1-3. a) ¿Testigo de Jehovacunaca imatataj tucui shunguhuan crina canchij? b) ¿Huañushcacuna causarinamanta ashtahuan yachanaca imamantataj importante can? (Jahuapi tiyaj dibujota ricui).

ACHCA gentecunami “¿testigo de Jehovacunaca imapitaj cringuichij?” nishpa tapuncuna. Chashna tapujpica, “Jehová Diosmi tucuita rurarca, causaitapish curca” ninchijmi. Chashnallataj “Jesuspimi crinchij. Paimi ñucanchij juchacunamanta huañurca” ninchijmi. O tal vez, “shamuj punllacunapica paraíso Allpapimi huiñaita causashun” nishpachari cutichinchij. Pero, ¿huañushcacuna causarinamantaca parlanchijchu?

² Ñucanchijcunaca jatun llaqui punllacunapi mana huañushpa cai Allpapi huiñaita causanatachari yuyanchij. Pero chashna yuyashpapish huañushcacuna causarina cashcatami tucui shunguhuan crina canchij. Apóstol Pabloca huañushcacuna causarinata crina importante cashcatami nirca. Paica: “Huañushcacuna causarina mana tiyajpica, Cristopish mana causarinmanchu carca” nircami. Jesús mana causarishca cashpaca cunan punllapica mana mandacunmanchu. Chashna cajpica denbaldemi Jesusca ñami mandacun nishpa huillacunchijman  (1 Corintios 15:12-19-ta leyipai). Saduceocunaca huañushcacuna causarinataca manataj crircacunachu. Pero ñucanchijca mana paicuna laya cashcamantami Jesús causarishcataca tucui shunguhuan crinchij. Chaimantami shujtajcuna burlarijpipish huañushcacuna causarinata gentecunaman yachachinchij (Marcos 12:18; Hechos 4:2, 3; 17:32; 23:6-8).

³ Pabloca Jesús yachachishcacunamanta escribicushpaca huañushcacuna causarinata yachanaca punta yachachishcacunalla nircami (Hebreos 6:1, 2). Pabloca huañushcacuna causarinata yachachishca jahuapish paipishmi tucui shunguhuan chaitaca crirca (Hechos 24:10, 15, 24, 25). Huañushcacuna causarina cashcata ‘punta yachachishcacunalla’ cashpapish chaimantaca ashtahuanmi yachana canchij (Hebreos 5:12). ¿Imamantataj chaita ninchij?

4. ¿Huañushcacuna causarinamantaca imatataj tapuri tucunchij?

⁴ Bibliata estudiai callarishpaca ñaupa punllacunapi huañushcacuna causarishcatami yacharcanchij. Por ejemplo, Lázaro causarishcatami yacharcanchij. Shinallataj Abrahampish Jobpish Danielpish shamuj punllacunapi huañushcacuna causarinata crishcatami yacharcanchij. Pero ¿achca huatacuna huashaman huañushca cashpapish cutin causaringacunachu? ¿Bibliaca huañushcacuna ima hora causarinata huillanchu? Chai tapuicunamanta yachashpaca huañushcacuna causarinataca ashtahuanmi crishun.

5. ¿Ima tapuicunamantataj yachagrinchij?

⁵ Maijancunaca huañushca qꞌuipallami causarircacuna (Juan 11:11; Hechos 20:9, 10). Pero, ¿shuj runa achca huatacuna huashaman huañushca cajpipish causaringachu? ¿Jehová Dios causachishami nishca shimicunaca pajtaringachu? Bibliapica shuj runamanta parlashpami, chai runaca causaringami nirca. Chai shimicuna pajtarichunca achca huatacunami pasarca. Chai runa causarishcatami ñucanchijpish crinchij. ¿Pitaj chai runaca carca? ¿Huañushcacuna causarinata seguros cangapajca imamantataj chai runamanta yachana canchij?

6. ¿Salmo 118-pi nishcacunaca ima shinataj Jesuspi pajtarirca?

⁶ Salmo 118-ta yachashpami chai runa pi cashcata intindishun. Cai salmotaca Davidmi escribishcanga. Chaipica: “Mandaj Diospaj shutipi shamujca, alli nishca cachun” ninmi (Salmo 118:25, 26). 9 de nisán punllatami Jesusca Jerusalenman yaicurca. Chaipimi gentecunaca Salmo 118-pi nishca shimicunata nircacuna (Mateo 21:7-9). Pero, ¿imamantataj ‘Salmo 118-pica Jesús causarina cashcatami parlan’ ninchij? Salmo 118:22-pica: “Huasita shayachijcuna yanganchishpa shitashca rumillatajmi, callaripi churana rumi tucushca” ninmi.

7. ¿Judiocunaca imatataj Jesustaca rurarcacuna?

⁷ Jehová Diosca Mesías cachunmi Jesusta agllarca. Shinapish “huasita shayachijcuna” o judiocunata pushajcunaca chaita mana crircacunachu. Chaimantami Jesustaca mana chasquircacuna. Achca judiocunacarin Jesusta huañuchichunmi mañarcacuna (Lucas 23:18-23). Judiocunata pushajcunapaj culpamantami Jesusta huañuchircacuna.

8. ¿Ima shinataj Jesusca huasita rurangapaj “callaripi churana rumi” tucurca?

⁸ Jesús “huasita rurangapaj callaripi churana rumi” tucuchunca paica causarinami  carca. Paillatajmi shuj parlota nishpa caitaca intindichirca. Shuj amoca chagrajcunapajmanmi huaquin sirvijcunata cacharca. Chagrajcunaca sirvijcunataca mana alli tratarcacunachu. Chai qꞌuipaca ñuca churitaca uyangacunami nishpami amoca paipaj cꞌuyashca churitaca cacharca. Amopaj churi chayajpica chagrajcunaca huañuchircacunami. Chai chagrajcuna shinallatajmi israelitacunaca Jehová cachashca profetacunataca mana alli tratarcacuna. Jesusca chai parlota nishca qꞌuipaca Salmo 118:22-pi tiyaj shimicunatami nirca (Lucas 20:9-17). Apóstol Pedropish Jerusalenpi mandajcunahuan, ancianocunahuan, mandashcata quillcajcunahuan parlacushpaca Salmo 118:22-pi nishca shimicunallatatajmi yuyachirca. Pedroca Jesucristomanta parlashpaca: “Cancuna huañuchijpipish Taita Diosmi paitaca huañushcacunapaj chaupimanta causachirca” nircami. Chai qꞌuipaca: “Jesustaca cancunaca huasita rurajcuna mana nishpa rumita shitaj shinami rurarcanguichij. Ashtahuanpish chai rumillatajmari huasita rurangapaj callaripi churana rumi tucushca” nircami (Hechos 3:15; 4:5-11; 1 Pedro 2:5-7).

9. ¿Salmo 118:22-pica imatataj huillarca?

⁹ Caipi ricushca shinaca Salmo 118:22-pica Jesustaca mana chasquina cashcata, huañuchina cashcatapishmi huillarca. Shinallataj chai versollapitajmi Jehová Dios Jesusta causachijpi ‘huasita rurangapaj callaripi churana rumi’ tucunatapish huillarca. Jesusllamantami ñucanchijcunaca huañuimanta quishpiri tucunchij. Chaimantami Bibliapica: “Pi shujtaj Quishpichijca mana tiyanchu. Cai pachapi causajcunata quishpichichunca Taita Diosca pi shujtajtaca mana cushcachu. Jesusllami quishpichi tucun” nin (Hechos 4:12; Efesios 1:20).

10. a) ¿Salmo 16:10-pica Davidca imatataj huillarca? b) ¿Salmo 16:10-pi nishca shimicunaca imamantataj Davidpi mana pajtarishcata ni tucunchij?

¹⁰ Salmo 16:10-pipish shuj runa causarina cashcatami parlan. Casi mil huatacuna pajtaringapaj faltajpimi Davidllataj cai profeciataca quillcashca canga. Cai versomanta yachashpaca huañushca punllamanta achca huatacuna pasajpipish causarina cashcatami crishun. Chai versopica Davidca: “Ñuca almataca Seolpica mana saquinguichu. Cambajlla caj ñuca aicha ismuchunpish mana saquinguichu” nircami. Cai versopi nishca shimicunaca David mana huañunata o Seolman mana rinatapish mana nisha ninchu. Seolca mana achca gentecunata pambana jutcucunachu can. Ashtahuanpish  huañushcacuna dormicuj shina cashcata ricuchingapajllami can. 1 Reyes 2:1, 10-pica: ‘Davidca yuyajyashpa huañurca. Paipaj pueblollapitajmi paipaj ñaupa yayacunahuan pambashca carca’ ninmi. Shinaca, ¿Salmo 16:10-pica pimantataj parlacun?

11. ¿Pedroca ima horataj Salmo 16:10-ta intindichirca?

¹¹ Salmo 16:10-pi nishca shimicunata David escribishca punllamantaca ñami mil huatacuna yalli pasashca carca. Chaipimi apóstol Pedroca shuj conferenciata cushpa cai versopi pimanta parlacushcata intindichirca. Chai conferenciata cushca punllacamaca Jesús huañushpa cutin causarishcapish ñami huaquin semanacuna pasashca carca. Pedroca achca judiocunapaj, mana judiocunapaj ñaupajpimi Salmo 16:10-manta parlarca (Hechos 2:29-32-ta leyipai). Chai conferenciapica Pedroca: ‘David huañushca qꞌuipaca pambashcami carca’ nircami. Pedrota uyacujcunaca chaitaca allimi yacharca. Chai qꞌuipaca Pedroca: ‘Davidca, Cristo causarina cashcatami ricurca’ nircami. Pedro chashna nijpica pipish mana imata nircacunachu.

12. a) ¿Salmo 16:10-pi nishca shimicunaca ima shinataj pajtarirca? b) ¿Cai shimicuna pajtarishcamantaca imatataj yachanchij?

¹² Pedroca pai yachachicushcata alli intindichingapajmi Salmo 110:1-mantapish parlarca (Hechos 2:33-35-ta leyipai). Pedroca Bibliahuan yachachishpami ‘Jesusllataj Mandaj cashcata, Quishpichij Cristo cashcata’ gentecunaman intindichirca (Hechos 2:36). Tucuicunami Salmo 16:10-pi nishca shimicunaca Jesús causarijpi pajtarishcata intindircacuna. Pablopish asha tiempo qꞌuipaca Antioquía de Pisidia llajtamanta huaquin judiocunamanmi caillamantataj parlarca. Chai judiocunaca Pablo parlashcata uyashpami ashtahuan intindichichun mañarca (Hechos 13:32-37, 42-ta leyipai). ¿Pablo parlashcamantaca imatataj yachanchij? Huañushcacuna causarinamanta parlaj profeciacuna achca huatacuna huashaman huillashca cajpipish pajtarinataj cashcatami yachanchij.

13. ¿Maijancunaca imatataj tapurincuna?

¹³ Bibliapica huañushcacuna causarinamanta parlaj profeciacunami tiyan. Achca huatacuna huashaman huillashca cajpipish pajtarinataj cashcata yachashpami cushicunchij. Shinapish maijancunaca ¿achca huatacunatachu ñuca familiacuna cutin causarichun shuyana cani? ¿Ima horashi huañushcacunaca causaringa? nishpachari tapuringacuna. Jesusca apostolcunamanca: ‘Cunanca mana tucuita yachai tucunguichijchu’ nircami (Juan 16:12). Shinallataj Hechos 1:6, 7-pica Jesusca: ‘Jehová Diosllami chaitaca yachan’ nircami. ¿Jesús chaita nishpaca huañushcacuna ima hora causarinata mana yachai tucushcatachu nisha nicurca?

14. a) ¿Eliaspaj, Eliseopaj punllacunapi causarishca runacunaca imataj tucurca? b) ¿Jesús causarishpaca imataj tucurca?

¹⁴ Bibliapica Jesús causarishcatami parlan. Pai mana causarishca cajpica ñucanchij familiacunata cutin ricuna esperanzata mana charinchijmanchu. Eliaspaj, Eliseopaj punllacunapica huaquin runacunami causarirca. Shinapish paicunaca cutinmi huañurcacuna. Paicunapaj cuerpocunaca allpallatajmi tucurca. Pero Jesusca “huañushcacunapaj chaupimanta causarishca” qꞌuipaca ña mana  huañurcachu. ‘Huañuica paitaca mana ashtahuan mandai tucurcachu’. Cunancarin huiñai huiñaitami jahua cielopi causacun (Romanos 6:9; Apocalipsis 1:5, 18; Colosenses 1:18; 1 Pedro 3:18).

15. ¿Cristomi “punta causarij” nishpaca imatataj nisha nin?

¹⁵ Jesusca jahua pachapi causangapajmi causarirca. Paica espíritu shina punta causarijmi can. (Hechos 26:23). Pero qꞌuipa punllacunapica shujtajcunapishmi espíritu shina causarigrirca. Jesusca apostolcunataca, ‘jahua pachaman rishpa ñucahuanmi mandanguichij’ nircami (Lucas 22:28-30). Pero jahua pachaman ringapajca apostolcunaca Jesús layallatajmi huañushpa espíritu shina causarina carca. Pablopish caimanta parlashpaca: “Huañushcacunapaj chaupimanta Cristoca causarishcami. Paica huañushcacuna causarinata ricuchishpa punta causarijmi” nircami. Chai qꞌuipami Pabloca: ‘Huashan huashanmi causaringa. Cristomi puntaca causarirca. Chai qꞌuipaca Jesús jahua pachapi mandacujpimi paipaj agllashcacunaca causaringa’ nircami (1 Corintios 15:20, 23). Chai shimicunahuanca shujtajcunapish jahua cieloman rina cashcatami ricuchirca.

16. ¿1 Corintios 15:23-pica jahua pachaman rigrijcunamantaca imatataj ricuchin?

¹⁶ 1 Corintios 15:23-ca jahua pachaman rigrijcuna ima hora causarina cashcatami ricuchin. Chaipica: ‘Jesús jahua pachapi mandacujpimi causaringacuna’ ninmi. Achca huatacunatami testigo de Jehovacunaca, 1914 huatamantami Jesusca jahua pachapi mandacun nishpa Bibliahuan huillacushcanchij. Jesús jahua pachapi mandacui punllacunapirajmi causacunchij. Ñallami cai mana alli causaipish tucuringa.

17, 18. ¿Jatun llaqui punllacunapi cai Allpapi causacunraj ungidocunahuanca imataj tucunga?

¹⁷ 1 Tesalonicenses 4:13-17-pimi jahua pachaman rigrijcunamanta ashtahuan parlan. Chaipica: ‘Huañushcacuna ima tucuna cashcata mana yachajcuna shina llaquilla cachunca mana munanchijchu. Ashtahuanpish yachajcuna cachunmi munanchij. Jesús huañushpa causarishcatami ñucanchijca crinchij. Chai shinallatajmi Jesusta crij huañushcacunatapish Taita Diosca causachinga’ ninmi. Cai versocunapica caitapishmi nin: ‘Jesús jahua pachapi mandacuicama ñucanchij causacujcunaca huañushcacunataca mana ñaupashpa rishunchu. Mandaj Jesusllatajmi cazuchij caparishcahuan jahua pachamanta uriyamunga’. Chashnallataj, “Cristota crij huañushcacunarajmi causaringa. Chai qꞌuipami ñucanchij caipiraj saquirishca causacujcunaca, Mandaj Jesusta huairapi tupangapaj paicunahuan tandalla pꞌuyupi apashca cashun. Chaipimi Mandaj Jesushuan huiñaita cashun” ninmi.

¹⁸ Jesús jahua pachapi mandai callarishca qꞌuipami ungidocunaca causarina carca. Pero, ¿jatun llaqui punllacunapi cai Allpapi causacunraj ungidocunahuanca imataj tucunga? Cai ungidocunaca jahua pachaman ringapajca puntaca huañunami cangacuna. Shinapish causaringapajca mana achca tiempotachu shuyana cangacuna. Ashtahuanpish paicunaca tucuri trompeta uyarijpica ñahuita sipushpa pascaj shinallami jahua pachapi causaringacuna (1 Corintios 15:51, 52; Mateo 24:31). Chaimantami Bibliapica ‘paicunaca pꞌuyucunapimi jahua pachaman apashca cangacuna’ nin.

19. ¿Bibliapica imamantataj ‘ashtahuan alli causaitami japingacuna’ nin?

¹⁹ Cunan punllacunapica Diosta achca  sirvijcunaca jahua pachapi causanaman ringapajca mana agllashcacunachu cashca. Chaimantami jahua pachapi Jesushuan mandagrinataca mana shuyancuna. Chaipaj randica Jehová Dios llaquichina punllata apamushpa tucui llaquicunata tucuchichunmi shuyancuna. Ima hora canataca ni pi mana yachanchu. Pero Bibliaca chai punlla ña quichquiyamucushcatami ricuchin (1 Tesalonicenses 5:1-3). Tucui llaquicuna tucurishca qꞌuipaca achca gentecunami causaringa. Paicunaca paraíso Allpapimi causangacuna, jucha illaj cana esperanzatapishmi charingacuna. Chashnallataj ñaupa punllacunapi causarijcuna shina ña mana cutin huañungacunachu. Chaimantami Bibliapica ‘ashtahuan alli causaitami japingacuna’ nin (Hebreos 11:35).

20. ¿Imamantataj ‘Jehová Diosca huañushcacunata ordenpimi causachinga’ ninchij?

²⁰ 1 Corintios 15:23-pica: Jahua pachapi causagrijcunaca ‘huashan huashanmi causaringacuna’ ninmi. ¿Cai versopica imatataj yachanchij? Jehová Diosca cai Allpapi causagrijcunatapish ordenpimi huashan huashan causachinga. Caita yachashpaca cashnachari tapurishun: “¿Cunan punlla huañujcunaca ima horashi causaringacuna? ¿Jesús cai Allpata mandai callarishca qꞌuipallachu causaringacuna? ¿Paicunataca picunataj chasquinga?” Shinallataj, “¿ñaupa punllacunapi Diospaj pueblota alli pushajcunaca causaringachu? ¿Paicunaca Diosta sirvijcuna shuj shinalla causachun ayudangacunachu?” Cutin, “¿Diosta mana rijsishpa huañujcunaca causaringacunachu? ¿Paicunaca ima hora, maipishi causaringacuna?” Shujtaj cosascunamantapishmi yachanata munanchij. Pero chai cosascunamanta tucuita yachasha nishpa mana preocuparinachu canchij. Preocuparinapaj randica Dios imata rurajta ricungacamami shuyana canchij. Dios ima shina rurajta ricushpaca cushillami sintirishun.

21. ¿Imatataj Apóstol Pablo shinallataj ni tucunchij?

²¹ Chai punlla chayangacamaca Diospi tucui shunguhuan cringapajmi ashtahuan esforzarishpa catina canchij. Jesusca: ‘Diosca paipaj yuyaipi cajcunataca causachingatajmi’ nircami (Juan 5:28, 29; 11:23). Shinallataj Jesusca: ‘Diospaj ñaupajpica Abrahampish Isaacpish Jacobpish causajcunami can’ nircami. Chashnami Jehová Dios huañushcacunata causachi pudishcata ricuchirca (Lucas 20:37, 38). Cai tucuita yachashpami ñucanchijpish Pablo shinallataj ni tucunchij. Paica: ‘Tucui huañushcacunatami Taita Diosca causachinga. Ñucapish chai yuyaillatajmi cani’ nircami (Hechos 24:15).