1. a)  ¿Maijan huauqui panicunaca ima llaquicunatataj charincuna? b) ¿Jehová Diosca imamantataj cushilla sintirin? (Jahuapi tiyaj fotocunata ricui).

CAI pachapica causaica sinchimi can. Por ejemplo, maijan huauqui panicunaca ancha ungushcacunami can. Cutin, shujtajcunaca ña yuyajllacuna cashpapish paicunapaj ashtahuan yuyaj familiacunatami cuidacuncuna. Huaquincunaca paicunapaj familiaman ima minishtirishcallatapish cungapajmi sinchita esforzaricuncuna. Maijancunatacarin cai tucui llaquicunami jahuanpi jahuanpi japishca. Chashna problemacunata charishcamantami shaicushca shina sintirincuna. Tiempotapish cullquitapishmi minishtincuna. Tucui cai problemacuna jahuapish Dios cusha nishca bendicioncunapimi tucui shunguhuan crishpa catincuna. Jehová Diosca chaita ricushpaca cushillami sintirin.

2. a) ¿Isaías 40:29-pi nishca shimicunaca ima shinataj animan? b) ¿Maijancunaca ima panda yuyaitataj charincuna?

² ¿Achca llaquicunata charishcamanta canca shaicushca sintirishcanguichu? Chashna sintirishpaca caita yuyari. Mana canllachu chashna sintirishcangui. Bibliapica can laya  sintirijcunamantami parlan (1 Reyes 19:4; Job 7:7). Paicunaca Jehová Diostami ayudachun mañarcacuna. Diosmi paicunamanca fuerzata cushpa ñaupajman catichun ayudarca (Isaías 40:29). Maijancunaca llaquicunata ahuantangapajca Diospajta ruranatami ashata saquina canchij nincunami. Paicunaca Diosta sirvina llashaj quipita layami ricuncuna. Chaimantami Bibliata leyinata saquincuna, tandanacuicunamanpish ña mana rincuna, huillanamanpish ña mana llujshincuna. Diabloca chaita rurachunmi munan.

3. a) ¿Diosmanta ama caruyangapajca imatataj rurana canchij? b) ¿Cai temapica imatataj yachashun?

³ Shaicushca sintirishpa, llaquilla cashpaca Diosmanta caruyanatachari yuyashun. Diabloca chaitami munan. Chaimantami Bibliata leyinata, tandanacuicunaman rinata, huillanaman llujshinatapish mana saquina canchij. Chashnami Diosta sirvishpa catingapajca fuerzata japishun. Bibliapica: ‘Diosca cancunataca allitaj caj tucungacamami pi mana cuyuchipaj sinchita ruranga’ ninmi (1 Pedro 5:10; Santiago 4:8). Cai temapica Diosta tucui shunguhuan sirvingapaj ima problemacuna jarcai tucushcatami yachashun. Shinallataj llaquicunata ahuantangapaj Bibliapaj consejocunata catina alli cashcatami yachashun. Jehová Diosca ñucanchijmanca fuerzata cusha ninmi. ¿Ima shinataj chaita ruran? Isaías 40:26-31-ta yachashpa callarishun.

4. ¿Isaías 40:26-pi nishca shimicunamantaca imatataj yachai tucunchij?

⁴ (Isaías 40:26-ta leyipai). Cielopi tiyaj tucui luzerocunataca ni pi mana cuentai pudishcachu. Pero cientificocunaca, 400 mil millones luzerocunami tiyaj yuyachin nincunami. Jehová Diosca tucui luzerocunatami shutipi cayan. Luzerocuna vidata mana charijpipish paica preocuparinmi. ¿Caimantaca imatataj yachanchij? Ñucanchijcunaca cꞌuyaimantami Diosta sirvinchij. Chaimantami Diosca ashtahuan preocuparin (Salmo 19:1, 3, 14). Diosca ñucanchijcunataca allimi rijsin. Jesusca: “Cancunapaj uma ajchapish tucui yupashcami canguichij” nircami (Mateo 10:30). Shinallataj salmocunata escribij shuj runaca: “Ima pandata mana rurajcunataca, punllantami Mandaj Diosca huaquichinga” nircami (Salmo 37:18). Cai versocunapi ricushca shinaca ima llaquicunata charijpipish Diosca ahuantachunmi ayudanga.

5. ¿Imamantataj Jehová Dios ñucanchijta ayudanataca crinchij?

⁵ (Isaías 40:28-ta leyipai). Jehová Diosca achca poderta, fuerzatami charin. Yuyashun, paimi intica achca poderta charichun rurashca. Cienciamanta escribij David Bodanisca: “Achca millón bombacunata tujyachishca shinami intimantaca cada segundo achca energía llujshin” nircami. Shujtaj cientificopish: “Intipica achca energiami tiyan. Chaipi tiyashca ashalla energiata utilizajpica casi 200 mil huatacunatami gentecunaca luzta charinman”  ninmi. Intiman energiata cushca shinallatajmi Jehová Diosca ñucanchijmanpish llaquicunata ahuantashpa catingapaj fuerzata cushpa ayudanga.

6. a) ¿Jesusca imamantataj “ñuca yugoca pꞌanguillami” nirca? b) ¿Caita yachashpaca ima shinataj sintirinchij?

⁶ (Isaías 40:29-ta leyipai). Jesusca paita catijcunamanca: ‘Ñuca yugota apaichij’ nircami. Shinallataj paica: “Ñuca yugoca pꞌanguillami, ñuca apachinapish mana llashajchu” nircami (Mateo 11:28-30). Huaquinpica tandanacuicunaman rishpa, huillanaman llujshishpaca shaicushcami sintirinchij. Pero huasiman tigrashpaca problemacunata ahuantangapajmi ashtahuan fuerzata charinchij. Jesús nishca shimicunaca ciertomi can. Diosta sirvishpaca cushillami sintirinchij.

7. ¿Ima shinataj shuj panica Mateo 11:28-30-pi nishca shimicuna cierto cashcata ricurca?

⁷ Shuj panimanta parlashun. Paica uma nanai ungüitami charin, imata ruranata munashpapish ratomi fuerza illaj saquirin. Jahuallami imamantapish llaquirin. Huaquinpica tandanacuicunaman rinaca paipajca sinchimi ricurin. Pero shuj punllaca tandanacuiman ringapajmi sinchita esforzarirca. Tandanacuipica desanimarishcacunamantami shuj conferenciata uyarca. Paica: “Chai conferenciata cuj turica cꞌuyaihuanmi yachachirca. Chaita uyashpami huacarcani. Tandanacuicunamanca shamunatajmi cani” nircami. Cai panica tandanacuiman ringapaj esforzarishcamantami dimastij cushicurca.

8, 9. ¿Pabloca “irquilla cashcapimi, ashtahuan sinchi tucuni” nishpaca imatataj nisha nicurca?

⁸ (Isaías 40:30-ta leyipai). Tucuicunami imataca rato, alli rurai tucunchij. Pero ñucanchij fuerzallahuan tucuita rurai pudishcataca mana yuyanachu canchij. Apóstol Pablota yuyarishun. Paica tucuita ruranata munashpapish mana tucuita rurai tucurcachu. Shuj punllaca ima shina sintirishcatami Diosman huillarca. Chaimi Diosca Pablomanca: “Irquilla cajpimi ñuca poderca ashtahuan alli jundanga” nircami. Cai nishcata intindishpaca Pabloca: “Irquilla cashcapimi, ashtahuan sinchi tucuni” nircami (2 Corintios 12:7-10). ¿Chaita nishpaca imatataj nisha nicurca?

⁹ Pabloca Dios mana ayudajpica imatapish mana rurai tucushcatami intindirca. Shaicushca sintirijpica Jehová Diosmi paipaj espirituhuan ayudarca. Chaimi Pabloca nunca mana rurashcata rurangapaj fuerzata charirca. Ñucanchijpish Jehová Diospaj espíritu ayudajpica imata rurangapajpish fuerzata charishunmi.

10. ¿Llaquicunata ahuantachunca ima shinataj Jehová Diosca Davidta ayudarca?

¹⁰ Davidca achca cutincunami Jehová Dios paipaj espirituhuan ayudacushcata sintirca. Chaimantami paica: “Canhuanca achca soldadocunatapish urata janajta cachashallami. Ñuca Dioshuanca jatun pircacunatapish urmachishpa llaquichingapaj yaicushallami” nirca (Salmo 18:29). Maijan problemacunaca ñucanchijpajca jatun pircacuna shinami ricurin. Ñucanchijllaca mana allichi tucunchijchu. Jehová Dios ayudachunmi minishtinchij.

11. ¿Llaquicunata ahuantangapajca ima shinataj Diospaj espirituca ñucanchijta ayudan?

¹¹ (Isaías 40:31-ta leyipai). Aguilacunaca carutami volai tucuncuna. Pero mana paicunapaj fuerzallahuanchu chaita rurai tucun. Aguilacunaca cunuj huairatami  minishtincuna. Chai cunuj huairami aguilacuna mana shaicushpa volachun ayudan. Ñucanchijpish aguilacuna shinami ayudata minishtinchij. Chaimantami shuj problemata charishpaca Jehová Diosta rogashpa paipaj espíritu santota cuchun mañana canchij (Juan 14:26). Jehová Diostaca siempremi paipaj ayudata mañai tucunchij. Por ejemplo, shuj huauquihuan o panihuan problemacunata charishpaca Jehová Diostami ayudachun mañana canchij. ¿Imamantataj chai problemacuna tiyai tucun?

12, 13. a) ¿Imamantataj huauquicunahuan panicunahuan problemacunata chari tucunchij? b) ¿Josepaj causaica imatataj Jehová Diosmanta yachachin?

¹² Juchayujcuna cashcamantami shujtajcunahuan problemacunata chari tucunchij. Huaquinpica shuj huauqui o pani imata nishpa o imata rurashpachari ñucanchijta pꞌiñachinga. Mana cashpaca ñucanchijcunachari paicunata pꞌiñachishun. Chai problemacuna tiyajpica ñucanchijpajca sinchichari canga. Pero Jehová Diosmanta mana caruyanachu canchij. Shinallataj juchayujcuna cashpapish tandallami huauqui panicunahuan Diosta sirvinata yachana canchij.

¹³ Joseta yuyarishun. Paica Diosta alli sirvijmi carca. Jovenraj cajpica paipaj huauquicunallatajmi envidiamanta esclavota shina cꞌaturcacuna. Chaimi Josetaca Egiptoman aparcacuna (Génesis 37:28). Shinallataj “Potifarpaj huarmitami violasha nicushca” nishpami, deganamanta juchachishpa carcelpi churarcacuna. Joseta llaquichicujta ricushpaca Diosca achcatami llaquirishca canga. Chai llaquicunata charichun permitishpapish paitaca mana cungarircachu. Bibliapica “Mandaj Dios paihuan cajpimi, tucui pai imata rurashcapish alli llujshirca” ninmi (Génesis 39:21-23). Caipi ricushca shinaca Diosta alli sirvijcuna cashpapish llaquicunataca charishunmi.

14. ¿Imamantataj pꞌiñarishca saquirinaca mana alli can?

¹⁴ Davidta yuyarishun. Paitaca achcatami llaquichircacuna. Pero Davidca paita llaquichijcunahuanca mana shungupi pꞌiñarishca saquirircachu. Ashtahuanpish paica cashnami  escribirca: “Pꞌiñarinata saqui. Pꞌiñarinata cungari. Ima mana allita ruranataca ama chai yuyailla caichu” (Salmo 37:8). Ñucanchijta llaquichijpica mana pꞌiñarishca saquirinachu canchij. Ashtahuanpish Jehová Dios shinami casha ninchij. Paica, ‘ñucanchij millaita rurashcamantaca, llaquichina shinatajca mana llaquichishcachu’ (Salmo 103:10). Pꞌiñarishca saquirinaca ñucanchij saludpajpish mana alli canchu. Por ejemplo, presión alta, pulmón ungüicuna, hígado ungüicuna o huijsa nanaicunami japi tucun. Shinallataj pꞌiñarishca cashpaca imatapish mana alli yuyashpami rurai callarishun o maipish cachun rimarishun. Cutin, ña colera pasashca qꞌuipaca llaquimi sintirishun. Chaimantami Bibliapica: ‘Cushijlla shunguca, aichamanpish causaitami cun’ nin (Proverbios 14:30). Shuj huauqui o pani ñucanchijta pꞌiñachijpi paicunahuan alli tucungapajca Bibliapi tiyaj consejocunatami catina canchij.

15, 16. ¿Ñucanchijta pꞌiñachijpica imatataj rurana canchij?

¹⁵ (Efesios 4:26-ta leyipai). Diosta mana rijsij gentecuna mana alli tratajpica manachari achcata llaquirishun. Pero, shuj huauqui, shuj pani o shuj familia imata rimashpa, imata rurashpa llaquichijpica shungupica dimastij nanarishcachari sintirishun. Chashna llaquichijpi mana cungari tucushpaca, ¿paicunahuan pꞌiñarishca saquirishunchu? Mana cashpaca ¿Bibliapaj consejocunata catishpa chai problemacunata utcachu allichishun? Achca tiempo pasachun saquijpica problemata allichinaca sinchimi tucunga.

¹⁶ Yuyashun. Shuj huauqui canta pꞌiñachishcata mana cungari tucushpaca ¿paihuan alli tucungapajca imatataj rurana cangui? Puntapica, “huauquihuan alhajata parlanacungapaj ayudahuai” nishpami Jehová Diosta tucui shunguhuan mañana cangui. Taita Diosca paicunapaj amigocunataca cꞌuyaihuanmi tratan. Chaimantami chai huauquipish Diospaj amigo cashcata yuyarishpa cꞌuyaihuan tratana cangui (Salmo 25:14; Proverbios 15:23; Mateo 7:12; Colosenses 4:6). Diosta mañashca qꞌuipaca imata ninatami alli yuyana cangui. Chai huauqui llaquichisha nishcataca ama yuyangui. Ashtahuanpish imamanta chaita rurashcata alli intindingapaj esforzari. Shinallataj “pai chashna cachunca ñucami imata rurashca casha” nishpami yuyana cangui. Huauquihuan parlagrishpaca: “Huaquinpica imamantapish ratomi llaquirinilla. Pero caina ñucahuan parlajpica cashna o chashnami sintirircani” nishpami callari tucungui. Chashna rurashca jahua huauquihuan mana parlanalla cajpica shujtaj punlla paihuan parlai. Chaicamaca chai huauquita cuidachun, ayudachun Jehová Diosta mañai. Shinallataj rogashpa “pandarishcacunallata ama ricungapaj ayudahuai” nishpa Diosta mañai. Chai huauquihuan alli apanacungapaj esforzarijpica Jehová Diosca cushillami sintiringa.

17. a) ¿Juchata rurashca cashpaca imatataj rurana cangui? b) ¿Imamantataj ancianocunapaj ayudata mashcana cangui?

¹⁷ Jatun juchata rurashcamantami maijancunaca, “Diosta sirvinataca mana mericinichu” nincuna. Shinallataj “chaitaca mana  ruranachu carcani” yuyashpami llaquilla, fuerza illaj sintirincuna. Rey Davidpish chashnallatajmi sintirirca. Chaimantami paica: “Mandaj Diosman ñuca juchacunata mana huillashpaca, punllanta aij nicunillami. Ñuca tullucunaca maucayashpami catin. Tutai punllami quiquinpaj maquica ñuca jahuapi ashtahuan ashtahuan llashashpa catin” nirca. Pero sinchi cajpipish Davidca Jehová Dios mandashca shinami rurarca. Chaimi Davidca: ‘Jehová Dios ñuca juchataca tucuitami quiquinman huillarcani. Millaita rurashpa ñuca juchallishcataca perdonarcanguimi’ nirca (Salmo 32:3-5). Shuj jatun juchata rurashca cajpica Jehová Diosca cantapish ayudasha ninmi. Pero, Jehová ayudachunca ancianocunapaj ayudatami mashcana cangui. Paicuna ima consejota cujpipish chasquinami cangui (Proverbios 24:16; Santiago 5:13-15, NM). Tiempo pasachun ama saquichu. Ancianocunaman utca huillai. Chashna rurashpallami huiñai causaita chari tucungui. ¿Jehová Dios juchata ña perdonashca qꞌuipa shungupi mana alli sintirishpaca imatataj rurai tucungui?

18. ¿Pandarishcacunamanta llaquilla sintirishpaca apóstol Pablomantaca imatataj yachai tucungui?

¹⁸ Apóstol Pablota yuyarishun. Paica ñaupa pandarishcacunata yuyarishpami llaquilla sintirirca. Chaimi: “Diospaj tandanacushca crijcunata catirashpa llaquichij cashcamantaca, caishuj apostolcunapaj qꞌuipallami cani. Apóstol nishcapish mana caipajmi cani” nircami. Qꞌuipaca: “Diospaj mana cꞌuyaipaj cꞌuyaimantaca ima shinami cani, chaimi cani” nircami (1 Corintios 15:9, 10). Pabloca juchayuj cashcamanta pandarijllami carca. Chaitaca Jehová Diosca allimi yacharca. Shinapish paipaj pandarishcacunamanta arrepintirijpica Diosca perdonashpami paita chasquirca. Jehová Dios perdonashcataca Pablollatajmi tucui shunguhuan crina carca. Jehová Diosca cantapish perdonai tucunmi. Chaipajca cambaj pandarishcacunamantaca arrepintirishpami Jehová Diosman huillana cangui. Jatun juchapi urmashca cashpaca ancianocunamanpishmi huillana cangui. Chaita ña rurashca cajpica Jehová Dios canta perdonashcatami tucui shunguhuan crina cangui (Isaías 55:6, 7).

19. a) ¿2018 huatapaj versoca imatataj nin? b) ¿Imamantataj cai versoca alli can?

¹⁹ Cai pachapi millai ruraicunata tucuchina punlla chayamungacamaca llaquicunaca mirashpami catinga. Chashna cajpipish Jehová Diosca ‘shaicushcacunaman fuerzata cungami. Fuerzata mana charijcunamanpish fuerzata mirachingami’ (Isaías 40:29; Salmo 55:22; 68:19). 2018 huatapaj versopica: ‘Jehová Diospi shunguta churashpaca mushuj fuerzatami charishun’ ninmi (Isaías 40:31) Cada tandanacuipi cai versota ricushpaca Jehová Dios paita sirvishpa catichun ayudanatami yuyarishun.