Caitami tapushcacuna
Shuj huauquica Biblia nishca shina cutin cazarangapaj manaraj libre cashpami shujtaj huarmihuan cazaran. ¿Chaita rurajpica paipaj mushuj matrimonioca valinchu?
Chai huauqui chashna cutin cazarajpica paipaj punta matrimonioca chaipimi tucurin. Cunanca paica shuj mushuj matrimoniotami charin. Caita alli intindingapajca divorciarinamanta, cutin cazaranamanta Jesús imata yachachishcatami ricushun.
Mateo 19:9-pica Jesusca: ‘Maijanpish paipaj huarmi manapish huainayajpi divorciarishpa shujtaj huarmihuan cazarajca, huainayanmi’ nircami (NWT). Jesús nishcacunamantaca ishqui yuyaitami yachai tucunchij: 1) huainayashcallamantami cusa huarmica divorciari tucun, 2) maijanpish paipaj huarmi manapish huainayajpi divorciarishpa shujtaj huarmihuan cazarashpaca huainayanmi. a
Shinaca caipi yuyashun. Shuj runaca huainayashpa, paipaj huarmimanta divorciarishpaca ¿cutin cazarangapajca librechu can? Tal vez mana. Chai runa cashna huainayajpica paipaj huarmica paita perdonanata o mana perdonanatami decidi tucun. Paipaj huarmi paita mana perdonajpica paicunaca divorciari tucuncunami. Chashnami shujtajhuan cazarangapajca paicunaca libres saquirincuna.
Cutin tal vez huarmica paipaj cusata perdonashpami paihuan saquirisha nin. Shinapish huainayaj cusaca huarmi perdonasha nijpipish paimanta divorciarinatami decidin. Chashna divorciarishpaca cai runaca Biblia mandashca shina cutin cazarangapajca mana librechu can. Shinaca cai runaca shujtaj huarmihuan cazarashpaca cutinmi huainayan. Chaimi ancianocunaca cutin shuj comité judicialta rurashpa paita juzgana can (1 Corintios 5:1, 2; 6:9, 10).
Shinashpaca shuj runa cutin cazarangapaj mana libre cashpa shujtaj huarmihuan cazarajpica, ¿paipaj punta matrimonioca chaipichu tucurin? Cutin ¿mushuj matrimonioca valishcachu can? ¿Cai runa huainayashpa cutin cazarajpica traicionashca huarmica perdonanata o mana perdonanata decidi tucunchu? ¿Congregacionpi cajcunaca chai runa paipaj mushuj huarmihuan cazarajpica apanacushpalla o huainayashpalla causacushcatachu yuyana can?
Ñaupaca chai runapaj punta huarmi causacujpiraj, manaraj cazarajpi, huainayana juchapi mana urmajpica chai runa paipaj mushuj huarmihuan huainayashpalla causacushcatami yuyarcanchij. Pero Jesús ima nishcatami alli intindina canchij. Jesusca traicionashca huarmihuan ima tucunamantaca mana imata nircachu. Ashtahuanpish chai runa cutin cazarangapaj mana libre cashpa, shujtaj huarmihuan cazarashpaca, chai runa huainayashcatami Jesusca intindichisha nirca. Chaimantami chai runa huainayashpa cutin cazarashpaca paipaj punta matrimoniotaca chaipi tucuchin.
Mateo 19:9-pica, (NWT): “Maijanpish paipaj huarmi manapish huainayajpi divorciarishpa, shujtaj huarmihuan cazarajca huainayanmi” ninmi
Chai runa paipaj punta matrimoniota chashna tucuchijpica traicionashca huarmica paita perdonanata o mana perdonanataca ña mana decidinachu can. Chaimantapish ña mana preocuparinachu can. Shinallataj congregacionpi cajcunaca punta huarmi causacujpiraj o manaraj cazarajpi o huainayanapi mana urmajpica: “Cai runaca paipaj mushuj huarmihuan huainayashpallami causacun” nishpaca mana yuyanachu canchij. b
Cai catij ejemplocunapipish yuyashun. Cusaca manaraj huainayashpapish paipaj huarmimanta divorciarishpami shujtaj huarmihuan cazaran. Mana cashpaca cusaca puntaca paipaj huarmimantami divorciarin. Divorciarishca huashaca shujtaj huarmihuanmi huainayan. Chaimi paipaj punta huarmica perdonasha nin. Pero chai runaca perdonta mana chasquishpami shujtaj huarmihuan cazaran. Cai ishqui ejemplocunapica cai runaca shujtaj huarmihuan cazarashpa, huainayashpaca paipaj punta matrimoniotami tucuchin. Cunanca paica shuj mushuj matrimoniotami charin. La Atalaya del 15 de febrero de 1980, página 30-pica: “Chai runa mushuj matrimoniota charishcamantami paipaj punta matrimonioca chaipi tucurin. Chashna tucurishcamantami paipaj punta huarmihuanca ña mana tigrailla tucun” nircami.
Cai mushuj yachaita intindishpapish huainayana shuj jatun jucha cashcatami yuyarina canchij. Shinallataj matrimoniopish Diospajca valishca cashcatami intindina canchij. Chaimantami Biblia nishca shina shuj runa cazarangapaj mana libre cashpa shujtajhuan cazarajpica, ancianocunaca comité judicialta rurashpa paita juzgana can. (Mushuj huarmi Diosta sirvij cajpica ancianocunaca paitapishmi comité judicialta rurashpa juzgana can). Cai runaca mushuj huarmihuan cazarashpaca ishquindijmi jatun juchata rurashpa Biblia yachachishcata mana cazushcacuna. Chaimantami cai huauquica achca huatacunata congregacionpi ima responsabilidadcunataca mana chasqui tucunga. Ña tauca huatacuna qꞌuipapish ancianocunaca cai huauquiman ima responsabilidadta cungapajca, puntaca cai huauqui paipaj huarmita traicionashcamanta gentecuna chaita yuyarishcata o ña cungarishcatami ricuna can. Shinallataj ancianocunaca pai traicionashca huarmi, pai shitashca menor de edad huahuacunapish ima shina cashcatami ricuna can (Malaquías 2:14-16).
Ña ricushca shinaca maijanpish cutin cazarangapaj mana libre cashpa shujtajhuan cazarashpaca llaquipimi urmanga, shujtajcunatapishmi llaquichinga. Chaimantami Diosta sirvijcunaca matrimonio Jehová Diospaj valishca cashcata yuyarina canchij (Eclesiastés 5:4, 5; Hebreos 13:4).
a Cai yachaipica shuj cusa huainayashpa shujtaj huarmihuan cazarashcatami parlashun. Pero Marcos 10:11, 12-pi Jesús nishca shinaca cusapish, huarmipish ama chai juchapi urmangapajmi cuidarina can.
b Cai mushuj yachai llujshingacamaca punta huarmi causacujpiraj, mana cutin cazarajpi o mana huainayajpica traicionaj runaca huainayashpallami causacun nishpami yuyaj carcanchij. Pero cai yachaipimi mana chashna yuyana cashcata intindichin.
