1. ¿Jehová Diosca imata rurachuntaj munan?

 SHUJ huahua huacharijpica yaya mamacunaca achcatami cushicuncuna. Paicunaca llullu huahuataca achcatami cꞌuyancuna. Pero para siempre llullu huahua cachunca mana munancunachu. Ashtahuanpish huiñashpa catichunmi munan. Huahua mana huiñajpica paicunaca achcatami sustarinman. ¿Caimantaca imatataj yachanchij? Diosmanta yachai callarishpaca uchilla huahuacuna shinami carcanchij. Ñucanchij esfuerzocunata ricushpaca Yayitu Diosca achcatami cushicurca. Pero paica “uchilla huahuacuna” shina saquirichunca mana munanchu (1 Corintios 3:1). Ashtahuanpish espiritualmente ‘jatun runacuna shina tucuchunmi’ munan (1 Corintios 14:20).

2. ¿Cai yachaipica ima tapuicunatataj cutichishun?

² Cai yachaipica cai tapuicunatami cutichishun: ¿Espiritualmente sinchi canaca imatataj nisha nin? ¿Espiritualmente sinchiyashpa catingapajca imatataj rurana canchij? ¿Imamantataj Jehová Diospajman cꞌuchuyangapajca sinchi yachaicunatapish yachana canchij? ¿Ña tucuita yachashcataca imamantataj mana yuyana canchij?

¿ESPIRITUALMENTE SINCHI CANACA IMATATAJ NISHA NIN?

3. ¿Bibliapica “jatun runacuna shinami cana canguichij” nishpaca imatataj nisha nin?

³ Bibliapi “jatun runacuna shina caichij” nishpaca ashtahuan edadta charina cashcataca mana nicunchu. Ashtahuanpish griego rimaipica “jatun runacuna shinami cana canguichij” nishpaca espiritualmente sinchi cana cashcatami nicun (1 Corintios 2:6). a Shinashpaca jatun runacuna shina cangapajca huahuacuna laya canata saquishpami espiritualmente sinchi tucuna canchij. Pero ña espiritualmente sinchi tucushpapish huiñashpami catina canchij (1 Timoteo  4:15). ¿Jovencuna cashpapish jatuncuna cashpapish espiritualmente sinchi cashcata yachangapajca imatataj rurana canchij?

4. ¿Espiritualmente sinchi cajcunaca imata rurangapajtaj esforzarincuna?

⁴ Espiritualmente sinchi cajcunaca paicuna munashcacunallata cazunapaj randica Jehová Dios mandashcacunata tucuipi cazungapajmi esforzarincuna. Juchayujcuna cashcamanta pandarijllacuna cashpapish Jehová Dios munashca shina causangapajmi sinchita esforzarincuna. Shinallataj mushuj churanata churarij shinami mushuj causaita causancuna. Chaimantami paicunapaj yuyaicunata mushujyachishpa Jehová Dios shina yuyangapaj esforzarincuna (Efesios 4:​22-24). Tucui ruraicunapaj achca leycuna tiyachunca mana minishtincunachu. Ashtahuanpish Jehová Dios cushca leycunapi, mandashcacunapi yuyashpami imatapish alli agllancuna. Shinallataj shuj decisionta agllashca cashpapish chaita pajtachingapajmi sinchita esforzarincuna (1 Corintios 9:​26, 27).

5. ¿Maijancunaca espiritualmente mana sinchi cashcamantaca imatataj rurashcacuna? (Efesios 4:​14, 15).

⁵ ‘Maijancunaca llullacunata yachachishpami espiritualmente mana sinchi cajcunata pandachincuna’. Por ejemplo, maijancunaca llulla noticiacunata, apostatacuna nishcacunata crishcamantami pandarishcacuna (Efesios 4:​14, 15-ta liyipai). b Shinallataj huaquincunaca espiritualmente mana sinchi cashcamantami envidiajcuna, imamantapish pꞌiñarijcuna, rato resintirijcuna can. Maijancunacarin jahuallami tentacioncunapi urmancuna (1 Corintios 3:3).

6. ¿Espiritualmenteca ima shinataj sinchi tucunchij? Shuj ejemplota churashpa parlai. (Fotocunamantapish parlapai).

⁶ Bibliapi nishca shinaca, huiñashpa catij huahua shinami espiritualmente huiñashpa catina canchij. Uchilla huahuacunaca ama llaqui tucungapajca siempremi paicunapaj yaya mama paicunata cuidachun minishtincuna. Por ejemplo, calleta pasangapajca shuj mamaca paipaj huahuataca “maquita cuhuai” ninmi. Huahua ashtahuan huiñajpica mamaca pailla calleta cruzachunmi saquin. Pero “carrocunata alli ricungui” nishpami advirtin. Chai huahua jatunyashpaca ama llaqui tucungapajmi imata ruranataca paillataj alli yachanga. ¿Caimantaca imatataj yachanchij? Manaraj espiritualmente sinchi cajcunaca ama llaquicunata charingapaj, alli decisioncunata agllangapajpish espiritualmente sinchi caj huauqui panicuna ayudachunmi minishtincuna. Pero  espiritualmente sinchi cajcunaca Jehová Dios Bibliapi imata yachachishcata yuyaipi charishpami paicunallataj alli decisioncunata japincuna.

7. ¿Espiritualmente sinchi cajcunaca siemprechu paicunalla imatapish decidincuna?

⁷ ¿Espiritualmente sinchi cajcunaca siemprechu paicunalla, pita mana tapushpa imatapish decidincuna? Mana. Paicunapish huaquinpica experienciata charij huauqui panicunapaj ayudata mashcashpami alli decidincuna. Pero shujtajcunapaj ayudata mashcashpapish paicunallatajmi alli yuyashpa imatapish agllancuna (Gálatas 6:5). Cutin, ¿espiritualmente huahuacuna shina cajcunaca ima shinataj can? Paicunaca shujtajcuna imata ruranata nichun o paicunamanta decidishpa cuchunmi shuyancuna.

8. ¿Diosta sirvijcunaca espiritualmente sinchi cashpapish imamantataj chꞌicancuna canchij?

⁸ Huahuacunaca jatunyashpaca chꞌican chꞌicancunami can. Chashna layallatajmi Diosta sirvijcunaca espiritualmente huiñashpaca cada uno chꞌican chꞌican cualidadcunata charinchij. Por ejemplo, maijancunaca alli yachaita charijcuna, mana manchajcuna, shungumanta cujcuna, shujtajcunamanta sustarijcunami can. Shinallataj espiritualmente sinchi cashpapish cada unomi chꞌican chꞌican decisioncunata japinchij. Pero Bibliapi nishcacunata yuyaipi charishpa decidishcamantami tucuicuna Diospaj ñaupajpica alli ricurinchij. ¿Shujtajcuna ñucanchij shina mana decidijpica imatataj rurana canchij? Paicunataca mana criticanachu canchij. Ashtahuanpish respetotami ricuchina canchij. Chashnami tucuicuna tandalla Jehová Diosta sirvishpa catishun (Romanos 14:10; 1 Corintios 1:10).

¿ESPIRITUALMENTE SINCHI TUCUNGAPAJCA IMATATAJ RURANA CANCHIJ?

9. ¿Espiritualmente huiñashpa catingapajca imatataj rurana canchij?

⁹ Huatacuna pasajpica huahuacunaca runa entero tucungacamami huiñashpa catincuna. ¿Diosta sirvijcunahuanca chashnallatajchu can? Mana. Huatacuna pasajpipish cada uno mana esforzarishpaca espiritualmenteca mana huiñashpa catishunchu. Por ejemplo, Corintopi causaj huauqui panicunaca Diosmanta yachashpami bautizarircacuna. Chai qꞌuipaca espíritu santotami chasquircacuna. Apóstol Pablomantapish achcatami yacharcacuna (Hechos 18:​8-11). Pero achca huatacuna pasajpipish paicunaca espiritualmente huiñashpaca mana catircacunachu (1 Corintios 3:2). ¿Ñucanchijpish paicuna shina ama tucungapajca imatataj rurana canchij?

10. Judas 20-pi nishca shinaca ¿espiritualmente huiñashpa catingapajca imatataj rurana canchij?

¹⁰ Maijancunaca jatuncuna cashpapish paicunapaj yaya mama paicunamanta tucuita decidishpa cuchunmi munancuna. Chashnallatajmi maijancunaca espiritualmente huahuacuna laya cashcamanta mana huiñashpa catincuna (Proverbios 1:22). Pero ñucanchijpish paicuna layaca mana casha ninchijchu. Ashtahuanpish espiritualmente sinchi tucungacamami esforzarishpa catina canchij (Judas 20-ta liyipai). Pero chaita rurangapajca espiritualmente sinchi tucuna munaitami charina canchij. ¿Canpish espiritualmente sinchi tucunata munanguimanchu? Chaipajca Jehová Diostami ‘munaitapish, fuerzatapish cushpa sinchiyachipai’ nishpa mañana cangui (Filipenses 2:13).

11. ¿Jehová Diosca espiritualmente sinchi tucuchunca ima shinataj ñucanchijtaca ayudan? (Efesios 4:​11-13).

¹¹ ¿Jehová Diosca espiritualmente sinchi tucuchunca ima shinataj ñucanchijtaca ayudan? Paica congregacionpica huaquin huauquicunatami michijcuna, yachachijcuna cachun churashca. Paicuna “ayudajpimi Cristo shinallataj allita rurajcuna tucushpa alli yuyaiyuj, jatun runacuna tucushun” (Efesios 4:​11-13-ta liyipai). Shinallataj Jehová Diosca ‘Cristopaj yuyaita’ charichunmi espíritu santota cun (1 Corintios 2:​14-16). Ashtahuanpish Jehová Diosca Jesusmanta yachachunca Mateo, Marcos, Lucas, Juan librocunatami quillcachirca. Jesús shina yuyangapaj, allicunata parlangapaj, alli causangapaj esforzarishpaca espiritualmente sinchimi tucushun.

 SINCHI MICUNACUNATA MICUSHUNCHIJ

12. ¿‘Cristomanta punta yachaicunaca’ maijancunallataj can?

¹² Espiritualmente huiñashpa catingapajca ‘Cristomanta punta yachaicunata’ yachashpallaca mana saquirinachu canchij. ¿‘Cristomanta punta yachaicunaca’ maijancunallataj can? Por ejemplo, Diosmanta yachai callarishpaca juchacunamanta arrepintirina cashcata, sinchi feta charina cashcata, bautizarina cashcata, huañushcacuna causarina cashcatapishmi yacharcanchij (Hebreos 6:​1, 2). Chai punta yachaicunatami tucuicuna alli intindina canchij. Chaimi apóstol Pedroca Pentecostés fiestapica achca gentecunaman chai punta yachaicunata yachachirca (Hechos 2:​32-35, 38). Jesusta catijcuna tucungapajca chai punta yachaicunata chasquinaca minishtirishcami can. Chaimantami Pabloca: ‘Huañushcacuna causarina cashcata mana crijpica cancunapaj crishcapish yangallami canman’ nirca (1 Corintios 15:​12-14). Shinapish cai punta yachaicunallata yachashpaca mana saquirinachu canchij.

13. ¿Hebreos 5:​14-pi parlashca sinchi yachaicunata alli intindingapajca imatataj rurana canchij? (Fotocunamantapish parlapai).

¹³ ‘Cristomanta punta yachaicunapish’, sinchi yachaicunapishmi tiyan. Chai yachaicunaca sinchi micunacuna shinami can. ¿Sinchi yachaicunaca imacunallataj can? Por ejemplo, Jehová Dios cushca mandashcacunata, consejocunatami charinchij. Chai consejocunami Jehová Dios ima shina yuyashcata alli intindichun ayudan. Pero chai yachaicunata alli intindingapajca Bibliatami alli estudiana canchij, imata liyishcapipishmi yuyana canchij. Ashtahuantajca ñucanchij causaipi pajtachingapajmi esforzarina canchij. Chashnami alli decisioncunata japishpa Jehová Diospaj shunguta cushichishun (Hebreos 5:​14-ta liyipai). c

14. ¿Corintopi caj huauqui panicuna espiritualmente sinchi tucuchunca Pabloca ima shinataj ayudarca?

¹⁴ Espiritualmente mana sinchi cajcunapajca Bibliapi imata ruranata mana nijpica shuj alli decisionta japinaca sinchimi can. Shinallataj maijancunaca paicunapaj munashcata ruranalla cashcatami yuyancuna. Shujtajcunaca mana minishtirishca cajpipish shuj mandashcata churachunmi munancuna. Por ejemplo, Corintopi causaj huauqui panicunaca yanga dioscunaman cushca micunacunata micui tucushcata o mana micui tucushcata yachangapajca shuj mandashcata churachunmi apóstol Pablota mañashcangacuna. Pero chaita ruranapaj randica Pabloca  cada uno chaita decidina cashcatami intindichirca. Shinallataj cada uno alli decisionta japichunca Bibliapi nishcacunatami yuyachirca. Chashnami concienciapi tranquilo sintirichun, shujtajcunatapish ama ñitcachichun paicunataca ayudarca (1 Corintios 8:​4, 7-9). ¿Pabloca imamantataj chaita rurashcanga? Paica mandashcacunallapi yuyashpa ama decidichun, ashtahuanpish Diospaj mandashcacunapi yuyashpa imatapish alli decidichunmi paicunataca ayudasha nirca.

15. ¿Hebreo huauqui panicuna espiritualmente sinchiyashpa catichunca Pabloca ima shinataj ayudarca?

¹⁵ Hebreo huauqui panicunaman Pablo quillcashca cartapipish shuj sumaj yuyaitami yachai tucunchij. Maijancunaca espiritualmente sinchiyashpa catingapajca mana esforzarircacunachu. Chaimi Pabloca: “Cancunaca sinchi micunata micunapaj randica llullu huahuacuna shinami lecheta cutin minishtinguichij” nirca (Hebreos 5:12). Paicunaca Jehová Dios yachachishca mushuj yuyaicunataca mana yachanata munarcacunachu (Proverbios 4:18). Por ejemplo, Jesús huañujpimi Moisesman cushca leyca tucurirca. Pero 30 huatacuna pasashca cajpipish achca hebreo huauqui panicunaca chai leyta cazuna cashcatami yuyashpa caticurcacuna (Romanos 10:4; Tito 1:10). Paicunaca chashna yuyanata saquingapajca 30 huatacunatami charircacuna. Pero mana esforzarircacunachu. Chaimantami Pabloca chai yuyaita cambiashpa Jehová Dios yachachishca mushuj yuyaicunata yachachun ayudasha nirca. ¿Pero imamantataj sinchi yachaicunatapish intindingapaj esforzarina carcacuna? Chai sinchi yachaicunata yachashpaca Jesús huañushcamanta Jehová Diosta ashtahuan alli adorai tucushcatami cuentata cugrircacuna. Shinallataj judiocuna jarcasha nijpipish mana manchashpa Diosmanta huillashpa catingapajmi chai sinchi yachaicunata yachana carcacuna (Hebreos 10:​19-23).

¿IMAMANTATAJ ESFORZARISHPA CATINA CANCHIJ?

16. ¿Espiritualmente sinchi cashpapish imatataj rurashpa catina canchij?

¹⁶ Espiritualmente sinchi tucungapaj esforzarinaca allimi can. Pero huahuacuna shina ama cutin tucungapajpishmi esforzarishpa catina canchij (1 Corintios 10:12). Espiritualmente sinchi tucucushcata cuentata cungapajca ‘ñucanchijllatajmi alli ricurashpa catina canchij’ (2 Corintios 13:5).

17. ¿Colosaspi causaj huauqui panicunataca Pabloca ima shinataj animarca?

¹⁷ Colosaspi causaj huauqui panicunataca Pabloca espiritualmente sinchi tucuchunmi animarca. Shinallataj espiritualmente sinchi cajpipish cuidarishpa catichunmi animarca. Colosaspi causaj  huauqui panicunaca ñami espiritualmente sinchicuna carca. Pero ‘cai pachapaj yuyaicunata’ ama cringapajmi esforzarishpa catina carcacuna (Colosenses 2:​6-10). Epafrasca paicunataca allimi rijsirca. Chaimantami espiritualmente sinchi cashpa catichun paicunamanta Yaya Diosta mañaj carca (Colosenses 4:12). ¿Caimantaca imatataj yachanchij? Espiritualmente ama chiriyangapajmi esforzarishpa catina canchij. Shinallataj Jehová Dios ñucanchijta ayudachunmi minishtinchij. Pablopish, Epafraspish chaitaca allimi yacharcacuna. Chaimantami “jarcaicuna ricurijpipish esforzarishpa catichij” nishpa Colosaspi caj huauqui panicunataca animarcacuna.

18. ¿Espiritualmente sinchi cashpapish imamantataj cuidarishpa catina canchij? (Fotomantapish parlapai).

¹⁸ Pabloca hebreo huauqui panicunataca: “Cancunaca espiritualmente sinchicuna cashpapish mana cuidadota charishpaca Yaya Diosmantaca para siempremi caruyai tucunguichij” nishpami advirtirca. Ñucanchijpish mana cuidadota charishpaca Diosmanta caruyashpa ñucanchij juchacunamantaca ña mana arrepintirinata munashunchu. Ñucanchij shungu rumiyashcata ricushpaca Yaya Diosca mana perdonasha ningachu. Hebreo huauqui panicunaca manaraj chaita tucushcacunachu carca (Hebreos 6:​4-9). Cunan punllacunapica maijancunaca espiritualmenteca chiriyashcacunami. Cutin shujtajcunataca paicunapaj juchacunamanta mana arrepintirishcamantami congregacionmanta llujshichishcacuna. Pero humilde shunguhuan paicunapaj juchacunamanta arrepintirishpaca Pablo parlashca millai gentecuna shina mana cashcatami ricuchincuna. Paicunaca Jehová Diosman cutirishpaca Jehová Diospaj ayudatami minishtincuna (Ezequiel 34:​15, 16). Chaimantami anciano huauquicunaca espiritualmente sinchi caj huauquita o panita paicunata ayudachun mañangacuna. Chashnami paicunaca cutin Jehová Diospaj ñaupajpi alli ricuri tucungacuna.

19. ¿Imata rurangapajtaj tucuicuna esforzarishpa catina canchij?

¹⁹ ¿Canca espiritualmente sinchi tucungapajchu esforzaricungui? Chashna cajpica tucui shunguhuan esforzarishpa cati. Shinallataj Diosmanta shamuj sinchi yachaicunata intindingapaj, Jehová Dios yuyashca shina yuyangapajpishmi esforzarishpa catina cangui. Cutin, ¿canca ñachu espiritualmente sinchi cangui? Chashna cajpipish cutin ama huahua shina tucungapajmi tucui shunguhuan esforzarishpa catina cangui.