1. Tucui rurashcacunata ricushpaca ¿imamantataj Diosca mana mitsami can ninchij?

JEHOVÁ DIOSCA tucui tiyashcata manaraj rurashpaca pai solomi carca. Pero paillapi yuyanapaj randica jahua pachapi angelcunaman, cai pachapipish gentecunamanmi causaita curca. Jehová Diosca ‘cushi Diosmi’ can. Tucui allicunatami gentecunaman cunata yachan (1 Timoteo 1:11; Santiago 1:17). Ñucanchijtapish cushilla causachun munashpami shujtajcunaman cuj canata yachachin (Romanos 1:20).

2, 3. a) ¿Imamantataj mana mitsashpa cujcunaca cushilla sintirinchij? b) ¿Cai yachaipica imatataj ricushun?

² Diosca ñucanchijtaca paiman rijchajtami rurarca (Génesis 1:27). Chaimantami Dios shina cꞌuyaj, llaquij cashcata ricuchi tucunchij. Cushilla causanata munashpa, bendicioncunata chasquinata munashpaca Diospaj ejemplotami catina canchij. Chaipajca shujtajcunapi yuyashpami mana mitsacuna  cana canchij (Filipenses 2:3, 4; Santiago 1:5). ¿Imamanta? Diosmi ñucanchijtaca chashna cachun rurashca. Juchayujcuna cashpapish Dios shinami mana mitsa canata yachai pudinchij.

³ Diospaj Shimipica mana mitsashpa shujtajcunaman cuj canatami yachachin. Cai yachaipica chaimanta Biblia imata yachachishcatami ricushun. Shinallataj mana mitsa cashpaca Diosta cushichi tucushcata, pai mingashcata pajtachi tucushcata, cushilla causai tucushcatami yachashun. Imamanta mana mitsa cashpa catina cashcatapishmi yachashun.

4, 5. a) ¿Jehovapish Jesuspish ima shinataj mana mitsa cashcata ricuchishcacuna? b) ¿Imamantataj paicunapaj ejemplocunata catina canchij?

⁴ Jehová Diosca pai laya cachunmi munan. Chaimantami mana mitsashpa shujtajcunaman imatapish cujpica cushilla sintirin (Efesios 5:1). Yaya Dios ñucanchijta ima shina rurashcata ricushpa, tucuita sumajta huiñachishcata ricushpaca ¿imatataj intindinchij? Ñucanchijcuna cushilla causachun munashcamanta chashna rurashcatami intindinchij (Salmo 104:24; 139:13-16). Shujtajcunata cushichingapaj imata rurashpa esforzarishpaca Diostami jatunyachinchij.

⁵ Ñucanchijca Jesuspaj ejemplotapishmi catinchij. Paica mana mitsashpami imatapish cuj carca. Chashnami shuj alli ejemplota ricuchishpa saquirca. Jesusca: “Runa Aichayujca, sirvishca cangapajca mana shamurcachu. Ashtahuanpish sirvingapaj, paipaj causaita cushpa tucuicunata randishpa cacharichingapajmi shamurca” nircami (Mateo 20:28). Apóstol Pablopish paita catijcunataca: “Cristo Jesuspi tiyashca shinallataj cancunapipish cai yuyai tiyachun”. Jesusca “paillatajmi tucuita saquishpa sirvij shina tucurca. Runacuna shinallatajmi tucurca” nircami (Filipenses 2:5, 7). Chaimantami, “Jesús shina cangapajca ¿imatataj ashtahuan rurana cani?” nishpa tapurina canchij (1 Pedro 2:21-ta leyipai).

6. ¿Jesús samaritanomanta parlashpaca imatataj ñucanchijman yachachirca? (Página 15-pi tiyaj dibujota ricui).

⁶ Yaya Diospaj ñaupajpi alli cangapajca paipaj ejemplota y Jesuspaj ejemplotami catina canchij. Chaipajca shujtajcunapi yuyashpami, ima shina ayudai tucushcata ricuna canchij. Jesusca shuj samaritano runamanta parlashpami pi cajpipish, maimanta cajpipish shujtajcunata ayudana cashcata paita catijcunaman yachachirca (Lucas 10:29-37-ta leyipai). Jesusca shuj judío, “¿pi shujtajtataj cꞌuyana cani?” nijpimi samaritanomanta parlotaca nirca. Jesús ima shina cutichishcamantaca ¿imatataj yachanchij? Diospaj ñaupajpi alli cangapajca chai samaritano runa shinami imatapish mana mitsashpa shujtajcunaman cuna canchij.

7. ¿Edén huertapi ima tucushcata yuyarishpaca imamantataj mana ñucanchijllapi yuyana canchij?

⁷ Edén huertapi ima tucushcata yuyarishpami imamanta mana ñucanchijllapi yuyana cashcata intindishun. ¿Imamantataj chaita ninchij? Diabloca Adán Eva Diosta mana cazushpa, paicunapaj munaita rurashpaca allimi causangacuna nircami. Evaca Dios shina canatami munarca. Adanpish Diospaj ñaupajpi alli ricurinapaj randica Evapaj ñaupajpi alli ricurinallatami munarca. Chashnami paicunallapi yuyashcata ricuchircacuna (Génesis 3:4-6). Pero qꞌuipaca jatun llaquicunatami charircacuna. Ñucanchijllapi  yuyashpaca mana cushilla causashunchu. Pero shujtajcunapi yuyashpa, paicunata ayudashpaca Dios yachachishcacuna allipaj cashcatami ricuchishun.

8. ¿Adán Evaca imamantataj shujtajcunapi yuyana carca?

⁸ Adán Evaca Edén huertapica paicunallami carca. Paicunalla cashpapish shujtajcunapimi yuyana carca. ¿Imamanta? Diosca shuj trabajotami paicunamanca mingashca carca. Yaya Diosca, huahuacunayuj tucushpa, cai pachapi jundarishpa shuj sumaj paraisota ruranguichij nishcami carca (Génesis 1:28). Diosca tucuicuna cushilla causachunmi munan. Adán Evapish paicunapaj huahuacuna cushilla causanapimi yuyana carca. Tucui familia tandalla trabajashpami cai Allpataca shuj paraisota rurana carcacuna.

9. Cai Allpata shuj paraisota rurashpaca ¿imamantataj gentecunaca cushilla canman carca?

⁹ Cai Allpa shuj paraíso cachunca jucha illaj gentecunami Dioshuan trabajashpa paipaj munai pajtarichun ayudana carca. Shinami Diospaj samanaman yaicunman carcacuna (Hebreos 4:11). Chai sumaj trabajota rurashpaca cushillami canman carcacuna. Shinallataj paicuna mana mitsa cashcata ricuchijpi, shujtajcunapi yuyashcata ricuchijpica Diosca bendicianmanmi carca.

10, 11. ¿Shujtajcunaman huillangapaj, Jesusta catijcuna cachun ayudangapajca imatataj rurana canchij?

¹⁰ Cunan punllacunapica Yaya Diosca ñucanchijmanca  shuj trabajotami mingashca. Gentecunaman predicashpa Jesusta catijcunata rurachun. Chaita pajtachingapajca shujtajcunamantami preocuparina canchij. Diosta cꞌuyashpa, projimotapish cꞌuyashpaca Dios mingashcatami rurashpa catishun.

¹¹ Ñaupa tiempopi apóstol Pabloca ñucapish, shujtaj huauquicunapish Dioshuan trabajajcunami canchij nircami. Paicunaca Diospaj Shimimanta huillashpa, yachachishpa purishcamantami chashna nircacuna (1 Corintios 3:6, 9). Ñucanchijpish Dioshuan trabajajcunami cai pudinchij. Chaipajca ¿imatataj rurana canchij? Dios mingashcacunata pajtachingapajca ñucanchij tiempota, fuerzata, charishca cosascunatami cui pudinchij. Chaica shuj sumaj bendicionmi can.

12, 13. Gentecuna Jesusta catijcuna tucuchun ayudashpaca ¿imamantataj cushilla sintirinchij?

¹² Ñucanchij tiempota, fuerzata Diosmanta huillangapaj utilizashpaca cushillami sintirinchij. Bibliamanta estudiota cuj achca huauqui panicunaca chashnami sintirishcacuna. Bibliata estudiajcuna yachachishcata alli intindijpi, paicunapaj crishcacuna sinchiyajpi, alli causai callarijpi, shinallataj imata yachashcatapish shujtajcunaman huillai callarijpica cushillami sintirinchij. Jesusta 70 catijcuna huillanamanta tigramushpaca ‘cushillami carcacuna’. Chaita ricushpami Jesuspish cushilla sintirirca (Lucas 10:17-21).

¹³ Gentecunata Diospaj Shimi ima shina ayudashcata ricushpami mundo enteropi caj huauqui panicunaca cushilla sintirincuna. Anna shuti solterapi yuyashun. Paica Europa ladopimi causanaman rirca. Chai ladocunapi Diosmanta huillajcunaca mana tanto tiyanchu * (urapi tiyaj notata ricui). Annaca: “Achca gentecuna Bibliata yachanata munajpimi cushilla sintirini. Predicashpapish cushillami sintirini. Ña huasiman tigrashpaca mana ñucallapi yuyanichu, ñuca estudiantecunapaj problemacunapimi yuyani. Paicunata ima shina ayudanata, ima shina animanatami ricuni. ‘Imatapish cujmi, cushcatapish japijta yalli cushicun’ nishca shimicuna cierto cashcatami ricushcani” ninmi (Hechos 20:35).

14. Ashalla gentecuna Diospaj Shimita uyajpipish, ¿cushilla huillashpa catingapajca imatataj rurana canchij?

¹⁴ Gentecuna mana uyajpipish paicunaman alli huillaicunata uyana oportunidadta cushcamantami cushilla sintirinchij. Profeta Ezequielman Yaya Dios imata mingashcatami ñucanchijpish rurana canchij. Diosca: “Paicuna uyachun, mana uyachunpish ñuca shimicunataca huillanguilla” nircami (Ezequiel 2:7; Isaías 43:10). Gentecuna mana uyasha nijpipish Diosca ñucanchij esfuerzocunataca achcatami valichin (Hebreos 6:10-ta leyipai). Gentecunaman huillanamantaca shuj huauquica: “Tarpushcanchij, yacutapish churashcanchij, Diostapish Bibliamanta yachana  munaita mirachichun nishpami mañashcanchij” ninmi (1 Corintios 3:6).

15. ¿Gentecuna pagui nijllapichu imatapish mana mitsashpa cuna canchij?

¹⁵ Jesusca ñucanchij cushilla cachunmi munan. Chaimantami paica: Shujtajcunaman cuichij, paicunapish “cancunamanca jatun jatunpi tushuchishpa, llapishpa talliricujtami cunga. Cancuna ima shinami shujtajcunaman jatun jatunpi cunguichij, chashnallatajmi cancunamanpish cunga” nircami (Lucas 6:38). Gentecunaman imatapish mana mitsashpa cujpica paicunapish chaillatatajmi rurangacuna. Pero huaquincunaca imata cujpipish mana agradicincunachu. Chashna cajpipish ñucanchijca cuj canataca mana saquinachu canchij. Shujtajcunaman cuj canata yachashpaca achca allicunatachari rurashun.

16. ¿Picunahuantaj mana mitsacuna cana canchij, imamanta?

¹⁶ Shujtajcunaman imatapish shungumanta cujcunaca paicunamanpish tigra cuchunca mana shuyancunachu. Jesuspish: “Jatun micuita rurashpaca, huajchacunata, mancocunata, cojocunata, mana ricujcunata cayangui. Paicuna mana tigrachi tucushcamantaca Taita Diosmi cantaca cushichinga” nircami (Lucas 14:13, 14). Diospaj Shimipipish imatapish mana mitsashpa cujcunaca bendiciashcami canga, ‘huajcha runa yuyailla cajpish cushichishcami’ canga ninmi (Proverbios 22:9; Salmo 41:1). Ñucanchijca gentecunata shungumanta ayudasha nishcamantami mana mitsacuna cana canchij.

17. ¿Cushilla sintiringapajca imallatataj cui pudinchij?

¹⁷ Pablopish Jesús shinallatajmi: “Imatapish cujmi, cushcata japijta yalli cushicun” nirca. Chashna nishpaca charishca cosascunallata cunamantaca mana nicurcachu. Ashtahuanpish shujtajcunaman animota  cuna cashcamanta, Bibliapaj consejocunata cuna cashcamantami nicurca. Pi imata minishtijpipish ayudana cashcamantami parlacurca (Hechos 20:31-35). Pabloca paipaj nishcacunahuan, ruraicunahuanmi ñucanchij tiempohuan, fuerzahuan cꞌuyaita ricuchishpa shujtajcunaman cuj canata yachachirca.

18. ¿Yachajcunaca imatataj cuentata cushcacuna?

¹⁸ Gentecuna ima laya cajta estudiajcunaca, mana mitsashpa cujcuna cushilla causajtami cuentata cushcacuna. Shuj informacionpica: “Gentecunaca shujtajcunamanta ima allita rurashcamantami cushilla sintirincuna” ninmi. Yachajcunaca, gentecunaca shujtajcunata ayudashpami mana yangamanta causacushcata sintincuna ninmi. Shinallataj huaquin yachaj runacunaca alli saludta charisha nishpa, cushilla causasha nishpaca shujtajcunatami mana cobrashpa ayudana canguichij nincunami. Pero ñucanchijpajca chaica mana mushuj yachaichu can. Jehová Diosca imatapish cushpa cushilla causanataca siempremi yachachicushca (2 Timoteo 3:16, 17).

19, 20. ¿Imamantataj mana mitsashpa cunata yachana canchij?

¹⁹ Mitsa gentecunapaj chaupipi causacushcamantami imatapish cuj canaca sinchi canga. Pero Jesusca ishqui mandamientotami yachachirca. Puntaca Jehová Diosta tucui shunguhuan, tucui almahuan, tucui fuerzahuan cꞌuyana cashcatami nirca. Qꞌuipaca quiquinta shinallataj projimotapish cꞌuyana cashcatami nirca (Marcos 12:28-31). Cai yachaipi ricushca shinaca, Diosta cꞌuyajcunaca pai shinami casha ninchij. Jehová Diospish Jesuspish imatapish mana mitsashpa cujcunami can. Chaimantami ñucanchijtapish paicunapaj ejemplota catishpa cushilla causachun nincuna. Ñucanchij tiempohuan, fuerzahuan Diosta alli sirvishpa, shujtajcunahuanpish mana mitsacuna cashpaca Yaya Diostami jatunyachinchij. Shinami ñucanchijpajpish shujtajcunapajpish allita rurashun.

²⁰ Quiquinca ñachari shujtajcunata ayudacungui. Huauqui panicunatacarin ashtahuan allichari ayudacungui (Gálatas 6:10). Mana shaicushpa ayudashpa catijpica paicunaca cantaca cꞌuyanga, pagui ningacunami. Ñucanchijpish cushillami sintirishun. Proverbios 11:25-pica: “Shujtajcunapaj allita rurajcunaca charijyancunami. Shujtajcunaman carajcunaca, paicunapish chasquincunami” ninmi. Huillacushpa o imata ruracushpapish shujtajcunata alli tratashpa, mana mitsa cashpa, mana ñucanchijllapi yuyashpami tucui laya ayudai pudinchij. Catij yachaipimi caimanta ashtahuan yachashun.