajtachijcuna carca (1 Corintios 12:4, 7-11). Chashnapish mana envidianacushpami Yayitu Diosta tandalla sirvircacuna. Apóstol Pabloca paicunataca tucui pudishcahuan Diosta sirvichun, tandalla cachunmi animarca. Paica: “Tucui crijcunaca paihuan shujlla cuerpo cashpami, aicha mucucuna huatarishca shina alli churashca cashpa paillamantataj huiñangapaj chasquicunchij. Chashna cashpami, tucui crijcuna quiquin rurana cashcata alli rurashpa, cꞌuyaihuan huiñashpa miraricun” nircami (Efesios 4:1-3, 11, 12, 16). Apóstol Pablo consejashcata catishpaca paicunaca tandalla, cushillami Diosta sirvircacuna. Cunan punllacunapish chashnallatajmi rurana canchij.

16. Hebreos 6:10-pi nishca shinaca ¿imata rurashpataj catina canchij?

¹⁶ Cai yachaipi ricushca shinaca shujtajcunahuanca mana compararinachu canchij. Chaipaj randica Jesuspaj ejemplotami yachashpa catina canchij. Bibliapi parlaj Diosta alli sirvijcunamanta, huauqui panicunamantapishmi yachashpa catina canchij. Canpish tucui pudishcahuanmi Jehová Diosta sirvishpa catina cangui. ‘Paica paipaj shutipi cꞌuyaihuan trabajashpa ricuchishcataca manataj cungaringachu’ (Hebreos 6:10-ta liyipai). Jehová Diosta cushicuihuan sirvijpica paica can imalla rurashcataca achcatami valoranga.