TUCURI punllacunapi causacushcamantami causaica ashtahuan sinchi can. Chaimantami Diosta sirvijcunaca imamantapish mana utca pꞌiñarinata o pacienciata charinata yachana canchij (2 Timoteo 3:1-5). Mayoría gentecunaca imamantapish ratomi pꞌiñarinllacuna. Chashna cashcamantami paicunallapi yuyancuna, shujtajcunahuanpish litunacuncuna, imapipish mana jarcari tucuncunachu. Chaimantami ñucanchijca “¿chai gentecuna shinachu tucushcani? ¿Mana utca pꞌiñarinaca o pacienciata charinaca imatataj nisha nin? ¿Imamantapish ama utca pꞌiñaringapajca imatataj rurana cani?” nishpa cada uno tapurina canchij.

¿Bibliapica mana utca pꞌiñarinamantaca imatataj nin? Mana utca pꞌiñarijca ima llaqui japijpica cai llaqui atrazochu tucuna carcani, imata rurashapish nishpallaca mana saquirinchu. Ashtahuanpish llaquicuna mejoranata shuyashpami ahuantan. Shinallataj mana paillapi yuyanchu. Shujtajcunamantami preocuparin. Pi llaquichijpipish paihuan tigra apanacunatami shuyan. Chaimantami Bibliapica cꞌuyaimantami mana utca pꞌiñarinchij nin (1 Corintios 13:4) * (urapi tiyaj notata ricui). Shinallataj mana utca pꞌiñarinaca espiritupaj granomi can (Gálatas 5:22, 23). ¿Imamantapish ama utca pꞌiñarij cangapajca imatataj rurana canchij?

Imamantapish mana utca pꞌiñaringapajca Jehová Diostami espíritu santota cushpa ayudahuai nishpa mañana canchij. Diosca paipi shunguta churajcunamanca cungallami (Lucas 11:13). Diospaj espíritu achcata ayudajpipish ñucanchij mañashca shinami imatapish rurana canchij (Salmo 86:10, 11). Tucui punllacunami ama utca pꞌiñarij cangapaj esforzarina canchij. Pero maipica pandarinchijllami. Chaipica ¿imatataj rurana canchij?

Mana utca pꞌiñarij cangapajca Jesuspaj causaimanta yachashpami paipaj ejemplota catina canchij. Apóstol Pabloca “mana pꞌiñarij” cangapaj esforzarijcunaca “mushuj runata” rurashca shinami can nircami. Chaimantami Jesusta catijcunataca: “Cristomanta Dioshuan sumaj causaica cancunapaj shungucunapi mandachun” nirca (Colosenses 3:10, 12, 15). Chaipajca ñucanchij preocuparishcacunata Jehová Dios pai agllashca horaspi allichinatami Jesús shina crina canchij. Shinami ima pasajpipish mana utca pꞌiñarishpa causashun (Juan 14:27; 16:33).

Cai Allpa shuj paraíso ña tucuchunmi achcata munanchij. Jehová Diospish chaitami munan. Pero paica pacienciahuanmi shuyacun. Dios chashna cashcata yuyarishpami ñucanchijpish pacienciata charinata yachanchij. Bibliapica: “Maijancuna, Jehová Diosca pai cusha nishcataca manaraj cushcachu, uniyacunmi nijpipish mana chashnachu. Paica cancunatami shuyacun. Shujllapish chingarichunca mana munanchu.  Ashtahuanpish tucuicuna arrepintirichunmi munan” ninmi (2 Pedro 3:9, NM). Yaya Dios pacienciata charishcata yuyarishpaca ¿manachu ñucanchijpish shujtajcunahuan chashna shina casha ninchij? (Romanos 2:4). ¿Imacunallapitaj pacienciata charishcata ricuchina canchij?

Tucui punllacunami imata ruracushpapish pacienciata charina canchij. Por ejemplo, imata nisha nishpaca shujtajcuna parlanacungacamami pacienciahuan shuyana canchij (Santiago 1:19). Shujtajcunapaj nishcacuna o ruraicuna mana alli ricurijpica mana utca pꞌiñarinachu canchij. Pꞌiñarinapaj randica Jehová Diospish Jesuspish ñucanchij pandarishcacunamanta pacienciata charishcatami yuyarina canchij. Paicunaca ñucanchij ashata imapi pandarijpipish mana chaita ricuncunachu. Ashtahuanpish allita rurangapaj achcata esforzaricujtami ricuncuna (1 Timoteo 1:16; 1 Pedro 3:12).

Huaquinpica gentecunaca canmi mana allita nircangui o mana allita rurarcangui nincunami. Chashna nijpica ratomi paicunahuan coleranchij o caimanta chaimantami rurarcanchij ninata pudinchij. Pero Diospaj Shimipica: “Mana utca pꞌiñarij canaca, cꞌari tucushca canata yalli allimi. Imamantapish ama jahualla pꞌiñaringuichu. Chꞌahuancunallami chashna pꞌiñarincuna” ninmi (Eclesiastés 7:8, 9). Shujtajcuna yangamanta juchachijpipish mana utca pꞌiñarishpami imata cutichinata alli yuyanaraj canchij. Jesuspish paita yangamanta juchachijpica chaitami rurarca (Mateo 11:19).

Yaya mamacunapish paicunapaj huahuacuna mana alli munaicunata charijpi o mana allicunata rurajpica cunangapajmi pacienciata charina can. Huauqui Mattiaspi yuyashun. Paica Europapi caj shuj sucursalpimi sirvin. Mattias escuelapi cajpica compañerocunaca paipaj crishcacunamantami burlarijcuna carca. Callaripica paipaj yaya mamaca caimantaca mana imata yachashcacunachu carca. Pero Mattias Diospaj Shimipi yachachishcacunata ña mana tanto cri callarishcatami ricurcacuna. Mattiaspaj yayaca Gillis shutimi can. Paica: “Achca pacienciatami charina carcanchij” ninmi. Mattiasca: “¿Diosca pitaj can? ¿Bibliapi tiyaj yuyaicuna mana Diospaj cajpica? ¿Dioschu caita o chaita rurana canguichij nin? ¿Chaitaca ima shinataj yachanchij?” nijmi carca. Paipaj yayatapish: “Cancuna shina mana crijpica ¿imamantataj juzgana canguichij?” nijmi carca.

Huauqui Gillisca: “Ñucanchij churica mana ñucanchijhuanchu pꞌiñarishpa parlaj carca. Paica Diospaj  Shimita yachashcamantami ñuca causaica llaquilla can nishpami coleraj carca” ninmi. ¿Mattiaspaj yayaca imatataj rurarca? Paica: “Achca horascunatami Mattiashuan parlanacuj carcanchij. Achca cutincunami pai ima nishcata uyashpalla saquirij carcani. Pai ima shina sintirishcata, imata yuyashcata alli intindingapajmi huaquinpica tapuicunata ruraj carcani. Shinallataj shuj yuyaita alli intindichishpami chaimanta cutin parlanacungapaj casi shuj punllata chaipi yuyachun saquij carcani. Mana cashpaca ‘can ima nishcata alli yuyaringapaj asha punllacunata cuhuai’ nijmi carcani” ninmi. Chashna shina parlanacuita charishcamantami Mattiasca Jesús imamanta huañushcata, imamanta Jehová Dios tucuita mandana cashcata, imamanta cꞌuyaj cashcatapish asha asha intindi callarirca. Chaipajca achca tiempomi minishtirirca, shinallataj mana jahuallachu carca. Pero asha ashami Jehová Diosta ashtahuan cꞌuyai callarirca. Mattiaspaj yayaca “huambraraj cajpi pacienciahuan parlashcamantami ima cunashcapish paipaj shunguman chayarca. Chaimantami ñuca huarmihuanca cushilla sintirinchij” ninmi.

Huauqui Gillis paipaj huarmipish Mattiasta pacienciahuan ayudacushpaca Jehová Diospish ayudanapimi confiarcacuna. Paica: “Achca cutincunami Mattiastaca ‘ñucapish cambaj mamapish cantaca achcatami cꞌuyanchij. Chaimantami Jehová Diostaca can tucuita intindichun ayudahuai nishpa tucui shunguhuan mañarcanchij’ nircani” ninmi. Cai yaya mamaca achca pacienciata paipaj huahuaman ricuchishcamantami cushilla cancuna.

Diosta sirvijcunaca ancha ungushca familiacunata, ungushca amigocunata cuidangapajpish achca pacienciatami charina canchij. Cunanca Ellenmanta parlashun * (urapi tiyaj notata ricui). Paipish Europa ladopimi causan.

Casi 8 huatacuna huashamanca pani Ellenpaj cusataca shuj grave ungüimi japirca. Chai ungüica paipaj cerebrotami dañarca. Chaimantapachami ña mana cushilla can, ña mana llaquirin, pitapish ña mana llaquin. Ellenpajca chashna causanaca yallitaj llaquimi can. Paica: “Achca pacienciatami ricuchina cashcani. Jehová Diostapish achca cutinmi mañashcani” ninmi. Paipaj munashca versoca Filipenses 4:13-mi can. Chaipica: “Ñucata sinchiyachij Jehová Dioshuanca, tucui imatapish rurai tucunimi” ninmi * (urapi tiyaj notata ricui). Jehová Diospaj ayudahuanmi Ellenca pacienciata charishpa, Diospi tucui shunguhuan confiashpa catin (Salmo 62:5, 6).

Jehová Diosmi tucuimanta yalli mana utca pꞌiñarij cashcata ricuchishca. Pai shinami cana canchij (2 Pedro 3:15, NM). Jehová Dios mana utca pꞌiñarij cashcatami Bibliapica achca cutincuna parlan (Nehemías 9:30; Isaías 30:18). Por ejemplo, Sodoma llajtata imamanta chingachigrishcata Abraham tapujpica ¿Jehová Diosca imatashi rurarca? Abraham imata tapushcata, imamanta sustarishcatami mana pꞌiñarishpa alli uyarcaraj. Qꞌuipaca imata nishcata tigra cutichishpami paita uyacushcata ricuchirca. Shinallataj cashcata ruraj 10 gentecuna Sodoma llajtapi tiyajpica mana chingachishachu nircami (Génesis 18:22-33). Jehová Diosca tucuimanta yalli mana utca pꞌiñarij cashcata, jarcarij cashcatami ricuchishca.

Diosta sirvijcuna “mushuj runata” rurashca shina cangapajca imamantapish mana utca pꞌiñarinachu canchij. Chaipajca tucui shunguhuanmi esforzarina canchij. Shinami ñucanchijta cꞌuyaj, mana utca pꞌiñarij Jehová Diosta jatunyachishun. Chashnallataj “crishcamanta mana pꞌiñarishpalla Dios cusha nishcata” japijcunapurapimi cashun (Hebreos 6:10-12).