1. ¿Punta siglopi causaj huauqui panicuna tandalla cachunca Jesusca ima shinataj ayudarca?

 JEHOVÁ DIOSCA paita sirvijcunaman ima trabajota mingashpaca ordenpi rurachunmi munan (1 Corintios 14:33). Por ejemplo, paica muyundij allpapi paimanta huillachunmi munan (Mateo 24:14). Pero chai obrata pushachunca Jehová Diosca Jesusmanmi mingashca. Jesusca chai obra ordenpi rurarichunmi Diospaj pueblota pushacun. Por ejemplo, punta siglopica Jerusalenpi caj apostolcuna, ancianocunami decisioncunata japishpa, instruccioncunata cushpa congregacioncunapi orden tiyachun ayudarcacuna (Hechos 15:2; 16:4). Shinallataj congregacioncunata ñaupajman pushachun, instruccioncunata cuchunca ancianocunatami nombrajcuna carca (Hechos 14:23). Huauqui panicuna pushaj huauquicunapaj instruccioncunata cazushcamantami “crishcapi sinchiyarishpa, punllanta mirarishpa catircacuna” (Hechos 16:5).

2. ¿Jehová Diosca 1919 huatamantaca paipaj pueblotaca ima shinataj pushacushca?

² Jehová Diosca cunan punllacunapipish paita sirvijcuna ordenpi adorachunmi ayudacushca. Chaimi 1919 huatapica Jesusca predicacionta organizachun, huauqui panicunaman yachachichunca huaquin ungidocunata agllarca (Lucas 12:42). a Jehová Dios Cuerpo Gobernante huauquicuna cai trabajota alli pajtachichun ayudacushcataca allimi yachanchij (Isaías 60:22; 65:​13, 14).

3, 4. a) ¿Diospaj pueblopi orden tiyachunca imamantataj minishtirishca can? Shuj ejemplota churashpa parlai. b) ¿Cai yachaipica imatataj yachashun?

³ Mana organizados cashpaca Jesús mingashca obrataca mana pajtachi tucunchijmanchu (Mateo 28:​19, 20). Por ejemplo, cada congregacionmi huillangapajca territoriota charin. Pero cada congregación huillangapaj territoriocunata mana charishpaca maipish  cachunmi huillanchijman. Tal vez shujtaj congregacioncuna huillashca lugarcunallapitajmi cada rato huillacunchijman. Pero shujtaj ladocunapica mana nunca huillachinmanchu. ¿Congregacioncunapi orden tiyashcamantaca shujtaj beneficiocunapish tiyanchu?

⁴ Ima shinami Jesusca cai allpapi cashpaca paipaj discipulocuna ordenpi huillachun ayudarca, chashnallatajmi cunan punllacunapica Diospaj pueblo ordenpi huillachun ayudacun. Cai yachaipica ñaupa punllacunapi Jesús paipaj discipulocunata ima shina pushaj cashcata, cunan punllacunapish Diospaj organización ordenpi tucuita rurangapaj esfozaricushcatami yachashun. Shinallataj ñucanchijpish Jehová Diospaj organizacionpi confiashcata ricuchingapaj imata rurana cashcatapishmi ricushun.

ÑUCANCHIJ ORGANIZACIONCA JESUSPAJ EJEMPLOTAMI CATIN

5. ¿Jesuspaj ejemplotaca ima shinataj cati tucunchij? (Juan 8:28).

⁵ Jesusca imata ruranata, imata ninataca paipaj Yayamantami yacharca. Diospaj organizacionpish Bibliapi nishcacunata catishpami consejocunata, yachachishcacunatapish cun (Juan 8:​28-ta liyipai; 2 Timoteo 3:​16, 17). Shinallataj pushaj huauquicunaca Diospaj shimita liyichun, chaipi nishcacunata causaipi pajtachichunmi animan. ¿Paicunapaj consejocunata cazushpaca ima shinataj causashun?

6. ¿Bibliataca imamantataj estudiana canchij?

⁶ Diospaj organización cushca publicacioncunahuan Bibliata estudianaca allimi can. ¿Imamanta? Chaita rurashpaca Diospaj organización cushca instruccioncunataca Bibliapi nishcacunahuanmi chꞌimbapurai tucushun. Chashnami Diospaj organización cushca instruccioncuna Bibliamanta japishca cashcata cuentata cushun. Ashtahuanpish Diospaj organizacionpimi confiashpa catishun (Romanos 12:2).

7. a) ¿Jesusca imatataj yachachishpa purirca? b) ¿Diosta sirvijcunapish imatataj rurana canchij?

⁷ ‘Jesusca Diospaj Gobiernomanta alli huillaicunatami’ huillashpa purirca (Lucas 4:​43, 44). Shinallataj paita catijcunatapish Diosmanta huillachunmi mandarca (Lucas 9:​1, 2; 10:​8, 9). Cunan punllacunapipish Diospaj pueblopi cajcunaca maipi causashpapish, ima privilegiocunata charishpapish Diosmanta huillashpa catingapajmi esforzarinchij.

8. ¿Diosta sirvijcunaca ima privilegiotataj charinchij?

⁸ Diospaj Gobiernomanta shujtaj gentecunaman yachachinaca valishca privilegiomi can. Chaitaca mana tucui gentecunachu rurai tucun. Por ejemplo, demoniocuna Jesús pi cashcata huillasha nijpica paica mana saquircachu (Lucas 4:41). Cunan punllacunapipish testigo de Jehovacunahuan pi huillanaman llujshisha nishpaca huaquin requisitocunatami pajtachina can. ¿Diosmanta huillana privilegiota valorashcataca ima shinatataj ricuchinchij? Chaipajca maipi cashpapish Diosmanta huillanami canchij. Ashtahuanpish Jesuspaj ejemplota catishpami muyuta tarpuj shina, yacutapish jichaj shina Diospaj yachachishcacunahuan gentecunapaj shunguman chayangapaj esforzarina canchij (Mateo 13:​3, 23; 1 Corintios 3:6).

9. ¿Testigo de Jehovacunaca Diospaj shutita rijsichingapajca imatataj rurashcanchij?

⁹ Jesusca gentecunamanca Diospaj shutitami rijsichirca. Chaimi Diosta mañashpaca: “Paicunamanmi cambaj shutitaca rijsichishcani” nirca (Juan 17:26). Testigo de Jehovacunaca tucui gentecunaman Diospaj shutita rijsichingapajmi esforzaricunchij. Chaipajca Traducción del Nuevo Mundo nishca Bibliatami utilizanchij. Chai Bibliapaj tucui librocuna o huaquin librocunaca 270 yalli shimicunapimi tiyan. Traducción del Nuevo Mundo nishca Bibliata traducijcunaca punta quillcashcacunapi Diospaj shutica maipimi carca, chaipimi Diospaj shutitaca churarcacuna. Chaita ima shina rurashcata ashtahuan intindingapajca español Bibliapi tiyaj apéndice A4 y A5-ta ricui. Shinallataj español Biblia de estudio nishcapipish apéndice C-ta ricui. Chaipica Mushuj Testamentopi Diospaj shutica 237 cutincuna ricurina cashcatami intindichin.

10. ¿Myanmar llajtapi causaj huarmimantaca imatataj yachanchij?

 ¹⁰ Jesús shinaca ¿imatataj rurana canchij? Ñucanchijpish tucui gentecunaman Diospaj shutita rijsichingapajmi esforzarina canchij. Myanmar llajtapi causaj shuj panica 67 huatacunata charij huarmimanmi Diospaj shutita yachachirca. Diospaj shuti maijan cashcata yachashpaca chai huarmica de contentomi huacai callarirca. Paica: “Diospaj shuti maijan cashcataca mana yachashcanichu. Chaita yachanaca tucui ñuca causaipi ima yachashcatapish yalli valishcami can” nircami. Cai experienciapi yachashca shinaca gentecunaca Diospaj shutita yachaj chayashpaca paicunapaj causaitami cambiai tucun.

DIOSPAJ ORGANIZACIONPI CONFIASHCATA RICUCHISHPA CATISHUNCHIJ

11. ¿Ancianocunaca Diospaj organizacionpi confiashcataca ima shinataj ricuchincuna? (Fotomantapish parlapai).

¹¹ ¿Ancianocunaca Diospaj organizacionpi confiashcataca ima shinataj ricuchi tucun? Chaipajca paicunaman cushca instruccioncunata alli intindingapaj, utca pajtachingapajmi esforzarina can. Por ejemplo, Diospaj organizacionca tandanacuicunata ima shina rurana cashcata, shinallataj tandanacuicunapi Yaya Diosta ima shina mañana cashcatami yachachishca. Ancianocunaca chai instruccioncunata pajtachingapajmi esforzarina can. Shinallataj ancianocunaca Cristopaj ovejitacunata ima shina cuidana cashcata yachangapajca instruccioncunatami chasquishcacuna. Chai instruccioncunata pajtachingapaj esforzarijpica huauqui panicunaca Jehová Diospaj valishca cashcata, paicunata manataj saquishcatami cuentata cungacuna.

12. a) ¿Pushaj huauquicuna cushca instruccioncunataca imamantataj cazuna canchij? (Hebreos 13:​7, 17). b) ¿Pushaj huauquicunapaj pandarishcacunallataca imamantataj mana ricuna canchij?

¹² Ancianocuna instruccioncunata cujpica cushicushpami cazuna canchij. Chashnami paicunaman mingashca trabajota alli pajtachichun ayudashun. Bibliapi nishca shinaca ñucanchijta pushajcunataca cazuna, respetanami canchij (Hebreos 13:​7, 17-ta liyipai). Ancianocuna juchayujcuna cashcamantami huaquinpica paicunata cazunaca sinchi canga. Pero paicunapaj pandarishcacunallata ricushpaca ñucanchij enemigo Diablota apoyacushcatami ricuchishun. ¿Imamantataj chashna ninchij? Diospaj enemigocunaca Diospaj organizacionpi ama confiachunmi pandachisha nin. Chaimantami ancianocunapaj pandarishcacunallata ricui callarishpaca Diospaj enemigocuna ñucanchijta pandachicushcata ricuchishun. ¿Diospaj enemigocunaca ima shinallataj ñucanchijta pandachisha nin? ¿Paicunapaj trampacunapi ama urmangapajca imatataj rurana canchij?

SHUJTAJCUNA PANDACHICHUNCA AMA SAQUISHUNCHIJ

13. ¿Diospaj enemigocunaca Diospaj organizacionmantaca imata yuyachuntaj munancuna?

¹³ Diospaj organizacionca ñucanchijcuna alli causachun munashpami chꞌican chꞌican instruccioncunata cun. Shinapish Diospaj enemigocunaca chai instruccioncuna mana alli cashcata yuyachunmi munancuna. Por ejemplo, Bibliapi nishca shinaca Diosta sirvijcunaca cuerpopi, yuyaipimi chuya, limpio cana canchij. Shinallataj Bibliapi nishca shinaca paicunapaj mapa ruraicunamanta mana arrepintirijcunaca congregacionmantami llujshichishca cana can (1 Corintios 5:​11-13; 6:​9, 10). Bibliapi nishcacunata cazungapaj esforzarijta ricushpaca Diospaj enemigocunaca: “Cancunaca yallitaj exagerajcuna, millaicunami canguichij. Shujtajcunata yalli cashcatapishmi yuyanguichij” nincunami.

14. ¿Pi yuyaita cujpitaj Diospaj enemigocunaca ñucanchijmanta llullacunata nincuna?

¹⁴ Diablo yuyaita cujpi Diospaj enemigocuna ñucanchijta yangamanta juchachishcatami yuyarina canchij. Diabloca ‘llullapaj yayami can’. Chaimantami paica Diospaj organizacionmanta achca llullacunata nishpa ñucanchijta pandachisha nin (Juan 8:44; Génesis 3:​1-5). Paica punta siglopipish, cunan punllacunapipish ñucanchijmanta  llullacunata nichunmi paita sirvijcunamanca yuyaita cushca.

15. ¿Panda religioncunata pushajcunaca Jesustapish, paita catijcunatapish ima shinataj llaquichircacuna?

¹⁵ Jesusca jucha illajmi can. Paica cai allpapi cashpaca milagrocunata rurashpami gentecunataca ayudarca. Shinapish Diabloca Jesusmanta llullacunata nichunmi huaquin gentecunamanca yuyaita curca. Por ejemplo, panda religioncunata pushajcunaca “Jesusca demoniocunata mandaj poderta cujpimi demoniocunataca llujshichin” nishpami yangamanta juchachircacuna (Marcos 3:22). Jesusta juzgacushpapish chai millai pushajcunaca ‘Jesusca llullacunatami yachachishpa puricun’ nishpami juchachircacuna. ‘Jesusta huañuchichun mañaichij’ nishpapishmi chaipi cajcunataca yachachircacuna (Mateo 27:20). Jesús huañushca qꞌuipa discipulocuna huillai callarijpipish paicunaca ‘gentecunata tandachishpami paicunapaj contra jatarichircacuna’ (Hechos 14:​2, 19). La Atalaya del 1 de diciembre de 1998 revistapica Hechos 14:​2-pi nishcacunamantami yachachirca. Chai revistapi nishca shinaca panda religionta pushajcunaca Diosmanta shamuj alli huillaicunataca mana chasquishun nircacunachu. Ashtahuancarin shujtaj llajtacunamanta gentecunapish Jesuspaj discipulocunata catirashpa llaquichichunmi achca llullacunata nircacuna.

16. ¿Llullacunahuan ñucanchijta pandachisha nijpica imatataj yuyarina canchij?

¹⁶ Diabloca llullacunata ninataca manataj saquishcachu. Paica “allpapi causajcunataca tucuicunatami pandachicun” (Apocalipsis 12:9). ¿Chaimanta Diospaj organizacionmanta, ñucanchijta pushajcunamanta llullacunata nijpica imatataj rurana canchij? Diospaj enemigocuna Jesustapish, paita catijcunatapish ima shina pandachisha nishcatami yuyarina canchij. Bibliapi nishca shinaca cunan punllacunapipish millai gentecunaca Diosta sirvijcunatapishmi catirashpa llaquichina carca. Shinallataj llullacunata nishpami paicunataca yangamanta juchachina carca (Mateo  5:​11, 12). Pero ñucanchijta ama pandachichunca Diablo yuyaita cushcamanta llullacunata nijcuna cashcatami yuyarina canchij. Cunanca chai llullacunapi ama cringapaj imata rurana cashcatami yachashun.

17. ¿Llulla parlocunata nijpica imatataj rurana canchij? (2 Timoteo 1:13; “ ¿Llulla parlocunapi ama cringapajca imatataj rurana cangui?” nishca recuadrotapish ricui).

¹⁷ Llulla parlocunapi ama crishunchij. Llulla parlocuna uyarijpica 1 Timoteo 1:​3, 4-pi apóstol Pablo nishca shinaca chaicunataca mana uyanachu canchij. Pabloca Timoteotaca “llulla parlocunataca ama uyangui” nishpami aconsejarca (1 Timoteo 4:7). Caipi yuyashun, llullu huahuacunaca pambapi imata tarishpaca chaita japishpami shimiman apanllacuna. Pero jatuncunaca chaitaca mana ruranchijmanchu. ¿Imamanta? Ñucanchijta dañota rurai tucushcata yachashcamanta. ¿Caimantaca imatataj yachanchij? Llulla parlocunaca pambapi tarishca mapa cosascuna shinami can. Ñucanchijta dañota rurai tucushcataca allimi yachanchij. Chaimantami chaicunata uyanapaj randica Diosmanta shamuj ‘alli yachaicunata’ uyana canchij (2 Timoteo 1:​13-ta liyipai).

18. ¿Jehová Diospaj organizacionpi confiashcataca ima shinataj ricuchinchij?

¹⁸ Cai yachaipica Diospaj organización Jesuspaj ejemplota ima shina caticushcataca quimsa yuyaicunallatami yachashcanchij. Pero Diospaj organizacionca shujtaj ruraicunapipish Jesuspaj ejemplota catingapajmi esforzarin. Chaimanta ashtahuan yachangapajca Bibliatami estudiana canchij. Shinallataj shujtaj huauqui panicunapish Jehová Diospaj organizacionpi confiashpa catichunmi ayudana canchij. Caipi yachashca shinaca Jehová Diosca paipaj munaita pajtachingapajmi shuj organizacionta charin. Chaimanta Jehová Diospi, paipaj organizacionpipish confiashpa catingapaj esforzarishunchij (Salmo 37:28). Diospaj organizacionca cꞌuyaita ricuchinataca manataj saquingachu. Cai organizacionpi Jehová Diosta sirvi tucushcamanta agradicishpa catishunchij.