1. ¿Diospaj sumaj causaita chasquishpaca ima shinataj sintirishun?

 DIOSTA mana sirvij gentecunaca Diospaj tranquilo, sumaj causaitaca mana charincunachu. Cutin ñucanchijcunaca Diospaj sumaj causaita chasquingapajca Jehová Dioshuanpish, paita cꞌuyajcunahuanpishmi alli apanacuna canchij (1 Tesalonicenses 5:23). Jehová Diosta rijsingapaj, paipi confiangapaj, paita tucuipi cazungapajpishmi esforzarina canchij. Caicunata rurashpaca Diospaj sumaj causaitami charishun. Ñucanchij shungupipish, yuyaipipish ima llaquicuna ricurijpica tranquilosmi sintirishun (Filipenses 4:6, 7-ta liyipai).

2. ¿Llaquicunata charishpapish Diospaj sumaj causaita chari tucushcataca imamantataj cringui?

² ¿Millai ungüicuna tiyai horas, llaqui atrazo japi horas, parota rurai horas o contracuna llaquichi horasca ñucanchij shungupipish, yuyaipipish tranquilo sintiri tucunchijchu? Cashna laya llaquicunata charishpaca achcatachari manchanchij. Pero Jesusca paipaj discipulocunataca: “Cancunapaj shungupica ama manchaichijchu, ama sustarichijchu” nircami (Juan 14:27). Achca huauqui panicunaca Diospaj ayudahuanmi llaquicunata charishpapish Dios cushca sumaj, tranquilo causaita charishcacuna.

3. ¿Shuj pandemia o millai ungüicuna tiyai horasca ima shinataj sintiri tucunchij?

³ Shuj epidemia o shuj millai ungüi tiyai horasca dimastijmi llaquiri tucunchij. Por ejemplo, achca gentecunaca COVID-19 ungüi ricuri horasca achcatami llaquirircacuna. Chaupi yalli encuestacunata jundachijcunami ni dorminallatapish mana  pudircacuna. Cai pandemiapica ansiedad o depresión ungüitami charishcacuna. Shujtajcunaca drogarishpa, machashpami pasajcuna carca. Cutin shujtajcunacarin huañunatami yuyajcuna carca. ¿Can causan ladopipish chashna laya pandemiachu tiyashca? ¿Chashna cajpica tranquilo sintiringapaj, Yayitu Diospaj sumaj causaita charingapajca imatataj rurana cangui?

4. ¿Cai tucuri punllacunapi achca llaquicuna ricurijpipish imamantataj mana yallitaj mancharinchij?

⁴ Jesucristoca: ‘Chꞌican chꞌican llajtacunapimi tucui laya ungüicuna tiyanga’ nircami (Lucas 21:11). Caita yachashcamantami cai tiempopi millai ungüicuna ricurijpipish mana yallitaj mancharinchij. Ashtahuanpish tranquilomi sintiri tucunchij. Jesusca ñucanchijtaca: ‘Cai llaquicuna tiyashcata ricushpapish ama mancharinguichijchu’ nircami (Mateo 24:6).

5. a) Filipenses 4:8 y 9-pi nishca shinaca ¿shuj millai ungüi mirarijpica imatataj Jehová Diosta mañana canchij? b) ¿Bibliapaj audiocunata uyashpaca ima shinataj sintirishun?

⁵ Millai ungüicuna mirarijpica dimastij preocuparishpami achcata mancharinchij. Pani Desica chashnami sintirirca. b COVID-19 tiyai horasca chai ungüihuanmi paipaj doctorpish, paipaj tiopish, paipaj primopish huañurcacuna. Chaimi paipish chai ungüihuan contagiarinata mancharca. Paipaj mayorlla mamatapish chai ungüihuan contagiachinatami mancharca. Shinallataj paica ‘¿trabajo illaj saquirishpa micungapaj, arriendota pagangapajpish maimantataj cullquita llujchisha?’ nishpami preocuparij carca. Chaicunallapi preocupada cashcamantami dorminallatapish mana pudirca. Chashna sintirishpapish paica allicunallapi yuyangapajmi Jehová Diosta ayudachun mañarca. Chaimi paica tranquila sintirirca (Filipenses 4:8, 9-ta liyipai). Jehová Diosta uyangapajpish Bibliapaj audiocunatami uyaj carca. Paica: “Turicuna Bibliata alajata liyijta uyashpaca tranquilami sintirircani. Jehová Dios ñucamanta preocuparishcatapishmi yuyarircani” ninmi (Salmo 94:19).

6. ¿Tandanacuicunaman rishpa, Bibliata estudiashpaca ima shinataj ñucanchij feta sinchiyachishun?

⁶ Shuj pandemia tiyajpica ñaupa layaca imatapish manachari rurai tucushun. Chashna cashpapish tandanacuicunaman rinata, Bibliamanta estudianataca manataj saquinachu canchij. Ñucanchij publicacioncunapi, videocunapica ñucanchij shinallataj achca llaquicunata charij huauqui panicunapaj experienciacunatami yachai tucunchij. Paicunaca tucuita ahuantashpami Jehová Diosta sirvishpa catishcacuna (1 Pedro 5:9). Tandanacuicunapipish Bibliapaj yachachishcacunatami yachai tucunchij, chaishujhuanpish caishujhuanpishmi animanacui tucunchij (Romanos 1:11, 12). Ashtahuancarin Jehová Dios ungushca huauqui panicunata, sololla caj  huauqui panicunata ima shina ayudashcata yuyarishpaca ñucanchij fetami sinchiyachishun. Ñucanchijtapish pai ayudanapimi crishun.

7. ¿Apóstol Juanpaj ejemplota catingapajca imatataj rurana canchij?

⁷ Shuj pandemia o shuj millai ungüi tiyajpica tal vez ñucanchij huauqui panicunahuan mana chꞌimbapura parlai tucushunchu. Chashna cajpipish paicunahuan parlanacushpa catingapajmi esforzarina canchij. Chai llaqui horaspica apóstol Juan shinachari sintirishun. Paica paipaj amigo Gallota ñahui ñahui ricunatami munarca (3 Juan 13, 14). Pero mana ricui pudishcamantami paipaj amigomanca shuj cartata rurashpa cacharca. Chai shinallatajmi ñucanchijpish, ñucanchij huauqui panicunahuan mana ñahui ñahui ricui tucushpapish paicunatami cayai tucunchij, o shuj video llamadatami rurai tucunchij. Mana cashpaca mensajecunatapishmi cachai tucunchij. Chashna paicunahuan parlashpa catishpaca mana sololla sintirishunchu. Ñucanchij shungupipish, yuyaipipish tranquilosmi sintirishun. Cutin yallitaj preocupado o llaquilla sintirishpaca ancianocunata ayudachunmi mañana canchij. Paicuna cꞌuyaihuan consejajpica tranquilo cangapajmi chai consejocunata pajtachina canchij (Isaías 32:1, 2).

8. ¿Llaqui atrazo japijpica ima shinataj sintiri tucunchij?

⁸ Manchanai yacu tucuita apashpa llaquichishcamanta, shuj jatun terremoto tiyashcamanta o nina japirishpa tucuita rupachishcamantachari achcata sufricungui. Mana cashpaca shuj cꞌuyashca amigo, o familia huañushcamanta o can charishca cosascunata chingachishcamantachari dimastij llaquilla, colera puricungui. Chashna sintirishpapish can sinchi feta mana charishcata o charina yuyailla cashcataca mana yuyanachu cangui. Shujtajcunacarin cai llaqui horaspica paica Diostami saquinga, ñaupajmanca mana cati tucungachu nishpachari yuyangacuna (Job 1:11). Pero cashna sinchi llaquicunahuan chꞌimbapuracushpapish tranquilo, sumaj causaitami chari tucungui. Chashna sumaj causaita charingapaj imata rurana cashcata ricushun.

9. ¿Llaquicunamanta Jesús imata nishcataca imamantataj yuyarina canchij?

⁹ Achca gentecunaca “ima llaqui atrazo ñucanchijtaca mana nunca japingachu” nishpami seguros causancuna. Pero Diosta sirvijcunaca Jesús ima nishcatami yuyaipi charinchij. Jesucristoca jatun terremotocuna, ashtahuan llaquicuna, ashtahuan millai gentecuna, macanacuicunapish tiyagrishcatami huillarca (Lucas 21:11; Mateo 24:12). Paica cai tucui llaquicunata Diosta mana sirvijcunalla charinataca mana nircachu. Ashtahuanpish cashna laya llaquicunataca Diosta sirvijcunapishmi ahuantashcacuna (Isaías 57:1; 2 Corintios 11:25). Jehová Diosca tal vez tucui llaquicunamantaca mana librangachu. Pero cai llaquicunata chari horas ñucanchij shungupipish, yuyaipipish tranquilo sintirichunmi ayudanga.

10. ¿Jehová Diospi confiashcata ricuchingapajca imatataj rurana canchij?

¹⁰ Ima llaqui atrazo manaraj japijpimi alli prepararina canchij. Chaita rurashpaca Jehová Dios ñucanchijta cuidanapi confiashcatami ricuchishun. ¿Imamantataj chaita ninchij? Bibliapica ñucanchijmanca ima llaqui ama japichun cuidarina cashcatami yachachin (Proverbios 22:3-ta liyipai). Y chaillatatajmi ñucanchij revistacunapi, tandanacuicunapipish Jehová Diosca advirticushca. c Chaimanta ¿Jehová Diospi confiashcata ricuchingapajca imatataj rurana canchij? Ima  llaqui atrazo manaraj japijpimi chai consejocunata pajtachishpa catina canchij.

11. ¿Margaritapaj ejemplomantaca imatataj yachai tucunchij?

¹¹ Pani Margaritapi yuyashunchij. Pai causan ladopica manchanai nina jatarishpami tucuita rupachi callarirca. Chaimi autoridadcunaca chaimanta llujshichun mandarcacuna. Tucui gentecuna jahuai ucu miticushpa ricushcamantami carreteracunaca junda carca, humopish tucuitami taparca. Chaimantami pani Margaritaca paipaj carro ucupi saquirirca. Pero alli preparada cashcamantami paipaj causaita quishpichirca. Paipaj carterapica maita rinata yachangapajmi shuj mapata charirca. Ashtahuancarin manaraj chai llaqui tucujpimi mai ñanta miticushpa ri tucushcata ña alli ricushca carca. Chaimantami Margaritaca paipaj causaita quishpichi tucurca.

12. ¿Llaquipi cai horas autoridadcuna nishcacunata, Diospaj organización nishcacunatapish imamantataj cazuna canchij?

¹² Llaqui horaspica autoridadcunaca ñucanchijta cuidangapaj, orden tiyachunpishmi miticushpa richun, huasipi saquirichun o ima shujtaj cosascunata rurachun mandangacuna. Huaquin gentecunaca paicunapaj charishca cosascunata mana saquisha nishcamantami autoridadcunataca mana cazuncuna. Pero Diosta sirvijcunaca 1 Pedro 2:13, 14-pi ima nishcatami pajtachinchij. Chaipica: “Amito munashca shina runacuna churashca mandajcunata cazuichij. Cancunata yalli caj reytapish, pai cachashca mandajcunatapish cazuichij” ninmi. Yayitu Jehová Diospaj organizacionpish ñucanchijta cuidangapajmi achca instruccioncunata cun. Por ejemplo, ancianocunaman ñucanchij direccioncunata cuchun, numerocunatapish cuchunmi mandashcacuna. Shinallataj Yayitu Diospaj organizacionca llaqui horaspi maipi saquiringapaj o maiman ringapaj o minishtishca cosascunata cungapajmi huaquin instruccioncunata cungacuna. Mana cashpaca pita ayudachun o ima hora ayudachunmi mandangacuna. Caicunata mana utca pajtachishpaca ñucanchijllataj, ñucanchij ancianocunatapishmi tal vez llaquipi churashun (Hebreos 13:17). Pani Margaritaca: “Yayitu Diospaj organización ima nishcata pajtachina, ancianocunapaj nishcacunatapish cazunaca allimi can. Ñucanchij causaitami quishpichin” nircami.

13. ¿Shujtaj ladopi causanaman rishpapish huauqui panicunaca cushilla, tranquilo cangapajca imatataj rurashpa catincuna?

¹³ Achca huauqui panicunaca llaqui atrazo  japishcamanta, guerracunamantami shujtaj ladopi causanaman rincuna. Paicunaca Diospajta rurashpa catingapaj, shujtaj ladopi amañarishpa catingapajmi esforzarincuna. Apostolcuna causashca tiempopipish huauqui panicunata catirashpa llaquichishcamantami shujtaj ladocunapi causanaman rircacuna. Chashnapish paicunaca Diospaj Shimimantami predicashpa catircacuna. Chai shinallatajmi ñucanchij huauqui panicunapish shujtaj ladopi causanaman rishpapish Diosmanta predicashpa caticuncuna (Hechos 8:4). Chaita rurashcamantami paicunapaj problemacunallapi mana yuyancuna. Ashtahuanpish Dios cusha nishcacunapi yuyashcamantami cushilla, tranquilo sintirincuna.

14. ¿Contracuna catirashpa llaquichijpica ima shinataj sintirinchij?

¹⁴ Diospaj contracuna ñucanchijta catirashpa llaquichijpi, tandanacuchun, predicachun mana saquijpica llaquillami sintirinchij. Carcelman apanata yuyashpacarin preocupadosmi sintirinchij. Chashna sintirinaca mana juchachu can. Shinapish Jesús nishca shinaca ñucanchij feta ama chiriyachingapajmi cuidarina canchij (Juan 16:1, 2). ¿Contracuna catirashpa llaquichicui horas tranquilo sintiringapajca imatataj rurana canchij?

15. ¿Contracuna catirashpa llaquichijpipish imamantataj mana mancharina canchij?

¹⁵ 2 Timoteo 3:12-pica: “Diosta tucui shunguhuan adorashpa causasha nijcunataca tucuicunatami catirashpa llaquichingacuna” ninmi. Huauqui Andreipi yuyashunchij. Paipaj llajtapica autoridadcunaca Testigocuna ama predicachun, ama tandanacuchunmi jarcai callarircacuna. Chaipica huauqui Andreica: “Caipica achca Testigocunami canchij. ¿Maitataj tucui Testigocunata carcelpi huichcashpa churangacunayari?” nishpami yuyarca. Chashna yuyashpapish paica dimastij preocupadomi sintirirca. Cutin shujtaj huauquicunaca tucuitami Jehová Diospaj maquipi saquircacuna. Paicunata carcelpi mana churanatapish mana yuyarcacunachu. Paicunaca Jehová Diospi confiashcamantami Andrei shinaca mana yallitaj sustarishca sintirircacuna. Chaimi huauqui Andreipish Jehová Diospi confianata decidirca. Chaimantami tucui jarcaicuna mana libri tucurijpipish paica cushilla, tranquilo sintirin. Ñucanchijpish chashnallatajmi tranquilo sintiri tucunchij. Jesucristoca contracuna catirashpa llaquichijpipish ñucanchijcuna tucuita  ahuantai tucunatami huillarca (Juan 15:20; 16:33-ta liyipai).

16. ¿Contracuna catirashpa llaquichijpica ima instruccioncunatataj cazuna canchij?

¹⁶ Ñucanchijcuna predicachun, tandanacuchun jarcajpica sucursalpi trabajaj huauquicuna, ancianocunapish ñucanchijta cuidangapajmi instruccioncunata cungacuna. Diosmanta yachashpa catichun, predicashpa catichunpish imallata rurai tucushcatami huillangacuna. Chai instruccioncunata mana tucuita intindishpapish paicunata cazungapajmi esforzarina canchij (Santiago 3:17). Ashtahuancarin ñucanchij huauqui panicunamanta o Diospaj organizacionmantapish mana huillana informaciontaca mana cunallachu canchij (Eclesiastés 3:7).

17. ¿Apostolcuna shinaca imata rurangapajtaj esforzarina canchij?

¹⁷ Ñucanchijcuna Jesusmanta predicacushcamantami Diabloca ñucanchijtaca manchanaita catirashpa llaquichicun (Apocalipsis 12:17). Chashna cajpipish mana mancharinachu canchij. Contracuna catirashpa llaquichijpipish predicashpa, gentecunaman yachachishpa catishpaca cushilla, tranquilomi sintirishun. Autoridadcunaca apostolcunatapish ama predicachunmi mandarcacuna. Pero apostolcunaca Diosta cazushpami predicashpa catircacuna. Chaimi cushilla, tranquilo sintirircacuna (Hechos 5:27-29, 41, 42). Cunan tiempopipish autoridadcuna ama predicachun jarcajpica Diosta cazushpami cuidadohuan predicana canchij (Mateo 10:16). Chashna gentecunaman predicanata mana saquishpaca cushillami sintirishun.

18. ¿Llaquicunata chari horasca pitaj ñucanchijmanca tranquilo, sumaj causaita cui tucun?

¹⁸ Llaquicunahuan cai horasca Diospaj sumaj, tranquilo causaita chasquishpaca mana yallitaj preocuparishunchu. Jehová Diosllami chashna tranquilo sintirichun ayudai tucun. Chaimanta millai ungüicuna ricurijpi, llaqui atrazo japijpi, contracuna catirashpa llaquichijpipish Jehová Diospi confiashpa catishunchij, Dios churashca pushaj huauquicunata cazushpa catishunchij, Dios cusha nishcacunapipish yuyashunchij. Caicunata rurajpica sumaj causaita cuj Diosca ñucanchijtami cushichinga (Filipenses 4:9). Catij yachaipica ñucanchij huauqui panicunapish llaquicunahuan cai horas tranquilo sintirichun imata rurai tucushcatami yachashun.