APÓSTOL Pabloca Diospaj espirituta charishpa ñucanchijcuna ima shina canatami parlarca (Gálatas 5:22, 23) * (urapi tiyaj notata ricui). Dios munashca shina causangapajca espiritupaj granota charishcatami ricuchina canchij (Colosenses 3:10). Shuj yurata cuidajpica alli granomi pꞌucun ¿nachu? Chai yura shinallatajmi shuj runaca Diospaj espíritu ayudachun saquishpaca Dios munashca shina causai tucun (Salmos 1:1-3).

Pabloca cꞌuyaimantami parlashpa callarirca. Paica: Mana cꞌuyaj cashpaca, “imapish mana canichu” nircami. Chaimantami cꞌuyaita ricuchina canchij (1 Corintios 13:2). Pero ¿cꞌuyaica imataj can? ¿Cꞌuyaj cangapajca imatataj rurana canchij? ¿Ima shinataj tucui punllacuna cꞌuyaita ricuchi pudinchij?

Cꞌuyai ima cashcata parlanaca sinchimi can. Shinapish Bibliapica cꞌuyaita charijca “llaquita apajmi. Imapish mana llulla cajpimi cushicun. Tucui llaquita apanllami, tucuita crinllami, tucuita shuyanllami, tucuita ahuantanllami” ninmi. Maijanpish cꞌuyaita charijca tucui shunguhuanmi shujtajcunamanta preocuparin, ayudan, allipipish llaquipipish mana caruyanchu. Cutin cꞌuyaita mana charijcunaca envidioso, jatun tucushcacuna, pꞌiñarishpapish manataj cungarijcuna, mana perdonajcuna, paicunalla alli canata munajcunami can. Paicuna shinaca mana casha ninchijchu. Chaipaj randica ‘mana ñucanchijllapaj mashcashpami’ cꞌuyaita ricuchina canchij (1 Corintios 13:4-8).

“Diosca cꞌuyajmi” can (1 Juan 4:8). Paica tucui rurashcacunahuanmi cꞌuyaj cashcata ricuchin. Diosca ñucanchijta yallitaj cꞌuyashcamantami paipaj Churita ñucanchij juchacunamanta huañuchun cacharca. Apóstol Juanca cashnami nirca: “Diosca paipaj shujlla Churimanta ñucanchij quishpirichunmi cai pachaman cacharca. Chashnami pai cꞌuyaj cashcataca ricuchirca. Mana ñucanchijchu Diostaca cꞌuyashcanchij, ashtahuanpish paimari ñucanchijta cꞌuyashpa ñucanchij juchacunamanta huañushpa juchacunata anchuchichun paipaj Churitaca cacharca. Chashnami pai cꞌuyashcataca ricuchishca” nircami (1 Juan 4:9, 10). Jehová Dios cꞌuyashcamantami ñucanchij juchacunata perdonan. Shinallataj shamuj punllacunapipish huiñai causaitami cunga.

Jesusca paipaj Yayapaj munaita pajtachingapajmi cai Allpaman shamushpa ñucanchijta quishpichirca. Chashnami ñucanchijta cꞌuyashcata ricuchirca. Chaimantami Pabloca: “Jesucristoca Diospaj munaita rurashpa shuj cutinlla huiñaipaj paipaj aichata ofrendata shina Diosman cujpimi,  ñucanchijca jucha illajta rurashcacuna canchij” nircami (Hebreos 10:9, 10). Jesús cꞌuyashca shinaca ni pi mana cꞌuyashcachu. Jesusca: “Maijanpish paihuan alli apanacujcunamanta huañujca yallitaj cꞌuyajmi. Chashna cꞌuyajca pi mana tiyanchu” nircami (Juan 15:13). Juchayuj cashpapish Jehová Dios laya, Jesús layami cꞌuyai tucunchij. ¿Ima shinataj paicuna laya cꞌuyaj cai tucunchij?

Pabloca: ‘Cꞌuyashca huahuacuna cashcamanta, Diosta ricushpa catijcuna caichij. Cristo ñucanchijta cꞌuyashca shina, cꞌuyaipi purichij’ nircami (Efesios 5:1, 2). Cꞌuyaipi puringapajca maipi cashpapish, imata ruracushpapish cꞌuyaita ricuchinami canchij. Shinapish “cꞌuyanimi nishpallaca” mana purinachu canchij. Ashtahuanpish rurashcacunahuanmi cꞌuyaita ricuchina canchij. Juanca: “Ñuca huahuacunalla, ama shimillahuan, cꞌallullahuan cꞌuyanimi nishunchij. Ashtahuanpish imatapish rurashpataj cꞌuyashcata ricuchishunchij” nircami (1 Juan 3:18). Jehová Diostapish, shujtajcunatapish cꞌuyashcamantami paipaj Shimita huillanchij (Mateo 24:14; Lucas 10:27). Shinallataj mana utca pꞌiñarishpa, tucuicunapaj allita rurashpa, perdonajcuna cashpami cꞌuyaj cashcata ricuchinchij. Chaimantami Bibliapi nishca shinaca Jehová perdonashca shina ñucanchijpish tucui shunguhuan perdonana canchij (Colosenses 3:13, NM).

Ñucanchijta consejajpi o disciplinajpica “ñucata mana cꞌuyashpami chashna rurancuna” yuyanchijchari. Pero cꞌuyashcamantami chashna rurancuna. Huaquin yaya mamacunaca huahua ama huacachun nishpami paicuna munashcata rurachun saquinllacuna. Pero chaita ruranaca mana allichu. Cꞌuyaj yaya mamaca huahua mana allita rurajpica disciplinanmi. Jehová Diospish ñucanchijta cꞌuyashcamantami disciplinan (Hebreos 12:6, NM). Shinaca minishtirijpica cꞌuyaimantami consejanchij o disciplinanchij (Proverbios 3:11, 12, NM). Juchayujcuna cashcamantami huaquinpica cꞌuyaita ricuchinaca sinchi ricurin. Chaimantami ashtahuan cꞌuyaj cangapaj esfuerzota rurana canchij. Chaipajca quimsa yuyaicunata ricushun.

1.- Jehová Diostami paipaj espirituhuan ayudachun mañana canchij. Jesusca: ‘Jucha illaj espirituta cuhuai nishpa mañajpica Yaya Diosca cungallami’ nircami (Lucas 11:13). Diospaj espirituta mañashpa ayudachun saquishpaca ashtahuan cꞌuyajcunami cashun (Gálatas 5:16). Por ejemplo, congregacionpi ancianocunaca Bibliamanta cꞌuyaihuan yachachingapajca Diostami, “cambaj espirituhuan ayudahuai” nishpa mañana can. Yaya mamacunapish huahuacunata cꞌuyaihuan disciplinashpa huiñachingapajmi Diospaj espirituta mañana can.

2.- Jesusta llaquichicujpipish pai ima shina cꞌuyaita ricuchishcata yuyashunchij (1 Pedro 2:21, 23). Ñucanchijta llaquichijpica “¿Jesusca imatashi ruranman carca?” nishpami tapurina canchij. Leigh shuti panimanta parlashun. Paica: “Trabajopi shuj compañeraca shujtaj compañerocunamanmi ñucamantapish, ñuca trabajashcamantapish mana allita escribishpa Internetpi mensajeta cachashca carca. Chaita rurashcamantaca llaquillami sintirircani. Pero ‘¿Jesusca imatashi ruranman carca?’ nishpami yuyarcani. Chaimantami chai problemata cungarircanilla. Asha punllacuna qꞌuipaca ñuca compañeraca ungushca cashcamanta llaquilla cajtami yachaj chayarcani. Chaipica, ‘mana ñucata pꞌiñashcamantachu chashna escribishcanga’ nishpami yuyarcani. Jesusca llaquita apacushpapish cꞌuyaitami ricuchirca. Ñucapish paipaj ejemplota catishpami ñuca compañeraman cꞌuyaita ricuchishpa catircani” ninmi. Jesuspaj ejemplota catishpami siempre cꞌuyaita ricuchishun.

3.- Shujtajcunata cꞌuyaihuan ayudashpaca Jesusta catijcuna cashcatami ricuchishun (Juan 13:34, 35). Bibliaca Jesús rurashca shina rurachunmi yachachin. Jesusca cꞌuyaimantami jahua pachapi tucuita saquishpa cai Allpaman shamushpa ñucanchijmanta huañurca (Filipenses 2:5-8). Jesús cꞌuyashca shina cꞌuyashpaca pai shinallatajmi rurashun. Shinallataj mana ñucanchijllapi yuyashpami shujtajcunapaj allita rurashun.

Cꞌuyaita ricuchishpaca achca bendicioncunatami chasquishun. Cunanca ishqui bendicioncunamanta parlashun.

• HUAUQUI PANICUNAPAJ CꞌUYAI. Diospaj pueblopica caishujhuan chaishujhuan cꞌuyanacushpami causanchij. Chaimantami maipi cashpapish ñucanchij huauqui panicunaca cꞌuyaihuan chasquincuna. Muyundij Allpapi tucui huauqui panicuna cꞌuyaj cashcata yachashpaca cushillami sintirinchij (1 Pedro 5:9). Diospaj pueblollapimi chashna cꞌuyaj gentecunata tari tucunchij.

• SUMAJ CAUSAI. Caishujmanta chaishujmanta mana pꞌiñarishpami cꞌuyaita ricuchina canchij. Chashna rurashpaca tandallami tucuicuna sumajta causashun (Efesios 4:2, 3). Cai mundopica gentecunaca mana tandalla causancunachu. Pero ñucanchijca tandanacuicunapi, jatun tandanacuicunapipish alhaja, sumaj causai tiyashcatami ricui tucunchij (Salmo 119:165; Isaías 54:13). Shujtajcunahuan alli apanacungapaj esforzarishpaca paicunata achcata cꞌuyashcatami ricuchinchij. Shinallataj Diostapishmi cushichinchij (Salmo 133:1-3; Mateo 5:9).

Pabloca: “Cꞌuyaimi crijtaca sinchiyachin” nircami (1 Corintios 8:1). ¿Chaita nishpaca Pabloca imatataj nicurca? 1 Corintios, capítulo 13-taca “cꞌuyaimanta cantomi” nishpami rijsincuna. Chai capitulopica cꞌuyaita ima shina sinchiyachinatami parlan. Shinallataj cꞌuyaita charijca quiquinpajlla ama mashcachun, ashtahuanpish shujtajpaj allita mashcachunmi Pabloca yachachirca (1 Corintios 10:24; 13:5). Ña ricushca shinaca cꞌuyaita charijca mana utca pꞌiñarinchu, llaquij, allita rurajmi can. Chashna cꞌuyashpaca ñucanchij familiahuanpish, huauqui panicunahuanpish tandallami causashun (Colosenses 3:14).

Tucuimanta yallica Jehová Diostami ashtahuan cꞌuyana canchij. Paita cꞌuyashcamantami tucui llajtacunamanta, chꞌican chꞌican rimaicunamanta, tucuicuna tandalla Jehová Diosta sirvinchij (Sofonías 3:9). Tucui punllacuna cꞌuyaj cashcata ricuchishpa catishunchij.