¿Imamantataj testigo de Jehovacunapaj publicacioncunataca Internetpi tiyaj shujtaj paginacunapi o redes sociales nishcacunapi churanaca mana permitido can?

Ñucanchij organizacionpica Bibliamantami tucui laya publicacioncunata gratis charinchij. Chaimantami huaquincunaca chaicunata japishpa Internetpi o redes sociales nishcacunapi churanallami can nishpa yuyancuna. Pero chaita rurashpaca ñucanchij paginacunapi tiyaj Caita Yuyari nishcatami mana pajtachicunchijman * (urapi tiyaj notata ricui). Chaimantami ña huaquin problemacuna tiyashca. Caita Yuyari partepica: ‘Cai paginapi tiyashca dibujocunata, publicación electronicacunata, marcacunata, musicacunata, fotocunata, videocunatapish shujtaj paginacunapi o redes socialescunapi mana churanachu cangui’ ninmi. ¿Imamantataj cai jarcaicunaca minishtirishca can?

Internetpi tiyaj tucui ñucanchij informaciontaca leycunami cuidacun. Apostatacuna y ñucanchijta jarcanata munajcunapish ñucanchij publicacioncunatami paicunapaj paginacunapi churan. Chaitaca testigo de Jehovacuna y shujtaj gentecunapish ricuchunmi churancuna. Pero chai paginacunapica gentecuna dudata charichunmi panda yuyaicunatapish churancuna (Salmo 26:4; Proverbios 22:5). Shujtaj gentecunaca ñucanchij publicacioncunamanta informacionta, JW letracunatami publicidadcunapi, cꞌatuna cosascunapi, aplicacioncunapipish utilizashcacuna. Ñucanchij publicacioncunata y marcas de producto nishcacunataca leycunami cuidacun. Chaimantami maijan mana alli utilizajpica ama chashna rurashpa catichun tribunalcunapi denunciai tucunchij (Proverbios 27:12). Pero shujtaj gentecuna o testigocunallataj publicacioncunata shujtaj paginacunapi churachun o JW letracunata imata cꞌatungapaj utilizachun ñucanchij organización saquijpica ¿imataj tucunga? Chaita rurajpica tribunalcunapi denunciajpimi autoridadcunaca ñucanchijta mana apoyanga.

Ñucanchij publicacioncunataca jw.org paginallamantami descargana canchij. Shujtaj paginacunamanta descarganaca achca peligrosomi can. Jehová Diosca ‘alli cazuj alli yuyaiyuj sirvij’ nishca huauquicunatami ñucanchijman alli yachachichun churashca (Mateo 24:45). Paicunaca ñucanchijman yachachingapajca propio paginacunatami charin. Caicunaca: jw.org, tv.pr418.com, wol.pr418.com paginacunami can. Shinallataj quimsa aplicacioncunallami telefonocunapaj o tabletacunapaj tiyan. Caicunaca: JW Language^®, JW Library^®, y JW Library Sign Language^® nishcacunami can. Internetpi ñucanchij paginacunapish ñucanchij aplicacioncunapish imata cꞌatungapaj publicidadta mana charinchu. Diablopaj mapa ruraicunahuanpish mana chagrurishcachu can. Pero ñucanchij publicacioncuna shujtaj paginacunapi cashpaca cambiashcami cai tucun (Salmo 18:26; 19:8).

Huaquin paginacunaca comentariocunata churangapajmi can. Chaicunapi ñucanchij publicacioncunata churajpica apostatacuna o ñucanchijta pꞌiñajcunami mana alli comentariocunata nishpa Diospaj organizacionpi ama confiachun pandachingacuna. Huaquin huauqui panicunacarin Internetpi conectarishpami chai laya gentecunahuan chꞌimbapurashcacuna. Shinami Diospaj shutita ashtahuan mapayachishcacuna. Internetpi chꞌimbapuraicunaca ‘huillashcata mana allichu nijcunaman manso shunguhuan yachachingapajca’ mana allichu can (2 Timoteo 2:23-25; 1 Timoteo 6:3-5). Shinallataj Internetpaj paginacunapi y redes socialescunapi Diospaj organizacionpaj shutihuan o Cuerpo Gobernantepi cajcunapaj shutihuan cuentata charijcuna cashcatami ricushcanchij. Pero Cuerpo Gobernantepi cajcunaca ni maijan shuj propio paginata Internetpi mana charincunachu, redes socialespipish shuj cuentata mana charincunachu.

Gentecunata jw.org paginata visitachun animashpaca, ‘alli huillaicunata’ huillashpami participanchij (Mateo 24:14). Ñucanchij paginacunapi o aplicacioncunapi llujchishca ayudacunaca ashtahuan ashtahuanmi mejorashpa caticun. Y chaita tucuicuna beneficiarichunmi munanchij. Chaimanta Caita Yuyari partepi nishca shinaca, piman correo electronicopi shuj publicacionta cachana o jw.org paginamanta imata descargachun link nishcata cachanaca permitidomi can. Alli shungu gentecunata Internetpi ñucanchij paginacunata visitachun animashpaca ‘alli cazuj, alli yuyaiyuj sirvij’ nishca huauquicuna yachachishcacunamanta beneficiarichunmi ayudacunchij. Jehová Diosca chai huauquicunatami ñucanchijman yachachichun agllashca.