1. ¿Babiloniocunaca Danielta rijsishpaca imamantataj sorprendidos saquirircacuna?

 DANIEL joven cajpica babiloniocunaca prezu shinami caru llajtaman aparcacuna. Danielca shuj rijsishca familiamantami shamurca. Shinallataj paica ima mana ungushca, alli ñahuiyujmi carca. Chaita ricushpaca babiloniocunaca sorprendidosmi saquirircacuna (1 Samuel 16:7). Chaimantami paitaca Nabucodonosorpaj mandana huasipi sirvichun agllarcacuna (Daniel 1:3, 4, 6).

2. ¿Jehová Diosca Danielmantaca imatataj yuyarca? (Ezequiel 14:14).

² ¿Jehová Diosca Danieltaca alaja cashcamanta o rijsishca cashcamantachu cꞌuyarca? Mana. Ashtahuanpish paita tucui shunguhuan sirvishcamantami cꞌuyarca. Chaimantami Noepish, Jobpish paita tucui shunguhuan sirvishcata parlashpaca Danielmantapish parlarca. Chai punllacunapi Danielca 20 o menos huatacunallatami charishcanga (Génesis 5:32; 6:9, 10; Job 42:16, 17; Ezequiel 14:14-ta liyipai). Danielca huañungacamami Jehová Diosta sirvirca. Chaimantami Jehová Diosca paita cꞌuyanataca manataj saquirca (Daniel 10:11, 19).

3. ¿Cai yachaipica imatataj yachashun?

³ Cai yachaipica Daniel ishqui alli cualidadcunata charishcatami yachashun. Paica chai cualidadcunata charishcamantami Diospaj ñaupajpica alli ricurirca. Callaringapajca chai ishqui cualidadcuna ima cashcata, shinallataj Daniel chaicunata ima shina ricuchishcatami yachashun. Chai qꞌuipaca chai ishqui cualidadcunata charingapaj Daniel imata rurashcatami ricushun. Y tucuchingapajca ñucanchijpish pai shina cangapaj imata rurana cashcatami yachashun. Cai yachaica jovencunapajmi  can. Pero tucuicunami Danielmantaca achcata yachai tucunchij.

4. ¿Danielca mana manchaj cashcataca ima shinataj ricuchirca?

⁴ Diosta alli sirvijcuna cashpapish huaquinpica manchaitami charishun. Chashnapish allita rurangapajmi esforzarina canchij. Por ejemplo, Danielca mana manchaj jovenmi carca. Babiloniocuna Jerusalenta tucuchishca más o menos ishqui huatacuna pasashca qꞌuipami Nabucodonosorca shuj muscuipica shuj jatun estatuata ricurca. Chaimi Danielta, Babiloniapi tiyaj tucui yachaj runacunataca pai imata muscushcata, chai muscui ima nisha nishcata nichun mandarca. Chaita mana rurajpica Nabucodonosorca tucuicunatami huañuchigrirca (Daniel 2:3-5). Chaita uyashpaca Danielca reytaca chai muscui imata nisha nishcata huillangapajca asha punllacunata shuyachunmi mañarca (Daniel 2:16). Bibliapica chai tiempopi muscuicuna ima nisha nishcata Daniel huillaj cashcataca mana ninchu. Pero Danielca Jehová Diospimi sinchi feta charirca. Chaimi Sadrac, Mesac, Abednegotaca b, ‘Jahua pachapi caj Dios cancunata llaquishpa chai muscui ima cashcata ricuchichun mañaichij’ nirca (Daniel 2:18). Paicuna chashna mañashcamantami Danielca Nabucodonosorpaj muscui ima nisha nishcata huillai tucurca. Chashnami Danielpish, paipaj quimsa amigocunapish huañuimanta quishpirircacuna.

5. ¿Nabucodonosor shujtaj muscuita charijpica Danielca imatataj rurarca?

⁵ Nabucodonosorpaj muscui ima nisha nishcata Daniel huillashca qꞌuipaca Nabucodonosorca cutinmi shujtaj muscuita charirca. Chaipica shuj jatun yuratami ricurca. ¿Chai muscuica imatataj nisha nirca? Danielca mana manchashpami Nabucodonosormanca ‘canca loco tucushpami asha tiempota mandanata saquigringui’ nishpa huillarca (Daniel 4:25). Chaita uyashpaca Nabucodonosorca Daniel paipaj contra tucucushcata yuyashpami paita huañuchichun mandai tucurca. Pero Danielca mana manchashpami chai muscui ima nisha nishcata tucuita huillarca.

6. ¿Danielca imamantataj mana manchaj carca?

 ⁶ ¿Danielca imamantataj mana manchaj carca? Paipaj yaya mamami mana manchaj canata yachachircacuna. Paicunaca Diospaj mandashcacunata cazujcuna cashcamantami chaicunataca Danielmanpish yachachircacuna (Deuteronomio 6:6-9). Pero Danielca israelitacunaman Jehová Dios cushca Diez Mandamientoscunallataca mana yacharcachu. Paica israelitacuna imacunallata micuna cashcata, imacunallata mana micunata cashcataca allimi yacharca (Levítico 11:4-8; Daniel 1:8, 11-13). c Shinallataj Danielca israelitacuna Jehová Diosta mana cazushcamanta llaqui tucushcatami yacharca (Daniel 9:10, 11). Ashtahuancarin Danielca paipaj tucui causaipimi Jehová Diospish, angelcunapish paita ima shina ayudashcata ricurca (Daniel 2:19-24; 10:12, 18, 19).

7. ¿Danielca mana manchaj cangapajca ima ashtahuantaj rurarca? (Fotomantapish parlapai).

⁷ Danielca profeta Jeremías, shujtaj profetacuna quillcashcacunatami estudiaj carca. Chai quillcashcacunata estudiashcamantami paica judiocuna Babiloniamanta llujshishpa Jerusalenman tigrangapaj ashalla tiempo faltashcata cuentata curca (Daniel 9:2). Danielca profetacuna quillcashcacuna pajtaricushcata ricushpaca Jehová Diospimi ashtahuan confiai callarirca. Chaimantami paica mana manchaita charirca (Romanos 8:31, 32, 37-39-ta ricui). Ashtahuantajca Danielca cutin cutinmi Yaya Diosta mañaj carca (Daniel 6:10). Paica imapi pandarishcata, ima shina sintirishcata, imapi ayudachun minishtishcatami Jehová Diosman huillaj carca (Daniel 9:4, 5, 19). Caicunata rurashcamantami Danielca juchayuj cashpapish mana manchaj canata yacharca.

8. ¿Mana manchaj cangapajca imatataj rurana cangui?

⁸ Tal vez cambaj yaya mamaca imata mana manchashpami Jehová Diosta sirvincuna. Pero canpish mana manchaj cangapajmi sinchita esforzarina cangui. Cai ejemplopi yuyai. Imata yachasha nishpaca ñucanchijman yachachijtami atencionhuan ricuna, uyana canchij. Paipaj ejemplotapishmi catina canchij ¿nachu? Chashna layallatajmi mana manchaj cangapajca mana manchajcunapaj ejemplomanta yachana canchij. Paicunapaj ejemplota catingapajpishmi esforzarina canchij. Por ejemplo, ¿Danielmantaca imatataj yachashcangui? Pai shinami Bibliata alli estudiana cangui. Shinallataj Jehová Diospaj alli amigo tucungapajca shungumantami paita mañana cangui. Paipi confiajpi tucuipi ayudanatapishmi seguro cana cangui. Chaita rurashpami jarcaicuna ricurijpica ahuantai tucungui.

9. ¿Mana manchajcuna cajpica shujtajcunaca imatataj yuyangacuna?

⁹ ¿Imamantataj mana manchaj cana cangui? Alemaniapi causaj Ben jovenmanta yachashun. Paipaj compañerocunaca tucui imalla tiyashcacuna ima shina tiyai callarishcata Bibliapi nishcacuna yanga parlolla cashcatami yuyajcuna carca. Ashtahuanpish paicunaca evolucionpimi crijcuna carca. Pero shuj cutinca Jehová Dios tucuita rurashcata imamanta crishcatami tucui paipaj compañerocunaman, paipaj profesorman yachachina oportunidadta charirca. Benpaj profesorca paitaca atencionhuanmi uyarca. Shinallataj Ben imalla investigashcacunatami tucui  paipaj compañerocunaman curca. Shinallataj Benpaj achca compañerocunaca atencionhuanmi paitaca uyarcacuna. Qꞌuipacarin felicitarcacunami. Cai experienciapi ricushca shinaca mana manchajcuna cajpica gentecunaca ñucanchijtami respetangacuna. Shinallataj Bibliamantami yachanata munangacuna. Chaimanta jovencuna mana manchajcuna cangapaj esforzarishpa catichij.

10. a) ¿Bibliapica Jehová Diosmantaca imatataj yachachin? b) ¿Jehová Diospaj ejemplotaca ima shinataj cati tucunchij?

¹⁰ Bibliapica Jehová Diosca paita sirvijcunata cꞌuyashcamanta paicunamanta mana caruyaj cashcatami nin. Shinallataj Diosta sirvijcunapish paicunapura cꞌuyanacushpa tandalla cana cashcatami nin (2 Samuel 9:6, 7). Yaya Diosca paita cꞌuyashcamanta paimanta mana caruyachunmi munan. Chaimantami Jehová Diosta ashtahuan cꞌuyangapaj esforzarina canchij. ¿Danielca Jehová Diosta tucui shunguhuan cꞌuyashcataca ima shinataj ricuchirca?

11. ¿Danielca mayorlla cashpaca ima jarcaihuantaj chꞌimbapurarca? (Página 1-pi tiyaj dibujota ricui).

¹¹ Danielca tucui vidami Jehová Diosta cꞌuyashcata ricuchirca. Pero 90 huatacunata charishpaca shuj jatun jarcaihuanmi chꞌimbapurarca. Chai punllacunapica medocuna, persacunami Babiloniata mandacurcacuna. Paicunaca Dariotami rey cachun churarcacuna. Dariota huaquin sirvijcunaca Danieltaca mana ricunachijcunachu carca. Jehová Diostapish mana respetajcunachu carca. Chaimantami Danielta huañuchisha nircacuna. Chai millai runacunaca Darío shuj mushuj leyta aprobachunmi rurarcacuna. Reyta respetashcata ricuchingapajca chai leypi nishca shinaca Danielca 30 punllacunatami Jehová Diostaca mana mañana carca. Shujtaj gentecunaca ama huañungapajllami chai leytaca cazurcacuna. Pero Danielca paicuna shinaca mana carcachu. Paica imata mana manchashpami chai leyta mana cazunata decidirca. Chaimantami paitaca leoncuna tiyan jutcupi shitarcacuna. Pero Jehová Diosca chaipi huañuchunca mana saquircachu (Daniel 6:12-15, 20-22). ¿Danielmantaca imatataj yachanchij?

12. ¿Danielca Jehová Diosta tucuipi cazungapajca imatataj rurarca?

 ¹² Jehová Diosta tucuipi cazungapajca paitami shungumanta cꞌuyana canchij. Danielca chaitami rurarca. Paica Jehová Diosta ashtahuan cꞌuyangapajca paipaj cualidadcunapi, chaicunata ima shina ricuchij cashcapimi yuyaj carca (Daniel 9:4). Ashtahuanpish Danielca Jehová Dios paipaj pueblota, paitapish ima shina ayudashcapimi yuyaj carca (Daniel 2:20-23; 9:15, 16).

13. a) ¿Jovencunaca ima jarcaicunahuantaj chꞌimbapurancuna? (Shuj ejemplomanta parlai). (Fotomantapish parlapai). b) ¿Videopi ricushca shinaca, “¿testigo de Jehovacunaca cꞌaripura o huarmipura huainayajcunata apoyancunachu?” nijpica imatataj rurana cangui?

¹³ Daniel shinami cunan punllacunapica jovencunaca Diosta mana cazusha nij gentecunapurapi causancuna. Huaquin gentecunaca Diosta sirvijcunataca mana ricunachinchu. Shujtajcunacarin jovencunatami Jehová Diosmanta caruyachisha nin. Australiapi causaj Graeme shuti jovenhuan ima tucushcata ricushun. Paica jovenraj cashpaca shuj jatun jarcaihuanmi chꞌimbapurarca. Paipaj profesoraca tucuicunatami ‘¿shuj amigo cꞌaricunatami munani nijpica imatataj ruranguichijman?’ nishpa tapurca. Chai qꞌuipaca profesoraca de acuerdo cajcunaca shuj ladoman shayarichun, mana de acuerdo cajcunaca shujtaj ladoman shayarichunmi nirca. Graeme y shujtaj Testigollami mana de acuerdo carcacuna. Graemeca: “Clase tucuringacamami ñucanchij compañerocunapish, profesorapish rimarcacuna, burlarircacuna. Cꞌaripura, huarmipura huainayajcunata imamanta mana apoyashcata pacienciahuan explicasha nijpipish paicunaca mana uyasha nircacunachu. Chai jarcaita chꞌimbapuranaca sinchimi carca. Pero Jehová Diosta cazushcamanta, ñuca crishcacunata difindishcamantami cushilla sintirircani” nircami. d

14. ¿Jehová Diosta tucuipi cazungapajca imatataj rurana cangui?

¹⁴ Daniel shina Jehová Diosta tucuipi cazungapajca paitami shungumanta cꞌuyana cangui, pai ima shina cashcatapishmi yachana cangui. Chaipajca tucui pai imalla rurashcacunapimi yuyana cangui (Romanos 1:20). Shinallataj Jehová Diosta ashtahuan cꞌuyangapaj, respetangapajca jw.org paginapi “¿Pitaj rurarca?” nishca partepi tiyaj yachaicunata estudiai. ¿Es la vida obra de un Creador? y El origen de la vida. Cinco cuestiones dignas de análisis nishca folletocunatapish estudiai. Dinamarca llajtapi causaj Esther shuti solteraca chai publicacioncunatami estudiarca. Paica: “Chai folletocunapica cada uno Jehová Diospi imamanta crina cashcata intindichunca alajatami yachachin” nircami. Shinallataj párrafo 9-pi parlashca Benca: “Chai folletocunata estudiashpami ñuca crishcacunata sinchiyachircani. Jehová Dios tucuita rurashcatapishmi seguro carcani” nircami. Canpish chai publicacioncunata estudiashpaca Apocalipsis 4:11-ta quillcaj runa shinami sintiringui. Paica: “Ñucanchij Jehová Dioslla. Canca Tucui poderta charijmi cangui. Canmi jatunyachishca canatapish, alli nishca canatapish chasquina cangui. Canmi tucui imatapish rurashcangui” nircami. e

15. ¿Jehová Diospajman ashtahuan cꞌuchuyangapajca imatataj rurana cangui?

¹⁵ Jehová Diosta ashtahuan cꞌuyangapajca paipaj Churi Jesusmantami yachana cangui. Alemaniapi causaj pani Samirami chaitaca rurarca.  Uchillaraj cashpaca paipajca Jehová Dios cꞌuyaj, llaquij cashcata intindinaca sinchimi carca. Pero Jesús cꞌuyaj, llaquij cashcataca paica segurami carca. Samiraca: “Jesusca huahuacunataca achcatami cꞌuyaj carca. Shinallataj tucui gentecunami paihuan apanacunata munarca” nircami. Samiraca Bibliata estudiashpami Jesús paipaj Yaya laya cꞌuyaj, llaquij cashcata intindirca. Shinallataj Jehová Dios gentecuna paita ashtahuan rijsichun Jesusta cai Allpaman cachashcatami cuentata curca (Juan 14:9). Joven, ¿canpish Jehová Diospaj alli amigo tucusha ninguichu? Chaipajca Jesusmantami yachana cangui. Chaita rurashpaca Jehová Diostami shungumanta cꞌuyangui, paimantapish manataj caruyasha ninguichu.

16. ¿Jehová Diostaca imamantataj cꞌuyana cangui? (Jeremías 31:3).

¹⁶ Cꞌuyaita ricuchijpica shujtajcunapishmi cꞌuyangacuna (Rut 1:14-17). Jehová Diospish ‘cancuna ñucamanta mana caruyajpica ñucapish cancunamantaca manataj caruyashachu’ ninmi. ¿Chaita yachashpaca manachu cushilla sintirinchij? (Jeremías 31:3-ta liyipai). Ñucanchijca ñutu allpallami canchij. Chashnapish Jehová Diosca ñucanchij amigomi casha nin. Chaica shuj sumaj bendicionmi can ¿nachu? Yayitu Diosmantaca ima jarcaipish, gentecunapish, huañuipish manataj caruyachi tucungachu (Daniel 12:13; Lucas 20:37, 38; Romanos 8:38, 39). Chaimanta Daniel shina Jehová Diosmanta ama caruyangapaj esforzarishunchij.

17, 18. ¿Danielmantaca ima ashtahuantaj yachai tucunchij?

¹⁷ Cai yachaipica Danielmantaca ashitullatami yachashcanchij. Pero paimantaca ashtahuanmi yachai tucunchij. Por ejemplo, Jehová Diosca muscuipi shinami shamuj punllacunapi imalla tucuna cashcata Danielman ricuchirca. Shinallataj Danielca Diospaj ayudahuanmi profeciacuna ima shina pajtarinata huillai tucurca. Daniel huillashca achca profeciacunaca ñami pajtarishca. Shujtajcunaca shamuj punllacunapimi pajtaringa. Chai profeciacunaca shamuj punllacunapi gentecunahuan ima tucunatami huillan.

¹⁸ Catij yachaipica Daniel huillashca ishqui profeciacunamantami yachashun. Chai profeciacunata alli intindishpaca jovencunapish, mayorcunapish alli decisioncunata japingapajmi animarishun. Shinallataj chai profeciacunata intindishpaca imata mana manchashpami Jehová Diosta sirvishpa catishun. Chashnami ima llaquicuna ricurijpipish chaicunata ahuantangapaj allichirishca cashun.