1. ¿Imamantataj bautizarina cangui? (Jahuapi tiyaj fotota ricui).

CADA huatami achcacuna bautizarincuna. Maijancunaca jovencunami can. Shujtajcunacarin huahuacunarajmi can. Huaquincunataca yaya mamami uchillamantapacha Bibliamanta yachachishcacuna. Quishpiringapajmi bautizarinaca minishtirishca can. ¿Canca ñachu bautizarishca cangui? Ña bautizarishca cashpaca allitami rurashcangui (Mateo 28:19, 20; 1 Pedro 3:21).

2. ¿Imamantataj bautizarinataca mana manchana cangui?

² Bautizarishpaca achca bendicioncunatami charingui. Can bautizarishca punllata yuyari. Chaipica: “Jesús canmanta huañushcata crishpaca, ¿cambaj juchacunamanta arrepintirishcanguichu? ¿Tucui ñuca causaihuanmi canta sirvisha nini nishpa Jehová Diosta mañashcanguichu?” nishpa tapujpica ari nircanguimi. Bautizarishpaca Diospaj ñaupajpimi “canllatami cꞌuyasha, tucui can nishcatapish cazusha” nircangui. ¿Ari nishcamantaca arrepintirinachu cangui? Mana. Diospaj maquipi  cambaj causaita mingashcataca mana arrepintirinachu cangui. Diosta mana sirvishpaca Diablopaj maquipimi cangui. Paica can quishpirichunca mana munanchu. Ashtahuanpish Diabloca Diosta mana cazushpa huiñai causaita ama charichunmi munan.

3. ¿Bautizarishca punllamantaca ima bendiciocunatataj charishcangui?

³ Ña bautizarishca cashpaca achca bendiciocunatami charishcangui ¿nachu? Bautizarishca punllamantaca cambaj causaitami Diospaj maquipi churarcangui. Chaimantami, “Diosca ñucahuanmari, mana manchanichu. Runacuna imata ruranataca mana manchanichu” ni tucungui (Salmo 118:6). Diospajman cꞌuchuyana, paipaj ñaupajpi alli ricurinami ashtahuan alli can.

4, 5. a) ¿Ña bautizarishca cashpaca imamantataj canllataj Dioshuan alli apanacungapaj esforzarina cangui? b) ¿Ima jarcaicunatataj tucuicuna charinchij?

⁴ Yaya mamapaj huasipi causacushpapish “paicuna Diosta alli sirvijpica ñucapish quishpirishallami” nishpa mana yuyanachu cangui. Ña bautizarishca cashpaca canllatajmi Dioshuan alli apanacungapaj esforzarina cangui. ¿Imamantataj chaita mana cungarina cangui? Cambaj causaipica llaquicuna, jarcaicunami ricuringa. Por ejemplo, huahuaraj cashpachari bautizarircangui. Pero cunanca ñachari joven cangui. Joven cashcamantaca jarcaicunata, shujtaj munaicunatachari charingui. Shuj solteraca cashnami nin: “Huahuaraj cashpaca cumpleañoscunapi mana participashpapish mana llaquilla sintirij carcanichu. Pero ña solterayajpica chayarina munaicunamanta jarcarinaca sinchimi can. Juchapi ama urmangapajmi Dios mandashcata cazuna alli cashcata tucui shunguhuan crina cani” ninmi.

⁵ Mana jovencunallachu jarcaicunata, llaquicunata charin. Ña achca huatacunata charishpa bautizarijcunapishmi jarcaicunata, llaquicunata charin. Por ejemplo, achcacunaca cusa huarmimi can. Paicunapishmi llaquicunata charin. Cutin shujtajcunaca saludmanta o trabajomanta chꞌican chꞌican llaquicunatami chꞌimbapurana can. Jovencuna o jatuncuna cashpapish tucuicunami jarcaicunata, llaquicunata charinchij. Chaimantami Diosmanta ama caruyangapaj esforzarina canchij (Santiago 1:12-14).

6. a) ¿Diosmanta ama caruyangapajca imatataj mana cungarina cangui? b) ¿2 Corintios 4:7-pica imatataj yachai tucungui?

⁶ Diosmanta ama caruyangapajca Diospaj ñaupajpi ari nishcatami yuyarina cangui. Bautizarigrishca punllaca ‘ima tucujpipish canllatami cꞌuyasha, tucui can nishcatami cazusha’ nircanguimi. Cambaj yaya o mama Diosmanta caruyajpipish cambaj ari nishcataca mana cungarinachu cangui (Salmo 27:10). Ima llaquicuna, tentacioncuna ricurijpipish “ñuca ari nishcata pajtachingapaj fuerzasta cuhuai” nishpami Diosta mañana cangui (2 Corintios 4:7-ta leyipai).

7. ¿Quishpiringapajca imatataj rurana cangui?

 ⁷ Jehová Diosca paihuan alli apanacuchunmi munan. Pero paihuan alli amigo cangapaj, quishpiringapajpish achcatami esforzarina cangui. Bibliapica: “Cancuna quishpiringapaj manchaihuan, chujchuihuan allita rurana yuyailla caichij” ninmi (Filipenses 2:12, QC, 1989). Cai shimicunaca llaquicuna ricurijpipish Jehová Diosmanta ama caruyangapaj sinchita esforzarina cashcatami ricuchin. Yuyari, maijancunaca achca huatacunata Diosta alli sirvishpapish qꞌuipaca paimanta caruyarcacunami. ¿Canpish Diosmanta ama caruyangapajca imatataj rurana cangui?

8. a) ¿Ima shinataj Bibliata estudiana cangui? b) ¿Imamantataj Bibliata estudiana cangui?

⁸ Diospaj alli amigo cangapajca paita uyana, paihuan parlanacunami cangui. ¿Ima shinataj chaita rurai tucungui? Bibliata estudiashpami pai nishcataca uyangui. Chaimantami Bibliatapish publicacioncunatapish leyina cangui. Qꞌuipaca leyishcapi yuyangapajmi tiempota surcuna cangui. Bibliata estudianaca mana escuelapi examenta cungapaj ima nishcata yuyaringapajllachu. Ashtahuanpish Bibliata estudiacushpaca Jehovamanta shujtaj yuyaicunata intindingapajmi esforzarina cangui. Chashnami Jehová  Diospajman ashtahuan cꞌuchuyangui. Paipish cambajman cꞌuchuyangami (Santiago 4:8).

9. ¿Canca Bibliataca ima ayudacunahuantaj yachangui?

⁹ Bibliata alli intindingapajmi achca ayudacuna tiyan. Por ejemplo, jw.org paginapica guías de estudio “¿Qué enseña realmente la Biblia?” nishca ayudami tiyan. Chai ayudacunahuan Bibliata yachashpaca Diospajmanmi ashtahuan cꞌuchuyangui. Shinallataj revista ¡Despertad! de abril de 2009-pica “Los jóvenes preguntan. ¿Cómo disfrutar la lectura de la Biblia?” nishca temami tiyan. Chaipica Bibliata yachangapaj ashtahuan yuyaicunatami taringui. Bibliata alli estudiashpa, leyishcata cutin cutin yuyashpaca quishpiringuimi (Salmo 119:105-ta leyipai).

10. ¿Imamantataj Diosta mañanataca mana cungarina cangui?

¹⁰ Ña ricushca shinaca Bibliata alli estudiashpami Diostaca uyanchij. Cutin, ¿paihuan parlasha nishpaca imatataj rurana canchij? Diostami mañana cangui. Pero mana imapish alli llujshichun nishpalla chaillatataj chaillatataj ninachu cangui. Diosta mañacushpaca paihuanmi parlanacunchij. Jehová Diosca cambaj mañashcacunata uyasha ninmi (Filipenses 4:6-ta leyipai). Achca huauqui panicunami problemata charishpaca Salmo 55:22-pi nishcata pajtachishcacuna. Chaipica: ‘Cambaj llaquitaca, Mandaj Diosman mingai’ ninmi. Canpish cambaj llaquicunata Diosman mingashpaca tranquilomi sintiringui.

11. ¿Diostaca imamantataj siempre pagui nina cangui?

¹¹ Diostaca mana llaquicunallapi cashpachu mañana cangui. Paitaca siempremi mañana cangui. Bibliapica “pagui nijcuna caichij” ninmi (Colosenses 3:15). Huaquinpica achca llaquicunata charishcamantachari Diosta pagui ninata cungarinchij. Shinashpaca ¿imatataj rurai tucungui? Cada punlla quimsa cosascunallamantapish Diosta pagui ningapaj esforzari. Abigail shuti panimanta parlashun. Paica 12 huatacunallata charishpami bautizarirca. Abigailca: ‘Diosca cada punllami achcata bendician. Chaimantami tucuicunamanta yallica Diosllata ashtahuan pagui nina canchij’ ninmi.

12, 13. ¿Imamantataj Jehová Dios canhuan alli cashcata yuyarina cangui?

¹² Jehová Diosca achca llaquicunapimi rey Davidtaca ayudarca. Chaimantami Davidca: ‘Mandaj Dios chashna alli cajtaca, cancunataj ricuichigari. Paipi shunguta churajcunaca cushicunmari’ ninmi (Salmo 34:8). Cai versopi yachachishca shinaca Jehová Dios ayudaj cashcatami canllataj ricuna  cangui. Bibliata, publicacioncunata leyishpa, tandanacuicunamanpish rishpami Jehová Dios paimanta ama caruyachun shujtajcunata ayudashcata yachangui. Pero Diosmanta ashtahuan yachashpaca canllatajmi ima shina ayudajta ricuna cangui. ¿Diosca canhuan alli cajtaca ima shinataj ricushcangui?

¹³ Tucuicunami Dios ñucanchijhuan alli cajtaca ricushcanchij. Por ejemplo, Diosca paipajman paipaj Churimanpish cꞌuchuyachunmi saquishca. Chaimantami Jesusca: “Ñucata cachaj Yaya mana pushamujpica, ñucapajmanca pi mana shamui tucunchu” nirca (Juan 6:44). Cantapish Jehová Diosca paipajman cꞌuchuyachunmi saquishca. Shinapish “ñuca yaya mamatami paipajman cꞌuchuyachun saquishca. Ñucaca paicunata catishcallamantami testigo cani” nishpachari yuyangui. Bautizarishpaca Jehová Diospaj amigo cashcatami ricuchircangui. Cunanca Jehová Diosca cantaca allimi rijsin. Bibliapi nishca shinaca Diosta cꞌuyajca, Diospaj alli rijsishcami tucun (1 Corintios 8:3). Chaimantami Diospaj pueblomanta ama caruyangapaj esforzarina cangui.

14, 15. ¿Jehová Diosta ashtahuan cꞌuyangapajca imamantataj shujtajcunaman huillana cangui?

¹⁴ Escuelapi compañerocunaman o shujtaj gentecunaman huillangapaj ayudajpimi Jehová Dios alli cajta ricui tucungui. Maijancunaca “ñuca compañerocunaca mana uyasha ningachu” yuyashpami achcata manchancuna. Shujtajcunaca taucacunapurapi parlana cashpami manchancuna. ¿Canpish manchanguichu? ¿Imatataj rurai tucungui?

¹⁵ Puntapica Diospipish Bibliapipish imamanta crishcatami yuyana cangui. JW.ORG paginapica guías de estudio nishcami achca shimicunapi tiyan. Chai ayudacunaca imapi crishcata, imamanta chaita crishcata, shujtajcunaman ima shina intindichinatapish yachangapajmi can. Diospipish Bibliapi nishcacunatapish tucui shunguhuanmi crina cangui. Shinallataj allimi prepararina cangui. Chashnami shujtajcunaman Diosmanta parlanata munangui (Jeremías 20:8, 9).

16. ¿Mana manchashpa Diosmanta parlangapajca imatataj rurai tucungui?

¹⁶ Shujtajcunaman parlangapaj alli prepararishpapish asha manchaitachari charingui. Cunanca 18 huatacunata charij shuj panimanta parlashun. Paica 13 huatacunallata charishpami bautizarirca. Cai panica: “Diospica crinimi pero shujtajcunaman parlanatami manchani. Pero parlacushpaca manchacushcata ama ricuchingapajmi esforzarini. Ñuca compañerocunaca imamantapish parlanllami. Ñucapish Diosmanta parlanallami cani” ninmi. Chaimantami imata parlacushpaca paica: “Shujtaj punllaca Bibliamantami yachachicurcani”  nishpa callarin. Qꞌuipaca shujtaj cosascunamantami parlan. Chashnami maijancunaca ¿Bibliamantaca imatataj yachachingui? nishpa tapuncuna. Cai panica chashna rurashpami Bibliamanta jahualla parlan. Paica “Diosmanta parlashpaca cushillami sintirini” ninmi.

17. ¿Imamantataj Diosmanta mana manchashpa huillana cangui?

¹⁷ Shujtajcunata respetashpa alli tratajpica canta respetasha ningacunami. Olivia panimanta parlashun. Paica 17 huatacunatami charin. Pero huahuaraj cashpami bautizarirca. Cai panica cashnami nin: “‘Diosllapimi yuyashpa purin’ nishpa gentecuna burlarinatami manchaj carcani. Pero qꞌuipaca, ‘shujtaj jovencunaca Diosmanta mana yachanchu, ñucanchijllami Jehovamanta yachanchij’ nishpami yuyarcani. Chaimantami mana manchashpa huillana carcani. Ñucanchijcuna manchaihuan parlajpica testigo cashcamanta mana alli sintirishcatami gentecunaca yuyangacuna. Shinallataj manchajpica manachari alli chasquingacuna. Mana manchashpa huillajpica Diospipish Bibliapipish tucui shunguhuan crishcata ricushpami uyasha ningacuna” ninmi.

18. ¿Quishpiringapajca imatataj rurana cangui?

¹⁸ Ima shinami ricushcanchij quishpiringapajca Diospaj ñaupajpi ari nishcata pajtachinatajmi cangui. Chaimantami Bibliata leyina cangui, leyishcapipish alli yuyanami cangui. Shinallataj Diostami mañana cangui, pai cushca bendicioncunamanta pagui ninatapish mana cungarinachu cangui. Chashna rurashpaca Jehová Diosca cambaj amigo cashcatami cringui. Shujtajcunamanpish mana manchashpami paimanta parlangui (Salmo 73:28-ta leyipai).

19. ¿Quishpirisha nishpaca imamantataj esforzarina canchij?

¹⁹ Bibliapi nishca shinaca Jesusta catijcuna cangapajca tucuitami saquina canchij (Mateo 16:24). Chaipajca ñucanchij causaitami Jehová Diosman mingana canchij, bautizarinapish canchij. Chaita rurashpaca achca bendicioncunatami chasquishun. Shamuj punllacunapipish huiñai causaitami japishun. Chaimanta quishpiringapaj Diosman ari nishcata pajtachishpa catishunchij.