1, 2. Cambaj causaipi ima importante cashcata agllagricushpaca ¿imamantataj Dios mandashca shina rurana cangui? (Jahuapi tiyaj fotocunata ricui).

CANCA jovenchari cangui. Chaimantachari shamuj punllapi ima shina causanata yachangapaj achca consejocunata chasquishcangui. Por ejemplo, profesorcuna o shujtaj gentecunaca achca cullquita ganangapajca, shuj carreratami japina cangui ninchari. Yayitu Diospish causaipi ima minishtirishcallata charichunca colegiopi alli estudiante cachunmi munan (Colosenses 3:23, NM). Pero paica causaipi ima ashtahuan importante cashcata agllana horasca paipaj Shimipi ricushpami agllachun munan. Chaita rurashpami cai tucuri punllacunapi Dios imata munashcata yachangui (Mateo 24:14).

² Jehová Diosca millai gentecunahuan ñalla ima tucuna cashcata, chaipaj ashalla tiempo illashcataca allimi yachan. Chaitaca mana cungarinachu cangui (Isaías 46:10; Mateo 24:3, 36). Diosca cantapish allimi rijsin. Paica imalla cosascuna cushilla causaita cuj cashcata, shinallataj imalla llaquilla causaita cuj cashcataca allimi yachan. Chaimantami  gentecunapaj consejocuna alli shina ricurijpipish Biblia yachachishca shina mana aconsejajpica mana alli consejocuna can (Proverbios 19:21).

3, 4. Diablopaj consejota uyashcamantaca Adán Evapish paicunapaj huahua huahuacunapish ¿imataj tucurcacuna?

³ Ñaupa punllacunamantami mana alli consejocuna tiyashca. Diablomi puntaca gentecunaman mana alli consejota curca. Paica Adán Evataca cushilla causangapajca cancunallatajmi causaipi imata ruranata agllana canguichij nircami (Génesis 3:1-6). Pero Diabloca paillapimi yuyacurca. Adán, Eva, paicunapaj huahuacunapish Jehová Diosta adoranapaj randica paita adorachunmi munarca. Shinapish Diabloca ¿imatataj paicunaman cushca carca? Ni imata. Diosmi tucuita cushca carca. Por ejemplo, matrimoniota, Edén huertata, huiñai huiñaita causachun jucha illaj cuerpotapishmi cushca carca.

⁴ Adán Evaca Diosta mana cazushcamantami paimanta caruyarcacuna. Qꞌuipaca shuj sisa shina chaquirishpami yuyajyashpa huañurcacuna. Paicunapaj huahua huahuacunapish juchamantami llaquicunata aparcacuna (Romanos 5:12). Chashna jahuapish achcacunami Diosta mana cazushpa, paicuna munashca shina causashpa catincuna (Efesios 2:1-3). ¿Chashna causashcamantaca imataj tucushcacuna? Bibliapica ima consejocuna Dios mana munashca shina cajpica mana yachaisapata ruraj cashcatami ricuchin ninmi (Proverbios 21:30).

5. a) ¿Jehová Diosca imatataj alli yacharca? b) ¿Dios yachashca mana panda cashcataca ima shinataj ricunchij?

⁵ Jehová Diosca tauca gentecunapish, jovencunapish paita rijsishpa, sirvisha nishcataca allimi yacharca (Salmo 103:17, 18; 110:3). Cai jovencunataca Diosca achcatami cꞌuyan. Canca ¿chai jovencunapuramantachu cangui? Chashna cajpica Yaya Dios tucui ima allicunata cujpimi cushilla causacungui. Salmo 103:5-pica: “Paimari tucui causaipi allillata cushpa cushichihuan” ninmi. ¿Chai allicunaca maijantaj can? Dios cushca yachaicuna o publicacioncuna, alli amigocuna, Diosta ashtahuan sirvina, imapi libres canapishmi can. Caicunamantami cunanca yachashun (Proverbios 10:22).

6. a) ¿Imamantataj Yaya Diosmanta yachana canchij? b) ¿Jehová Diosca ima shinataj ñucanchijman yachachin?

⁶ Animalcunaca Diosmanta yachanata mana minishtincunachu. Pero ñucanchijca Diosmanta yachanatami minishtinchij (Mateo 4:4). Pai ima nishcata uyashpaca yachaisapami tucushun, shinallataj cushillami causashun. Jesusca: “Espiritupi huajcha cajcunaca cushichishcami” nircami (Mateo 5:3). Jehová Diosca paimanta yachachunca Bibliatami cushca. Shinallataj “alli cazuj alli yuyaiyuj” sirvij huauquicuna publicacioncunahuan yachachichunmi paicunata agllashca (Mateo 24:45, QC, 1989). Diosca cai publicacioncunahuanmi paipi tucui shunguhuan crichun, paipaj ñaupajpipish alli ricurichun ayudan (Isaías 65:13, 14).

7. ¿Dios cushca publicacioncunata yachashpaca imatataj cuentata cungui?

 ⁷ Dios cushca publicacioncunata liyishpaca yachaisapa tucushpami ima llaquicunamantapish cuidaringui (Proverbios 2:10-14-ta liyipai). Por ejemplo, huaquincunaca Diosca mana tiyanchu nincunami. Shujtajcunaca cushilla causangapajca charij tucunami canchij nincunami. Pero publicacioncunata liyishpa yachaisapa tucushpallami chai nishcacuna llulla cashcata cuentata cungui. Chaimantami publicacioncunata yachangapaj esforzarina cangui. Shinami Jehová Dios canta cꞌuyashcata, alli causachun munashcata canllataj cuentata cungui (Salmo 34:8; Isaías 48:17, 18).

8. ¿Cunan Diospajman cꞌuchuyajpica paica shamuj punllapica imatataj ruranga?

⁸ Diablopaj ruraicunaca ñallami chingaringa. Chai punllacunapica Jehovallami ñucanchij ima minishtishcata cushpa cuidanga (Habacuc 3:2, 12-19). Chaimanta, cunanmi Yaya Diospajman cꞌuchuyashpa, pai nishcacunapi tucui shunguhuan crina cangui (2 Pedro 2:9). Shinami ima llaquicuna o problemacuna tiyajpipish David shina sintiringui. Paica: “Ñucaca tucui imapipish Mandaj Diostami puntapi churani. Chaimanta pai ñuca alli ladopi cajpi, pi mana cuyuchingachu” nircami (Salmo 16:8).

9. a) Juan 6:44-pi yachachishca shinaca, ¿Jehová Diosca imatataj ruran? b) ¿Testigocunata rijsinaca imamantataj diferente can?

⁹ Canca Diosta mana sirvij runahuan tupashpaca ¿paitaca allichu rijsingui? Tal vez paipaj shutillatachari yachangui. Pero shuj testigohuan tupashpaca Diosta cꞌuyashcatami ña yachangui. Shinallataj paipi Dios allicunata ricushcamanta paipaj puebloman pushamushcatami ña yachangui (Juan 6:44-ta liyipai). Shujtaj llajtamanta cajpipish, shujtaj raza cajpipish, shujtaj costumbrecunata charijpipish, paimantaca achcatami yachangui. Paipish canmantaca achcatami yachan.

10, 11. a) ¿Diosta sirvijcunaca imapitaj shuj shinalla canchij? b) ¿Shuj shinalla cashcamanta ima bendiciontataj charinchij?

 ¹⁰ Ishquindij chꞌican chꞌican shimita rimaj cashpapish Jehová Diostaca shujlla shinami sirvicunguichij (Sofonías 3:9). Shinallataj Diospi tucui shunguhuan crishpami pai munashca shina causanguichij. Shamuj punllapajpish chai esperanzallatatajmi charinguichij. Paimanta caicunata yachanami ashtahuan importante can. Chaimi paipi confiashpa, unai unaicama amigocuna cai pudinguichij.

¹¹ Diosta sirvijcunaca ashtahuan alli amigocunatami charinchij. Chashna nishpaca mana exageranchijchu. Joven, canca tucui muyundij Allpapimi achca amigocunata charingui. Paicunataca manachari rijsingui pero cambaj amigocunami can. ¿Diosta mana sirvijcunaca cashna shina ni pudishcacunachu?

12. ¿Diosta ashtahuan sirvingapajca imatataj rurana cangui?

¹² (Eclesiastés 11:9–12:1-ta liyipai). Joven, ¿Yaya Diosta ashtahuan sirvingapaj esforzaricunguichu? Bibliata cada punlla liyingapaj, tandanacuicunapi participangapaj, huillanaman llujshingapajchari esforzaricungui. Chaita rurashpaca tucui alli llujshijpi o shujtajcuna felicitajpica de seguromi cushilla sintiringui. ¿Imamanta? Jesús shina Yaya Diospaj munaitaraj ruracushcamantami chashna sintiringui (Salmo 40:8; Proverbios 27:11).

13. Cai mundopaj ruraicunapi ocuparinapaj randica ¿imamantataj Diosta sirvina ashtahuan alli can?

¹³ Diosta ashtahuan sirvingapaj esforzarishpaca cushillami sintiringui. Shinallataj mana yangamanta causacushcatami cuentata cungui. Apóstol Pabloca: “Chashna cajpica ñuca cꞌuyashca huauquicuna, Mandaj Jesuspajta ruranapi huiñashpa, sinchiyashpa, pi mana cuyuchipaj catiraichij. Cancuna Mandaj Jehová Diospi shujlla tucushpa paipajta trabajashca mana yanga cashcataca yachanguichijmi” nircami (1 Corintios 15:58, NM). Cai mundopaj gentecunaca cullquita charinallapi, famoso tucunallapimi yuyancuna. Chaimi paicunapaj metacuna can. Shinapish paicunaca mana cushilla causancunachu (Lucas 9:25). Cunanca rey Salomonmanta yachashun (Romanos 15:4).

14. ¿Salomonmantaca imatataj yachangui?

¹⁴ Rey Salomonca achca charij runami carca. Paica: “Cunanca tucui laya cushicushpa, alli causashpa ricusha” nircami (Eclesiastés 2:1-10). Chaimantami pai munashca shina huasicunata, jardincunata, parquecunata rurarca. ¿Chaicunata rurashpaca cushillachu sintirirca? Mana. Imallata rurashcata yuyarishpaca: ‘Tucui chaicunaca yangalla cashcatami ricurcani, cai pachapica imapish yangallami’ nircami (Eclesiastés 2:11). Salomón shina mana casha ninguichu ¿nachu?

15. a) ¿Imamantataj sinchi feta charina cangui? b) Salmo 32:8-pi nishca shinaca, ¿ima bendiciontataj charingui?

¹⁵ Maijancunaca llaqui atrazopi urmashca qꞌuipami experienciata japincuna. Joven, can chashna tucuchunca Jehová Diosca mana munanchu. Ashtahuanpish tucuipi paita uyashpa cazuchunmi munan. Chaipajca sinchi fetami charina cangui. Shinallataj Dios mandashca shina alli decisioncunata  agllashcamantaca mana nunca llaquiringuichu. Diospish paipaj shutipi cꞌuyaihuan trabajajpica manataj cungaringachu (Hebreos 6:10). Chaimanta, cambaj feta sinchiyachingapaj achcata esforzari. Shinami Yaya Dios nishcacunaca cambajllataj alli cashcata ricungui (Salmo 32:8-ta liyipai).

16. ¿Libres cashpapish imamantataj alli decisioncunata agllana canchij?

¹⁶ Apóstol Pabloca: “Mandaj Jehová Diospaj espíritu maipi cajpica, ña cacharichishcami” nircami (2 Corintios 3:17, NM). Jehová Diosca ñucanchijllataj decisioncunata agllachunmi saquin. Ñucanchijtaca chashnami rurashca. Alli decisioncunata agllajpica ñucanchij causaica allimi ringa. Cutin Diosta mana sirvij jovencunaca computadorapi o tabletapimi lluchulla cꞌari o huarmi mapata ruracujta ricuncuna. Maipicarin shujtajcunahuanpishmi siririncuna. Shinallataj drogatapishmi fumancuna, tragotapish manchanaitami ubyancuna. Mancharina pugllaicunapipishmi participancuna. Paicunaca shuj ratollachari chashna cushilla shina sintirincuna. Pero chashna causashcamantami viciopi urmancuna, unguncuna, huañuncunapish (Gálatas 6:7, 8). Tucuipi libres canchij nishpami yuyancuna pero chashna yuyashpaca pandaricuncunami (Tito 3:3).

17, 18. a) ¿Imamantataj Diosta cazushpaca libresmi canchij ninchij? b) ¿Imamantataj Adán Evaca cunan punllapi causaj gentecunatapish yalli libresmi carca ninchij?

¹⁷ Jehová Diosta tucuipi cazushpaca alli saludtami charishun, shinallataj libresmi causashun. Chashnami Diosta cazuna ñucanchijpajllataj alli cashcata cuentata cushun (Salmo 19:7-11). Libres cashpapish Dios mandashca shina ima decisioncunata agllajpica ¿Diospish yaya mamacunapish imatataj rurangacuna? Canpi confiashpami canllataj ima decisionta agllachun saquingacuna. Bibliapica ‘Diospaj huahuacunaca cacharichishpa jatunyachishcami canga’ ninmi (Romanos 8:21). Chaitaca shamuj punllapimi Diosca pajtachinga.

¹⁸ Adán Evapish ima decisioncunata agllangapajca libresmi carcacuna. ¿Paicunataca Edén huertapica Diosca mashna yuracunamantataj ama micuchun nirca? Shujlla yuramantami ama micuchun nirca (Génesis 2:9, 17). ¿Cai mandashcata pajtachinaca sinchichu carca? Mana. Gobiernocunaca achca leycunatami llujchincuna, cazuchunpishmi obligancuna. Pero Diosca Adán Evamanca shujlla leytami curca.

19. ¿Jehová Diospish Jesuspish ñucanchij libres cachunca ima shinataj yachachin?

¹⁹ Jehová Dios yachaisapa cashcataca ñucanchijta ima shina tratashcapimi ricunchij. Paica mana achca leycunatachu cun. Ashtahuanpish mana allita pꞌiñashpa pai nishcacunata cazuchunmi pacienciahuan  yachachin (Romanos 12:9). Jesús yachachicushpaca ima cosascuna juchapi urmachi tucushcatami yachachirca (Mateo 5:27, 28). Rey Jesusca paraíso Allpapica alli ruraicunatapish mana alli ruraicunatapish pai shina ricuchunmi yachachishpa catinga (Hebreos 1:9). Shinallataj yuyaipipish cuerpopipish jucha illaj tucuchunmi ayudanga. Caipi yuyai: Paraíso Allpapica juchapi urmangapaj ima tentacioncuna mana tiyangachu. Juchayuj cashcamanta llaquicunata apanapish mana tiyangachu. Chaipica Dios nishca shina ‘paipaj huahuacuna cacharichishca o libres cashcamantami jatunyachishca’ cashun.

20. a) Jehová Dios tucuipi libre cashpapish ¿ima shinataj gentecunataca tratan? b) ¿Diospaj ejemplotaca ima shinataj catina canchij?

²⁰ Paraisopica mana tucuipichu libres cashun. ¿Imamanta? Yaya Diosta, shujtajcunatapish cꞌuyashcamantami alli yuyarishpa decisioncunata agllashun. Chashnami imatapish Dios rurashca shina rurashun. Paica tucuipi libre cashpapish ñucanchijtaca cꞌuyaihuanmi tratan (1 Juan 4:7, 8). Shinashpaca Diospaj ejemplota catishpallami libres causai tucushun.

21. a) ¿Davidca imatataj Jehová Diosmanca nirca? b) ¿Catij yachaipica imatataj ricushun?

²¹ ¿Dios cushca tucui allicunataca valichinguichu? Cai yachaipica Dios cushca publicacioncunamanta, alli amigocunamanta, Diosta ashtahuan sirvinamanta, imapi libres canamantapishmi yachashcanchij (Salmo 103:5, NM). Canca David shinachari contento sintiringui. Davidca Jehová Diostaca: “Ñucamanca causaiman apaj ñantami ricuchingui. Cambaj alli ladopica huiñaita sumajmari. Cambaj ñaupajpica cushicucunallami canga” nircami (Salmo 16:11). Caishuj yachaipica Salmo capítulo 16-mantami shujtaj sumaj yuyaicunata ricushun. Shinami cushilla causangapaj imata rurana cashcata yachangui.