1. ¿Davidca Jehová Diosmantaca imatataj nirca?

¿JEHOVÁ DIOSCA ciertochu humilde can? Ari, Davidca Jehová Diostaca: ‘Ñucata quishpichij, escudotapish canmi cungui. Cambaj cꞌuyaihuanmi o cambaj humildadhuanmi jatunyachishcangui’ nircami (2 Samuel 22:36; Salmo 18:35). ¿Davidca imamantataj Jehová Diosmantaca chashna nirca? Shuj punllaca, Samuelca Davidpaj huasimanmi Israelta mandaj cachun agllanaman rirca. David último churi cajpipish Jehová Diosca Saulpaj randi mandachunmi agllarca. Davidca chaita yuyashpami cai shimicunata escribishcanga (1 Samuel 16:1, 10-13).

2. ¿Cai yachaipica imallatataj yachashun?

² Davidca Salmo 113-pi ima nishcahuanmi igual yuyarca. Chaipica: “Jehová Diosca jahua pachatapish cumurishpami ricucun. Paica cai pachatapish cumurishpami ricucun. Paimi huajchataca ñutu allpamanta jatarichin. Jatun mandajcunahuan tiyachingapajmi chashna ruran” ninmi (Salmo 113:6-8). Cai yachaipimi Jehová Dios humilde cashcata, ñucanchijpish humilde cangapaj paimanta imata yachai tucushcata ricushun. Qꞌuipaca Saulmanta, Danielmanta, Jesusmanta yachashpami humildes cangapaj imata ruranata intindishun.

3. a) ¿Jehová Diosca gentecunataca ima shinataj tratan? b) ¿Chashna tratashpaca imatataj ricuchin?

³ Juchayuj gentecunata cꞌuyaihuan tratashpami Jehová Diosca humilde cashcata ricuchin. Paica paita adorachun, paipaj amigocuna cachunmi saquin (Salmo  25:14). Jehová Dios paipaj Churita ñucanchijmanta huañuchun cachashcamantami Diospaj amigo cai tucunchij. Chashnami Jehová Diosca llaquij cashcata ricuchishca.

4. ¿Jehová Diosca ñucanchijtaca ima shinataj rurarca?

⁴ Jehová Diosca ñucanchijta paiman rijchajta rurashpa, cada uno imatapish decidichun saquishpami humilde cashcata ricuchin. Ñucanchij paipaj ñaupajpi uchilla shina cajpipish ñucanchij decidishcacunami paipajca valishca can. Chaimantami pai mandashcacuna ñucanchijpaj alli cashcata yachashpa cꞌuyaimanta sirvichun munan (Deuteronomio 10:12; Isaías 48:17, 18). Jehová Dios humilde cashcamantami cushilla sintirinchij.

5. ¿Jehová Diosca ima shinataj humilde canataca yachachin? (Página 1-pi tiyaj fotota ricui).

⁵ Jehová Dios ñucanchijta ima shina trataj cashcata ricushpami humilde canata yachai tucunchij. Paica tucuimanta yalli yachaj cashpapish shujtajcuna ima nishcatami uyanata yachan. Por ejemplo, Jehová Diosca paipaj Churi, paihuan tucui cosascunata rurashpa trabajachunmi saquirca (Proverbios 8:27-30; Colosenses 1:15, 16). Jehová Diosca tucuita rurai tucuj cashpapish shujtajcunamanmi autoridadta cun. Por ejemplo, Jesusta 144 mil agllashcacunatapish paipaj Gobiernopi mandachunmi agllashca (Lucas 12:32). Pero rey cachun, sacerdotecunata mandaj cachunmi puntaca Jesustaca yachachirca (Hebreos 5:8, 9). Shinallataj 144 mil agllashcacunatapish paipaj Churihuan mandachunmi yachachin. Pero paicunaman paipaj munaita pajtachichun mingashpapish, Yayitu Diosca paicunaca allichu pajtachinga o mana allichu pajtachinga nishpaca mana yuyanchu. Chaipaj randica paicunapimi confiashcata ricuchin (Apocalipsis 5:10).

6, 7. ¿Familiata, congregacionta pushajcunaca ima shinataj Jehová Diospaj ejemplota cati tucuncuna?

 ⁶ Jehová Diosca shujtajcunapaj ayudata mana minishtishpapish shujtajcuna ayudachunmi saquin. Ñucanchijcarin shujtajcuna ayudachunmi saquina canchij. ¿Familiata pushajcunapish congregacionta pushajcunapish ima shinataj Jehová Diospaj ejemplota cati tucuncuna? Shujtajcunaman trabajocunata mingashpa, chai trabajocunata ima shina pajtachichun yachachishpami ayudana can. Pero chaicunata pajtachicujta ricushpapish mana tucuita controlanachu can. Chashnami chai trabajotaca cushilla pajtachingacuna (Isaías 41:10). ¿Familiata, congregacionta pushajcunaca Jehová Diosmantaca imatataj ashtahuan yachai tucuncuna?

⁷ Bibliapica Jehová Diosca angelcuna imata nishcataca allimi uyan ninmi (1 Reyes 22:19-22). ¿Yaya mamacunaca Jehová Diospaj ejemplotaca ima shinataj cati tucuncuna? Yaya mamacunaca cancunapaj huahuacunahuan shuj trabajota ruracushpaca ¿ima shinataj chaitaca pajtachi tucunchij? nishpami tapuna can. Pudishpaca paicuna ima nishcatami chasquina can.

8. ¿Jehová Diosca Abrahamman, Saramanca ima shinataj pacienciata ricuchirca?

⁸ Jehová Diosca mana utca pꞌiñarishpami humilde cashcata ricuchin. Por ejemplo, paita sirvijcuna paihuan mana de acuerdo cajpipish paicunamanca pacienciatami ricuchin. Caipi yuyashun. Sodoma, Gomorra llajtacunata Jehová Dios tucuchisha nijpimi Abrahamca mana de acuerdo carca. Pero Jehová Diosca Abrahamtaca pai parlachunmi saquirca (Génesis 18:22-33). Shinallataj Saraca ña mayorlla cashcamantami shuj huahuata charinata yachashpaca asirca. Sara asirijpipish Diosca pꞌiñarinapaj randica cꞌuyaihuanmi tratarca (Génesis 18:10-14).

9. ¿Yaya mamacunapish, congregacionta pushajcunapish Diosmantaca imatataj yachai tucuncuna?

⁹ Yaya mamacunapish congregacionta pushajcunapish Jehová Diospaj ejemplomantaca ¿imatataj yachai tucuncuna? Cambaj huahuacuna o congregacionpi caj huauqui panicuna can ima decidishcata mana chasquisha nijpica ¿imatataj rurangui? ¿Paicuna pandarishcatachu yuyangui? O ¿paicuna imamanta chashna nishcata intindingapajchu esforzaringui? Yaya mamacuna, congregacionta pushajcuna Diospaj ejemplota catijpica tucuicunami beneficiarinchij. Caicamaca Jehová Dios ima shina humilde cashcatami yachashcanchij. Cunanca shujta ejemplocunamanta yachashpami humilde canata ricushun.

10. ¿Jehová Diosca ñucanchijtaca ima shinataj yachachin?

¹⁰ Jehová Diosca ñucanchijta yachachij cashcamantami Bibliapica huaquin ejemplocunata churashca (Isaías 30:20, 21). Chai ejemplocunamanta yachashpami paicunamantaca achcata yachai tucunchij. Huaquincunaca humildecunami carca. Paicunaca Diospaj ñaupajpica allimi ricurirca. Cutin shujtajcunaca jatun tucushcacunami carca. Paicunamanta yachashpami imata rurana cashcata, imata mana rurana cashcata yachashun (Salmo 37:37; 1 Corintios 10:11).

11. ¿Saulmantaca imatataj yachanchij?

¹¹ Rey Saulhuan ima tucushcata yuyarishun. Saulca jovenraj cashpaca humildemi carca. Dios mingashcacunatapish mana pajtachi tucushachu nishpami yuyaj carca (1 Samuel 9:21; 10:20-22). Pero rey tucuchun nombrashca qꞌuipaca Saulca asha ashami jatun tucurca. Shuj cutinca profeta Samuelca  Jehová Diosmanmi ofrendata cuna carca. Pero rey Saulca ofrendata cuchunca mana shuyarcachu. Chaipaj randica paimi jatun tucushpa Diosmanca ofrendata curca. Chaita rurangapajca Saulca mana autoridadta charircachu. Chaimantami Jehová Diospaj ñaupajpica mana alli ricurirca. Qꞌuipacarin mandashpa catichunca Jehová Diosca mana saquircachu (1 Samuel 13:8-14). ¿Caimantaca imatataj yachai tucunchij? Imata rurangapaj autoridadta mana charishpaca mana ruranachu canchij.

12. ¿Danielmantaca imatataj yachanchij?

¹² Profeta Danielca mana Saúl shinachu carca. Danielca humilde cashcamantami Jehová Diospaj ayudata siempre mashcarca. Por ejemplo, shuj punllaca Nabucodonosormi shuj muscuita charirca. Danielca Dios ayudajpimi chai muscui ima nisha nishcata huillarca. Paica humilde cashcamantami Jehová Diosta jatunyachirca (Daniel 2:26-28). ¿Caimantaca imatataj yachanchij? Alli conferenciata cuj cashpapish, Diosmanta alli huillaj cashpapish siempremi Jehová Diosta jatunyachina canchij. Ñucanchijllaca imatapish mana rurai tucunchijchu. Jehová Diospaj ayudatami minishtinchij (2 Corintios 4:7). Humilde cashpaca Jesuspaj ejemplotami catishun. ¿Imamantataj chashna ninchij?

13. Juan 5:19, 30-pi nishca shinaca ¿Jesusmantaca imatataj yachai tucunchij?

¹³ Jesusca Diospaj Churi cashpapish, jucha illaj cashpapish siempremi Jehová Diospi confiarca (Juan 5:19, 30-ta liyipai). Diospaj randi mandanataca Jesusca mana nunca yuyarcachu. Filipenses 2:6-pica: “Jesusca Dios shina canataca” mana munaj shinami carca, ninmi. Jesusca Yayitu Dioslla tucui autoridadta charishcataca allimi yacharca. Chaimantami paitaca tucuipi cazurca.

14. a) ¿Juanpaj Santiagopaj mamaca Jesustaca imatataj mañarca? b) ¿Jesusca imatataj nirca?

¹⁴ Shuj punllaca Santiagopaj Juanpaj mamaca Jesustaca: ‘Ñuca ishqui churicunataca Diospaj Mandanapi shujtaca alli ladoman, caishujtaca cambaj lluqui ladoman tiyachingui’ nircami. Shina nijpica ¿Jesusca imatataj nirca? Jesusca paipaj Yayalla chai autoridadta charishcatami intindichirca (Mateo 20:20-23). Chashnami paica mana tucui autoridadta charishcata ricuchirca. Jesusca Dios mandashcallatami rurarca. Chashnami  humilde cashcata ricuchirca (Juan 12:49). ¿Ima shinataj Jesuspaj ejemplota cati tucunchij?

15, 16. 1 Corintios 4:6-pi nishcataca ¿ima shinataj cazuna canchij?

¹⁵ Jesús shina humilde cangapajca 1 Corintios 4:6-pi ima nishcatami cazuna canchij. Chaipica: “Quillcachishcapi nicushcata ama yallirichijchu” ninmi (1 Corintios 4:6, NVI, 1999). Pi ñucanchijman consejota mañajpica mana ñucanchij yuyaillamantachu consejota cuna canchij. Ashtahuanpish alli yuyashpami Bibliapi, publicacioncunapi ricushpa consejana canchij. Chashnami Jehová Dioslla ñucanchijta yalli alli consejaj cashcata ricuchishun (Apocalipsis 15:3, 4).

¹⁶ Ña ricushca shinaca humildes cashpami Jehová Diosta jatunyachinchij. Cunanca, humildes cashpa shujtajcunahuan alli apanacushpa cushilla causanatami ricushun.

17. ¿Humilde gentecunaca imamantataj cushilla causancuna?

¹⁷ Humildes cashpaca mana tucuita rurai tucushcatami intindishun. Chaimantami shujtajcuna ayudajpica shungumanta agradicishun. Chashnami cushilla sintirishun. Shuj cutinca Jesusca leprahuan caj 10 runacunatami jambirca. Paicunamantaca shujllami Jesusta agradicinaman tigrarca. Chai humilde runaca jambiringapaj Jesús ayudachun minishtishcatami cuentata curca. Chaimantami Jesustapish agradicirca, Jehová Diostapish jatunyachirca (Lucas 17:11-19).

18. ¿Humilde cashpaca ima shinataj shujtajcunahuan alli apanacushun? (Romanos 12:10).

¹⁸ Humildes cashpaca shujtajcunahuanmi alli apanacushun. Alli amigocunatapishmi charishun. Humildecunaca shujtajcuna alli  cualidadcunata charishcatami yachancuna. Chaimantami paicunapi confiancuna. Ashtahuancarin shujtajcuna Diosta alli sirvijpica paicunatami felicitancuna (Romanos 12:10-ta liyipai).

19. ¿Imamantataj mana jatun tucuna canchij?

¹⁹ Jatun tucushcacunapajca shujtajcunata felicitanaca sinchimi can. Paicunaca paicunallatataj felicitachunmi munan. Shujtajcunahuan compararishpami paicunata yalli casha nincuna. Ashtahuanpish shujtajcunaman yachachinata, autoridadta cunataca mana munancunachu. Paicunallami imatapish alli ruranata yuyancuna. Jatun tucushcacunaca shujtajcunatami envidiancuna (Gálatas 5:26). Chashna cajpimi paicunapaj amigocunaca caruyancuna. Ñucanchijpish ama jatun tucungapajmi Jehová Diosta mañana canchij. Chashnami yuyaipipish shungupipish mana jatun tucuna munaita charishun (Romanos 12:2).

20. ¿Imamantataj humildecuna cana canchij?

²⁰ Jehová Diosca paita sirvijcunata alli tratashpami humilde cashcata ricuchin. Chaimantami cushilla sintirinchij. Paipaj ejemplotapishmi catisha ninchij. Ñaupa tiempopi Diosta sirvijcunapaj ejemplomantapishmi yachai tucunchij. Ñucanchijpish Jehová Diosta jatunyachinataca amataj saquishunchijchu (Apocalipsis 4:11). Humildecuna cashpaca Jehová Diospaj alli amigosmi cai tucunchij. Paica humildecunatami cꞌuyan.