1. ¿Jehová Diosta alli sirvingapajca ima metacunatataj churai tucunchij?

 DIOSTA sirvijcunaca Jehová Diosta cꞌuyashcamantami paita sirvingapaj tucui pudishcata rurasha ninchij. Chaipajca alli cualidadcunata charingapaj, imata alli ruranata yachangapaj o shujtajcunata ayudangapajmi metacunata churana canchij. b

2. ¿Imamantataj metacunata churashpa pajtachina canchij?

² ¿Jehová Diosta sirvingapajca imamantataj metacunata churashpa pajtachina canchij? Puntapica, Jehová Diosta cushichingapajmi metacunata churasha ninchij. Ñucanchij tucui pudishcahuan Jehová Diosta sirvijpica paica cushillami sintiringa. Ishquipica, huauqui panicunata ayudangapaj, paicunata sirvingapajmi metacunata churasha ninchij (1 Tesalonicenses 4:9, 10). Apóstol Pablo nishca shinaca mashna huatacunata Diosta sirvicushpapish, tucuicunami Jehová Diosta ashtahuan alli sirvishpa catina canchij. Cai yachaipica chaita ima shina pajtachinatami ricushun.

3. 1 Timoteo 4:12 al 16-pi nishca shinaca ¿Pabloca Timoteotaca ima nishpataj consejarca?

³ Timoteoca jovenraj cashpapish alli pushajmi carca. Chashna cajpipish Pabloca Diosta ashtahuan alli sirvichunmi consejarca (1 Timoteo 4:12-16-ta liyipai). Apóstol Pabloca Timoteotaca cꞌuyaj cachun, sinchi feta charichun, shujtaj cualidadcunata charichunpishmi animarca. Shinallataj shujtajcunapaj ñaupajpi alli liyij, alli consejaj, alli yachachij cachunpishmi animarca. Cunanca Jehová Diosta ashtahuan  sirvingapaj Timoteopaj ejemplomanta imata yachai tucushcatami ricushun.

4. Filipenses 2:19 al 22-pi nishca shinaca ¿imamantataj Jehová Diosca Timoteoman huaquin responsabilidadcunata mingarca?

⁴ ¿Imamantataj Jehová Diosca Timoteomanca huaquin responsabilidadcunata mingarca? Timoteoca alli cualidadcunatami charirca (Filipenses 2:19-22-ta liyipai). Apóstol Pabloca Timoteo humilde, alli trabajaj, alli pajtachij cashcatami nirca. Timoteoca huauqui panicunamanta preocuparishpami cꞌuyaihuan tratarca. Chaimi Pabloca Timoteota achcata cꞌuyarca, huaquin responsabilidadcunatapishmi mingarca (1 Corintios 4:17). Ñucanchijpish alli cualidadcunata charijpica Jehová Diosca achcatami cꞌuyanga, huaquin responsabilidadcunatapishmi minganga (Salmo 25:9; 138:6).

5. a) ¿Imapi mejoranata yachangapajca imallatataj rurana canchij? b) ¿Fotopi ricurij panica ashtahuan cꞌuyaj cangapajca imatataj ruracun?

⁵ Ima cualidadta charina cashcata alli ricushunchij. Imapi mejorana cashcata yachangapajmi Jehová Diosta mañana canchij. Shinallataj cashna nishpami tapuri tucunchij: “¿Ashtahuan cꞌuyaj canatachu minishtini? ¿Shujtajcunata ayudana munaitachu charini? ¿Mana rato pꞌiñarijchu cani? ¿Shujtajcunata shungumanta perdonanata yachanichu?”. Ashtahuancarin shuj amigotami imapi mejorangapaj tapuna canchij. Ima cualidadcunata pajtachina cashcata cuentata cushpaca shuj shujta pajtachingapajmi esforzarina canchij (Proverbios 27:6).

6. ¿Ima cualidadta pajtachingapajca imatataj rurana canchij?

⁶ Ñucanchij churashca metata pajtachingapaj esforzarishunchij. Chaipajca ñucanchij charisha nishca cualidadmantami investigai tucunchij. Por ejemplo, ñucanchijca tal vez ashtahuan alli perdonajchari casha ninchij. Chaipajca Bibliapimi huaquincunaca perdonashcata, cutin shujtajcunaca mana perdonashcata yachai tucunchij. Por ejemplo, Jesusca shujtajcunataca shungumantami perdonaj carca (Lucas 7:47, 48). Paica shujtajcunapaj pandarishcacunallata ricunapaj randica, paicunapaj alli ruraicunatami valorarca. Cutin fariseocunaca humilde gentecunatami pꞌiñajcuna carca (Lucas 18:9). Paicunamanta yachashca huashaca  cashna nishpami tapurina canchij: “¿Shujtajcunamantaca imatataj yuyani? ¿Paicunapaj alli cualidadcunatachu valorani?”. Callaripi pi ñucanchijta llaquichijpica paita perdonanaca sinchichari canga. Chashna cajpica paipaj alli cualidadcunatami shuj listapi anotai tucunchij. Chai huashaca cashna nishpami tapurina canchij: “¿Jesusca paimantaca imatashi yuyan? ¿Paitaca perdonanmanchu?”. Chashna Bibliamanta yachashpa, yuyarishpaca shujtajcunataca shungumantami perdonashun.

7. Proverbios 22:29-pi nishca shinaca ¿alli trabajaj huauqui panicunamanca Jehová Diosca imata rurachuntaj mingan?

⁷ Imata alli rurangapajmi metacunata churana canchij. Por ejemplo, achca huauqui panicunaca sucursalcunata, Tandanacuna Huasicunatami shayachishpa, allichishpa ayudancuna. Paicunaca experienciata charij huauqui panicunamantami chashna trabajangapajca yachashcacuna. Página 25-pi tiyaj fotopi ricushca shinaca huauquicunapish, panicunapishmi chashna ayudai tucuncuna. “Huiñai huiñaita Jatun Mandaj” Jehová Diospish, “mandajcunapaj jatun mandaj” Jesuspish cashna alli trabajaj huauqui panicunamanmi valishca ruraicunata pajtachichun mingancuna (1 Timoteo 1:17; 6:15, NWT; Proverbios 22:29-ta liyipai). Chaimantami ñucanchijpish sinchita trabajangapaj, imatapish alli rurangapaj esforzarisha ninchij. Chaita rurashpapish mana jatun tucunachu canchij. Ashtahuanpish Jehová Diosllatami jatunyachina canchij (Juan 8:54).

8. ¿Imapi mejorana cashcata yachangapajca imatataj rurana canchij?

⁸ Imapi mejorana cashcata alli ricushunchij. Imapi mejoranata yachangapajca pushaj ancianocunata o superintendente de circuito huauquitami tapuna canchij. Paicunaca tal vez alli conferenciata cungapaj, alli yachachingapajmi imapi mejorana cashcata ningacuna. Paicuna imapi mejorachun nijpica chaita pajtachingapajmi esforzarina canchij. 

9. ¿Alli yachachijcuna cangapajca imatataj rurana canchij?

⁹ Ñucanchij churashca metata pajtachingapaj esforzarishunchij. Por ejemplo, alli yachachijcuna cangapajca Alli yachachij nishca folletotami alli estudiana canchij. Shinallataj manaraj shuj asignacionta cushpaca experienciata charij huauquitami ricuchun, uyachun mañana canchij. Chai huashaca imapi mejorana cashcata huillachunmi mañana canchij. Ashtahuancarin utcami ñucanchij asignacioncunata, conferenciacunataca preparana canchij. Chashnami alli yachachijcuna tucushun. Shujtajcunapish ñucanchij alli pajtachijcuna cashcatami ricungacuna (Proverbios 21:5; 2 Corintios 8:22).

10. ¿Imata pajtachina sinchi cajpica imatataj rurana canchij? Shuj ejemplomanta parlai.

¹⁰ ¿Imata pajtachina sinchi cajpica imatataj rurana canchij? Alli pajtachingapajmi esforzarishpa catina canchij. Huauqui Garrypi yuyashun. Paica alli liyinataca mana pudijchu carca. Chaimantami tandanacuicunapi liyinata manchaj carca. Pero manchashpalla saquirinapaj randica alli liyishpa catingapajmi esforzarirca. Paica huauquicunapaj ayudahuan, paillataj publicacioncunatapish estudiashpami cunanca tandanacuicunapi, jatun tandanacuicunapi conferenciacunata cun.

11. ¿Ashtahuan responsabilidadcunata chasquingapajca imatataj Timoteo shina rurana canchij?

¹¹ ¿Timoteoca alli yachachij tucurcachu? Chaitaca Bibliapica mana huillanchu. Pero  paica apóstol Pablo ima nishcatami pajtachirca. Chaimi Timoteoca alli yachachij tucushcanga, ima mingashcatapish alli pajtachishcanga (2 Timoteo 3:10). Ñucanchijpish Timoteo shina ñucanchij ruranapi, yachaipi mejorashpaca ashtahuan responsabilidadcunatami chasquishun.

12. ¿Huauqui panicunaca ima shinallataj canta ayudashca?

¹² Shujtajcuna ñucanchijta ayudajpica cushillami sintirinchij. Por ejemplo, hospitalpi cajpi Comité de Enlace con los Hospitalespi trabajaj shuj huauqui ñucanchijta visitajpica cushillami sintirinchij. Shinallataj maipica causaipi ima llaquicunata charijpi, shuj pushaj anciano ñucanchijta uyajpi, animajpipish cushillami sintirinchij. Cutin ñucanchij Bibliamanta yachachinaman rijpi, shuj precursor ñucanchijta acompañashpa imapi mejoranata huillajpica animarishcami sintirinchij. Jesusca: “Imatapish cujmi, cushcata japijta yalli cushicun” nircami (Hechos 20:35). Cashna ayudaj huauqui panicunaca shujtajcunata ayudashpami cushilla sintirincuna. Ñucanchijpish cushilla sintiringapajca shujtajcunatami ayudana canchij. Cai metata pajtachingapaj imata ruranata ricushun.

13. ¿Shuj metata pajtachingapajca imatataj rurana canchij?

¹³ Ima metata pajtachingapajca imallata rurana cashcatami alli ricuna canchij. Por ejemplo, maipica huauqui panicunatami ashtahuan ayudasha ninchij. Pero chashna yuyashpalla saquirinapaj randica huauqui panicunata ima shina ayudanatami ricuna canchij. Chai huashaca huauqui panicunata ima shina ayudanata, chaita pajtachingapajpish imata ruranatami shuj hojitapi anotai tucunchij. Chashnami ñucanchij metata pajtachi tucushun.

14. ¿Ima metata mana pajtachi tucushpaca imatataj rurana canchij?

¹⁴ Maipica ñucanchij causaipi ima cambiocuna tiyajpi o ima llaquicuna tiyajpica, ñucanchij churashca metataca manachari pajtachi tucushun. Chashna cajpipish tucui pudishcahuanmi Jehová Diosta sirvishpa catina canchij. Por ejemplo, apóstol Pabloca Tesalonicapi shuj congregación tiyachunmi ayudarca. Chaimi chai mushuj huauqui panicunata ayudashpa saquirinata decidirca. Pero  contracuna llaquichisha nijpica Pabloca chai llajtamantami rirca (Hechos 17:1-5, 10). Pai chaipi saquirishca cajpica contracunaca mushuj huauqui panicunatami llaquichinman carca. Chashna jarcaicuna tiyajpipish Pabloca tucui pudishcahuanmi Diosta sirvishpa catirca. Qꞌuipacarin Timoteotami Tesalonicapi caj huauqui panicunata sinchiyachichun cacharca (1 Tesalonicenses 3:1-3). Tesalonicapi caj huauqui panicunaca Timoteo paicunata sinchiyachijpica cushillami sintirishcangacuna.

15. ¿Ñucanchij causaipi ima cambiocuna tiyajpica Diosta sirvishpa catingapajca imatataj rurana canchij? Shuj ejemplomanta parlai.

¹⁵ ¿Apóstol Pablopaj ejemplomantaca imatataj yachai tucunchij? Ñucanchij causaipi ima cambiocuna tiyajpica ñucanchij churashca metacunataca manachari pajtachi tucushun (Eclesiastés 9:11). Chashna tucujpica pajtachi tucushca shujtaj metacunatami churana canchij. Huauqui Ted, pani Hiedica chaitami rurarcacuna. Paicunaca mana alli saludta charishcamantami betelpi sirvinata saquircacuna. Pero paicunaca Jehová Diosta cꞌuyashcamantami precursores regulares tucurcacuna. Qꞌuipaca paicunataca precursores especiales cachunmi agllarcacuna. Ted shuti huauquitacarin superintendente de circuito sustituto cachunmi capacitarcacuna. Shinapish qꞌuipaca paicunaca ña edadyashcamantami chaipi mana ayudai tucushcata cuentata curcacuna. Callaripica paicunaca desanimarishcami sintirircacuna. Pero qꞌuipaca Jehová Diosta chꞌican laya sirvi tucushcatami intindircacuna. Huauqui Tedca: “Jehová Diosta sirvingapaj chꞌican chꞌican metacunata churai tucushcatami yachashcanchij” ninmi.

16. ¿Gálatas 6:4-mantaca imatataj yachanchij?

¹⁶ Ima cambio tiyashcamanta ima asignacionta mana charishpapish, Jehová Diospaj valishca cashcatami yuyarina canchij. Ñucanchij munashca asignacionta charij huauqui panicunahuanpish mana compararinachu canchij. Pani Hiedica: “Shujtajcunahuan compararishpaca ñucanchijllatajmi desanimarishun” ninmi (Gálatas 6:4-ta liyipai). Chaimanta shujtajcunahuan compararinapaj randica Diosta ashtahuan sirvishpa, huauqui panicunata ayudashpa catishunchij. c

17. ¿Ashtahuan responsabilidadcunata chasquingapajca imatataj rurana cangui?

¹⁷ Ashtahuan responsabilidadcunata chasquingapajca minishtirishca cosascunallahuan, mana dibiyashpami causana cangui. Shinallataj ima responsabilidadcunata chasquingapajca puntaca chꞌican chꞌican metacunatami  pajtachina tucunga. Por ejemplo, precursor regular cangapajca puntaca precursor auxiliarmi cai tucungui. Shinallataj siervo ministerial cangapajca puntaca ashtahuan predicangapaj o mayorlla huauqui panicunata, ungushca huauqui panicunata visitangapajmi tiempota surcui tucungui. Chashna esforzarishpaca qꞌuipacarin ashtahuan responsabilidadcunatachari charingui. Ima laya cajpipish Jehová Diosta sirvishpa catingapaj tucui pudishcata rurai (Romanos 12:11, NWT).

18. ¿Pani Beverleypaj ejemplomantaca imatataj yachanchij?

¹⁸ Mayorllacuna cashpapish Jehová Diosta ashtahuan sirvingapajmi metacunata churai tucunchij. 75 huatacunata charij pani Beverleypi yuyashun. Paica mana alli saludta charishcamantami mana tanto puri tucun. Pero Jesús huañushcata yuyarina campañapimi paica ayudanata munarca. ¿Chaipi ayudangapajca paica imatataj rurarca? Pai pajtachi tucushca metacunatami churarca. Chaita pajtachishpaca paica cushillami sintirirca. Pai chashna rurashpaca shujtajcunatapish ashtahuan huillachunmi animarca. Jehová Diosca mayorlla huauqui panicuna chashna esforzarijpica cushillami sintirin (Salmo 71:17, 18).

19. ¿Ima metacunallatataj churasha ningui?

¹⁹ Caipi yachashca shinaca pajtachi tucushca metacunata churashunchij. Chaipajca alli cualidadcunata charingapaj esforzarishunchij. Ñucanchij ruranapi, yachaipipish mejorashunchij. Huauqui panicunatapish shungumanta ayudashunchij. d Chaicunata rurajpimi Jehová Diosca bendicianga. Ashtahuancarin huauqui panicunaca Timoteo laya Jehová Diosta alli sirvij cashcatami ricungacuna (1 Timoteo 4:15).