1. ¿Pacienciata charijcunahuanca imamantataj apanacunata munanchij?

 ÑUCANCHIJCA pacienciata charijcunahuanmi apanacunata munachij ¿nachu? Por ejemplo, mana pꞌiñarishpa ñucanchijta shuyajpica achcatami agradicinchij. Shinallataj imapi pandarishca cajpi mana pꞌiñarijpica tranquilomi sintirinchij. Bibliamanta pacienciahuan ñucanchijman yachachishcamantapishmi achcata agradicinchij. Ashtahuantajca Yayitu Jehová Dios ñucanchijta pacienciata charishcamantami achcata agradicinchij (Romanos 2:4).

2. ¿Pacienciata charinaca imamantataj huaquinpica sinchi can?

² Ñucanchijhuan pacienciata charijpica cushillami sintirinchij ¿nachu? Pero ñucanchijllataj pacienciata charinaca huaquinpica sinchimi can. Por ejemplo, carrota apurado manejacushpa achca carrocuna tiyashcamantami rato pꞌiñari tucunchij. Shinallataj shujtajcuna imata rurajpi o imata nijpimi pacienciata charinaca sinchi cai tucun. Ashtahuanpish Jehová Dios cusha nishca bendicioncuna mana utca chayashcamantami ashata pꞌiñari tucunchij. Cai yachaipica imamanta, ima shina pacienciata ricuchina cashcatami yachashun. Shinallataj pacienciata charingapaj imata rurana cashcatapishmi ricushun.

3. ¿Pacienciata charishcataca ima shinataj ricuchinchij?

³ Cunanca pacienciata ima shina ricuchina cashcatami yachashun. Por ejemplo, pacienciata charishpaca mana utca pꞌiñarishunchu. Shinallataj imatapish utca rurachun nijpica mana rato colerashunchu. Shujtajcuna llaquichijpipish mana chashnallataj llaquichishunchu. Jehová Diosca siempremi pacienciata ricuchishca. Chaimantami Bibliapica Jehová Dios pacienciata  charij cashcata punta cutin parlashpaca, ‘Mandaj Diosca tucuita rurai tucuj, llaquij, cꞌuyaj shungu, mana utca pꞌiñarij, yallitaj llaquij, mana llullaj Diosmi can’ nin (Éxodo 34:6).

4. ¿Shuyana tucujpica ima shinataj pacienciata ricuchinchij?

⁴ Pacienciata charishpaca imatapish mana pꞌiñarishpami shuyashun. Achcata shuyana cajpipish mana pꞌiñarishunchu (Mateo 18:26, 27). ¿Mana pꞌiñarishpa shuyajcuna cashpaca ima shinataj ricuchinchij? Por ejemplo, shujtajcuna ima shina sintirishcata ñucanchijman parlajpica pacienciahuanmi mana imata nishpa alli uyana canchij (Job 36:2). Shinallataj Bibliamanta yachacujcunaman Bibliapi nishcacunata alli intindichingapaj, paicunapaj causaita cambiachun ayudangapajmi pacienciata charina canchij.

5. ¿Pacienciata charishcata ricuchingapajca ima ashtahuantaj rurana canchij?

⁵ Pacienciata charishpaca imatapish alli yuyashpami rurashun. Huaquin cosascunataca utcami rurana canchij. Pero importante cosascunataca mana apuradochu rurai callarina canchij. Shinallataj mana apuradochu tucuchina canchij. Chaipaj randica chaicunata ima shina ruranatami alli yuyanaraj canchij. Chai qꞌuipaca alli trabajota rurangapajmi tiempota llujchina canchij.

6. ¿Llaquicuna, jarcaicuna ricurijpica pacienciata charishcataca ima shinataj ricuchinchij?

⁶ Llaquicunata, jarcaicunataca mana quejarishpallami ahuantana canchij. Chashnami pacienciata charishcata ricuchishun. Ima llaquita apacushpaca shuj amigoman ima shina sintirishcata tucuita huillanaca allimi can. Pero pacienciata charishpaca llaquicunata charishpapish Jehová Diosta cushilla sirvishpa catingapajmi esforzarishun (Colosenses 1:11). Shinashpaca pacienciata charishcata ricuchingapajca, cunancama yachashca chuscu yuyaicunata pajtachingapajmi esforzarina canchij. ¿Pero imamantataj pacienciata charina canchij? Cunanmi chaimanta yachashun.

7. ¿Santiago 5:7, 8-pi nishca shinaca imamantataj pacienciata charina canchij? (Fotocunamantapish parlapai).

⁷ Ñaupa tiempopi Diosta sirvijcunaca Dios cusha nishcacuna pajtarichunca pacienciahuanmi shuyarcacuna. Ñucanchijpish quishpirisha nishpaca pacienciahuanmi shuyana canchij (Hebreos 6:11, 12). Bibliapica cada uno tarpuj runa shina cashcatami nin (Santiago 5:7, 8-ta liyipai). Tarpuj runaca muyuta tarpushpa, plantitata cuidashpami sinchita trabajan. Shinapish grano ima hora pꞌucunataca mana yachanchu. Pero mana yachashpapish cosechana cashcata seguro cashcamantami pacienciahuan shuyan. Diosta sirvijcunaca chashnallatajmi canchij. Diospaj punlla ima hora shamuna cashcata mana yachashpapish Jehová Diospajta rurashpami ocupados canchij (Mateo 24:42). Shinashpaca Jehová Dios cusha nishcacuna pajtarinataj cashcata yachashcamantami shuyana canchij. Pacienciata mana charishpaca asha ashami Diosmanta caruyashun. Ashtahuanpish ñucanchijllapi yuyashpami cai rato cushilla causangapaj yallitaj esforzari callarishun. Pero pacienciata charishpaca Jehová Dios sumaj causaita cungacamami mana pꞌiñarishpa shuyashun (Miqueas 7:7; Mateo 24:13).

8. ¿Shujtajcunahuan alli apanacungapajca imamantataj pacienciata charina canchij? (Colosenses 3:12, 13).

⁸ Pacienciata charishpaca shujtajcunahuanmi alli apanacushun. Paicuna imata parlacujpipish atencionhuanmi uyashun (Santiago 1:19). Shinallataj pacienciata charishpaca tucuicuna alli apanacuchunmi ayudashun. Shaicushca o estresado cashpapish alli yuyashpami imatapish nishun. Ashtahuancarin pi ñucanchijta pꞌiñachijpi o llaquichijpipish mana pꞌiñarishpami paicunataca alli tratashun. Shinallataj mana tigra llaquichishunchu. Ashtahuancarin caishuj chaishuj perdonanacushpa, ahuantanacushpami sumajta causashun (Colosenses 3:12, 13-ta liyipai).

9. ¿Imatapish alli decidingapajca imamantataj pacienciata charina canchij? (Proverbios 21:5).

⁹ Mana pacienciata charishpaca yuyarishcahuanmi ucui jahua imatapish decidishun. Pero pacienciata charishpaca manaraj decidishpami alli yuyangapaj tiempota llujchishun. Shinallataj “¿cai decisionta japinaca allichushi canga? ¿manachu alli canga?” nishpami alli yuyashun (Proverbios 21:5-ta liyipai). Por ejemplo, tal vez trabajo illaj saquirishcamantami mana alli yuyashpa ima trabajotapish japinata yuyashun. Pero chai trabajota japishpaca tandanacuicunaman, predicacionman ringapajca manachari tiempota charishun. Chaimantami manaraj shuj trabajota japishpaca chai trabajo maipi saquirishcata, ima horascama trabajana cashcata alli ricuna canchij. Shinallataj, “chai trabajota japishpaca ñuca familiahuan cangapaj, Jehová Diosta adorangapajca ¿tiempota charishachu?” nishpami yuyarina canchij. Alli yuyashpa imatapish decidishpaca tranquilo, cushillami causashun.

10. ¿Pacienciataca ima shinataj chari tucunchij?

¹⁰ Jehová Diostami ashtahuan pacienciata charingapaj ayudachun mañana canchij. Pacienciata charinaca Diospaj espíritu pꞌucuchishca granomi (Gálatas 5:22, 23). Chaimantami pacienciata, shujtaj cualidadcunata ricuchingapajca Jehová Diospaj ayudata mashcana canchij. Huaquinpica pacienciata ricuchinaca sinchimi canga. Chai ratomi “pacienciata charingapaj ayudahuai” nishpa Jehová Diosta mañana canchij (Lucas 11:9, 13). Shinallataj Jehová Diostaca “can yuyashca shina yuyangapaj ayudahuai” nishpami mañana canchij. Chashna mañajpica Yayitu Diosca pacienciata ricuchichunmi ayudanga. Pero ñucanchijpishmi tucui  punllacuna pacienciata ricuchishpa catingapaj esforzarina canchij. Chaita rurashpaca asha ashami pacienciata ricuchi callarishun.

11-12. ¿Jehová Diosca ima shinataj pacienciata ricuchishca?

¹¹ Bibliapi tiyaj ejemplocunapi yuyashunchij. Bibliapica Jehová Diosta sirvijcuna pacienciata ima shina ricuchishcatami parlan. Chai ejemplocunapi yuyashpami pacienciata charinata yachashun. Cunanca Diosta sirvijcuna ima shina pacienciata ricuchishcatami yachashun. Pero chaita manaraj yachashpaca Jehová Diospaj ejemplomantami yachashun. Paica tucuicunamanta ashtahuan yalli pacienciatami charin.

¹² Edén huertapica Diabloca “Diosca gentecunataca mana cꞌuyanchu, mana alli mandajmi can” nishpami Jehová Diostaca yangamanta juchachirca. Pero Diablo chashna nijpipish Jehová Diosca pacienciata charishcamantami mana chai rato paita tucuchirca. Ashtahuanpish Jehová Diosca alli mandaj cashcata ricuchingapajmi tiempo pasachun saquirca. Chai tiempo pasangacamaca millai gentecunaca yangamantami Diospaj shutita mapayachishcacuna. Pero Jehová Diosca pacienciahuanmi mana pꞌiñarishpa shuyacun. Ashtahuanpish Jehová Dios pacienciata charishcamantami achca gentecunaca paimanta yachashpa paraisopi huiñai huiñaita causana esperanzata charincuna (2 Pedro 3:9, 15). Shinashpaca Jehová Dios pacienciata charishcamantami achca bendicioncunata chasquishcanchij. Chaimanta, paipaj punlla chayamungacama pacienciahuan shuyashpa catishunchij.

13. ¿Jesusca Jehová Dios shina pacienciata charishcataca ima shinataj ricuchishca? (Fotomantapish parlapai).

¹³ Jesusca paipaj Yaya shinami achca pacienciata charin. Chaimantami cai Allpapi cashpaca tucuipi pacienciata charishcata ricuchirca. Por ejemplo, mandashcacunata quillcajcuna,  fariseocunaca mishqui shimi jayaj shungucunami carca. Shinapish Jesusca paicunataca achca pacienciatami charirca (Juan 8:25-27). Jesusca paipaj Yaya shinami mana rato pꞌiñarij carca. Shujtaj gentecuna rimajpipish, cꞌamijpipish mana chashnallataj llaquichircachu (1 Pedro 2:23). Ashtahuanpish Jesusca llaquicunataca mana quejarishpami pacienciahuan ahuantarca. Chaimantami Bibliapica “juchayuj gentecuna llaquichij shimicunahuan rimashcata ahuantaj runata cutin cutin yuyarichij” nin (Hebreos 12:2, 3). Ñucanchijpish Jehová Diospaj ayudahuanmi tucui llaquicunataca pacienciahuan ahuantai tucushun.

14. ¿Abrahanmantaca imatataj yachachij? (Hebreos 6:15). (Fotomantapish parlapai).

¹⁴ Maijancunaca Diospaj punlla chayamuchunca achca huatacunatami shuyashcanchij. Chaimantachari “Diospaj punllaca ñuca huañushca qꞌuipami chayamunga” nishpa sustarinchij. Shina sintirishpaca Abrahanpimi yuyana canchij. Jehová Dios cantaca jatun llajtatami rurasha nijpica Abrahanca 75 huatacunatami charirca. Chai punllacunapica shuj huahuallatapish mana charircachu (Génesis 12:1-4). Abrahanca Jehová Dios nishcacuna ima shina pajtarishcataca mana tucuita ricurcachu. Isaac huacharichunca río Eufratesta chꞌimbashca qꞌuipaca 25 huatacunatami shuyana carca. Y 60 huatacuna qꞌuipami paipaj nietocuna Esaú y Jacob huacharircacuna (Hebreos 6:15-ta liyipai). Shinapish Abrahanca paipaj huahua huahuacuna shuj jatun llajta tucushpa Jehová Dios cusha nishca allpata japijtaca mana ricurcachu. Chaita mana ricushpapish Abrahanca Jehová Diospaj alli amigomi cashpa catirca (Santiago 2:23). Pero paraisopi Abrahán causarishpaca pai sinchi feta charishcamanta tucui gentecuna achca bendicioncunata chasquishcatami yachaj chayanga. Chaita yachaj chayashpaca paica cushillami sintiringa (Génesis 22:18). ¿Abrahanmantaca imatataj yachanchij?  Ñucanchijpish Jehová Diospaj nishcacuna ima shina pajtarinataca manachari ricui tucushun. Pero Abrahán shina pacienciata charishpaca cunan punllacunapi, shamuj punllacunapi Jehová Dios bendicianatami seguros cashun (Marcos 10:29, 30).

15. ¿Pacienciata charinata yachangapajca imallatataj estudiana canchij?

¹⁵ Bibliapica Diosta sirvijcuna ima shina pacienciata charishcatami parlan (Santiago 5:10). Paicunamanta yachangapaj tiempota surcushunchij. b Por ejemplo, David jovenraj cajpimi Jehová Diosca mandaj cachun churarca. Pero mandaj cangapajca achca huatacunatami shuyana carca. Simeón, Anapish Mesías shamungacamaca Jehová Diostaca achca huatacunatami sirvircacuna (Lucas 2:25, 36-38). Paicunamanta estudiacushpaca, “¿paicunaca pacienciata charingapajca imatataj rurarcacuna? ¿Pacienciata charishcamantaca ima bendicioncunatataj chasquircacuna? ¿Paicunamantaca imatataj yachai tucuni?” nishpa tapurishunchij. Pero Bibliapica mana pacienciata charijcunamantapishmi parlan. Paicunamantapishmi estudiana canchij (1 Samuel 13:8-14). Pacienciata mana charijcunamanta estudiacushpaca, “¿paicunaca imamantataj mana pacienciata charircacuna? ¿Pacienciata mana charishcamantaca ima llaquicunallatataj charircacuna?” nishpa tapurishunchij.

16. ¿Pacienciata charishpaca ima shinataj causashun?

¹⁶ Pacienciata charishpaca ima shina causanata yuyai. Pacienciata charishpaca shungupi, yuyaipimi tranquilo sintirishun. Congregacionpipish huauqui panicunahuanmi tandalla Jehová Diosta sirvishun. Shinallataj shujtajcuna mana alli tratajpipish mana utca pꞌiñarishpaca congregacionpi pꞌiñanacuicuna ama tiyachunmi ayudashun (Salmo 37:8; Proverbios 14:29). Ashtahuantajca pacienciata charishpaca Jehová Dios shina mana utca pꞌiñarij cashcatami ricuchishun.

17. ¿Imatataj rurashpa catina canchij?

¹⁷ Caipi yachashca shinaca pacienciata charinaca valishcami can. Shinapish tucuipi pacienciata ricuchinaca mana jahuallachu canga. Pero Jehová Diosmi pacienciata ricuchishpa catichun ayudanga. Salmo 33:18-pica: ‘Jehová Diosca paita manchajcunamanta, pai llaquina cashcata shuyajcunamantaca paipaj ñahuita mana anchuchinchu’ ninmi. Chaimanta, Diospaj punllata mana pꞌiñarishpa shuyashpa catishunchij. Pacienciata charinatapish churarishpa catishunchij.