¿Yacharcanguichu?
¿Davidpaj soldadocunapurapica israelitacunallachu tiyarca?
DAVIDPAJ soldadocunapurapica mana tucuicunachu israelitacuna carca. Por ejemplo, Zelecca ammonita, Uriasca hitita, Itmaca moabitami carca (1 Crónicas 11:39, 41, 46). a Shinallataj keretitacuna, peletitacuna, guitita soldadocunapishmi tiyarca (2 Samuel 15:18). Cai keretita, peletita soldadocunaca filisteocunapuramantami cashcangacuna (Ezequiel 25:16). Cutin guitita soldadocunaca Gat llajtapimi causajcuna cashcanga (Josué 13:2, 3; 1 Samuel 6:17, 18).
¿Shinashpaca imamantataj Davidca shujtaj llajtamanta caj soldadocunatapish charirca? Paica paipaj soldadocuna Jehová Diostapish, paitapish mana saquinatami seguro carca. Por ejemplo, keretitacunamanta, peletitacunamanta parlashpaca The New Interpreter’s Dictionary of the Bible libroca cashnami nin: “Rey David llaquicunata charijpica keretitacunapish, peletitacunapish paitaca mana saquircacunachu”. ¿Chaitaca ima shinataj yachanchij? Shuj cutinca millai runa Sebata sirvingapajmi tucui israelitacunaca rey Davidta saquishpa rircacuna. Pero keretitacuna, peletitacunaca Davidtaca mana saquircacunachu. Ashtahuancarin Seba runata tucuchingapajmi ayudarcacuna (2 Samuel 20:1, 2, 7). Shinallataj Davidpaj churi Adonías mandanata quichusha nijpica keretitacuna, peletitacunapish Davidtaca mana saquircacunachu. Ashtahuanpish Salomón rey cachunmi ayudarca. Paicunaca paita rey cachun Jehová agllashcatami yacharcacuna (1 Reyes 1:24-27, 38, 39).
Ittái soldadoca guititami carca. Shinapish Davidtaca tucui shunguhuanmi sirvirca. ¿Imamantataj chashna ninchij? Shuj cutinca Davidpaj churi Absalonca mandanata quichungapajmi israelitacunataca Davidpaj contra tucuchun pandachirca. Pero Ittaica paipaj 600 soldadocunahuanca Davidpaj contra mana tucushpami paitaca apoyashpa catircacuna. Chaita rurajpica Davidca Ittaitaca: ‘Canca mana israelitachu cangui. Ñucamantaca mana macanacunachu cangui’ nircami. Pero Ittaica: “¡Taita Diosca causacunmi, jatun mandaj ñuca amopish causacunguimi! Cambajta ruraj ñucaca huañungapajpish, causangapajpish jatun mandaj ñuca amo maipimi can, ñucapish chaipimi casha” nircami (2 Samuel 15:6, 18-21).
Ittái runaca Jehová agllashca reytami tucui shunguhuan sirvirca.
Keretitacuna, peletitacuna, guititacuna mana israelitacuna cashpapish Jehová Diospimi crircacuna. Shinallataj David Dios agllashca rey cashcata yachashcamantami paitaca respetarcacuna. Davidca cai alli soldadocunata charishcamantami achcata agradicirca.
a Deuteronomio 23:3-6-pica: “Mandaj Diospaj tandanacuimanca amonitacunapish, moabitacunapish mana yaicungacunachu” ninmi. ¿Caica imatataj nisha nin? Ammonitacunapish, moabitacunapish israelitacuna charishca derechocunataca mana chari pudircacunachu. Shinapish paicunaca israelitacunahuan causai pudircacunami. Ashtahuan yachangapajca Perspicacia para comprender las Escrituras, volumen 1, página 117-ta ricui.
