1. ¿Martaca imatataj tucui shunguhuan crirca? (Jahuapi tiyaj dibujota ricui).

MARTACA Jesusta catij, paipaj alli amigami carca. Paipaj turi Lázaro huañushcamantami dimastij llaquirishca carca. Jesusca Martata animangapajmi: “Cambaj turica causaringami” nirca. Caita uyashpaca Martaca asha tranquilami sintirishcanga. Chaimantami: “Huañushcacuna causarina punllapi paipish causarina cashcataca yachanimi” nirca (Juan 11:20-24). Martaca shamuj punllapi Lázaro causarinatami tucui shunguhuan crirca. Shinapish Jesusca chai punllallatajmi Lazarota causachirca.

2. ¿Imamantataj huañushcacuna causarinataca Marta shinallataj crina canchij?

² Ñucanchij yaya mama, cusa, huarmi, abuelo o huahua huañushcamantachari llaquilla canchij. Paicuna cutin causarijpi ugllanata, paicunahuan parlanata, asinatachari munanchij. Jehová Diospish Jesuspish cunan punllapi causachinataca mana shuyanchijchu. Pero Marta shinallatajmi shamuj punllapi huañushcacuna causari tucushcataca  tucui shunguhuan crinchij. ¿Imamantataj huañushcacuna causarinataca crinchij?

3, 4. a) ¿Jesusca Martahuan parlashca punllacamaca picunallatataj causachirca? b) ¿Lázaro ima hora causarinatataj Martaca crirca?

³ Jesusca Naín llajtapimi shuj viudapaj churita causachirca. Pero Martaca Jerusalén llajtapimi causarca. Chaimantami Jesús chai huambrata causachijtaca mana ricushca canga. Shinapish paica chai milagromantaca yachaj chayashcami canga. Shinallataj Jairopaj ushushitapishmi Jesusca causachirca. Achcacunami Jairopaj ushushi huañushcataca yacharcacuna. Pero Jesusca maquimanta japishpami “¡huambra, jatari!” nirca. Chaimi chai rato huambraca jatarirca (Lucas 7:11-17; 8:41, 42, 49-55). Ungushcacunata Jesús jambij cashcataca Martapish Mariapish allimi yacharca. Chaimantami Jesús utca chayashca cajpica Lazaroca mana huañunmanchu carca nishpa yuyarcacuna. ¿Lázaro ña huañushca cajpipish Martaca imatataj crirca? Martaca shamuj punllapi Lázaro causarinatami crirca. Chaimantami ‘huañushcacuna causarina punllapimi Lazaropish causaringa’ nirca. ¿Imamantataj Martaca chaita crirca? ¿Imamantataj ñucanchijpish huañushcacunata Jehová Dios causachinataca crinchij?

⁴ Bibliapi yachashcamantami huañushcacuna causarinataca crinchij. Cai yachaipica causarinamanta ashtahuan yuyaicunatami ricushun. Chashnami ñucanchij huañushca familiacuna, amigocuna causarinata tucui shunguhuan crishun.

5. ¿Lázaro causarinataca imamantataj Martaca tucui shunguhuan crirca?

⁵ Martaca, ñuca turi Lazaroca causaringapishchari mana nircachu. Paica, ñuca turi causarina cashcatatajmi yachani nircami. ¿Imamantataj Martaca chaita nirca? Paica huambraraj cashpami causarina milagrocunamanta paipaj huasipi o sinagogapi yachashca canga. Chai milagrocunamanta Bibliapi ricushun.

6. ¿Martaca ima milagromantataj de seguro yachashcanga?

⁶ Bibliapica profeta Elías Diospaj poderhuan shuj huahuata causachishcatami parlan. Chai punllacunapica shuj viuda huajcha huarmimi Sarepta llajtapi causarca. Paica profeta Eliastami llaquishpa paipaj huasipi chasquishca carca. Chaimantami Jehová Diosca micungapaj harinapish aceitepish manataj tucuringachu nirca. Chashnami viuda huarmipish paipaj shujlla churipish causashpa catircacuna (1 Reyes 17:8-16). Asha tiempo qꞌuipaca chai viudapaj churimi ungushpa huañurca. Chaimantami profeta Eliasca chai huañushca huahuata tuparishpa: “Mandaj ñuca Taita Dioslla, cai huambrapaj almata paillamantaj tigrachi” nishpa mañarca. Chaimi Jehová Diosca Elías mañashcata uyashpa chai huahuapaj almata tigrachirca. Alma nishpaca Eliasca causaimantami parlacurca (1 Reyes 17:17-24-ta leyipai). Cai milagromi punta cutin Bibliapica ricurin. Martaca cai milagromantami de seguro yachashcanga.

7, 8. a) ¿Eliseoca ima shinataj shuj llaquilla huarmitaca ayudarca? b) ¿Eliseo rurashca milagroca imatataj Jehová Diosmanta ricuchirca?

 ⁷ Profeta Eliseopish shuj huahuata causachishcatami Bibliapica parlan. Sunem llajtapimi shuj huarmi paipaj mayorlla cusandij causarca. Paicunaca mana huahuata charircacunachu. Shinapish paicuna Eliseota llaquishpa huasipi chasquishcamantami Diosca shuj huahuata curca. Asha huatacuna qꞌuipaca chai huahuaca huañurcami. Chaimantami mamaca achcata llaquirishca canga. Paipaj cusa cachajpimi paica profeta Eliseota Carmelo urcupi mashcanaman rirca. Carmelo urcucamaca casi 8 horascunatami purishpa rina carca. Chai urcumantami Eliseoca paita sirvij Giezi (Guehazí) runata ñaupachishpa cacharca. Pero paica mana huahuataca causachi tucurcachu. Qꞌuipaca chai huahuapaj mamapish Eliseopishmi huasimanca chayarcacuna (2 Reyes 4:8-31).

⁸ Profeta Eliseo huasiman chayashpaca huahuapaj cꞌuchupimi Diosta mañarca. Chaimi Jehová Diosca huahuata causachirca. Chaita ricushpami huahuapaj mamaca dimastij cushicushcanga (2 Reyes 4:32-37-ta leyipai). Chai huarmica Jehová Diosman Ana mañashcatami yuyarishcanga. Anaca mana huahuata chari tucurcachu. Huahuata charishpaca Diospaj huasipi sirvichunmi cacharca. Chaimantami Anaca: ‘Diosllatajmi Seolpipish churan. Diosllatajmi chaimantapish llujshichin’ nirca (1 Samuel 2:6). Chai huahuata causachishpami huañushcacunata causachi tucushcata Jehová Diosca ricuchirca.

9. ¿Shuj runaca ima shinataj causarirca?

⁹ Eliseo huañushca qꞌuipapishmi shujtaj milagro tiyarca. Eliseoca 50 huatacunatami profeta carca. Shinapish paica ungushpami huañurca. Tiempo pasajpica Eliseota pambashca puestopica ña tullucunallami siricurca. Shuj punllaca huaquin israelitacunaca huañushca runatami pambanaman ricurcacuna. Chaipimi ñapish enemigocuna ricurijpi huañushca runata Eliseota pambashca jutcupi shitashpa callparcacuna. Bibliapica: ‘Huañushca runapaj aicha Eliseopaj tullucunapi tuparijpica causarircami’ ninmi (2 Reyes 13:14, 20, 21). Cai milagrocunamanta yachashpami ñucanchijpish Marta shinallataj Jehová Dios achca poderta charishcata intindinchij. Chaimantami Dios huañushcacunata causachi pudishcataca tucui shunguhuan crinchij.

10. ¿Dorcas huañujpica Pedroca imatataj rurarca?

¹⁰ Mushuj Testamentopipish Diosta sirvijcuna huaquincunata causachishcatami parlan. Naín llajtapi shuj viudapaj churitapish Jairopaj ushushitapish  Jesús causachishcatami yachashcanchij. Asha huatacuna qꞌuipaca apóstol Pedropish Tabita (Dorcas) shuti huarmitami causachirca. ¿Pedroca ima shinataj chai huarmita causachirca? Pedroca huañushca siricun ucuman yaicushpami Taita Diosta mañashpa: “¡Tabita, jatari!” nirca. Chaimi chai rato huarmica causarirca. Pedroca chaipi cajcunapaj ñaupajpimi chai huarmitaca ricuchirca. Dorcasta causachishcata ricushpami achcacunaca Jesusta catijcuna tucurca. Jesusta mushuj catijcunaca paimantami huillai tucurcacuna. Jehová Dios huañushcacunata causachingapaj poderta charishcatapishmi shujtajcunaman parlai tucurcacuna (Hechos 9:36-42).

11. a) ¿Lucasca imatataj nirca huasi ventanamanta urmaj huambramantaca? b) ¿Apóstol Pablo causachijta ricushpaca ima shinataj gentecunaca sintirirca?

¹¹ Cunanca shujtaj runa ima shina causarishcata yachashun. Caitaca achca gentecunami ricurca. Shuj tutaca apóstol Pabloca Troas llajtapimi chaupi tutacama conferenciata cucurca. Troas llajtaca cunan Turquiapimi carca. Eutico shuti shuj jovenmi apóstol Pablopaj conferenciata uyacurca. Paica ventanapi tiyacushpami dormi atijpi quimsa piso huasimanta urmarca. Tal vez Lucasmi puntapi uriyashpa chai huambra huañushcata ricushcanga. Pabloca gradacunata uriyashpami huambrata ugllarishpa causachirca. Chaimi: ‘Huambraca mana huañushcachu, causacunmi’ nirca. Pablo chai huambrata causachijta ricushpami chaipi cajcunaca cushicushcacuna canga (Hechos 20:7-12).

12, 13. ¿Cunanca ima tapuicunatataj cutichigrinchij?

¹² Elías, Jesús, Pedropish Jehová Dios poderta cujpimi huañushcacunata causachirca. Cai milagrocunamanta yachashpami  Marta shinallataj huañushcacuna causarinata cri tucunchij. Jehová Diosmi ñucanchijman causaita curca. Chaimantami huañushcacunata causachi tucushcata crina canchij. Martaca: ‘Huañushcacuna causarina punllapi ñuca turipish causarina cashcataca yachanimi’ nircami. Shinashpaca, ¿Martaca imamantataj shamuj punllapi huañushcacuna causarinataca crirca? ¿Imamantataj Marta shinallataj huañushcacuna causarinataca crina canchij? ¿Milagrocuna mana tiyai punllacunapi huañujcunaca causaringachu?

¹³ Bibliapi parlashca shinaca ñaupa punllapi Diosta sirvijcunapish huañushcacuna causarina cashcatami crircacuna. Paicunamanta yachashpa catishun.

14. ¿Huañushcacuna causarinata yachashpaca Abrahamca imatataj rurarca?

¹⁴ Abrahamca ña yuyaj cashpami Isaactaca charirca. Pero Jehová Diosca: “Cunanca cambaj cꞌuyashca shujlla churi Isaacta pushashpa, Moriah llajtaman ri. Chai urcupi Isaactaca ñucaman cushpa tucui rupachingui” nircami (Génesis 22:2). Abraham ima shina sintirishcata yuyashun. Jehová Diosca paimanca: ‘Cambaj huahua huahuacunamantaca shuj huahuamantami tucui cai Allpapi causajcunaca alli nishca cangacuna’ nircami (Génesis 13:14-16; 18:18; Romanos 4:17, 18). Chai huahuaca Isaacmantami shamuna carca (Génesis 21:12). Pero ¿Abraham Isaacta huañuchijpica ima shinataj chai profeciaca pajtarinman carca? Apóstol Pabloca: ‘Crishcamantami Abrahamca paipaj shujlla churita Diosman cungapaj aparca’ nircami (Hebreos 11:17-19-ta leyipai). Abrahamca Jehová Dios paipaj churita chai rato causachinataca mana shuyashcachu canga. Pero Jehová ima hora cashpapish causachinatami seguro cashcanga.

15. ¿Jobca imatataj tucui shunguhuan crirca?

 ¹⁵ Diosta sirvij Jobpish shamuj punllapi huañushcacuna causarinatami crirca. Paica, ‘shuj yurata pꞌitijpipish cutin retoñanllami. Pero runa huañushpaca, maipi mana ricurinchu’ nircami (Job 14:7-12; 19:25-27). Shuj runa huañushpaca mana paillataj pambashcamanta llujshishpa causarinchu (2 Samuel 12:23; Salmo 89:48). Pero Diosca huañushcacunata causachi tucunmi. Chaimantami Jobca, Jehová Diosca ñucataca causachingami nirca (Job 14:13-15-ta leyipai). Ima hora causarinataca Jobca mana yacharcachu. Pero causaita cuj Dios paipaj poderhuan causachinatami tucui shunguhuan crirca.

16. ¿Shuj angelca ima shinataj Danieltaca animarca?

¹⁶ Cunanca Danielmantapish parlashun. Paica achca huatacunatami Diosta sirvirca. Chaimantami Jehová Diosca paita mana saquirca. Shuj cutinca, shuj ángel ricurishpami Danielmanca: “Canca yallitaj cꞌuyashcami cangui, ama manchaichu. Sumaj causaica canhuan cachun. Fuerzata japishpa sinchita shayari” nirca (Daniel 9:22, 23; 10:11, 18, 19).

17, 18. ¿Jehová Diosca Danielmanca imatataj nirca?

¹⁷ Danielca casi 100 huatacunatami charirca. Paica ña huañunalla cashpami, shamuj punllapica imashi tucusha nishpa yuyashcanga. Danielca ¿causarinata shuyashcachu canga? Ari. Paica huañushcacuna samaricuj shinalla cashcatami yacharca. Shinallataj huañujpica imata rurana, imata yuyana, imata yachanapish chaipi tucurina cashcatami yacharca (Eclesiastés 9:10). Chaimantami Jehová Dios “canca samaringuimi” nijpica Danielca cushilla sintirishcanga (Daniel 12:13).

¹⁸ Ima hora ima punlla Daniel causarinataca angelca mana huillarcachu. Pero, “tucuri punllacuna pajtajpimi can japina cashcata chasquingapaj jataringui” nircami. Chaita uyashpami Danielca causaringapaj achca tiempo pasana cashcata intindirca. Chai punlla chayangacamaca Danielca huañushpami samarina carca.

19, 20. a) ¿Martaca imamantataj huañushcacuna causarinataca tucui shunguhuan crirca? b) ¿Catij temapica imatataj yachashun?

¹⁹ Martaca paipaj turi Lázaro causarinatami tucui shunguhuan crirca. Chaimantami, ‘causarina punllapi paipish causaringami’ nirca. Danielman Jehová ima nishcata yachashpa, Martapish Jesusman imata cutichishcata yachashpami huañushcacuna causarinataj cashcataca tucui shunguhuan crinchij.

²⁰ Cai yachaipica ñaupa punllacunapi huañushcacuna causarishcatami ricushcanchij. Shinallataj Diosta huaquin sirvijcunamantami yachashcanchij. Paicunaca shamuj punllapi huañushcacuna causarinatami crircacuna. Shinapish yuyashunchij. ¿Achca tiempo pasashca cajpipish huañushcacuna causaringami nishca shimicunaca pajtaringachu? Chashna cajpica Marta shinallatajmi huañushcacuna causarinata seguros cashun. Pero, ¿ima horataj causaringacuna? Caitaca catij temapimi yachashun.