1. ¿Profeciacunata yachana munaita charingapajca imatataj intindina canchij?

 BEN SHUTI jovenca: “Profeciacunata estudianataca achcatami munani” nircami. ¿Canpish chashnallatajchu yuyangui? ¿O profeciacunata estudiana aburrido, sinchi cashcatachu yuyangui? Ama chashna yuyangapajca Jehová Dios imamanta profeciacunata cushcatami intindina cangui.

2. ¿Cai yachaipica imatataj yachashun?

² Cai yachaipica Bibliapi tiyaj profeciacunata imamanta, ima shina estudiana cashcatami yachashun. Chai huashaca Daniel libropi tiyaj ishqui profeciacunatami yachashun. Chai profeciacunata imamanta intindina cashcatapishmi ricushun.

3. ¿Profeciacunata alli intindingapajca imatataj rurana canchij?

³ Profeciacunata alli intindingapajca pi ñucanchijta ayudachunmi mañana canchij. Cai ejemplopi yuyashun. Canchari can mana rijsishca llajtaman ringui. Pero mana canllachu ringui. Chai llajtata alli rijsij amigohuanmi ringui. Paica maipi cashcata, maita rinataca allimi yachan. ¿Paihuan rishcamantaca manachu tranquilo sintiringui? Jehová Diosca chai amigo shinami can. Paica ima punllacunapi causacushcata, shamuj punllacunapi ima tucunataca allimi yachan. Chaimantami Bibliapi tiyaj profeciacunata alli intindingapajca mana jatun tucushpa Jehová Diospaj ayudata mashcana canchij (Daniel 2:28; 2 Pedro 1:19, 20).

4. ¿Jehová Diosca Bibliapica imamantataj profeciacunata quillcachirca? (Jeremías 29:11). (Fotomantapish parlapai).

⁴ Yayitu Diosca shuj alli Yayami can. Chaimantami paipaj huahuacuna shamuj punllacunapi cushilla causachun munan (Jeremías 29:11-ta liyipai). Gentecunaca shamuj punllacunapi ima tucunataca mana yachai tucunchijchu. Pero Jehová Diosca chaitaca allimi yachan. Paica paipaj sirvijcunapish shamuj punllacunapi  imalla tucuna cashcata yachachunmi munan. Chaimantami Bibliapi profeciacunata quillcachirca (Isaías 46:10). Profeciacunaca cꞌuyaj Yaya Dios cushca regalomi can. Pero ¿profeciacuna pajtarinataj cashcata seguros cangapajca imatataj rurana canchij?

5. ¿Jovencunaca Maxpaj ejemplomantaca imatataj yachai tucuncuna?

⁵ Escuelapi, colegiopi caj jovencitocunaca chꞌican chꞌican jarcaicunatami chꞌimbapurana can. Tal vez paicunapaj compañerocuna, profesorcunaca Bibliapi nishcacuna mana cierto cashcatami yuyangacuna. Chaita uyashpaca huaquin jovencitocunaca “¿Bibliapi nishcacunaca ciertochushi canga?” nishpami dudai callaringacuna. Por ejemplo, Maxca: “Jovenraj cashpaca ñuca yaya mama yachachicushca ¿religionca allichu canga?, ¿Bibliapish Yaya Diosmantachu shamun?” nishpami dudai callarirca. ¿Maxpaj yaya mama paita ayudangapajca imatataj rurarcacuna? Maxca: “Ñuca yaya mamaca ñucamanta sustarishca cashpapish ñucahuanca mana pꞌiñarircacunachu. Ashtahuanpish Bibliata utilizashpami ñuca tapuicunata cutichircacuna” nircami. Maxpish Jehová Diospi tucui shunguhuan cringapajca Bibliapi tiyaj profeciacunatami estudiai callarirca. Shinallataj paipaj congregacionpi caj shujtaj jovencunahuanmi chai profeciacunamanta parlanacui callarirca. Chaicunata rurashcamantami Maxca Bibliapi nishcacunata Jehová Dios quillcachishcata seguro carca.

6. a) ¿Bibliapi nishcacuna cierto cashcata mana seguros cashpaca imatataj rurana canchij? b) ¿Bibliapi nishcacuna cierto cashcataca imamantataj asegurana canchij?

⁶ ¿Canpish Bibliapi nishcacuna cierto cashcata dudai callarishpaca imatataj rurana cangui? Mana yallitaj llaquirinachu cangui. Pero maqui cruzashcapish mana saquirinachu cangui. ¿Imamanta? Caipi yuyashun. ¿Shuj fierro oxidari callarijpica imatataj ruranchij? Ratomi limpianchij ¿nachu? Chaita mana rurajpica fierroca asha ashami ismushpa tucuringa. ¿Caimantaca imatataj yachanchij? Shamuj punllacunapi ima tucunamanta Bibliapi nishcacuna cierto cashcata mana seguros cashpaca ñucanchij feta sinchiyachingapajmi esforzarina canchij. Bibliapi tiyaj profeciacunatapishmi alli estudiana canchij. Chaita rurajpica ñucanchij feca oxidarishca fierro shinaca mana tucuringachu. Pero ¿profeciacunataca ima shinataj estudiana canchij?

7. ¿Danielca profeciacunataca imamantataj intindi tucurca? (Daniel 12:10). (Fotomantapish parlapai).

⁷ Profeciacunata alli intindingapajca Danielpaj ejemplotami catina canchij. Paica verdadta yachasha nishcamantami estudiaj carca. Shinallataj paica humildemi carca. Chaimantami paica Jehová Dios paita cazujcunallaman Bibliapi nishcacunata intindichij cashcata reconocirca (Daniel 2:27, 28; Daniel 12:10-ta liyipai). Danielca siempremi Jehová Diospaj ayudata mashcaj carca. Chashnami humilde cashcata ricuchirca (Daniel 2:18). Ashtahuanpish Danielca Diospaj Shimitaca allimi estudiaj carca. Pai causashca punllacunapica Bibliapi tiyaj huaquin librocunallami tiyarca. Pero Danielca chai librocunatami alli estudiaj  carca (Jeremías 25:11, 12; Daniel 9:2). ¿Danielmantaca imatataj yachanchij?

8. a) ¿Huaquin gentecunaca profeciacunataca imamantataj estudiancuna? b) ¿Ñucanchijcunaca profeciacunataca imamantataj estudiana canchij?

⁸ Alli munaihuan estudiai. ¿Canca Bibliapi tiyaj profeciacunataca imamantataj estudiangui? ¿Jehová Diosmanta yachasha nishcamantachu estudiangui? Chashna cajpica Jehová Diosllatajmi alli intindichun ayudanga (Juan 4:23, 24; 14:16, 17). Shinapish maijan gentecunaca Bibliapi nishcacuna Jehová Diosmanta mana shamushcata ricuchingapajllami profeciacunataca estudiancuna. Paicunaca paicunallataj ima alli cashcata, ima mana alli cashcatami agllasha nincuna. Ashtahuanpish paicuna munashca shinami imatapish rurasha nincuna. Pero ñucanchijcunaca paicuna shinaca mana canachu canchij. ¿Profeciacunata alli intindingapajca ima ashtahuantaj rurana canchij?

9. a) ¿Profeciacunata alli intindingapajca ima shinataj cana canchij? b) ¿Imamantataj humildes cana canchij?

⁹ Humildecuna cashunchij. Jehová Diosca humildecunatami ayudasha nin (Santiago 4:6). Chaimantami profeciacunata intindisha nishpaca ñucanchijta ayudachun mañana canchij. Shinallataj Jehová Diosca tucuipimi ordenado can (1 Corintios 14:33; Efesios 4:4-6). Chaimantami alli cazuj, alli yuyaiyuj sirvijllata Bibliapi nishcacunata intindichichun utilizan (Lucas 12:42). Humildecuna cashpaca cai huauquicunapaj yachachishcacunataca cushicushpami chasquishun.

10. ¿Pani Esthermantaca imatataj yachanchij?

¹⁰ Diospaj Shimita alli estudiashunchij. Tal vez ñucanchij munashca profeciatami yachashpa callari tucunchij. Esther shuti panimi chaitaca rurarca. Paica 15 huatacunata charishpaca Jesús shamuna cashcata huillaj profeciacunatami estudiai callarirca. ¿Imamanta? Paica chai profeciacuna Jesús manaraj shamujpi quillcashca cashcatami segura casha nirca. Chaimantami Rollos del mar Muerto nishca quillcashcacunamanta investigarca. Estherca: “Huaquin rollocunataca Jesús manaraj shamujpimi quillcashcacuna carca. Shinaca Jehová Dios yuyaita cujpimi chaipi tiyaj profeciacunataca quillcarcacuna. Cai temamanta investigacushpaca huaquin partecunata alli intindingapajca cutin cutinmi liyircani. Pero ñucallataj chaita estudiashcamantami cunanca Bibliapi nishcacuna ciertotaj cashcata segura cani” nircami.  

11. ¿Bibliapi verdadta yachachishcataca imamantataj investigana canchij?

¹¹ Bibliapi tiyaj tucui profeciacuna ima shina pajtarishcata investigashpaca ñucanchij fetami sinchiyachishun. Shinallataj profeciacunata estudiashpaca shamuj punllacunapi pajtarinataj cashcatami seguros cashun. Chaimantami tucui profeciacuna pajtarichun cushilla shuyashun. Cunanca Daniel libropi tiyaj ishqui profeciacunamantami parlashun. Chai profeciacunaca cunan punllacunapimi pajtaricun. Ima shina pajtaricushcata intindishpaca alli decisioncunata japingapajmi animarishun. 

12. Nabucodonosor ricushca estatuapaj chaquicunaca ‘ashaca fierrohuan, ashaca lodohuanmi’ rurashca carca. ¿Chaica imatataj ricuchin? (Daniel 2:41-43).

¹² Daniel 2:41-43-ta liyipai. Nabucodonosor ricushca estatuapaj chaquicunaca ‘ashaca  fierrohuan, ashaca lodohuanmi’ rurashca carca. Chai profeciata Danielpi Apocalipsispi tiyaj shujtaj profeciacunahuan chꞌimbapurashpaca estatuapaj chaqui dedocuna Estados Unidos y Reino Unido llajtacunata ricuchishcatami cuentata cunchij. Cai ishqui llajtacunaca shuj shinallami mandacuncuna. Pero Danielca chai llajtacunamanta parlashpaca ‘chai mandanaca ashaca sinchi, ashaca urmanallami canga’ nircami. ¿Caica imatataj nisha nin? Gentecunaca lodo shinami can. Paicunami chai ishqui llajtacuna fierro shina sinchi cachunca mana saquincuna. b

13. ¿Daniel parlashca profeciamantaca imatataj yachanchij?

¹³ ¿Cai estatuapaj chaqui dedocunamanta Daniel imalla parlashcamantaca imatataj yachai tucunchij? Estados Unidos y Reino Unido llajtacuna shuj shinalla mandacushpaca achca poderta charishcatami ricuchishcacuna. Por ejemplo, shuj shinalla macanacushcamantami paicunaca Primera y Segunda Guerra Mundial nishca jatun macanacuicunata misharcacuna. Shinapish cunan punllacunapi chai llajtacunapi causaj gentecunaca paicunapurami pꞌiñanacushpa causacuncuna. Chaimantami cai ishqui llajtacunaca ña mana achca poderta charin. Shinallataj Bibliapica cai ishqui llajtacuna mandashca qꞌuipa shujtaj llajtacuna mandana cashcataca mana ninchu. Tal vez huaquin llajtacunaca cai ishqui llajtacunatami mishasha ningacuna. Pero mana pudingacunachu. Ashtahuanpish Diospaj Gobiernomi cai ishqui llajtacunata ñutushpa tucuchinga. Daniel libropica cai Gobiernoca shuj jatun “rumi” shina cashcatami nin (Daniel 2:34, 35, 44, 45).

14. ¿Estatuapaj chaqui dedocunamanta parlaj profeciata intindishcataca ima shinataj ricuchinchij?

¹⁴ ¿Canca estatuapaj chaqui dedocunamanta Daniel imalla nishcacuna cierto cashcata cringuichu? Cai nishcacuna cierto cashcata crishpaca cai millai mundo ñalla tucurina cashcataca seguromi cangui. Chaimantami ashtahuan charinataca mana mashcana cangui (Lucas 12:16-21; 1 Juan 2:15-17). Shinallataj cai profeciata alli intindishpaca tucui shunguhuan huillashpa catingapaj, gentecunaman Bibliamanta yachachingapajmi esforzarishpa catingui (Mateo 6:33; 28:18-20). Shinashpaca Diospaj Gobierno cai pacha gobiernocunata ñalla tucuchina cashcataca segurosmi cana canchij. Seguro cashcataca alli decisioncunata japishpami ricuchishun.

15. ¿‘Janaj lado llajtata jatun mandaj, ura lado llajtata jatun mandajcunaca’ picunataj can? (Daniel 11:40).

¹⁵ Daniel 11:40-ta liyipai. Daniel capítulo 11-pica ishqui mandajcuna cai Allpata mandasha nishpa macanacucushcatami parlan. ¿Daniel nishcacunata shujtaj profeciacunahuan chꞌimbapurashpaca imatataj intindinchij? Janaj lado llajtata mandajca Rusia y paita apoyajcunami can. Cutin ura lado llajtata mandajca Estados Unidos y Reino Unidomi can. Cai ishqui mandajcunataca “rey del norte” y “rey de sur” nishpapishmi rijsinchij. c

16. ¿“Janaj lado llajtata jatun mandajca” Diosta sirvijcunataca ima shinataj llaquichishca?

¹⁶ ‘Janaj lado llajtata mandajca’ pai mandacun llajtacunapi causaj Testigocunataca achcatami llaquichicun. Huaquin Testigocunataca Jehová Diosta sirvishcamantami macashcacuna, carcelpipish churashcacuna. Pero ñucanchij huauqui panicunaca cai millai mandajtaca mana manchancunachu. Paicunaca Daniel libropi nishca shina cai mandaj paicunata llaquichina  cashcataca allimi yachancuna (Daniel 11:41). d Ñucanchijpish cai profecía ña pajtaricushcata seguros cashpaca Jehová Diostami tucuipi cazushun. Shamuj punllacunapi sumaj bendicioncunata chasquina cashcatapishmi seguros cashun.

17. ¿“Ura lado llajtata jatun mandajca” Diosta sirvijcunataca ima shinataj llaquichishca?

¹⁷ ‘Ura lado llajtata mandajpishmi’ Diosta sirvijcunataca llaquichishca. Por ejemplo, Primera y Segunda Guerra Mundial tiyai punllacunapica achca huauqui panicunatami carcelpi churarca. Huahuacunatapish politicapi mana chagrurisha nishcamantami escuelacunamanta llujshichirca. Shinapish cai tucuri punllacunapica cai mandajca Diosta sirvijcunataca shujtaj layami llaquichishca, pandachishcapish. Por ejemplo, politicocuna campañata ruracujpica Diosta sirvijcuna shungu ucupi paicunata apoyachunmi pandachisha nishca. Tal vez shuj candidatoman votota mana cushpapish shungu ucupimi ‘caica allimi, chaica mana allichu’ nishpa yuyashun. Chaimantami shungu ucullapipish  politicapi ama chagruringapaj cuidadota charina canchij (Juan 15:18, 19; 18:36).

18. ¿Cai ishqui mandajcuna paicunapura macanacucujta ricushpaca ima shinataj sintirinchij? (Fotomantapish parlapai).

¹⁸ Cai ishqui mandajcuna paicunapura macanacucujta ricushpaca maijancunaca achcatami mancharincuna (Daniel 11:40). Paicunaca achca armacunatami charincuna. Chai armacunahuanca tucui mundotami tucuchi pudin. Pero Jehová Dios chaita rurachunca manataj saquingachu (Isaías 45:18). Chaimanta mana manchanachu canchij. Ashtahuanpish cai ishqui mandajcuna paicunapura macanacucujta ricushpaca Diospaj nishcacuna ñalla pajtarina cashcatami seguros canchij.

19. ¿Huaquin profeciacunata manaraj intindishpapish imatataj rurana canchij?

¹⁹ Huaquin profeciacuna ima shina pajtarinataca mana yachanchijchu. Danielpish pai quillcashca profeciacuna ima shina pajtarinataca mana tucuita intindircachu (Daniel 12:8, 9). Pero chai profeciacuna ima nisha nishcata manaraj intindishpapish pajtarinataca pajtaringatajmi. Jehová Diosllatajmi pai agllashca punllapi chai profeciacuna imata nisha nishcataca alli intindichinga. Chaitaca segurosmi canchij (Amós 3:7).

20. a) ¿Ima profeciacunallataj ñalla pajtaringa? b) ¿Imatataj rurashpa catina canchij?

²⁰ Llajtacunaca ñallami: “¡Sumajta, mana manchashpami causacunchij!” ningacuna (1 Tesalonicenses 5:3). Chai qꞌuipaca gobiernocunami panda religioncunata tucuchingacuna (Apocalipsis 17:16, 17). Chai huashaca Diospaj pueblotami llaquichisha ningacuna (Ezequiel 38:18, 19). Chai qꞌuipaca Armagedón jatun macanacuimi callaringa (Apocalipsis 16:14, 16). Cai profeciacuna ñalla pajtarina cashcataca segurosmi canchij. Pero pajtaringacamaca ima shina pajtaricushcatami yachashpa catina canchij. Shujtajcunatapish chai profeciacunata intindichunmi ayudana canchij. Chashnami Jehová Diosta tucui shunguhuan cꞌuyashcata ricuchishun.