YACHAI 36
Apana cashca cargacunallata apashunchij
‘Llashacuj cargatapish anchuchishunchij. Ñucanchij ñaupajpi churashca carrerapica ahuantashpa callpashunchij’ (HEBREOS 12:1).
CANTO 33 Campaj llaquicunataca Diosman mingai
CAITAMI YACHASHUN a
1. ¿Hebreos 12:1-pi nishca shinaca huiñai causaiman apaj carrerata tucuchingapajca imatataj rurana canchij?
BIBLIAPI nishca shinaca Diosta sirvijcunaca shuj carrerapimi callpacunchij. Cai carrerata tucuchishpaca huiñai huiñaita causanatami premiota shina chasquishun (2 Timoteo 4:7, 8). Cai carreraca ñallami tucurigrin. Chaimantami callpashpa catingapaj esforzarina canchij. Apóstol Pabloca carrerataca ñami tucuchirca. Ñucanchijpish cai carrerata tucuchingapajca pai nishcatami pajtachina canchij. Pabloca ‘tucui llashacuj cargatapish, anchuchishunchij. Ñucanchij ñaupajpi churashca carrerapica ahuantashpa catishunchij’ nircami (Hebreos 12:1-ta liyipai).
2. ¿Pabloca ‘tucui llashacuj cargatapish anchuchishunchij’ nishpaca imatataj nisha nirca?
2 Pabloca, ‘tucui llashacuj cargatapish, anchuchishunchij’ nishpaca ima cargatapish mana apana cashcataca mana nicurcachu. Ashtahuanpish mana minishtishca cargacunata saquina cashcatami nicurca. Cai shaicuchij cargacunaca utca callpashpa catichunca mana saquingachu. Chaimantami cai cargacunataca rato ladoman saquina canchij. Pero minishtishca cargacunataca apashpami catina canchij. Chaicunata mana apashpa catijpica Yayitu Diosca carrerapi callpashpa catichunca ña mana saquingachu (2 Timoteo 2:5). Mana minishtishca cargacuna imacunalla cashcatami cunanca yachashun.
3. a) ¿Gálatas 6:5-pi nishca shinaca imatataj cada uno apanataj canchij? b) ¿Cai yachaipica imatataj yachashun? ¿Imamantataj chaitaca yachashun?
3 Gálatas 6:5-ta liyipai. Apóstol Pablo nishca shinaca cada unomi imata rurana cashcataca pajtachinataj canchij. ¿Chaica imatataj nisha nin? Diospaj ñaupajpi alli ricuringapajca cada unomi apana cashca cargacunata apana canchij. Cai yachaipica cada uno ima cargacunallata apana cashcata, chai cargacunata apashpa catingapaj imallata rurana cashcatami yachashun. Shinallataj mana minishtishca cargacuna imacunalla cashcata, chaicunata ladoman saquingapaj imata rurana cashcatapishmi ricushun. Minishtishca cargacunallata apashpaca huiñai causaiman apaj carrerapimi callpashpa catishun. Ashtahuancarin metamanmi chayashun.
¿IMA CARGACUNALLATATAJ APANA CANCHIJ?
Cada unomi Jehová Diosman mingarishpa ari nishcata pajtachingapaj, ñucanchij familia cushilla causachun ayudangapaj, pandarishcamanta apacushca llaquicunata ahuantangapaj esforzarina canchij. (Párrafos 4 al 9-ta ricui).
4. ¿Jehová Diosman mingarinaca imamantataj mana shuj llashaj carga shina can? (Fotomantapish parlapai).
4 Jehová Diosman mingarina. Jehová Diosman mingarishpaca “canllatami sirvisha, can munashca shinami causasha” nishpami ari nircanchij. Chai ari nishcataca pajtachinatajmi canchij. Chaita pajtachinaca mana sinchichu can. ¿Imamanta? Jehová Diosllatajmi paipaj munaita rurachun ñucanchijtaca rurarca. Chaimantami pai munashca shina causanaca mana sinchi can (Apocalipsis 4:11). Shinallataj Jehová Diosca paimanta yachana munaita charichunmi ñucanchijtaca rurarca. Ñucanchijca Jehová Diosman rijchajtami rurashca canchij. Chaimantami paiman cꞌuchuyashpa, pai nishcacunata cazushpa cushilla causanata munanchij (Salmo 40:8). Ashtahuanpish Jehová Diosta tucuipi cazushpa, paipaj Churipaj ejemplota catishpaca tranquilo causaitami chari tucunchij (Mateo 11:28-30).
(Párrafos 4 y 5-ta ricui).
5. ¿Jehová Diosman mingarishpa ari nishcata pajtachingapajca imatataj rurana canchij? (1 Juan 5:3).
5 ¿Cai cargataca ima shinataj apai tucungui? Chaipajca Jehová Diosta ashtahuan cꞌuyangapajmi esforzarina cangui. Paica cantaca achcatami cꞌuyan. Shamuj punllacunapicarin sumaj bendicioncunatami cusha nin. Chaita yuyaipi charishpaca paitami ashtahuan cꞌuyangui. Y Jehová Diosta ashtahuan cꞌuyashpaca paita tucuipi cazunaca mana sinchichu canga (1 Juan 5:3-ta liyipai). Shinallataj Jesuspaj ejemplotami catina cangui. Paica siempremi Jehová Diospaj ayudata mañaj carca. Shinallataj Jehová Dios paiman cusha nishcacuna yuyaillami causarca. Chaimantami Diospaj munaita ruranaca paipajca mana sinchi carca (Hebreos 5:7; 12:2). Ñucanchijpish Jehovapaj ayudatami mashcana canchij. Shinallataj paraisopi causana yuyaillami causana canchij. Jehová Diosta ashtahuan cꞌuyangapaj esforzarishpa, paipaj Churipaj ejemplota catishpaca ñucanchij ari nishcata pajtachinaca mana sinchichu canga.
6. ¿Imamantataj ñucanchij familia cushilla causachun ayudana canchij? (Fotomantapish parlapai).
6 Familia ucupi cushilla causangapajmi ayudana canchij. Ñucanchijca ñucanchij familiata yallimi Jehová Diosta y Jesusta cꞌuyana canchij (Mateo 10:37). Pero chaica mana nisha ninchu ñucanchij familiata mana cuidana cashcata. Ashtahuanpish Jehová Diospaj, Jesuspaj ñaupajpi alli ricurisha nishpaca ñucanchij familiatami alli cuidana canchij (1 Timoteo 5:4, 8). Chaita rurashpaca cushi causaitami charishun. ¿Imamanta? Jehová Diosca familiacunataca cushilla causachunmi rurarca. Cusa huarmicuna paicunapura cꞌuyaita, respetota ricuchinacushpa, yaya mamacunapish huahuacunata cꞌuyaihuan yachachishpa, huahuacunapish yaya mamata tucuipi cazushpaca cushillami causangacuna (Efesios 5:33; 6:1, 4).
(Párrafos 6 y 7-ta ricui).
7. ¿Ñucanchij familia cushilla causachunca ima shinataj ayudai tucunchij?
7 ¿Cai cargataca ima shinataj apai tucunchij? Tal vez ñucanchij yuyashca shinami ñucanchij familiataca cuidanata munashun. Mana cashpaca ñucanchij culturapi yachachishca shina o yachaj gentecuna nishca shinami familiataca cuidanata munashun. Pero chaita ruranapaj randica familia ucupica tucuicunami Bibliapi nishcacunata pajtachina canchij (Proverbios 24:3, 4). Ñucanchij publicacioncunapica Bibliapi nishcacunata ima shina pajtachinatami yachachin. Por ejemplo, jw.org paginapi “Familiacunapaj ayudacuna” nishca parteta mashcai. Chaipica cusa huarmicuna, yaya mamacuna, huahuacunapish huaquin jarcaicunata ima shina chꞌimbapurai tucushcatami yachachin. b Familiapi ñucanchijlla Jehová Diosta sirvijcuna cashpapish Bibliapi nishcacunata pajtachingapajmi esforzarina canchij. Chaita rurajpica tucui familiami beneficiaringacuna. Jehová Diospish ñucanchijmanca achca bendicioncunatami cunga (1 Pedro 3:1, 2).
8. ¿Mana alli desicioncunata japishcamantaca ima shinataj causashun?
8 Mana alli desicioncunata japishcamantaca llaquicunatami charishun. Jehová Diosca cada uno desicioncunata japichunmi ñucanchijtaca rurashca. Paica alli desicioncunata japishpa cushilla causachunmi munan. Pero mana alli desicioncunata japishcamanta llaquicunata ama charichunca imata mana rurai tucunchu (Gálatas 6:7, 8). Chaimantami mana allicunata rurashpa, mana alli yuyashpa imatapish rurashpa o imatapish nishpaca llaquicunata charishun. Mana allicunata rurashpaca tal vez ñucanchij shungu ucupimi mana alli sintirishun. Chaimantami imapi pandarishcata huillanata munashun. Shinallataj mana alli ruraicunata ladoman saquishpa ama cutin pandaringapajmi esforzarishun. Chaita rurashpaca huiñai causaiman apaj carrerapimi callpashpa cati tucushun.
(Párrafos 8 y 9-ta ricui).
9. ¿Imapi pandarishca cashpaca imatataj rurana cangui? (Fotomantapish parlapai).
9 ¿Cai cargataca ima shinataj apai tucungui? Puntapica pandarishcatami aceptana cangui. Pero mana chaillapi yuyashpachu pasana canchij. Can pandarishcamanta shujtajcunatapish mana culpanachu cangui. Pretextocunatapish mana churanachu cangui. Ashtahuanpish cambaj culpamanta pandarishcatami reconocina cangui. Ima shina mejorai tucushcatapishmi yuyana cangui. Pandarishcamanta yallitaj llaquilla sintirishpaca “ñuca pandarishcacunata perdonahuai” nishpa Jehová Diosta mañai (Salmo 25:11; 51:3, 4). Shujtajcunata llaquichishca cashpaca perdonta mañai. Shinallataj ancianocunapaj ayudata mashcai (Santiago 5:14, 15). Ama cutin chaillapitaj pandaringapajpishmi esforzarina cangui. Chaita rurajpica Jehová Diosca canta llaquishpami ayudanga (Salmo 103:8-13).
¿IMA CARGACUNALLATATAJ ANCHUCHINA CANCHIJ?
10. ¿Shujtajcuna shina tucuita rurasha o charisha nishpaca ima shinataj causashun? (Gálatas 6:4).
10 Can mana rurai tucushcataca mana ruranachu cangui. Por ejemplo, shujtajcunahuanca mana compararinachu cangui (Gálatas 6:4-ta liyipai). Shujtajcunahuan compararishpaca caishuj chaishujmi mishanacui, envidianacui callarishun (Gálatas 5:26). Tal vez shujtajcuna shina tucuita rurangapaj o tucuita charingapajmi yallitaj esforzari callarishun. Pero mashnata esforzarishpapish manachari paicuna shina tucuita rurai tucushun. Ashtahuanpish ñucanchij shuyacushca ‘mana utca pajtajpica shungu pꞌaquirishpami llaquirishun’ (Proverbios 13:12). Shinallataj shujtajcuna shina mana tucuita chari tucushcata cuentata cushpaca huiñai causaiman apaj carrerapica ña mana utca callpanata munashunchu (Proverbios 24:10).
11. ¿Shujtajcunahuan compararinapaj randica imatataj rurana cangui?
11 ¿Cai cargataca ima shinataj anchuchi tucungui? Jehová Diosca can rurai pudishcallata rurachunmi mañan. Chaimanta shujtajcuna shina tucuita rurangapajllaca mana yallitaj esforzarinachu cangui (2 Corintios 8:12). Shinallataj Jehová Diosca cantaca shujtajcunahuanca mana comparanchu (Mateo 25:20-23). Canca tucui shunguhuan Jehová Diosta sirvingapaj, llaquicunata ahuantangapajmi esforzaricungui. Chaimantami can rurai pudishcallata ruracujta ricushpaca Jehová Diosca cushilla sintirin. Tal vez cambaj edadmanta, saludmanta o shujtaj llaquicunata charishcamantami ñaupa shinaca ña mana rurai tucungui. Por ejemplo, cambaj saludmanta huaquin asignacioncunata mana chasqui tucushpaca mana pingashpami “chaitaca mana rurai valishachu” ninalla cangui. Chashnami Barzilai runa shina humilde cashcata ricuchingui (2 Samuel 19:35, 36). Shinallataj alli cajpica can pajtachicushca asignacioncunatami Moisés shina shujtajcunaman mingana cangui (Éxodo 18:21, 22). Humilde cashpaca can rurai pudishcallatami rurangui. Chashnami mana shaicushpa huiñai causaiman apaj carrerapi callpashpa catingui.
12. ¿Shujtajcuna mana alli desicioncunata japijpica ñucanchij culpa cashcatachu yuyana canchij?
12 Shujtajcuna mana alli desicioncunata japishcamantaca mana culpablechu sintirina cangui. Shujtajcunamantaca mana decidi tucunchijchu. Shinallataj mana alli decidishcamanta llaquicunata ama charichunca imata mana rurai tucunchijchu. Huahuacuna Jehová Diosta saquijpica yaya mamacunaca achcatami llaquirincuna. Shinapish yaya mamacunaca paicunapaj culpamanta Jehová Diosta saquishcataca mana yuyanachu can. Chashna yuyanaca llashaj cargata apacushca shinami can. Jehová Diosca yaya mamacuna chai cargata apachunca mana munanchu (Romanos 14:12).
13. ¿Huahuacuna mana alli desicioncunata japijpica yaya mamacunaca imatataj rurana can?
13 ¿Cai cargataca ima shinataj anchuchi tucungui? Jehová Dios cada uno paita sirvinata o mana sirvinata decidichun saquishcatami yuyarina cangui. Diosca yaya mamacuna juchayujcuna cashcataca allimi yachan. Paica yaya mamacuna huahuacunata alli huiñachichunmi munan. Pero huahuacuna Jehová Diosta saquijpica mana cambaj culpachu can. Paicunapaj culpallatajmi can (Proverbios 20:11). Caita yachashpapish maijan yaya mamacunaca paicunapaj culpa cashcatami yuyashpa catingacuna. Chashna sintirishpaca Jehová Diosman ima shina sintirishcata huillai, canta perdonachunpish mañai. Paica can imapi pandarishcata ña mana allichi tucushcataca allimi yachan. Pero Diosca cambaj huahuacuna pandarishcamanta paicuna apacushca llaquicunata can allichichunca mana shuyanchu. Ashtahuanpish paicuna shungumanta arrepintirijpica Yaya Diosca cushillami paipaj pueblopi cutin chasquinga (Lucas 15:18-20).
14. ¿Imapi pandarishca cashcamanta ña arrepintirishca cashpaca imamantataj mana llaquilla sintirishpa catina canchij?
14 Pandarishcamanta yallitaj llaquilla sintirina. Juchapi urmashpaca achcatami llaquirinchij. Pero Jehová Diosca yallitaj llaquilla sintirishpa catichunca mana munanchu. ¿Yallitaj llaquiricushcataca ima shinataj yachai tucunchij? Ñucanchij juchacunamanta arrepintirishpa ñachari ancianocunaman huillarcanchij. Ama cutin pandaringapajpish ñachari esforzaricunchij. Chaita rurashca cashpaca Jehová Dios ñucanchijta perdonashcatami seguros cana canchij (Hechos 3:19). Jehová Diosca llaquilla sintirishpa catichunca mana munanchu. Chashna sintirishpaca tranquilo causaitaca mana chari tucushunchu (Salmo 31:10). Shinallataj huiñai causaiman apaj carrerapica ña mana callpanata munashunchu (2 Corintios 2:7).
Can shungumanta arrepintirijpica Jehová Diosca can pandarishcataca cutinca manataj yuyaringachu. ¿Canpish chaita rurai tucunguichu? (Párrafo 15-ta ricui).
15. ¿Pandarishcamanta ama yallitaj llaquilla sintiringapajca imatataj rurana canchij? (1 Juan 3:19, 20). (Fotomantapish parlapai).
15 ¿Cai cargataca ima shinataj anchuchi tucungui? Pandarishcamanta yallitaj llaquilla sintirishpaca Jehová Dios shungumanta perdonaj cashcata cringapajmi esforzarina cangui (Salmo 130:4). Jehová Diosca can shungumanta arrepintirijpica “mana allita rurashcataca, manataj cutinca yuyarishachu” ninmi (Jeremías 31:34). Shinaca Jehová Diosca can pandarishcataca ña mana yuyachicungallachu. Tal vez imapi pandarishcamantami llaquicunata charingui. Pero chaica mana nisha ninchu Jehová Dios canta mana perdonashcata. Shinallataj juchapi urmashcamanta congregacionpi ña mana ayudai tucushpaca mana yallitaj llaquirinachu canchij. Jehová Diosca can pandarishcataca ña mana yuyarinchu. ¿Canpish chaita rurai tucunguichu? (1 Juan 3:19, 20-ta liyipai).
METAMAN CHAYANGACAMA CALLPASHPA CATISHUNCHIJ
16. ¿Maiman chayangacamataj callpashpa catina canchij?
16 Huiñai causaiman apaj ñanpica premiota chasquingacamami callpashpa catina canchij (1 Corintios 9:24). Pero minishtishca cargacunallata apashpami callpana canchij. Cutin, mana minishtishca cargacunataca anchuchinami canchij. Cai yachaipica huaquin cargacunallamantami yachashcanchij. Pero shujtaj cargacunapishmi tiyan. Por ejemplo, Jesusca “cancunapaj shungupica achcata micuna yuyailla, achcata ubyana yuyailla ama canguichijchu. Cancunapaj causaimantapish ama sustarishpalla causanguichijchu” nircami (Lucas 21:34). Shinashpaca huiñai causaiman apaj ñanpi callpashpa catingapajca Bibliapi nishcacunapimi yuyana canchij.
17. ¿Metaman chayai tucushcataca imamantataj seguros canchij?
17 Jehová Diosca metaman chayachunmi fuerzasta cusha ayudasha nin. Chaimantami huiñaita causana premiota chasquinataca seguros cana canchij (Isaías 40:29-31). Shinaca apóstol Pablo shina premiota chasquingacama callpashpa catishunchij (Filipenses 3:13, 14). Cada unomi metaman chayangacama callpashpa catingapaj esforzarina canchij. Pero Jehová Diosmi ñucanchijta ayudasha nin. Paica minishtishca cargacunallata apachun, mana minishtishca cargacunata anchuchichunmi ayudanga (Salmo 68:19). Jehová Dios ayudajllapimi carrerata tucuchishpa premiota japishun.
CANTO 65 Sinchiyashpa ñaupajman catishunchij
a Cai yachaica huiñai causaiman apaj carrerapi callpashpa catichunmi ayudanga. Cai carrerapi callpacushpaca huaquin cargacunatami apana canchij. Por ejemplo, Jehová Diosman mingarina, familiata cuidana, imapi pandarishcamanta apacushca llaquicunami cargacuna shina can. Pero utca callpashpa catingapajca mana minishtishca cargacunatami saquina canchij. Cai yachaipimi caicunamanta ashtahuan yachashun.
b JW.ORG paginapi tiyaj “Familiacunapaj ayudacuna” nishca partepica familiacunapaj temacunatami yachai tucungui. Españolpi tiyaj “Ayuda para las familias” nishcapica familiacunaca cai temacunatami yachai tucuncuna: “Cómo mostrar respeto”, “Cómo mostrar agradecimiento”. Yaya mamacunapajca cai temacunami tiyan: “¿Cómo puedo enseñarle a usar el celular de forma responsable?”, “Cómo comunicarse con un hijo adolescente”. Y jovencunaca “Cómo resistir la presión de tus compañeros” y “Qué hacer si te sientes solo” nishca temacunatami yachai tucuncuna.
