1. a) ¿Isaiasca imatataj Jesusmantaca nirca? b) ¿Isaías ima nishcata yachashpaca imamantataj animarinchij?

JESÚS ima shina canamanta parlashpami Isaiasca: “Pai mandacushpaca ñahuita ricushpallaca mana llaquichingachu. Paica shujtajcuna huillashcata uyashcallahuanca mana allichingachu. Ashtahuanpish paica piman mana tucushpami, huajchacunataca cashcata rurashpa allichinga” nirca (Isaías 11:3, 4). Cai shimicunata uyashpami achcata animarinchij. ¿Imamantataj chaita ninchij? Cai millai mundopica gentecunaca ñahuita ricushpallami juzgancuna o imatapish nincuna. Pero Jesusca cashcata ruraj Juezmi can. Paica mana ñahuita ricushpalla juzgangachu. Chaimantami Jesús juzgana punlla ña chayamuchun shuyacunchij.

2. a) ¿Jesusca imatataj mandarca? b) ¿Cai yachaipica imatataj ricushun?

² Tucui punllacunami shujtajcunamanta paicuna ima shina cashcata yuyanchij. Pero juchayujcuna cashcamantami mana Jesús shina shujtajcunata alli juzgai tucunchij. Ashtahuanpish ñahuita ricushpallami imatapish ninchij o juchachinchij. Jesús cai Allpapi cashpaca: “Mana alli yuyachijllapica ama juchachichijchu. Ashtahuanpish ima shina cashcata alli yachashpataj mana allichu nichigari” nishpami mandarca (Juan 7:24). Jesusca paipaj ejemplota catishpa ama jahua ricuillata ricushpa  juzgachunmi munan. Cai yachaipica gentecuna maijan llajtamanta cajpi, cullquita charijpi o mana charijpi, paicunapaj edadmanta ñucanchij imata yuyai tucushcatami ricushun. Cada unopimi ima shina Jesús mandashcata pajtachi tucushcata yachashun.

3, 4. a) ¿Imamantataj apóstol Pedroca mana judío gentecunataca alli ricui callarirca? (Página 9-pi tiyaj dibujota ricui). b) ¿Ima mushuj yachaitataj Jehová Diosca Pedroman yachachirca?

³ Apóstol Pedrohuan ima tucushcata yuyashun. Pedrotaca Cesarea llajtapi causaj Corneliopaj huasiman richunmi mandashca carca. Cornelioca mana judiochu carca (Hechos 10:17-29). Pedroca judiocunapurapi huiñashcamantami mana judío gentecunataca mana allita shina ricuj carca. Shinapish huaquin cosascuna pasashcamantami Pedroca cambiashca carca. Por ejemplo, paica shuj muscuita shinami charishca carca (Hechos 10:9-16). Chai muscuipica jahua cielomanta shuj jatun linso shinapi achca mapa animalcunata uriyachicujtami ricurca. Qꞌuipaca “Pedro, chai animalcunata huañuchishpa micui” nishcami uyarirca. Pero Pedroca mana chaita rurasha nircachu. Chaimi: “Taita Dios chuyayachishcataca, canca ama mapami nichu” nishpa rimashca uyarirca. Chai muscuita tucui ricushca qꞌuipaca imamanta chaita nicushcataca Pedroca mana intindircachu. Chai ratomi Cornelio cachashca runacunaca Pedropajman chayamurcacuna. Pedroca Diospaj espíritu pushajpimi Corneliopaj huasiman chai runacunata compañashpa rirca.

⁴ Judiocunaca mana judiocunapaj huasimanca mana yaicujcunachu carca. Apóstol Pedro gentecunata ñahuillata ricunata yachashca cashpaca Corneliopaj huasimanca nunca mana rinmanchu carca. Shinashpaca ¿imamantataj rirca? Paica shuj muscuita shina ricushcamanta, Diospaj espíritu pushachun saquishcamantami rirca. Corneliohuan parlashca qꞌuipami Pedroca: “Pi cashpapish Taita Diospaj ñaupajpica tucuicuna chai shinallataj cashcatami cunantajca yachani. Maijan llajtapi causaj cashpapish Taita Diosta manchashpa allita rurajtami Taita Diosca alli nin” nirca (Hechos 10:34, 35). Cai mushuj yachaica Pedropajca allimi ricurirca. Pero Jesusta tucui catijcunaca ¿ima shinataj cai mushuj yachaitaca ricuna canchij?

5. a) ¿Diosca paita sirvijcuna imata intindichuntaj munan? b) Dios tucui laya gentecunata chasquij cashcata yachashpapish ¿imatataj ñucanchij shungupi sinti tucunchij?

⁵ Jehová Diosca paita sirvijcunaman tucui laya gentecunata chasquij cashcata ricuchingapajca Pedrotami utilizarca. Diospajca ima shimita rimaj cashpapish, maijan llajtamanta cashpapish, ima raza cashpapish tucuicunami igual canchij. Paita manchashpa allita rurajcunataca tucuicunatami chasquin (Gálatas 3:26-28; Apocalipsis 7:9, 10). Ñucanchijca chai cierto cashcatami yachanchij. Pero ñahuillata ricushpa juzgaj gentecuna causan lugarcunapi o familiapichari huiñarcanchij. Chaimantami tucuicunata igual tratanchijmi nishpapish, shungu ucupica paicunamanta yalli cashcata yuyai tucunchij. Pedro ima tucushcata yuyarishun. Paica Yaya Dios tucuicunata chasquij  cashcata shujtajcuna intindichunmi ayudarca. Pero tiempohuanca shungu ucupi shujtajcunata yalli sinticushcatarajmi ricuchirca (Gálatas 2:11-14). Shinashpaca ¿ima shinataj Jesuspaj mandashcata pajtachishpa shujtajcunata ñahuita ricushpalla juzganata saquishun?

6. a) Ñucanchij shungupi shujtajcunata yalli cashcata sintishcata yachangapajca ¿imatataj rurana canchij? b) ¿Shuj anciano informeta cachashpaca imatataj ricuchirca?

⁶ Shungu ucupi shujtajcunata yalli cashcata sintishpa caticushcata yachangapajca ¿imatataj rurai tucunchij? Diospaj Shimita yachashpami ñucanchij ima shina cashcata ricurina canchij (Salmo 119:105). Alli amigocunatapish, “¿ñucaca shujtajcunamanta yalli cashcata sintishpa caticunichu?” nishpami tapui tucunchij (Gálatas 2:11, 14). Achca huatacunatachari shujtajcunata yalli cashcata sintishcanchij. Chaimantami chashna sintishpa caticushcataca mana cuentata cunchij. Shuj anciano chaita ima shina pasashcata ricushun. Paica sucursalmanmi tiempo completopi sirvij shuj cusa huarmimanta shuj informeta cacharca. Cusaca achca gentecuna yanganchishca shuj razamantami carca. Chai informepi cusamanta allicunata nishpapish ancianoca: “Chai razamanta cashpapish chai cusaca alli comportamientota, alli causaitami charishca. Chaimi shujtajcunaca yachai tucun, chai razamanta cajcunaca mapa o llaquinai causaita mana charina cashcata” nircami. Diospaj pueblopi ima responsabilidadta charishpapish shujtajcunamanta yalli cashcata o mana yalli cashcata sinticushcatarajmi ricuna canchij. Chashna sintishpa caticushcata yachangapajpish huauqui panicunatami ayudahuai nishpa mañana canchij. Pero, ¿imatataj ashtahuan rurai tucunchij?

7. ¿Shujtajcunata shungumanta cꞌuyaj cashcataca ima shinataj ricuchishun?

⁷ Shujtajcunata shungumanta cꞌuyashpaca paicunataca mana yangata shina ricushunchu (2 Corintios 6:11-13 El Nuevo Testamento Quichua, Nueva Versión Internacional, 1999, NVI). ¿Ñucanchij llajtamanta cajcunallahuan, ñucanchij shimita parlajcunallahuanchu tandanacunata yachanchij? Shina cashpaca tucui laya huauqui panicunahuan apanacunata yachashunchij. Paicunataca ñucanchijhuan huillanaman, ñucanchij huasipi micunaman o shujtaj huauqui panicunahuan shuj rato pasachunmi invitanalla canchij (Hechos 16:14, 15). Chaita rurashpaca tiempohuanca ashtahuanmi cai huauqui panicunataca cꞌuyashun. Paicunata yangata shina ricuna yuyaitaca mana charishunchu. Cunanca imallacunamanta shujtajcunata mana alli juzgai tucushcata ashtahuan yachashun.

8. ¿Levítico 19: 15-pica imatataj yachachin?

⁸ Shujtajcuna cullquita charijta ricushpa o mana charijta ricushpami maipica imatapish paicunamanta yuyanchij. Levítico 19:15-pica: “Maijan ima mana allita rurashcata allichichun nijpica, imata mana charij huajchapuralla ama tucunguichijchu. Achcata charijpurallapish ama tucunguichijchu. Ashtahuanpish maijanmanpish ama tucushpa, imatapish cashcata ricuchinguichij” ninmi.

9. a) ¿Salomonca imatataj nirca? b) ¿Salomón nishcacunamantaca imatataj yachanchij?

⁹ ¿Shujtajcuna cullquiyuj cajpi o pobre cajpica imatataj yuyai tucunchij? Espíritu santo yuyachijpimi Salomonca: “Huajchaca, paihuan apanacuj runapipish pꞌiñai tucunmi. Charijllatami achcacuna cꞌuyan” nishpa escribirca (Proverbios 14:20). ¿Caimantaca imatataj yachanchij? Mana cuidadota charishpaca cullquita charij huauqui panicunallahuanmi apanacunata munashun. Cutin ashalla cullquita  charijcunahuanca manachari tandanacunata munashun. ¿Shujtajcuna mashnata charishcallata ricushpa juzganaca imamantataj mana alli can?

10. ¿Santiagoca imatataj nirca?

¹⁰ Shujtajcuna cullquita charishcamanta o mana charishcamanta juzganata yachashpaca huauqui panicunatami chꞌicanyachinata pudinchij. Ñaupa tiempopi Jesusta catij Santiagoca chashna problema tiyashcamantami huaquin congregacioncunaca chꞌicanyaricuncuna nircami (Santiago 2:1-4-ta leyipai). Ñucanchij congregacionpipish chashna pasachunca mana saquinachu canchij. Shinashpaca ¿shujtajcuna mashnata charishcallata ricushpa ama juzgangapajca imatataj rurana canchij?

11. ¿Pobre cashcamanta o charij cashcamantachu Diospaj ñaupajpi alli ricurinchij?

¹¹ Ñucanchij huauqui panicunataca Jehová Dios ricushca shinami ricuna canchij. Paica pobre cajllapi o charij cajllapica mana cꞌuyanchu. Diospaj ñaupajpi alli cangapajca achca cosascunata o ashalla cosascunata charinaca mana minishtirinchu. Jesusca: “Jahua pachamanta mandacujpica, achcata charijca mana jahualla yaicui tucungachu” nircami. Jesusca cashna nishpaca mana yaicuna cashcataca mana nicurcachu (Mateo 19:23). Shinallataj Jesusca: “Huajchacunaca, cushichishcami canguichij. Taita Dios mandagrinca cancunapajmi” can nircami (Lucas 6:20). Chashna nishpapish tucui pobrecuna paita uyashpa bendicioncunata chasquinataca mana nicurcachu.  Achca pobre gentecunaca mana Jesusta catijcuna tucurcachu. Chaimantami shuj persona mashnata charishcallamanta Diospaj amigo cai tucunmi nishpaca mana yuyana canchij.

12. ¿Bibliaca imatataj charijcunaman, huajchacunamanpish yachachin?

¹² Diospaj pueblo ucupica charij y huajcha huauqui panicunami tiyan. Pero tucui paicunami Diosta cꞌuyashpa tucui shunguhuan sirvincuna. Charijcunamanta parlashpaca Bibliaca chingarijlla charinacunapica ama shunguta churaichijchu. Ashtahuanpish Taita Diospi shunguta churaichij ninmi (1 Timoteo 6:17-19-ta leyipai). Shinallataj charij o huajcha cajpipish achca cullquita charinata munashpaca llaquicunatami charinga ninmi (1 Timoteo 6:9, 10). Yaya Dios shina huauqui panicunata ricushpaca paicuna charij o huajcha cashcallamantaca mana juzgashunchu. Pero ¿mashna edadta charishcata ricushpalla juzganata yachanchijchu?

13. ¿Bibliapica yuyajllacunataca ima shinataj tratachun nin?

¹³ Bibliapica yuyajlla cajcunataca respetohuan tratachunmi mandan. Levítico 19:32-pica: “Puzujlla uma yuyajcunataca paicunapaj ñaupajpi shayarishpa alli ninguichij. Cambaj Taita Diosta manchanguichij” ninmi. Cutin Proverbios 16:31-pica: “Cashcata rurajcunaca, yuyajcamami causancuna. Chashna yuyajcama causanaca, sumaj coronata churarishca shinami” can ninmi. Apóstol Pablopish Timoteotaca yuyajlla runataca ama sinchita rimangui, ashtahuanpish “quiquin yayata shina yuyachishpa rimangui” nircami (1 Timoteo 5:1, 2). Timoteoca yuyaj huauquicunata mandana derechotami charirca. Pero mana tucuipi mandana cashcamantami paicunataca llaquishpa respetohuan tratana carca.

14. ¿Mayorlla huauqui o panitaca imamantataj huaquinpica consejota cuna canchij?

¹⁴ ¿Shuj mayorlla huauqui yachashca jahua mana allicunata rurajpi o shujtajcunata mana allita rurachun animajpica imataj tucunga? Diosca mana ñahuita ricushpallachu juzganga. Mayorlla cajpipish juzganataca mana saquingachu. Ezequiel 9:5, 6-pica: “Ñuca uyacuitami caishuj runacunatapish cashna nirca: ‘Cancunapish chai runata catishpa chai pueblollatataj pasanguichij. Chaipi causajcunataca huañuchinguichijlla. Yuyajcunatapish, mosocunatapish, solteracunatapish, huahuacunatapish, huarmicunatapish shujllapish ama saquirichun tucuicunata huañuchinguichijlla’ nircami” ninmi. Isaías libropipish cai shina yuyaillamantatajmi parlan (Isaías 65:20). Ñucanchijpajca “Uni huatacunayuj Yuyaj” Jehová Diosta respetanami ashtahuan importante can (Daniel 7:9, 10, 13, 14). Chaita rurashpaca pi mashna huatacunata charijpipish consejota cuchun minishtijpica mana manchashpa cunallami canchij (Gálatas 6:1).

15. ¿Apóstol Pablomantaca imatataj yachacunchij?

¹⁵ ¿Jovencunataca ima shinataj tratana canchij? ¿Joven cashcallamantachu mana respetana canchij? Apóstol Pablo Timoteoman imata nishcata yuyashun. Paica: “Pajta cantaca, huambrami nishpa pi rimanman. Chaimanta rimanapi, causanapi, cꞌuyanapi, yuyanapi, crinapi, chuya canapipish crijcuna ricushpa catinalla alli cangui” nircami (1 Timoteo 4:12). Pablo cai shimicunata quillcajpica Timoteoca 30 huatacuna yallitami charishcanga. Chai huatacunata charijpipish Pabloca importante cosascunata rurachunmi mingarca. ¿Caimantaca imatataj yachacunchij? Jovencunataca mashna huatacunata charishcallamanta mana juzganachu canchij.  Shinallataj Jesucristo 33 huatacunacama imallata rurashcatami yuyarina canchij.

16, 17. a) ¿Shuj huauqui, anciano o siervo ministerial cangapaj listo cashcata yachangapajca ancianocunaca imatataj rurana can? b) ¿Ñucanchij llajta yuyaicunahuan Bibliapi tiyaj yuyaicunahuanca huaquinpica imapitaj mana igual can?

¹⁶ Huaquin llajtacunapica jovencunataca mana tanto cuentapi tomancunachu. Huaquin ancianocunapish chai shinallataj yuyaita charishcamantami maipica jovencuna anciano o siervo ministerial canapaj pajta cajpipish mana superintendenteman huillancuna. Pero Bibliapica cai huatacunata charishpami anciano o siervo ministerial tucuna can nishpaca mana ninchu (1 Timoteo 3:1-10, 12, 13; Tito 1:5-9). Shuj anciano pai causacun llajta gentecuna shina yuyashpa, “cai huauquica cai edadta charishpami anciano o siervo ministerial tucuna can” nishpaca Diospaj Shimi ima nishcatami mana caticun. Ancianocunaca mana paicuna yuyashca shinachu jovencunataca juzgana can. Biblia mandashca shinami juzgana can (2 Timoteo 3:16, 17).

¹⁷ Huaquin ancianocuna paicuna causacun llajta gentecuna shina yuyashcamanta ima tucushcata ricushun. Shuj llajtapica shuj siervo ministerial huauquica congregacionpi huaquin mingashcacunatami alli pajtachicurca. Shinami anciano cangapaj Bibliapi mandashcata pajtachicushcata ricuchicurca. Pero huaquin mayorlla ancianocunaca cai huauquica anciano tucunapajca jovenrajmi can nishpami yuyarcacuna. Chaimantami superintendenteman mana huillarcacuna. Jahua ricuillata ricushcamantami cai huauquitaca anciano cachun mana nombrarcacuna. Achca llajtacunapimi ancianocunaca cashna shina yuyaita charincuna. Chashna cajpipish mana ñucanchij llajtapi causajcuna shina o ñucanchij yuyashca shinachu imatapish rurana canchij. Ashtahuanpish Bibliapi mandashca shinami rurana canchij. Chaita rurashpallami shujtajcunata ñahuita ricushpalla juzganata saquishun. Shinami Jesusta cazucushcata ricuchishun.

18, 19. ¿Shujtajcunata Jehová ricushca shina ricungapajca imatataj rurana canchij?

¹⁸ Diospajca tucuicunami igual canchij. Juchayujcuna cashpapish shujtajcunataca Dios ricushca shinami ricunata yachai tucunchij (Hechos 10:34, 35). Chaipajca Diospaj Shimipi ima nishcatami siempre pajtachina canchij. Shinami ñahuita ricushpalla juzganata saquishpa Jesús mandashcata cazucushcata ricuchishun (Juan 7:24).

¹⁹ Mandaj Jesusca ñallami tucui gentecunata juzganga. Pero paica mana ñahuita ricushpalla o imata uyashcallamantachu juzganga. Ashtahuanpish cashcata rurashpami juzganga (Isaías 11:3, 4). Chaita ricunaca yallitaj sumajmi canga.