1. ¿Jesusca Jehová Diostaca imamantataj paipaj discipulocunata cuidachun mañarca?

 HUAÑUNAPAJ ashalla horascuna faltajpimi Jesusca paipaj discipulocunata Diablomanta cuidachun Jehová Diosta mañarca (Juan 17:15, 20). Jehová Diosca paita sirvijcunataca siempremi cuidan. Pero Jesusca paita sirvijcunata Diablo llaquichinata yachashpami paicunata cuidachun Yayitu Diosta mañarca.

2. Salmo 33:18 al 20-pi nishca shinaca ¿llaquicunahuan cashpaca imamantataj mana manchana canchij?

² Cai millai mundopi causacushcamantami Diabloca Diosta sirvijcunataca achcata llaquichicun. Achca llaquicunata charishcamantami maipica Diosta sirvinaca mana jahualla can, huaquinpicarin desanimadosmi sintirinchij. Pero llaquicunahuan cashpapish mana manchanachu canchij. Jehová Diosca ñucanchijcuna ima llaquicunahuan chꞌimbapuracushcataca allimi yachan. Chaimantami ñucanchijta ayudangapajca listo can. Caita alli intindingapajca Jobpaj ejemplomanta, Eliaspaj ejemplomantapish yachashun (Salmo 33:18-20-ta liyipai).

3. ¿Huaquinpica imamantataj sololla sintirinchij?

³ Achca huauqui panicunata charishpapish maipica solollami sintirinchij. Por ejemplo, huaquin jovencunaca escuelapi paicunalla predicana cashcamanta o shujtaj congregacionman rina cashcamantami sololla sintirincuna. Huaquincunacarin depresión ungüita charishcamantami llaquilla, sololla sintirincuna. Ñucanchijpish chashna laya sintirishpaca “ñucataca ni pi mana intindingachu” nishpami ni pihuan mana parlasha ninchij. Shinallataj “ñucanchijmantaca  ni pi mana preocuparinchu” nishpachari yuyanchij. Pero ñucanchijta cꞌuyaj Jehová Diosca chashna llaquilla, sololla sintirichunca mana munanchu.

4. ¿Profeta Eliasca imamantataj “ñucallamari saquirishcani” nirca?

⁴ Eliasca Jezabel paita ama huañuchichunmi 40 punllacunata miticushpa rirca (1 Reyes 19:1-9). Chai huashaca shuj jutcuman yaicushpami Jehová Diosmanca: “Ñucallamari saquirishcani” nirca (1 Reyes 19:10). Eliasca pailla saquirishcata yuyashpami sololla sintirirca. Pero mana chashnachu carca. Abdiasca Jezabel ama huañuchichunmi 100 profetacunata quishpichishca carca (1 Reyes 18:7, 13). Shinaca ¿Eliasca imamantashi sololla sintirirca? Tal vez paica Jezabel tucui profetacunata huañuchishcatami yuyashcanga. Mana cashpaca Carmelo urcupi Yayitu Diospaj lado ni pi mana tucushcata ricushpami sololla sintirishcanga. Shinallataj paita huañuchigrishcata yuyashpa, paimanta ni pi mana preocuparishcata yuyashpami sololla sintirishcanga. Bibliapica Elías imamanta llaquilla cashcataca mana tucuita huillanchu. Pero Jehová Diosca Eliastaca allimi intindirca. Paita ima shina ayudanatapishmi alli yacharca.

5. ¿Elías ama sololla sintirichunca Jehová Diosca ima shinataj ayudarca?

⁵ Jehová Diosca Eliastaca achcatami ayudarca. Por ejemplo, Elías ima shina sintirishcata huillachunmi paitaca ishqui cutin parlachun animarca (1 Reyes 19:9, 13). Elías ima shina sintirishcata parlajpica Jehová Diosca allimi uyarca. Qꞌuipacarin paita ayudangapaj listo cashcata, poderoso cashcatapishmi ricuchirca. Israel llajtapipish achcacuna Jehová Diosta adoracushcatami huillarca (1 Reyes 19:11, 12, 18). Elías ima shina sintirishcata Jehová Diosman huillashpa, Dios imata nishcata uyashpaca cushilla, tranquilomi sintirishcanga. Ashtahuancarin Jehová Diosca Elías alli sintirichunmi huaquin ruraicunata pajtachichun mingarca. Eliasca Siria llajtata mandachunmi Hazael nishca  runata agllana carca. Israel llajtata mandachunpish Jehú nishca runatami agllana carca. Eliseotapishmi profeta cachun agllana carca (1 Reyes 19:15, 16). Qꞌuipaca Eliasca Eliseohuanca allimi apanacurca. ¿Ñucanchijpish sololla sintirishpaca imatataj rurana canchij?

6. ¿Sololla sintirishpaca Jehová Diostaca imatataj mañana canchij?

⁶ Jehová Diosca ñucanchijcuna ima shina sintirishcata huillachun, paita mañachunmi munan (1 Tesalonicenses 5:17). Paita mañajpica Jehová Diosca cushillami ñucanchijtaca uyan (Proverbios 15:8). Pero ¿sololla sintirishpaca Jehová Diostaca imacunallamantataj mañana canchij? Elías shinami ima shina sintirishcata, imamanta preocuparishcataca Jehová Diosman huillana canchij (Salmo 62:8-ta liyipai). Imata rurana cashcata yachachichunpishmi Yayitu Diosta mañana canchij. Por ejemplo, can joven cashpa escuelapi predicanata manchashpaca Jehová Diostami yachaita cuchun, fuerzasta cuchun mañana cangui (Lucas 21:14, 15). Cutin desanimachij yuyaicunata charishpaca shuj alli huauquihuan o alli panihuan parlangapajmi Jehová Diosta mañana cangui. Chai huauqui o pani canta intindichunpishmi Diosta mañana cangui. Jehová Diosman ima shina sintirishcata huillashpa, pai ñucanchijta ima shina ayudacushcata ricushpa, shujtajcunapaj ayudata chasquishpaca mana sololla sintirishunchu.

7. ¿Mauriciopaj ejemplomantaca imatataj yachai tucungui?

⁷ Jehová Diosca ñucanchijmanca importante ruraicunata pajtachichunmi mingan. Paica congregacionpipish, predicacionpipish imata ruracushcataca achcatami valoran. Diosta sirvinapi ocupados cashpaca mana sololla sintirishunchu (Salmo 110:3). ¿Imamantataj chaita ninchij? Huauqui Mauriciopaj * ejemplopi yuyashun. Pai bautizarishca huashaca paipaj alli amigoca Diosmantami caruyarca. Huauqui Mauricioca: “Ñuca amigo Diosmanta caruyashcata ricushpaca ‘¿ñucapishchu Diosta sirvinata saquisha?’ nishpami dudai callarircani. Sololla sintirishpapish ‘ñucataca ni pi mana intindingachu’ nishpami yuyarcani” ninmi. Pero ¿ama chashna sintiringapajca Mauricioca imatataj rurarca? Paica: “Ñucallapi ama yuyangapaj, desanimachij yuyaicunata ama charingapajca ashtahuan predicanatami decidircani. Huauqui panicunahuan tandalla predicashpaca cushillami sintirircani” ninmi. Ñucanchijpish maipica huauqui panicunahuan mana cꞌuchullapi cashpapish paicunahuan predicashpami cati tucunchij. Por ejemplo, telefonopi cayashpa, cartacunata rurashpami paicunahuan predicashpa  catina canchij. Chashnami fuerzasta japishun. ¿Huauqui Mauricioca sololla ama sintiringapajca imatataj ashtahuan rurarca? Paica: “Congregacionpica ñucaman mingashca asignacioncunata alli pajtachingapajca ashtahuanmi esforzarircani. Chashnami Jehová Dios, huauqui panicuna ñucata cꞌuyashcata sintircani” ninmi.

8. ¿Llaquicunata charishpaca ima shinataj sintirinchij?

⁸ Cai tucuri punllacunapica tucuicunami llaquicunata charishun (2 Timoteo 3:1). Maipica mana yuyashcapimi llaquicunaca japinga. Tal vez cullqui illajmi saquirishun o shuj millai ungüitami charishun. Mana cashpaca shuj familiami huañunga. Chashna llaquicunahuan cashpa o llaquicuna huashan huashan shamujpicarin desanimadosmi sintirishun. Pero Jehová Dios ñucanchijmanta preocuparijpi, ñucanchijta ayudajpimi chai llaquicunataca ahuantai tucushun.

9. ¿Jobca ima llaquicunatataj charirca?

⁹ Cunanca Jehová Dios Jobta ima shina ayudashcata ricushun. Jobtaca ratomi achca llaquicunaca japirca. Shuj punllallapimi paipaj animalcuna, paita sirvijcuna, paipaj huahuacunapish huañurcacuna (Job 1:13-19). Qꞌuipacarin paitaca shuj millai ungüimi japirca. Chai ungüimantami Jobpaj tucui cuerpoca chugri carca (Job 2:7). Jobca dimastij llaquilla cashcamantami: ‘Ñuca causaitaca pꞌiñanayanmi, ña huañuchun saquihuailla’ nirca (Job 7:16).

10. ¿Job llaquicunata ahuantachunca Jehová Diosca ima shinataj ayudarca? (Página 1-pi tiyaj dibujomanta parlapai).

¹⁰ Jehová Diosca Job ima tucushcataca allimi yacharca. Jobta cꞌuyashcamantami Diosca llaquicunata ahuantachun, paita sirvishpa catichun ayudarca. Shinallataj Jehová Diosca Jobhuan parlashpaca pai yachaj cashcata, tucuicunata cuidaj cashcatami yuyachirca. Achca animalitocunamantapishmi parlarca (Job 38:1, 2; 39:9, 13, 19, 27; 40:15; 41:1, 2). Jehová Diosca Jobta ayudachun, consejachunmi Elihutaca cacharca. Chai joven Elihuca Jobtaca Jehová Dios paita sirvijcunata bendiciaj cashcatami yuyachirca. Shinallataj Job ama paillapi yuyachun, Jehová Dios tucuita ruraj cashcata, jatun cashcata yuyarichunmi cꞌuyaihuan ayudarca (Job 37:14). Qꞌuipaca ama llaquicunallapi yuyachunmi Jehová Diosca Jobmanca paipaj quimsa amigocunamanta mañachun mingarca (Job 42:8-10). ¿Cunan punllacunapica Jehová Diosca ñucanchijtaca ima shinataj ayudan?

11. ¿Llaquicunata charijpica Bibliaca ima shinataj ñucanchijta ayudan?

¹¹ Ñucanchijcuna Bibliata liyijpica Jehová Dios ñucanchijhuan parlacushca shinami can. Bibliata liyinaca llaquicunahuan cashpapish ama desanimarichunmi ayudan (Romanos 15:4). Por ejemplo, Romanos 8:38, 39-pica: ‘Llaquicunaca Diospaj cꞌuyaimanta mana caruyachi tucunchu’ ninmi. Salmo 145:18-pica: ‘Mandaj Diosca tucui paita mañajcunapaj cꞌuchupimi can’ ninmi. Jehová Diospi confiashpaca ima llaquicunata charishpapish chaicunatami cushilla ahuantashun (1 Corintios 10:13; Santiago 1:2, 12). Shinallataj Bibliapica llaquicuna mana huiñaipaj cana cashcata, llaquicunatapish yalli achca bendicioncunata charigrishcatami yuyachin (2 Corintios 4:16-18). Ashtahuancarin Jehová Diosca Diablota, paita catijcunatapish tucuchinatami yachachin (Salmo 37:10). Chaimantami llaquicunata ahuantangapajca de memoria huaquin versocunata yachana canchij.

12. ¿Jehová Dios ñucanchijta ayudachunca imatataj rurana canchij?

 ¹² Jehová Diosca Bibliata estudiachun, estudiashcapipish yuyachunmi munan. Imata yachashcata pajtachishpaca ñucanchij fetami sinchiyachishun, Jehová Diospaj alli amigocunapishmi tucushun. Chashnami llaquicunata ahuantai tucushun, Diospaj espíritu santotapish chasquishun. Espíritu santota chasquishpacarin llaquicunata ahuantangapaj Dios cushca podertami charishun (2 Corintios 4:7-10).

13. ¿Alli cazuj, alli yuyaiyuj sirvij huauquicuna cushca ayudacunaca ñucanchijtaca ima shinataj animan?

¹³ Jehová Dios ayudajpica “alli cazuj, alli yuyaiyuj sirvij” huauquicunaca ñucanchij feta sinchiyachingapajmi achca publicacioncunata, videocunata, cantocunata rurashca (Mateo 24:45). Chaicunataca ñucanchij minishtishca tiempopimi cushca. Chaimantami caicunataca estudiana, ricuna canchij. Shuj panipaj ejemplopi yuyashun. Cai panica achca llaquicunatami charishca. Shuj runaca machashca manejacushcamantami paipaj abuelota huañuchirca. Cai panipaj yaya mamapish shuj millai ungüihuanmi huañurcacuna. Paipish ishqui cutinmi cáncer ungüita charirca. Chashna llaquicunata charishpapish cai panica paipaj feta sinchiyachingapajmi chꞌican chꞌican ayudacunata charirca. Paica: “40 huatacunatami Jehová Diosta sirvicushcani. Chai tucui tiempopica achca llaquicunatami charishcani. Pero Jehová Diosca ñucataca siempremi cuidashca. Alli cazuj, alli yuyaiyuj sirvij huauquicuna chꞌican chꞌican ayudacunata cushcamantami Jehovataca diosolopagui nini. Chashna ayudacunata cushcamantami llaquicunata ahuantai tucushcani. Job shinami ñucapish huañungacama Diosta sirvishpa catisha nini” ninmi (Job 27:5).

14. ¿Llaquicunata charijpica huauqui panicunaca ima shinataj ñucanchijta ayudan?

¹⁴ Jehová Diosca ñucanchijpura cꞌuyanacuchun, ayudanacuchunmi yachachishca (2 Corintios 1:3, 4; 1 Tesalonicenses 4:9-ta liyipai). Huauqui panicunaca Elihú shinami llaquicunata charijpica ñucanchijta ayudangapaj listos cancuna (Hechos 14:22). Diane shuti panipaj ejemplopi yuyashun. Cai panipaj cusaca ungushca cashcamantami anchayarca. Pero huauqui panicunaca paicunatami achcata ayudarcacuna. Cai panica: “Huaquin quillacunata chai llaquihuan chꞌimbapuranaca  sinchimi carca. Pero chai tiempopica Jehová Dios ñucanchijta cꞌuyashcatami sintircanchij. Turi ñañacunapish ñucanchijta visitashpa, cayashpami sinchiyachircacuna. Ñucanchijta visitashpaca ugllashpami cꞌuyaita ricuchijcuna carca. Ñuca manejanata mana yachashcamantami turi ñañacunaca tandanacuicunaman, predicacionman pushajcuna carca” ninmi. Huauqui panicuna ñucanchijta cꞌuyaihuan ayudaj cashcata yachashpaca dimastij contentosmi sintirinchij.

15. ¿Jehová Diosca llaquicunata ahuantachunca ima shinataj ayudan?

¹⁵ Tucuicunami llaquicunata charishun. Pero mana ñucanchijllachu canchij. Jehová Diosca ñucanchijta cꞌuyaj Yaya cashcamantami ñucanchij mañashcacunata uyangapaj, ñucanchijta ayudangapajca listo can (Isaías 43:2). Jehová Diosca tucui laya llaquicunata ahuantachunmi achca ayudacunata cushca. Paita mañachun saquijpi, Bibliahuan, publicacioncunahuan, videocunahuan ñucanchijman yachachijpi, huauqui panicunapish ñucanchijta ayudajpimi llaquicunataca ahuantashun.

16. ¿Jehová Dios ñucanchijta cuidachunca imatataj rurana canchij?

¹⁶ Jehová Dios ñucanchijmanta siempre preocuparishcamantami shungumanta agradecidos, cushilla sintirinchij (Salmo 33:21). Diosta agradicingapajca pai cushca ayudacunatami aprovechana canchij. Shinallataj Diosta cazungapaj, pai munashca shina rurangapajmi esforzarina canchij. Caicunata pajtachijpica Jehová Diosca ñucanchijta ayudangapajca listomi canga (1 Pedro 3:12).