1. ¿Imamantataj Jehová Diosca tucuita rurarca?

ACHCA tiempotami Jehová Diosca pailla causarca. Sololla cashpapish mana llaquilla sintirircachu. Cushilla causangapajpish mana pita minishtircachu. Pero cꞌuyaimantami shujtajcuna cushilla causachun munarca. Chaimantami tucuita rurarca (Salmo 36:9; 1 Juan 4:19).

2. ¿Jesuspish angelcunapish Jehová Dios tucuita ruracujta ricushpaca ima shinataj sintirircacuna?

² Puntapica Jehová Diosca paipaj Churi Jesustami rurarca. Qꞌuipaca Diosca jahua pachapi, cai pachapi tucui imalla tiyajtaca paipaj Churihuanmi rurarca. Achca angelcunatapishmi rurarca (Colosenses 1:16). Jesusca paipaj Yayahuan trabajashcamantami cushilla sintirirca (Proverbios 8:30). Jahua pachata, cai pachata ruracujta ricushpami angelcunapish cushilla sintirircacuna. Bibliapica angelcunaca Yaya Diostami alabai callarircacuna ninmi. Jehová Dios gentecunatapish ruracujta ricushpaca angelcunaca Yaya Diostaca alabashpami catircacuna (Job 38:7; Proverbios 8:31). Jehová Dios tucui imalla rurashcacunaca pai cꞌuyaj, tucuita yachaj cashcatami ricuchin (Salmo 104:24; Romanos 1:20).

3. 1 Corintios 15:21, 22-pi nishca shinaca ¿Jesús huañushcamantaca imacunallamantataj quishpirishun?

³ Jehová Diosca cai Allpapi gentecuna huiñaita causachunmi munarca. Pero Adán y Eva Diosta mana cazushcamantami  juchapish huañuipish cai pachaman yaicurca (Romanos 5:12). ¿Jehová Diosca imatataj rurarca? Paica chai ratomi gentecunata ima shina quishpichinata huillarca (Génesis 3:15). Gentecunata juchamanta, huañuimanta quishpichingapajmi paipaj Churita curca. Chashnami huiñai causaita chari tucushun. Pero Yaya Diosca paita sirvinata o mana sirvinata cada uno decidichunmi saquishca (Juan 3:16; Romanos 6:23; 1 Corintios 15:21, 22-ta liyipai).

4. ¿Cai yachaipica ima tapuicunamantataj yachashun?

⁴ Yaya Dios huañushcacunata causachinata yachashpami cashna tapurishcanchij: ¿Jehová Dios huañushcacunata causachijpica ima shinataj canga? ¿Huañushca familiacuna causarijpica rijsishunchu? ¿Huañushcacuna causarijpica imamantataj dimastij cushicushun? Huañushcacunata causachina esperanzata cushpaca Yayitu Diosca cꞌuyaj, tucuita yachaj, pacienciata charij cashcataca ¿ima shinataj ricuchin? Cai tapuicunamanta yachashun.

5. ¿Imamantataj huañushcacuna mana tucuicuna igual causarinata yachanchij?

⁵ Jesusmantami Jehová Diosca achca gentecunata causachinga. Pero mana tucuicunachu igual causaringa. ¿Imamanta? Tucuicuna igual causarijpica ima orden mana tiyanmanchu. Jehová Diosca tucuipi orden tiyachunmi munan. Tucuita ordenpi charijpica tranquilo causaimi tiyanga (1 Corintios 14:33). Jehová Diosca gentecuna cai Allpapi causachunmi cai Allpataca Jesushuan asha asha allichirca. Chashnami tucuita yachaj, pacienciata charij cashcata ricuchirca. Jesuspish paipaj Yaya shinami  alli yachaj, pacienciata charij can. Chaimantami pai mil huatacunata mandacushpaca Armagedonmanta quishpirijcunataca cai Allpata allichichun ayudanga. Chashnami causarijcunataca alli chasquingacuna.

6. Hechos 24:15-pi nishca shinaca ¿picunataj causaringacuna?

⁶ Armagedonmanta quishpirishcacunaca causarijcunaman Diospaj Gobiernomanta, paipaj mandashcacunamantami yachachingacuna. Bibliapica cashcata mana rurajcunami causaringa ninmi (Hechos 24:15-ta liyipai). Paicunaca Jesusmanta bendicioncunata chasquingapajca achca cambiocunatami rurana canga. Achca causarijcunaman Diosmanta yachachingapajca achca trabajomi minishtiringa. ¿Cunan punllacunapi Bibliamanta yachachicuj shinallatajchu cada unoman yachachishun? ¿Ashtahuan yachangapajca mai congregacionman rinachu minishtiringa? ¿Paicunatapish shujtaj causarijcunata yachachichunchu mandangacuna? Caicunataca mana yachanchijchu. Pero Isaías 11:9-pi nishca shinaca Jesús mandashpa tucuchicujpica “tucui cai pachaca Mandaj Diosta rijsishcahuanmi junda canga”.

7. ¿Diosta sirvijcunaca imamantataj causarijcunamanca cꞌuyaihuan yachachingacuna?

⁷ Jesús mandacujpica Diosta sirvijcunaca paicunapaj causaipi cambiocunata rurashpami catingacuna. Causarijcunapish Dios munashca shina causangapajca paicunapaj causaipimi cambiocunata rurana canga. Chaimantami Diosta sirvijcunaca causarijcunamanca cꞌuyaihuan yachachingacuna (1 Pedro 3:8). Diosta sirvijcuna humilde cashcata, paita sirvingapaj esforzaricushcata ricushpaca causarijcunapish Diostami sirvisha ningacuna (Filipenses 2:12).

8. ¿Cꞌuyashca familiacuna causarijpica paicunata rijsi tucushcataca ima shinataj yachanchij?

⁸ Ñucanchij cꞌuyashca familiacuna causarijpica ratomi rijsi tucushun. ¿Imamantataj chashna ninchij? Bibliapica huañushcacuna causarishcamantami parlan. Por ejemplo, Lazarota ima shina Jesús causachishcapi yuyashun. Lazaroca ñami chuscu punllacunata huañushca carca. Chaimantami paipaj cuerpoca ña ashnacushcanga. Pero Jesús Lazarota causachincami paipaj panicunaca rijsircacuna. Lazaropishmi paipaj panicunata yuyarishcanga (Juan 11:38-44; 12:1, 2). Chashnallatajmi Jehová Dios huañushcacunata causachijpica paicunata rijsi tucushun. Causarijcunaca ñahui ricuipipish, yuyaipipish, rimaipipish chashnallatajmi causaringacuna. Jesusca huañuitaca dorminahuanmi chꞌimbapurarca. Cutin causachinataca dormicushcamanta rijchachinahuanmi chꞌimbapurarca (Mateo 9:18, 24; Juan 11:11-13). Gentecuna rijcharishpaca ñahui ricuipipish, yuyaipipish, rimaipipish mana cambiancunachu. Chashnallatajmi huañushcacunapish causarishpaca mana cambiangacuna.

9. ¿Huañushcacunaca ima laya cuerpohuantaj causaringacuna?

⁹ Jehová Diosca paraisopica: “‘Ungushcami cani’ nishpaca ni pi mana ningacunachu” ninmi (Isaías 33:24; Romanos 6:7). Jehová Dios huañushcacunata causachijpica causarijcunaca sano cuerpohuanmi causaringacuna. Pero chai ratoca jucha illaj cuerpohuanca mana causaringacunachu. Paicuna jucha illaj cuerpohuan causarijpica paicunapaj familiaca manachari rijsi tucungacuna. Chaimantami Jesús cai Allpata mandacujpi tucui gentecunaca  asha asha jucha illaj tucungacuna. Chashnami Jesusca Diospaj munaita pajtachinga. Jesusca mil huatacunata mandashca qꞌuipaca chai mandanataca paipaj yayamanmi tigrachinga (1 Corintios 15:24-28; Apocalipsis 20:1-3).

10. ¿Huañushcacuna causarijpica ima shinashi sintirishun?

¹⁰ Huañushcacuna causarijpi paicunata cutin ricushpaca ¿ima shinashi sintirishun? ¿Cushilla cashcamantachu huacashun? ¿Cushilla sintirishcamantachu Jehová Diostaca alabashun? Ima laya cashpapish Jehová Dios paipaj Churihuan huañushcacunata causachishcamantami paicunataca ashtahuan cꞌuyashun.

11. Juan 5:28, 29-pi nishca shinaca ¿causarijcunaca Diospaj mandashcacunata cazushpaca ima laya causaitataj charingacuna?

¹¹ Causarijcunaca ñaupa causaita huashaman saquishpa, Diospaj mandashcacunata cazushpaca achcatami cushicungacuna. Paicunapaj causaipi cambiocunata rurajcunaca huiñaita causangapajmi causaringacuna. Cutin Diosta mana cazujcunataca Yayitu Diosca paraisopi ima millaita rurachunca mana saquingachu (Juan 5:28, 29-ta liyipai; Isaías 65:20).

12. ¿Paraíso Allpapi causajcunaca ima bendicioncunatataj chasquingacuna?

¹² Proverbios 10:22-pica: “Mandaj Diostaj cushca allicunaca charijyachinmi. Chaica ima llaquipipish mana churanchu” ninmi. Jesús mandacujpimi Diosta sirvijcunaca cai shimicuna pajtarishcata ricungacuna. Jehová Dios paipaj espíritu santohuan ayudajpimi paicunaca Jesús yachachishcacunata cazushpa catingacuna. Shinallataj asha ashami jucha illaj tucungacuna (Juan 13:15-17; Efesios 4:23, 24). Cada punllami allicunata rurashpa catingacuna. Cuerpopipish alli saludtami charingacuna. Chaipi causacushcamantami cushilla sintiringacuna (Job 33:25). Huañushcacunata causachinapi yuyashpaca ¿Jehová Diosmantaca imatataj yachanchij?

13. Salmo 139:1 al 4-pi nishca shinaca ¿Jehová Dios ñucanchijta alli rijsishcataca ima shinataj yachanchij?

¹³ Ña ricushca shinaca Jehová Diosca huañushcacunata causachishpaca manaraj huañushpa ima shina cashcata shinallatajmi causachinga. Paica ñucanchijta achcata cꞌuyashcamantami cada uno imata yuyashcata, ima shina sintirishcata, imata nishcata, imata rurashcatapish alli yachan. Chaimantami ñucanchijcuna huañujpipish ñucanchij ima laya cashcahuan paica causachi tucunga. Rey Davidca: ‘Jehová Diosca cada unotami alli rijsin’ nircami (Salmo 139:1-4-ta liyipai). ¿Jehová Dios ñucanchijmanta preocuparishcata yachashpaca ima shinataj sintirinchij?

14. ¿Jehová Dios ñucanchijta alli rijsishcata yachashpaca ima shinataj sintirinchij?

¹⁴ Jehová Dios ñucanchijta alli rijsishcamantaca mana sustarinachu canchij. Paica ñucanchijtaca achcatami cꞌuyan. Ñucanchijca paipajca valishcami canchij. Shinallataj paica ñucanchij causaipi ima tucushcataca tucuimi yachan. Chaimantami ñucanchijtaca alli intindin. Caicunata yachashpaca cushillami sintirinchij. Ñucanchijlla cashcataca mana yuyanachu canchij. Jehová Diosca ñucanchijta ayudangapajmi listo can (2 Crónicas 16:9).

15. ¿Jehová Diosca causachina esperanzata cushpaca yachaj cashcataca ima shinataj ricuchin?

¹⁵ Diablopaj munaita rurajcunaca gentecuna paicunapaj amigocunamanta caruyachun, paicunapaj crishcacunata huashaman saquichunmi munan. Gentecuna huañunata manchajpica contracunaca paicunata jahualla manchachishpami mana allita rurachun obligancuna. Pero caicunaca Diosta sirvijcunataca mana manchachinchu. Contracuna ñucanchijta huañuchijpipish Jehová Dios causachinataca allimi yachanchij (Apocalipsis 2:10). Diospaj cꞌuyaimanta pi mana anchuchi tucushcatapish allimi yachanchij (Romanos 8:35-39). Ñucanchijca Diablota apoyajcunata mana manchashcamantami mana manchashpa Diosta sirvi tucunchij. Jehová Diosca huañushcacunata causachina esperanzata cushpami Diablota ama manchachun ayudan. Chashnami tucuita yachaj cashcata ricuchin.

16. a) ¿Imatataj tapurina canchij? b) ¿Caicunata pajtachishpaca imatataj rurashun?

¹⁶ Contracuna ñucanchijta huañuchisha nijpica Jehová Dios causachinatami crina canchij. Chaimanta cashna nishpa tapurishunchij: ¿Cada punlla imata decidicushpapish Yaya Diospi confiashcatachu ricuchini? (Lucas 16:10). Diospaj Gobiernota punta lugarpi churashpa ¿Jehová Dios ayudanapichu confiani? (Mateo 6:31-33). Caicunata pajtachishpaca ima llaquicuna ricurijpipish ñaupajmanmi catishun (Proverbios 3:5, 6).

17. a) ¿Jehová Diosca pacienciata charishcataca ima shinataj ricuchin? b) ¿Jehová pacienciata charishcamantaca ima shinataj agradicinchij?

¹⁷ Jehová Diosca mana allicunata tucuchingapajca shuj punllatami agllashca (Mateo 24:36). Shinallataj huañushcacunata causachisha nishpapish pai agllashca tiempopimi causachinga (Job 14:14, 15). Chai punlla chayangacamami shuyacun (Juan 5:28). Jehová Dios paciente cashcamantami achcata agradicinchij. Chaimantami achca gentecunapish ñucanchijpish juchacunamanta arrepintiri tucushcanchij (2 Pedro 3:9). Jehová Diosca tucui gentecuna huiñai causaita charichunmi munan. Ñucanchijpish gentecunataca Yaya Diosta sirvichun, huiñai causaita charichunmi ayudana canchij (Hechos 13:48). Chashnami paicunapish ñucanchij shinallataj Diospaj pacienciamanta beneficiaringacuna.

18. ¿Imamantataj shujtajcunaman pacienciata ricuchina canchij?

 ¹⁸ Jehová Diosca pacienciata charishcamantami ñucanchij jucha illaj tucungacama mil huatacunata shuyanga. Chai tucui huatacunapimi ñucanchij juchacunataca perdonashpa catinga. Ñucanchijpish paipaj ejemplota catishpami shujtajcunapaj alli cualidadcunata ricuna canchij. Shuj panipi yuyashun. Paipaj cusaca yallitaj preocuparina ungüita charishcamantami tandanacuicunaman rinata saquirca. Paica: “Ñuca cusa yallitaj preocuparina ungüita charishcamantami achcata llaquirircani. Ñucanchij causaipaj rurashca planescunata mana pajtachi tucushcatami cuentata curcani” ninmi. Cashna llaquicunahuan chꞌimbapuracushpapish cai panica paipaj cusataca cꞌuyaihuan, pacienciahuanmi tratashpa catirca. Shinallataj paica problemacunallapica mana yuyarcachu. Jehová Diospi confiashcamantami ñaupajman catirca. Chai panica: “Ñuca cusaca alli cualidadcunatami charin. Paipaj ungüimantapish alliyangapajca achcatami esforzaricun” ninmi. Ñucanchijpish cashna shina problemacunata chꞌimbapuracuj familiacunahuanpish, huauqui panicunahuanpish pacienciatami charina canchij.

19. ¿Imata rurangapajtaj decididos cana canchij?

¹⁹ Jehová Dios cai Allpata rurajpica Jesuspish, angelcunapish achcatami cushicurcacuna. Shinallataj paraíso Allpapi gentecuna jucha illaj tucushcata ricushpa, Jehová Diosta sirvicujta ricushpami cushilla sintiringacuna. 144 mil agllashcacunapish cai Allpata Jesushuan mandacujpica gentecunaca achcatami beneficiaringacuna (Apocalipsis 4:4, 9-11; 5:9, 10). Paraíso Allpapi ungüicuna illaj, llaquicuna illaj, huañuicuna illaj causanapi yuyai (Apocalipsis 21:4). Chai punlla chayamungacamaca Yaya Dios shina cꞌuyaita, alli yachaita, pacienciata ricuchingapajmi decididos cana canchij. Chaita rurashpaca llaquicunahuan chꞌimbapuracushpapish cushillami causashun (Santiago 1:2-4). Jehová Dios huañushcacunata causachinata yachashpaca achcatami agradicinchij (Hechos 24:15).