DIANA huarmica casi 80 huatacunatami charin. Paipaj cusapish shuj ungüitami umapi charirca. Cai ungüica umapi tiyaj yuyaitami asha asha chingachij carca. Doctorcunaca cai ungüitaca alzheimer nishpami rijsincuna. Paipaj cusaca último huatacunapica mayorcuna causana huasipimi causarca. Dianapaj ishqui churicunapishmi huañurca. Shinallataj paipaj pechopipishmi cáncer japirca. Huauqui panicunaca Dianaca chashna llaquicunata charishpapish tandanacuiman, huillanamanpish cushilla purijtami ricunchij nincunami.

Huauqui Johnpish casi 43 huatacunatami superintendente shina sirvirca. Paica paiman mingashcata o asignaciontaca shungumantami pajtachij carca. Pero paipaj shuj familia ungujpimi paita cuidangapaj cai asignacionta saquirca. Shuj punllaca jatun tandanacuipimi paita achca huatacunata rijsij huauqui panicunahuan tuparca. Cai huauqui panicunaca paica ima shinami ñaupa punllacunapi cushilla caj layallatajmi cunanpish cushilla can nircacunami.

¿Dianapish Johnpish cushilla causangapajca imatataj rurancuna? ¿Ima shinataj llaquicunahuan sufricushpapish o ñucanchij munashca asignacionta saquishpapish cushilla causai tucunchij? Bibliapica: “Cashcata ruraj runaca, Mandaj Dioshuanmari cushicunga” ninmi (Salmo 64:10). Cai versota alli intindingapajca ima cushilla causaita cuj cashcata, shinallataj ima mana cushilla causaita cuj cashcatami ricushun.

¿Causaipica imacunataj cushicuita cun? Cazarana, huahuata charina o Diosta sirvingapaj shuj asignacionta cujpi chasquinami cushi causaita cun. Chashna sintirinaca normalmi can. Jehová Diosmi chai regalocunata cushca. Paimi matrimoniota callarichirca, huahuacunata charichunpish rurarca. Paipaj organizacionpipish huaquin trabajocunata rurachunmi mingan (Génesis 2:18, 22; Salmo 127:3; 1 Timoteo 3:1).

Pero huaquinpica asha tiempocamallami contento causanchij. ¿Imamanta shina ninchij? Cusa o huarmi huañujpi o shujtajhuan huainayajpimi llaquicuna ricurin (Ezequiel 24:18; Oseas 3:1). Huaquinpica huahuacunaca yaya mamatapish Diostapish mana cazuncunachu. Maipicarin cai  huahuacunataca congregacionmantami llushichishca can. Por ejemplo, ñaupa tiempopish profeta Samuelpaj churicunaca mana Dios munashca shinachu paita sirvijcuna carca. Rey Davidpish juchapi urmashcamantami familiatapish llaquichirca (1 Samuel 8:1-3; 2 Samuel 12:11). Cashna shina problemacunahuan cashpaca cushilla causacushpapish llaquillami sintirinchij.

Ñucanchij familiacuna ungushcamanta cuidana o mantinina tucujpi o Diospaj organizacionpi cambiocuna tiyajpichari ñucanchijman mingashca asignacioncunataca ña mana pajtachi tucunchij. Chaimantami achca huauqui panicunapish paicunaman mingashca asignacionta saquishcacuna. Pero chai asignación cushi causaita cushcamantami achcata extrañancuna.

Caicunaca ñucanchijmanca ashacamalla cushicuita cushcatami ricunchij. Pero Samuelpaj, Davidpaj, shujtajcunapaj causaicunami ima llaquicunahuan sufricushpapish o cambiocuna ricurijpipish cushilla causai pudishcata ricuchin.

Jesusca ima shina cushilla causana cashcataca allimi yacharca. Chaimi jahua pachapi cashpaca paica Diospaj ñaupajpica punllanta cushilla carca (Proverbios 8:30). Pero cai pachaman shamushpaca sinchi problemacunahuanmi chꞌimbapurarca. Chashna jahuapish Diospaj munaita rurashpami contento pasaj carca (Juan 4:34). Jesusca pai huañuna horas ashalla illajpi, nanaicunata ahuantangapajca ¿imatataj rurarca? Bibliapica: “Cushicuna cashcata yachashpami paita asicujpipish mana pingarishpa [caspipi, NM] huañurca” ninmi (Hebreos 12:2). Cunanca cushilla causangapaj Jesús imallata nishcata yachashunchij.

Shuj punllaca 70 discipulocunaca huillanaman rishpami gentecunamanta demoniocunata llujchishpa dimastij contento tigramurcacuna. Chaimi Jesusca: “Cancunaca supaicunata cazuchishpallaca ama cushicuichijchu. Ashtahuanpish cancunapaj shuticuna jahua pacha libropi quillcashca cashcamanta cushicuichij” nirca (Lucas 10:1-9, 17, 20). Jehová Diospaj ñaupajpi alli ricurinami ashtahuan valishca can. Chaimi pai mingashca trabajotapish yalli cushicuita cun.

Shujtaj punllaca Jesusca mirga gentecunamanmi yachachicurca. Chaipimi shuj judía huarmica cai alli yachachijpaj mamaca cushillami canga nishpa caparirca.  Pero Jesusca: “¡Diospaj Shimita uyashpa cazujcunami, ashtahuan cushichishcacuna!” nircami (Lucas 11:27, 28). Yaya mamacunaca paicunapaj huahuacuna alli shungu cajpica contentomi sintirincuna. Shinapish Diospaj munaita rurana, paihuan alli amigo canami ashtahuan cushicuita cun.

Diospaj amigo cashpallami cushilla causaita charishun. Problemacuna ricurishpapish chai cushicuitaca mana quichungachu. Ashtahuancarin imatapish ahuantashpa Diosta sirvinata mana saquishpaca ashtahuanmi cushilla causashun (Romanos 5:3-5). Diosca paipi shunguta churajcunamanca paipaj espíritu santotapishmi cun. Cai espiritupaj shuj granoca cushi canami can (Gálatas 5:22). Chaimantami Salmo 64:10-pica: “Cashcata ruraj runaca, Mandaj Dioshuanmari cushicunga” ninmi.

Cai tucuimanta yachashpami pani Dianapish huauqui Johnpish imamanta cushilla causanata mana saquishcata intindinchij. Dianaca: “Shuj uchilla huahua paipaj yaya mamapi paca tucuj shinami ñucaca Diospi paca tucurcani. Shinallataj cushilla huillashpa catichunmi Diosca ñucata ayudashpa bendiciashca” nircami. Johnpish paipaj asignacionta saquishca huasha Diosmanta cushilla huillashpa catingapajca ¿imatataj rurarca? Paica: “1998 huatapica Escuela de Entrenamiento Ministerialpi yachachij cachunmi ñucata nombrarca. Chaimi Bibliata, publicacioncunatapish tucuita alli estudiana carcani” ninmi. Johnpish paipaj huarmipish Dios mingashcataca tucui shunguhuanmi pajtachijcuna carca. Chaimantami yachachichun mingajpica mana sinchi cashcata ricurcacuna. Ashtahuanpish chaita pajtachishcamantami mana arrepintirincuna.

Achcacunami Salmo 64:10-pi nishcacuna cierto cashcata ricushcacuna. Shuj cusa huarmica Estados Unidos llajtapi saquirij Betelpimi 30 huatacunata yalli sirvircacuna. Paicunataca precursores especiales shina sirvichunmi nombrarcacuna. Chaimi paicunaca: “Valorashca asignacionta saquishpaca llaquillami sintirinchij. Pero mana llaquilla causashpa catinachu canchij” nircacuna. Chai qꞌuipaca cai cusa huarmica mushuj congregacionman chayashpami huauqui panicunahuan ña huillai callarircacuna. Paicunaca: “Diosta mañacushpaca tucuitami huillarcanchij. Ñucanchij mañashcata ima shina cutichijta ricushpaca animarishpami contento sintirircanchij. Congregacionman chayashca qꞌuipallami huauqui panicunapish precursorcuna tucurca. Bibliamanta ishqui yachacujcunapish paicunapaj causaipi cambiocunata rurajta ricushpami cushilla sintirircanchij” nincunami.

Mana siemprechu contento causashun. Mai ratoca triste tristellami purishun. Pero Jehová Diosca Salmo 64:10-pica: “Cashcata ruraj runaca, Mandaj Dioshuanmari cushicunga” ninmi. Chashna nishpaca Diosca ima llaqui atrazo japijpipish paimanta mana caruyajpica cushilla causaita charinguichijmi nicuj layami can. Chaimantami paipi confiana canchij. Yayitu Diosca ‘mushuj jahua pachatapish mushuj cai pachatapishmi’ rurasha nin. Chai punlla chayamuchunmi shuyacunchij. Chai punllacunapica Diosta sirvijcunaca pai tucuita rurashcamanta, jucha illaj cashcamantapishmi para siempre cushilla causashun (Isaías 65:17, 18).

Shinallataj chaipica ña mana ungüihuan causashunchu. Ashtahuanpish tucui punllacunami achca fuerzata charishun. Ñaupaman mana alli yuyaicuna o llaquichij yuyaicuna pasashcatapish ña mana yuyarishunchu. Jehová Diosca “ñaupaman imapish tucushcataca mana yuyaringacunachu. Pipaj yuyaimanpish chaicunaca ña mana shamungachu” ninmi. Cꞌuyashca familiacunapish amigocunapish causarijpimi paicunahuan tigra cushilla causashun. Jesusca 12 huatata charij huambratami causachirca. Chaimi paipaj yaya mamaca dimastij contento sintirircacuna. Paicuna shinami millones gentecunapish mana nunca yuyashca shina cushilla sintirishun (Marcos 5:42). Chai punllacunapica tucui gentecunami cashcata rurashpa, huiñai huiñaicama ‘Mandaj Dioshuan cushicushun’.