1. ¿Jesusca arrepintirishca shuhuataca imatataj nirca?

 ISHQUI shuhuacunaca caspipi huarcushca cai horasmi achcata sufricurcacuna (Lucas 23:32, 33). Paicunaca Jesuspaj discipulocuna mana cashcamantami paimanta burlaricurcacuna (Mateo 27:44; Marcos 15:32). Pero paicunapuramanta shujca arrepintirishpami Jesustaca: “Jesús, can ña mandaj cashpaca ñucata yuyaripangui” nircami. Chashna nijpimi Jesusca: “Cunanmi canmanca cashna nini: ñucahuanmi Paraisopi cangui” nirca (Lucas 23:39-43-ta liyipai). Chai runaca jahua pacha Gobiernopi crishcataca manaraj ricuchishcachu carca. Jesucristopish chai runa paihuan jahua pachapi mandagrishcatapish mana nircachu (Mateo 4:17). Chaimantami Jesusca “ñucahuanmi Paraisopi cangui” nishpaca Paraíso Allpamanta parlacurca. ¿Caitaca ima shinataj yachanchij?

2. ¿Arrepintirishca shuhua judío cashcataca ima layataj yachanchij?

² Arrepintirishca shuhuaca judiomi cashcanga. ¿Chaitaca ima layataj yachanchij? Paica caishuj shuhuataca: “Cai runa shinallataj llaquita apacushpapish, ¿manachu ashallatapish Diostaca manchangui?” nircami (Lucas 23:40). Judiocunaca shujlla Dios tiyashcatami crircacuna. Cutin shujtaj llajtamanta gentecunaca achca dioscunatami adorajcuna carca (Éxodo 20:2, 3; 1 Corintios 8:5, 6). Cai shuhuacuna judiocuna mana cashca cashpaca arrepintirij shuhuaca “¿manachu ñucanchij dioscunata manchangui?” nishpami tapunman carca. Shinallataj Jesusca chingarishca ovejacuna shina caj israelitacunata ayudangapajmi shamushca carca. Caishuj llajtacunamanta gentecunata predicangapajca mana shamushcachu carca (Mateo 15:24). Jehová Diospish israelitacunamanca huañushcacunata causachinatami huillashca carca. Chaita crishpami arrepintirishca shuhuaca Jehová Dios paipaj Gobiernopi mandachun Jesusta causachinapi crirca. Ashtahuancarin  Jehová Dios paitapish causachinapimi crishcanga. Caicunata ricushcamantami cai arrepintirishca shuhua judío cashcata intindinchij.

3. ¿Jesús “ñucahuanmi Paraisopi cangui” nijta uyashpaca arrepintirishca shuhuaca imatataj intindishcanga?

³ Cai arrepintirishca shuhuaca judío cashcamantami Jehová Dios Adanta, Evata shuj paraisopi churashcata yacharca. Chaimantami Jesús “ñucahuanmi Paraisopi cangui” nijta uyashpaca cai Allpapi shuj Paraisopi canata intindishcanga (Génesis 2:15-ta liyipai).

4. ¿Jesús ima nishcata yachashpaca imapitaj yuyana canchij?

⁴ Jesús ima nishcata yachashpaca Paraíso Allpapi ima shina causagrishcapimi yuyana canchij. Chaita intindingapajca rey Salomón mandacui horas sumaj causai tiyashcapimi yuyarina canchij. Bibliapica: ‘Jesusca Salomontapish yallimari can’ nishpami yachachin. Chaimantami Jesuspish, paihuan mandagrijcunapish cai Allpata shuj Paraisota ruranata tucui shunguhuan crinchij (Mateo 12:42). Pero shujtaj ovejacunamanta Diosta sirvijcunapish Paraíso Allpapi causangapajca imata rurana cashcatami yachana cancuna (Juan 10:16).

5. ¿Paraíso Allpapica ima shina causanapitaj yuyangui?

⁵ ¿Paraíso Allpapica ima shina causanapitaj yuyangui? Tal vez canca Edenpi shinallataj shuj alaja jardinpi causacushcapimi yuyangui (Génesis 2:7-9). Mana cashpaca Miqueas ima nishcapimi yuyangui. Paica: “Quiquin uva yura ucupi, quiquin higo yura ucupi tiyarishpami samaringacuna” nircami (Miqueas 4:3, 4). Chaipica alaja plantacunayuj, sisacunayuj alaja jardinpi cashcapichari yuyangui. Shinallataj chai ladopica mesa jahuapi achca micunacunata charicushcapichari yuyangui (Salmo 72:16; Isaías 65:21, 22). Achcacunamanta maijancunapish chaipimi causarishcangacuna. Paicunamantaca tal vez cambaj familiacuna, cambaj amigocunachari canga. Paicunaca tucuicunami tandalla, asishpa, alajata pasacungacuna. Cai Paraisotaca cai Allpallapitajmi charishun. Mana shuj muscuillachu can. Caica pajtaringatajmi. Paraíso Allpapica alaja trabajotapishmi charishun.

6. ¿Paraíso Allpapica imallatataj rurashun?

⁶ Jehová Diosca trabajomanta cushicuchunmi ñucanchijtaca rurashca (Eclesiastés 2:24). Jesús cai Allpata mil huatacunata mandacui horasca achca trabajomi tiyanga. Chaipica jatun llaqui punllacunamanta quishpirijcunapish, chai tiempopi causarijcunapishmi ropacunata, micunacunata, maipi causanatapish minishtingacuna. Chai tucuita charingapajca achca trabajomi minishtiringa. Ima shinami Adán y Evaca Edenpi tiyaj jardinta  cuidana carca, chashnallatajmi ñucanchijpish shuj Paraíso tucungacama cai Allpata allichishpa, cuidashpa catishun. Achca huaranga causarijcunamanpishmi Diosmanta, paipaj munaimanta yachachishun. Ñaupa tiempopi causaj Diosta sirvijcunamanpishmi paicuna huañushca qꞌuipa imalla tucushcacunamanta huillashun. Cai tucuita rurashpaca dimastij cushillami causashun.

7. ¿Paraíso Allpapi sumajta causanataca imamantataj yachanchij?

⁷ Paraíso Allpapica cushilla, sumaj causaimi tiyanga. ¿Chaitaca ima shinataj yachanchij? Ñaupa tiempopi rey Salomón israelitacunata cuidashca shinallatajmi Paraíso Allpapipish Jehová Diosca ñucanchijmanca alaja causaita cunga, alli cuidanga.

8. ¿Salmo 37:10, 11, 29-pi tiyaj shimicunaca ima shinataj rey Salomón mandacui horaspi pajtarirca? (Cai revistapica “Caitami tapushcacuna” nishca yachaita ricui).

⁸ Jehová Diosca Davidmanca shuj alli mandaj mandacui horas sumaj causai tiyanatami quillcachirca. Chaitaca Davidca Salmo 37-pimi quillcarca (Salmo 37:10, 11, 29-ta liyipai). Ñucanchijcunaca Paraíso Allpamanta gentecunaman predicangapajca achca cutincunami Salmo 37:11-ta liyinchij. Jesucristopish chai versollamantatajmi yachachirca. Paica chaipi tiyaj shimicuna shamuj punllacunapipish pajtarinatami ricuchirca (Mateo 5:5). Shinapish David imata quillcashcacunaca Salomón mandacui horaspipishmi pajtarirca. Chai tiempopica tucui Israel llajtapi causajcunaca alaja, sumaj causaita, achca micunacunatapishmi charircacuna (1 Crónicas 22:9; 29:26-28). Jehová Diosca israelitacunataca: ‘Ñuca mandashcacunata huaquichishpa chaitataj rurana yuyailla tucushpa ruraichij. Chaita rurajpica ñucaca chai llajtapica sumaj causaitami cusha. Cancunaca pi mana manchachishcami dorminguichij’ nircami (Levítico 20:24; 26:3, 6). Shinallataj Jehová Diosca millai gentecunapish, yanga dioscunata adorajcunapish ña mana tiyanatami huillarca (Salmo 37:10). Cai tucui shimicunaca Salomón mandacui tiempopimi pajtarirca. Pero shamuj punllacunapipishmi Salmo 37:10, 11, 29-pi tiyaj shimicunaca pajtaringa.

9. ¿Saba llajtata mandaj huarmica Salomontaca imatataj nirca?

 ⁹ Saba llajtata jatun mandaj huarmica israelitacunata Salomón mandacujpi sumaj causaita charishcatami yachaj chayarca. Chaimi paipaj ñahuihuantaj ricungapaj caru llajtamanta Jerusalencama shamurca (1 Reyes 10:1). Salomón alli mandacushcata ricushpaca chai mandaj huarmica: “Cambaj yachaitapish, imalla rurashcacunatapish cunan ñuca ñahuihuantaj ricujpica, ñuca uyashca shinaca chaupillatapish mana huillashcacunachu. Canhuan caj runacunapish, cambajta ruraj cai runacunapish, yachaisapa shimicunata rimajta punllanta uyashpaca cushijllami cangacuna” nircami (1 Reyes 10:6-8). Shinapish shamuj punllacunapi Jesús cai Allpata mandacui horasca, Salomón mandacui punllacunatapish yalli allimi canga.

10. ¿Jesusca imamantataj Salomonta yalli alli rey can?

¹⁰ Jesusca Salomontapish yalli alli mandajmi can. Salomonca juchayuj cashcamantami achca cutincuna pandarirca. Chaimi paipaj puebloca achca llaquicunata charirca. Cutin Jesusca jucha illaj cashcamantami mana nunca pandarin (Lucas 1:32; Hebreos 4:14, 15). Paica Diablopaj trampacunatapish tucuitami misharca. Jesusca imapi mana pandarij, gentecunata ayudaj, alli cuidajmi can. Chai laya reyta charishcamantaca achcatami cushicunchij ¿nachu?

11. ¿Jesusca picunallahuantaj mandanga?

¹¹ Jesusca 144.000 reycunahuanmi tucui gentecunata mandanga. Paicunaca cai Allpapimi Diospaj munaita pajtachingacuna (Apocalipsis 14:1-3). Jesushuan mandagrij agllashca gentecunaca cai Allpapi cashpaca achcatami sufrircacuna. Chaimantami paicunaca tucui gentecunata alli intindingacuna. ¿Jesushuan mandachun agllashca ungidocunaca imallatataj rurangacuna?

12. ¿Jehová Diosca ungidocunamanca imata rurachuntaj minganga?

¹² Jesuspish, 144.000 ungidocunapish Salomontapish yallimi ashtahuan trabajota charingacuna. Salomonca shuj llajtallatami mandarca. Pero Diospaj Gobiernopi mandaj ungidocunaca cai tucui Allpapi tiyagrij achca millón gentecunatami mandangacuna. Chai mingashcata pajtachinaca ungidocunapajca dimastij valishcami canga.

13. ¿Jesushuan mandagrijcunaca imatataj rurangacuna?

¹³ 144.000 ungidocunapish Jesús shinallatajmi mandajcuna, sacerdotecuna cangacuna (Apocalipsis 5:10). Moisesman cushca leypi nishca shinaca sacerdotecunaca tucui israelitacunatami alli cuidana carca, Diosmantapishmi yachachina carca. Chai “Leyca shamuj punllacunapi tiyana bendicioncunata ricuchij llandu shinallami” carca. Chaimantami Jesuspish, 144.000 ungidocunapish Paraíso Allpapi causaj gentecunata alli cuidangacuna, Jehová Diospajman cꞌuchuyachunpishmi ayudangacuna (Hebreos 10:1). Dios agllashca ungidocuna, Paraíso Allpapi gentecunahuan ima shina parlanataca mana yachanchijchu. Ima laya cajpipish paicunaca tucui gentecunatami alli pushangacuna (Apocalipsis 21:3, 4).

14. ¿Agllashca ungidocunapish, shujtaj ovejacunapish ima shinataj Diosta adoracuncuna?

¹⁴ Jesusca paihuan mandagrij ungidocunataca “ashalla ovejacuna” nircami (Lucas 12:32). Cutin Paraíso Allpapi causagrij gentecunataca “shujtaj ovejacuna” nishpami cayarca. Cai ishqui grupocunaca shujlla canlla  ovejacuna shinami cancuna (Juan 10:16). Paicunaca cai tiempopica tandallami Jehová Diosta sirvicuncuna. Paraíso Allpapipish tandallami Jehová Diosta sirvishpa catingacuna. Chai tiempopajca ashalla ovejacunaca ñami jahua pachapi cangacuna. Cutin Paraíso Allpapi causagrij shujtaj ovejacunaca huiñaipaj causana esperanzatami charingacuna. Shinapish shujtaj ovejacunaca huiñaipaj causangapajca cunanmanta imallata rurana cashcatami ricushun.

15. a) ¿Shujtaj ovejacunaca ungidocunata apoyashcataca ima shinataj ricuchincuna? b) ¿Canca fotopi ricurij huauquipaj ejemplotaca ima shinataj cati tucungui?

¹⁵ Arrepintirishca shuhuaca Jesusta agradicishcataca mana ricuchi tucurcachu. Cutin shujtaj ovejacunaca Jesusta agradicingapajca achca oportunidadcunatami charincuna. Por ejemplo, Dios agllashca ungidocunaca Jesuspaj huauquicunami can. Paicunata cai Allpapi apoyashpaca Jesusta agradicishcata, cꞌuyashcatapishmi ricuchinchij. Ungidocunata apoyajpica Jesusca ñucanchijtaca achcatami bendicianga (Mateo 25:31-40). Gentecunaman tucui shunguhuan predicashpa, Jesuspaj discipulocunata rurashpaca ungidocunatami apoyanchij (Mateo 28:18-20). Paicunaca gentecunaman yachachingapajmi achca ayudacunata cushca. Chaimantami Cushilla causai nishca librohuan gentecunaman yachachingapaj esforzarina canchij.

16. ¿Paraíso Allpapi causangapajca imatataj rurana canchij?

¹⁶ Jehová Diosca Paraíso Allpapica alli gentecuna causachunmi munan. Chaimantami cunanmantapacha honrados cangapaj, ama llullangapaj, Diospaj Gobiernota punta lugarpi churangapaj esforzarina canchij. Shinallataj Jehová Diostapish, ñucanchij cusatapish o huarmitapish, huauqui panicunatapish shungumanta cꞌuyangapajmi esforzarina canchij. Caita pajtachinaca cai tiempopica mana facilchu can. Pero esforzarishpaca Paraíso Allpapi causangapaj preparados cashcatami ricuchishun. Paraíso Allpapicarin Diosta cazuna, pai munashca shina causanaca ashtahuan jahuallami canga. “¿Paraíso Allpapi causangapaj listochu cangui?” nishca yachaitami cai revistallapitaj ricui tucungui.

17. ¿Ñucanchij juchacunamanta ña arrepintirishca cashpaca imamantataj chaicunallapi mana yuyashpa catina canchij?

 ¹⁷ ”Jesús huañushcamantami Jehová Diosca perdonangalla” nishpaca juchacunata mana rurashpa catinallachu canchij (Hebreos 10:26-31). Cutin jatun juchata rurashcamanta arrepintirishca cashpa, Jehová Diospish, ancianocunapish ña ñucanchijta ayudashca cajpica mana llaquirishpalla catinachu canchij. Ashtahuanpish Jesús huañushcamanta Jehová Dios perdonashcapimi tucui shunguhuan crina canchij (Isaías 55:7; Hechos 3:19). Jesucristoca fariseocunataca: “Ñucaca cashcata rurajcunata cayanamanca mana shamurcanichu. Ashtahuanpish juchayujcunata cayanamanmi shamurcani” nircami (Mateo 9:13). Jesús huañushcamantami Jehová Diosca tucui ñucanchij juchacunata perdonai tucun.

18. ¿Jesushuan parlashca shuhuahuan Paraíso Allpapi tupanacushpaca imatataj tapunata munanguiman?

¹⁸ Jesushuan parlashca shuhuahuan Paraíso Allpapi cashcapi yuyai. Chaipica ishquindijpuramantami Jesús cancunamanta huañushcamantaca agradecidos canguichij. Tal vez canca chai shuhuataca Jesús caspipi cai horas ima shina cashcata, Jesús paita cutichijpi ima shina sintirishcatachari tapungui. Tal vez chai shuhuapish cantaca Diablo mandacui horas cai tucuri punllacunapi ima shina cashcatachari tapunga. Cai runaman Paraíso Allpapi yachachina, shujtajcunaman yachachinapish shuj jatun privilegiomi canga (Efesios 4:22-24).

19. ¿Paraíso Allpapi causacushpaca imamantataj mana aburrido sintirishun? (Página 1-pi tiyaj dibujomanta parlapai).

¹⁹ Paraíso Allpapica mana nunca aburrido sintirishunchu. Chaipica achca gentecunatami rijsi tucushun. Ñucanchij munashca trabajotapishmi charishun. Ashtahuancarin Jehová Diostapish punllanta punllantami rijsishpa catishun. Pai rurashcacunatapishmi alli rijsishpa catishun. Chashnami punllanta Yayitu Diostaca ashtahuan cꞌuyashun. Jehová Diospish ñucanchijmanca achca bendicioncunatami cunga. Chaimantami Jehová Diostapish, Jesustapish Paraíso Allpata cusha nishcamanta achcata agradicinchij.