1, 2. ¿Hebreos 13:4-pi yuyaicunata ricushpaca imatataj rurasha ninchij?

TUCUICUNAMI Jehová Diostaca respetasha ninchij. Paitaca tucuita rurashcamantami respetana canchij. Paita respetajpica ñucanchijtapish respetangami (1 Samuel 2:30; Proverbios 3:9; Apocalipsis 4:11). Yayitu Diosca gentecunatapish respetachunmi munan. Por ejemplo, Diosca gobiernopaj autoridadcunata respetanami canguichij ninmi (Romanos 12:10; 13:7). Pero chaitapish yallica matrimoniota o cazarashcatami respetana canchij.

² Apóstol Pabloca: “Cazaranaca tucuicuna alli nishca cachun. Paicuna chayarinacunapish chuya cachun” nishpami quillcarca (Hebreos 13:4). Pablo chashna nishpaca cazarana valishca cashcallataca mana nicurcachu. Ashtahuanpish Diosta sirvijcunaca cada uno matrimoniota valishca cashcata ricuchunmi quillcarca. Can cazado cashpaca ¿cambaj matrimoniota chashnachu ricungui?

3. ¿Jesusca matrimoniomantaca ima consejotataj curca? (Jahuapi tiyaj dibujota ricui).

³ Matrimonio valishca cashcata ricushpaca Jesuspaj  ejemplotami caticunchij. Fariseocunaca Jesustaca divorciarinamantami tapurca. Chaimi Jehová Dios imata yuyashcata ricuchingapajca paica: “Chashna cashcamanta cꞌarica, yaya mamata saquishpa, paipaj huarmihuan tandanacushpa, ishquindijmanta shuj aichallami tucunga”. “Chashna cashcamanta Taita Dios tandachishcataca, ni pi amataj chꞌicanyachichun” nirca (Marcos 10:2-12-ta liyipai; Génesis 2:24).

4. ¿Maijantaj Diospaj munai carca?

⁴ Jesusca Jehová Dios matrimoniota callarichishcataca allimi yacharca. Chaimantami Jesusca matrimonioca tucui vidapajmi can nirca. Shinallataj Yaya Diosca Adán Evataca divorcianacushpa matrimoniota chaipi tucuchina cashcata mana nircachu. Ashtahuanpish paica “ishquindij” tucui vida shuj shinalla causachunmi munarca.

5. ¿Huañui tiyajpica matrimoniohuanca imataj tucun?

⁵ Adán juchata rurajpica huaquin cambiocunami tiyarca. Por ejemplo, paipaj juchamantami huañui tiyarca. Chaimantami cusa huarmica mana tucui vida causai pudircacuna. Apóstol Pablopish cusa o huarmi huañujpica matrimonioca chaipimi tucurin. Chaimi causacujrajca shujtajhuan cutin cazarai tucun nirca (Romanos 7:1-3).

6. ¿Moisesman cushca leypica Diosca ima layataj matrimoniota ricuj carca?

⁶ Jehová Diosca israelitacunaman cushca leypica matrimoniomantami ashata parlarca. Chai leypica cusaca ishqui o yalli huarmicunahuan cazarachun o paita sirvij huarmicunahuan huahuata charichunmi saquirca. Israelitacunaca Dios chai leyta manaraj cujpimi ña chashna causajcuna carca. Pero Diosca huarmicunata, huahuacunata ama maltratachunmi leypica huaquin yuyaicunata churarca. Por ejemplo, shuj israelita paita sirvij huarmihuan cazarashpa, qꞌuipa shujtaj huarmihuan cazarashpaca ¿imatataj rurana carca? Punta huarmimanca cusaca micunata, churanata cushpami catina carca. Paihuanca chayarinacushpapishmi catina carca. Diosca chashna cuidachunmi  mandarca (Éxodo 21:9, 10). Cunan tiempoca ñucanchijca chai ley ucupi ña mana canchijchu. Pero Diospajca matrimonio achca valishca cashcatami ricunchij. Chaimantami pai shina valorasha ninchij.

7, 8. a) ¿Deuteronomio 24:1-pi nishca shinaca Moisesman cushca leypica imatataj permitirca? b) ¿Diosca divorciarinamantaca imatataj yuyan?

⁷ ¿Moisesman cushca leypica divociarinamantaca imatataj nirca? Diosca matrimoniotaca achcata valorashpami catirca. Shinapish israelitacuna divorciarichunmi permitirca (Deuteronomio 24:1-ta liyipai). Cusa o huarmica ‘ima mana allita o mapata ricushpami’ divorciari tucurca. ¿Ima ruraitaj mana alli carca? Leypica mana huillanchu. Pero chai ruraica pinganayai o juchami cashcanga (Deuteronomio 23:14). Jesuspaj punllacunapica achca judiocunami imamantapish yangamanta divorciarijcuna carca (Mateo 19:3). Ñucanchijca mana paicuna shina casha ninchijchu.

⁸ Profeta Malaquiaspaj tiempopica achca cꞌaricunami paicunapaj huarmicunamantaca divorciarijcuna carca. ¿Imamanta? Diosta mana sirvij cꞌaricunaca joven huarmicunahuan cazarasha nishpami chaita rurajcuna carca. Pero Jehová Diosca chai ruraimanta imata yuyashcata ricuchingapajmi: “Quiquin huarmita shitajcunata [divorciarijcunata, NM] pꞌiñanimi” nirca (Malaquías 2:14-16). Chashna nishpami Diosca cusaca “paipaj huarmihuan tandanacushpa ishquindijmanta shuj aichallami tucunga” nishca yuyaita mana cambiashca carca (Génesis 2:24). Jesuspish paipaj yayapaj yuyaita apoyashcata ricuchingapajmi: “Dios tandachishcataca, ni pi amataj chꞌicanyachichun” nirca (Mateo 19:6).

9. ¿Marcos 10:11, 12-pica Jesusca imatataj yachachirca?

⁹ Huaquincunaca ¿Diosta sirvijcunaca divorciarishpa tigra cazarai tucunchijchu? nishpachari tapurincuna. Jesusca divorciarinamanta imata yuyashcata ricuchingapajca: ‘Maijan cashpapish paipaj huarmimanta divorciarishpa shujtajhuan cazarajca huainayanmi. Chashna rurashpaca paipaj huarmitapish llaquichinmi. Huarmipish cusamanta divorciarishpa shujtajhuan cazarashpaca huainayanmi’ nircami (Marcos 10:11, 12, NM; Lucas 16:18, NM). Chashna nishpami Jesusca matrimoniota achcata respetashcata ricuchirca. Paica shujtajcunapish chashnallataj yuyachunmi munarca. Pipish shuj pretextota churashpa, paipaj alli cusamanta o paipaj alli huarmimanta divorciarishpa shujtajhuan cazarajca huainayashcatami ricuchij carca. ¿Imamanta shina ninchij? Diospaj ñaupajpica divorcioca matrimoniotaca mana chaipichu tucuchin. Paipajca ishquindijmi ‘shuj aichalla’ shina catin. Shinallataj Jesusca maijan cusapish huarmimanta divorciarijpica shujtajhuanmi huainayachin nircami. ¿Imamanta shina nirca? Chai tiempopica divorciarishca huarmi pailla mana mantiniri tucushcamantami shujtaj cusata charisha  ninman carca. Chai qꞌuipa cazamientoca huainayashca layallatajmi carca.

10. ¿Diosta sirvijcunaca imamantataj divorciarishpa cutin cazarai tucun?

¹⁰ Jesusca imamanta divorciari tucushcatami huillarca. Paica: ‘Maijanpish paipaj huarmita manapish huainayajpi shitashpa [divorciarishpa, NM] shujtajhuan cazarajca huainayanmi’ nircami (Mateo 19:9). Jesusca Sermón del Montepipish chaillatatajmi nirca (Mateo 5:31, 32). Ishqui cutinmi Jesusca ‘huainayanamanta’ parlarca. ¿Huainayana shimica imatataj nisha nin? Manaraj cazarashpa huainayana, cazarashca jahua shujtaj cꞌarihuan o huarmihuan huainayana, cullquita charina raiculla huainayana, cꞌaripura huarmipura huainayana, animalcunahuan huainayanami can. Por ejemplo, shuj cazado cꞌari shujtajhuan huainayajpica huarmica divorciarinata o mana divorciarinatami decidi tucun. Divorciarijpica Diospaj ñaupajpica libresmi cancuna.

11. Cusa o huarmi shujtajhuan huainayajpipish mana culpata charijca ¿imamantataj mana divorciarinata decidi tucun?

¹¹ Shujtajhuan huainayajpica mana culpata charij cusa o huarmica divorciarinapaj obligado cashcataca Jesusca mana nircachu. Por ejemplo, cusa shujtajhuan huainayashca cajpipish huarmica paihuan causashpa catinatami decidi tucun. ¿Imamanta? Paita tucui shunguhuan cꞌuyashcamantachari perdonanata munanga. Shinallataj paicunapaj matrimoniopi mejorangapajchari achca esfuerzota rurasha ninga. Cutin huarmi divorciarishpa, mana tigra cazarashpaca huaquin problemacunami tiyanga. Por ejemplo, ¿ima shinataj pailla mantiniringa? ¿Ima shinataj cusahuan chayarina munaitapish pajtachinga? ¿Sololla sintirishpaca ima shinataj causanga? O huahuacunata charishpaca ¿paicunata Diospaj ñanpi huiñachinaca sinchichu canga? (1 Corintios 7:14). Mana culpata charij cusa o huarmi divorciarishpaca cai llaquicunata chꞌimbapurana cashcatami ricunchij.

12, 13. a) ¿Oseaspaj matrimoniohuanca imataj tucurca? b) ¿Oseasca imamantataj Gomerta paipaj huasiman cutin aparca? c) ¿Cai experienciaca matrimoniomantaca imatataj yachachin?

¹² Profeta Oseaspaj causaipi ima tucushcami Dios matrimoniota ima shina ricushcata yachachin. Diosca Oseastaca Gómer nishca huarmihuan cazarachunmi mandarca. Cai huarmica ‘huainayaj huarmimi’ carca. Paica ‘huainayashcamantami shujtaj huahuacunata’ charigrirca. Gomerca Oseashuanca shuj huahuatami charirca (Oseas 1:2, 3). Qꞌuipaca cai huarmica tal vez shujtaj cꞌarihuanmi shuj ushushita, shuj churita charishcanga. Chashna tauca cutin shujtajcunahuan huainayajpipish Oseasca paimanta mana divorciarircachu. Tiempohuanca cai huarmica Oseastami shitashpa rirca. Qꞌuipaca shuj esclavami tucurca. Pero Oseasca paitami randirca (Oseas 3:1, 2). Oseaspaj causaihuanmi Diosca paipaj llajta shujtaj dioscunata adorajpipish cada rato perdonaj cashcata ricuchirca. ¿Caimantaca imatataj yachacunchij?

¹³ Diosta sirvij cusa o huarmi shujtajhuan huainayajpica mana culpata charijca shuj decisiontami agllana can. Jesusca mana culpata charijca divorciarishpa shujtajhuan cazarai tucunmi mana cashpaca perdonai tucunmi nircami. Chaita ruranaca mana juchachu can. Bibliapica Oseasca paipaj huarmita cutin huasiman apashcatami huillan. Chai punllamantami cai huarmica shujtaj cꞌarihuan mana chayarina carca.  Oseashuanpish shuj tiempotami mana chayarircacuna (Oseas 3:3, nota, nwt-E). Pero qꞌuipaca chayarinacurcami. Caica Jehová Dios paipaj pueblota cutin chasquishpa alli tucusha nishcatami ricuchirca (Oseas 1:11; 3:3-5). ¿Caimantaca imatataj yachacunchij? Mana culpata charij paipaj cusahuan o huarmihuan catinata decidishpa, shinallataj paihuan cutin chayarinata decidishpaca perdonashcatami ricuchin (1 Corintios 7:3, 5). Chaita rurashpaca ña imamanta mana divorciari tucunchu. Ashtahuanpish chai punllamantami matrimoniotaca Dios ricushca shina ricungapaj ishquindij esforzarina can.

14. ¿1 Corintios 7:10, 11-pi nishca shinaca huaquinpica matrimoniohuanca imataj tucun?

¹⁴ Tucui Diosta sirvijcunaca Jehová Dios shina Jesús shina matrimoniota respetangapajmi esforzarina canchij. Pero juchayujcuna cashcamantami maijancunaca mana respetancuna (Romanos 7:18-23). Chaimantami ñaupa tiempopipish Jesusta catij cusa huarmicuna paicunapaj causaipi problemacunata charishcata ricushpaca mana mancharinchij. Apóstol Pabloca “huarmica cusata ama shitachun” nircami. Pero huaquincunaca paicunapaj cusamanta o huarmimantami separarijcuna carca (1 Corintios 7:10, 11-ta liyipai).

15, 16. a) Problemacunata charishpapish ¿cusa huarmica imatataj rurana can? b) ¿Cusa huarmica imamantataj alli tucuna can? c) ¿Shuj testigo Diosta mana sirvijhuan cazarashca cashpaca ¿imatataj rurana can?

¹⁵ Pabloca imamanta cusa huarmi separarijcuna cashcataca mana huillarcachu. Pero cusaca mana huainayashcachu carca. Huainayashca cajpica mana culpata charijca divorciarishpami tigra cazarai tucurca. Ashtahuanpish Pabloca separarij huarmitaca cusahuan alli tucungui mana cashpaca shujtajhuan ama cazarangui nircami. ¿Imamanta? Ishquindijmi Diospaj ñaupajpica shujlla aicha shina carcacuna. Chaimantami Pabloca mana huainayashca cajpica ima problemacuna tiyajpipish cutin alli tucuichij nishpa aconsejarca. Shinallataj cusa huarmica ancianocunapaj ayudatami mañai tucurcacuna. Pero ancianocunaca ni maijanpaj lado mana tucunachu carca. Chaipaj randica Bibliahuanmi consejocunata cuna carca.

¹⁶ Shinapish shuj testigo Diosta mana sirvijhuan cazarashca cajpica ¿imataj tucunga? Ima problemacuna tiyajpica ¿separarinallachu canga? Ña ricushca shinaca Bibliapica huainayajllapimi divorciari tucuncuna ninmi. Pero imacunallamanta separari tucushcataca mana huillanchu. Apóstol Pabloca: “Maijan crij huauquipaj huarmi mana crij cashpapish paihuan causasha nijpica, ama  shitachun ninimi” nircami (1 Corintios 7:12, 13). Cai yuyaicunaca cunan punllacamami valishca can.

17, 18. Diosta sirvij huaquin cusa huarmicunaca sinchi problemacuna ricurijpipish ¿imamantataj separarinata mana decidishcacuna?

¹⁷ Huaquinpica ‘mana crij cusaca’ paipaj huarmihuan causanataca mana munanchu. Chaimantachari huarmitaca dimastij maltratan. Chaimi huarmica paipaj saludta o causaita peligropi churashcata yuyan. Shinallataj cusaca familiatapish manachari mantininata munan. Huarmitapish Diosta sirvichunca manachari saquin. Chashna tucujpimi Diosta sirvij huaquin huarmicunaca cusacuna paicunahuan causanata ña mana munashcamanta separarinata decidincuna. Pero Diosta sirvij shujtaj huarmicunaca mana chaita rurashcacunachu. Ashtahuanpish imatapish ahuantashpami matrimoniopi imapi mejorana cajpica achcata esforzarishcacuna.

¹⁸ Cusa huarmica separarishpapish cazadocunami can. Ñajaman nishca problemacunata chꞌimbapurashpami catingacuna. Pero apóstol Pabloca tandalla causashpa catichunmi shujtaj consejota curca. Paica: ‘Mana crij cusaca crij huarmimantaca, jucha illajta rurashcami. Shinallataj mana crij huarmipish crij cusamantaca chashnallatajmi. Mana chashna cajpica, cancunapaj huahuacunaca mapacunami canman. Ashtahuanpish cunanca, paicunapish jucha illajcunami can’ nircami (1 Corintios 7:14). Diosta alli sirvijcunaca sinchi llaquicunata chꞌimbapurana cashpapish paicuna cazarashca mana testigo cusahuan o huarmihuan causashpa catinatami decidishcacuna. Chaimantami maijancunaca chai sacrificiocunata rurashcamanta cusa o huarmi Diosta sirvi callarijpica cushilla sintirishcacuna (1 Corintios 7:16-ta liyipai; 1 Pedro 3:1, 2).

19. ¿Imamantataj congregacionpica achca alli cusa huarmicuna tiyan?

¹⁹ Jesusca divorciarinamantami parlarca. Cutin Apóstol Pabloca separarinamantami Diospaj consejocunata curca. Ishquindijmi Diosta sirvijcuna matrimoniota respetachun munarcacuna. Cunan punllacunaca muyundij Allpapi tiyaj congregacioncunapimi alli cusa huarmicuna tiyan. Ñucanchij congregacionpipish achca cusa huarmicunami caishuj chaishuj cꞌuyanacushpa, respetanacushpa cushilla causacuncuna. ¿Manachu shujtaj cusa huarmicunapish cashna shina causashpa matrimoniota valorai pudincuna? Ari. Achca cusa huarmicunaca: “Cꞌarica, yaya mamata saquishpa, paipaj huarmihuan tandanacunga. Ishqui cashcamanta shujlla aichami tucunga” nishcata paicunapaj causaipi pajtachishpa, cierto cashcata ricuchishcamantami cushilla sintirinchij (Efesios 5:31, 33).