1. ¿Jehová Diosca paita sirvijcunataca maipi sirvichuntaj saquin?

JEHOVÁ DIOSCA cꞌuyaimantami paita sirvijcunataca congregacionpi sirvichun saquin. Cada uno chꞌican chꞌican mingashcacunata pajtachishpapish tucuicunami valishca canchij. Shinallataj tucuicunami minishtirishca canchij. Caita intindingapajca apóstol Pablo ima yachachishcata ricushun.

2. Efesios 4:16-pi nishca shinaca ¿imamantataj valichinacushpa, ayudanacushpa causana canchij?

² 1 Corintios 12:21-pi apóstol Pablo nishca shinaca huauqui panicunataca “cantaca mana minishtinichu” nishpaca mana ninachu canchij. Jehová Diosta congregacionpi tranquilo sirvingapajca tucuicunami valichinacushpa, ayudanacushpa causana canchij (Efesios 4:16-ta liyipai). Congregacionpi tandalla cashpaca huauqui panicunahuanmi ashtahuan sinchiyanacushun. Shinallataj cꞌuyaitami charishun.

3. ¿Cai yachaipica imacunallatataj yachashun?

³ ¿Huauqui panicunata respetashcataca ima shinataj ricuchinchij? Cai yachaipica congregacionta pushajcuna caishuj pushajcunata ima shina respetana cashcatami yachashun. Qꞌuipaca solteros huauqui panicunata ima shina respetanata, mushuj shimita yachacujcunatapish ima shina valoranatami yachashun.

4. Romanos 12:10-pi nishca shinaca ¿pushajcunaca imatataj rurana can?

⁴ Congregacionta pushajcunataca Jehová Diosca paipaj espíritu santohuanmi agllashca. Pero cada unomi ima rurai tucushcahuan, ima yachashcahuan congregacionpica ayudai tucun (1 Corintios 12:17, 18). Maijancunaca pushaj cachun recienlla nombrashcamanta, ña mayorlla cashcamanta o alli saludta mana charishcamantami congregacionpica mana tucuipi ayudai tucuncuna. Ima laya cajpipish pushajcunaca shujtaj pushajcunataca “cancunataca mana minishtinchijchu” nishpaca mana yuyanachu can. Chaipaj randica Romanos 12:10-pi ima nishcatami pajtachina can (Romanos 12:10-ta liyipai).

5. a) ¿Congregacionta pushajcunaca shujtaj pushajcunata respetashcataca ima shinataj ricuchincuna? b) ¿Pushajcunapura respetota ricuchinaca imamantataj minishtirishca can?

⁵ Congregacionta pushajcunaca shujtaj pushajcunata alli uyashpami respetota ricuchincuna. Importante decisioncunata agllangapaj tandanacushpami chaitaca pajtachina can. La Atalaya del 1 de octubre de 1988-pica: “Congregacionpi ima decisionta agllangapaj o ima problemata allichingapajca pushajcuna tandanacujpica Jesusca tucuicunatami espíritu santohuan ayudan (Hechos 15:6-15). Diospaj espíritu santoca mana shuj pushajllata ayudanchu. Maijan pushajtapish Biblia ima nishcata yuyachishpami alli decisionta agllachun ayudai tucun” ninmi.

6. a) ¿Pushaj huauquicunaca paicunapura ima shinataj tratana can? b) ¿Pushaj huauquicunaca paicunapura cꞌuyaita, respetota ricuchishpaca ima shinataj congregacionta ayudanga?

⁶ Shuj pushaj huauquica respetota ricuchishpaca siempre pairaj parlanataca mana yuyanchu. Ashtahuanpish caishuj pushaj huauquicuna parlachunmi saquin. Shinallataj ñuca yuyashcapish tucuimi valishca can nishpaca mana yuyanchu. Chaipaj randica pai imata yuyashcataca mana jatun tucushpami parlan. Ashtahuancarin shujtajcuna ima nishcatami alli uyan. Biblia yachachishcacunata,  Cuerpo Gobernante huauquicuna ima nishcatapishmi catin (Mateo 24:45-47, QC, 1989). Pushaj huauquicuna paicunapura cꞌuyaihuan, respetohuan tratajpica Diosca paipaj espíritu santohuanmi alli decidichun ayudanga. Chashnami huauqui panicunata sinchiyachingacuna (Santiago 3:17, 18).

7. ¿Jesusca solterocunata respetashcataca ima shinataj ricuchirca?

⁷ Congregacioncunapica cazarashcacunalla, huahuayujcunallaca mana tiyanchu. Ashtahuanpish achca solteracuna, solterocunapishmi tiyan. ¿Solterocunata respetashcataca ima shinataj ricuchinchij? Jesuspi yuyashun. Paica cai Allpapi cashpaca mana cazararcachu. Ashtahuanpish Diosta sirvingapajmi dedicarca. Jesusca solterocunataca: “Cazaranatajmi canguichij” o “mana cazaranachu canguichij” nishpaca mana yachachircachu. Pero huaquincunaca soltero saquirinatami decidingacuna nircami (Mateo 19:11, 12, QC, 1989). Maijancuna mana cazarashcamanta ima faltashcataca Jesusca mana yuyarcachu. Chaipaj randica paicunataca respetohuanmi tratarca.

8. 1 Corintios 7:7 al 9-pi nishca shinaca ¿Diosta sirvijcunaca imatataj cada uno agllana carca?

⁸ Apóstol Pablopish Diosta sirvingapajmi soltero saquirirca. Pero cazaranaca mana allichu can nishpaca mana yachachircachu. Chaitaca cada uno decidina cashcatami ricuchirca. Pero mana cazarashpa Yaya Diosta sirvi tucushpaca chaitami rurai tucungui nishpami animarca (1 Corintios 7:7-9-ta liyipai). Pabloca solterocuna cazadocunata menos cashcataca mana yuyarcachu. Por ejemplo, Timoteo mana cazarashca cajpipish paimanca congregacionpi sinchi responsabilidadcunata pajtachichunmi mingarca (Filipenses 2:19-22). * Chaimanta shuj huauquica cazado cashpalla o soltero cashpallami Diostaca alli sirvi tucun nishpaca mana yuyanachu canchij (1 Corintios 7:32-35, 38).

9. ¿Cazado canamanta, soltero canamantaca imatataj yachanchij?

⁹ Jesuspish Pablopish “cazaranatajmi cangui” o “mana cazaranachu cangui” nishpaca mana yachachircacunachu. Caita intindishpaca cazado o soltero canamantaca ¿imatataj yachanchij? La Atalaya del 1 de octubre de  2012-pica: ‘Soltero canapish cazado canapish Dios cushca valishca regalomi can. Jehová Diosca solterocunataca llaquilla cajta shina, pingaihuan cajta shinaca mana ricunchu’ ninmi. Congregacionpi caj solterocunataca respetana, valoranami canchij.

10. ¿Solteros huauqui panicunata respetashcataca ima shinataj ricuchinchij?

¹⁰ ¿Solteros huauqui panicuna ima shina sintirishcata respetangapajca imatataj rurana canchij? Maijan solterocunaca paicunallataj mana cazaranatami decidishcacuna. Shujtajcunaca cazaranata munashpapish paicunapaj alli cashca shuj huauquita o shuj panita mana tarishcamantami mana cazarashcacuna. Cutin maijancunaca viudacuna, viudocunami saquirishcacuna. Ima shina cajpipish solterocunataca: “¿Imamantataj mana cazarangui?” nishpaca mana tapunachu canchij. Shinallataj paicuna ayudata mana mañajpica pihuan cazaranata mashcashpaca mana ayudanachu canchij. Ñucanchij ayudasha nijpica: “¿Paicunaca ima shinashi sintiringa?” nishpami tapurina canchij (1 Tesalonicenses 4:11; 1 Timoteo 5:13). Huaquin solteros huauqui panicuna ima nishcata ricushun.

11, 12. ¿Solterocunataca imata nishpataj desanimachi tucunchij?

¹¹ Shuj superintendente de circuito huauquica solteromi can. Cai huauquica Dios mingashcacunataca allimi pajtachin. Paica: “Soltero cashcamantami achca beneficiocunata charini. Pero shujtaj huauqui panicuna ‘¿imamantataj mana cazarashcangui?’ nijpica desanimadomi sintirini” ninmi. Shinallataj shuj sucursalpi sirvij huauquica: “Huaquin huauqui panicunaca solterocunamantami llaquirincuna. Paicunaca soltero canataca shuj cargata shinami ricuncuna. Pero soltero canaca shuj regalomi can” ninmi.

¹² Betelpi sirvij shuj soltera panica: “Huaquin huauqui panicunaca ‘tucui solterocunami cazaranata munan’ nishpami yuyancuna. Mana cashpaca ‘solterocunapura tandanacushpami pihuan cazaranata mashcacuncuna’ nishpami yuyancuna. Shuj cutinca ñucataca shujtaj lugarpi shuj trabajota rurachunmi cacharca. Tutata chayashpaca tandanacuimanmi rircani. Ñucata chasquij ñañaca ñucataca: ‘Cambajca noviotaca mana mashcacunichu. Pero ñuca congregacionpica canhuan igual huiñai ishqui turicunami tiyan’ nircami. Ñapish tandanacuiman chayajpica cai ñañaca ñucataca maquipi aisashcahuanmi chai ishqui solterocunapajman pushashpa presentarca. Chaimantami ñucapish chai ishqui turicunapish pingaihuan saquirircanchij” ninmi.

13. ¿Shuj soltera panitaca ima ejemplocunataj ayudashca?

¹³ Betelpi sirvij shujtaj solteraca: “Huaquin precursor solterocunatami rijsini. Paicunaca ña mana jovenlla cashpapish Diosta sirvina yuyaillami causancuna. Dios mingashcacunatapish cushillami pajtachincuna. Congregacionpipish achcatami ayudancuna. Paicunaca soltero cashcamanta shujtajcunata yalli cashcataca mana yuyancunachu. Shinallataj mana cazarashcamanta, mana huahuacunata charishcamantaca mana llaquirincunachu” ninmi. Congregacionpi caj solterocunata, cazadocunata, tucuicunata respetohuan igual tratajpi, mana envidiajpica tucuicunami cushilla sintirishun.

14. ¿Solterocunata respetashcataca ima shinataj ricuchinchij?

¹⁴ Solterocunaca mana cazarashcamanta paicunata juzgachunca mana munancunachu. Cutin paicunapaj alli cualidadcunamanta valorajpica paicunaca achcatami  agradicincuna. Paicunamanta llaquirinapaj randica Yayitu Dios mingashcacunata pajtachishcata valorashunchij. Caicunata rurajpica paicunaca cancunataca mana minishtinchijchu nicujta shinaca mana sintingacunachu (1 Corintios 12:21). Ashtahuancarin congregacionpi paicunata valorashcata, respetashcatami cuentata cungacuna.

15. ¿Huaquin publicadorcunaca ashtahuan predicangapajca imatataj rurashcacuna?

¹⁵ Cai último huatacunapica achca publicadorcunaca ashtahuan predicangapajmi mushuj shimita yachai callarishcacuna. Chaimantami paicunaca shujtaj congregacionpi ayuda minishtirijta ricushpaca chai congregacionman pasashcacuna (Hechos 16:9). Mushuj shimipi huillangapajca cada unomi decidincuna. Mushuj shimita yachangapaj achca tiempo minishtirijpipish congregacionpica achcatami ayudancuna. Paicunapaj experienciacunahuan, cualidadcunahuanmi huauqui panicunataca achcata sinchiyachincuna. Paicuna chashna esforzarijta ricushpaca cushillami sintirinchij.

16. ¿Pushaj huauquicunaca siervo ministerialta o pushaj huauquita agllangapajca imatataj ricuna can?

¹⁶ Shuj huauqui siervo ministerial cangapaj o congregacionta pushaj cangapajca mushuj shimita alli yachanaca mana shuj requisitochu can. Chaipaj randica pushajcunaca siervo ministerialcunata, congregacionta pushajcunata agllangapajca Bibliapi tiyaj requisitocunata pajtachishcatami ricuna can (1 Timoteo 3:1-10, 12, 13; Tito 1:5-9).

17. ¿Shujtaj llajtapi causanaman rij familiacunaca imatataj decidina can?

¹⁷ Huaquin familiacunaca paicunapaj llajtapi llaquicuna tiyashcamantami shujtaj llajtapi causanaman o trabajanaman rishcacuna. Paicuna maipi saquirinata agllashca llajtapica shujtaj shimitachari parlan. Chaimi paicunapaj huahuacunaca escuelaman rishpaca chai shimita yachana minishtiringa. Tal vez yaya mamacunapish trabajota mashcangapajca chai llajtapi tiyaj shimita yachanami minishtiringa. Pero chai llajtapica paicuna parlashca shimipichari shuj congregación o shuj grupo tiyanga. ¿Cai familiaca maijan congregacionmantaj rina can? ¿Paicunapaj propio shimita parlaj congregacionman o chai llajtapi tiyaj shimita parlaj congregacionman?

18. Gálatas 6:5-pi nishca shinaca ¿familiata pushaj decidishcata respetashcataca ima shinataj ricuchinchij?

¹⁸ Familiata pushajcunami maijan congregacionman rinataca decidina can. Chaipajca familiapaj ima alli cashcatami alli ricuna can (Gálatas 6:5-ta liyipai). Familiata pushaj imata decidishcatami respetana canchij. Imata decidishca cajpipish paipaj familiataca congregacionpi cushilla chasquishunchij (Romanos 15:7).

19. ¿Familiata pushajcunaca paicuna parlashca shimita huahuacuna congregacionpi mana intindijpica imatataj rurana can?

 ¹⁹ Huaquin yaya mamacunaca paicuna parlashca shimipi tiyaj congregacionmanmi huahuacunataca pushancuna. Pero huahuacunaca escuelaman rishpaca maipi saquirij llajtapi tiyaj shimitachari yachancuna. Chaimantami paicunapaj yaya mama parlashca shimitaca mana alli parlai tucungacuna. Congregacionpipish tucuita intindinaca paicunapajca sinchimi canga. Espiritualmentepish mana sinchi cangacuna. Familiata pushajmi Diostaca alli decidingapaj mañana can. Shinallataj huahuacuna Diospajman ashtahuan cꞌuchuyachun, paipaj pueblopi cachunmi alli ricuna can. Yaya mamacuna, cancuna parlashca shimitami cancunapaj huahuacunamanca yachachina canguichij. Mana cashpaca huahuacuna parlashca shimipi tiyaj congregacionman rinata alli ricuichij. Imata decidijpipish tucui huauqui panicunami chai familiataca cꞌuyaihuan, respetohuan chasquina can.

20. ¿Mushuj shimita yachacujcunata respetashcataca ima shinataj ricuchinchij?

²⁰ Achca congregacioncunapica huaquin huauqui panicunami mushuj shimita yachangapaj esforzaricuncuna. Chaimantami ima shina sintirishcata, imata yuyashcata parlanaca paicunapajca sinchi canga. Pero paicuna mushuj shimita ima shina parlashcata ricunapaj randica Jehová Diosta cꞌuyaimanta sirvishcatami ricuna canchij. Chashnami paicunata respetashcata, valorashcata ricuchishun. Shinallataj ñucanchij shimita mana alli parlashcamanta ‘cantaca mana minishtinchijchu’ nishpaca mana yuyashunchu.

21, 22. ¿Jehová Diostaca imamantataj agradicina canchij?

²¹ Congregacionpi paita sirvichun saquishcamantami Jehová Diostaca achcata agradicinchij. Cꞌaricunapish, huarmicunapish, solterocunapish, cazadocunapish, jovencunapish, mayorllacunapish, mushuj shimita alli parlanata yachajcunapish o mana tanto alli parlanata yachajcunapish tucuicunami Jehová Diospajpish huauqui panicunapajpish valishca canchij (Romanos 12:4, 5; Colosenses 3:10, 11).

²² Apóstol Pablo quillcashca chꞌimbapuraimantaca achcatami yachashcanchij. Imalla yachashcata pajtachishpaca huauqui panicunata valorangapaj, animangapajmi esforzarishun. Chashnami paicunata cꞌuyashcata, respetashcata ricuchishun.