1, 2. ¿Jehová Diosca ima shinataj paita sirvijcunata ayudan?

OROPISH cullquipish tucui cai pachapi ima tiyashcapish Jehovapajmi can. Paica cushicushpa cuj Dios cashcamantami tucui ñucanchij minishtishcata cun. Shinallataj cai pachapi causai tiyachunmi tucuita rurai tucun (Salmo 104:13-15; Ageo 2:8). Bibliapi nishca shinaca ¿Jehová Diosca ima shinataj pai rurashca cosascunata utilizashpa paita sirvijcunata ayudashca?

² Por ejemplo, israelitacunaca chaquishca pambatami 40 huatacunata purirca. Chai tucui huatacunatami Jehová Diosca maná shuti tandata, yacutapish cushpa paicunataca cuidarca (Éxodo 16:35). Jehová Dios cuidashcamantami israelitacunaca ‘ima illajca’ mana carcacuna (Nehemías 9:20, 21). Shinallataj shuj cutinca tucui shunguhuan crij huarmita ayudachunmi Jehová Diosca profeta Eliseoman poderta curca. Shuj milagrota rurashpami chai huarmipaj huasipi charishca aceiteta Eliseoca mirachirca. Chai aceiteta cꞌatushpami chai huarmica dibicunata pagarca. Sobrashca cullquihuanca  paipajpish, churicunapajpishmi minishtirishcata randi tucurca (2 Reyes 4:1-7). Jehová poderta cujpimi Jesuspish milagrocunata rurai tucurca. Chaimantami micunata charichun o cullquita charichun huaquincunata ayudarca (Mateo 15:35-38; 17:27).

3. ¿Ima tapuicunamantataj cai temapica yachashun?

³ Jehová Diosca paita sirvijcunatapish, pai tucui imalla rurashcatapish cuidangapajca tucuitami rurai tucun. Shinapish paica ñucanchij charishca cosascunahuan paita apoyachunmi munan (Éxodo 36:3-7; Proverbios 3:9-ta leyipai). ¿Imamantataj Jehová Diosca chaita rurachun munan? ¿Ñaupa punllacunapi Diosta sirvijcunaca ima shinataj Diospaj obrata rurangapaj ayudarcacuna? ¿Diospaj pueblopica shungumanta cushca cullquitaca ima shinataj utilizacuncuna? Cai temapica cai tapuicunamantami yachashun.

4. ¿Ñucanchij charishca cosascunata Diosman cushpaca imatataj ricuchinchij?

⁴ Jehová Diosca ñucanchijmanca tucuitami cushca. Chaimantami paita tucui shunguhuan agradicishcata, cꞌuyashcata ricuchingapaj ñucanchij charishca cosascunata paiman cuna canchij. Jehová Dios tucuita cushcata mana cungarishpaca David layami sintirishun. Diospaj huasita shayachingapaj imalla minishtirishcamanta parlacushpaca Davidca: ‘Jehová Dioslla tucui imapish cambajmi. Cambaj maquimanta japishcallatami canman cunchij’ nircami (1 Crónicas 29:11-14-ta leyipai).

5. ¿Bibliapi yachachishca shinaca Diosta adorangapajca imatataj rurai tucunchij?

⁵ Apóstol Juanca shuj muscuipi shinami jahua pachapi angelcunata caita nicujta ricurca: “Jatun Dios, canca jatunmari cangui, allimari cangui, Tucuita rurai tucujmari cangui nishcataca chasquipaj allimari cangui. Canmari tucui ima tiyajtapish rurashcangui. Can munashpa rurashcamantami tucui imapish tiyan” (Apocalipsis 4:11). Caipi ricushca shinaca ñucanchij charishca cosascunahuanmi Jehová Diosta adorana, jatunyachina canchij. Moisesman cushca leypica Jehová Diosca israelitacunataca cada huata quimsa fiestacunata rurachunmi mandarca. Cai fiestacunapica israelitacunaca paicuna charishca cosascunata Jehová Diosman cushpami paita adorana carca. Chaimantami chai leypica: “Ni pi ama Mandaj Diospaj ñaupajpica chushaj maquilla ricurigringuichijchu” nirca (Deuteronomio 16:16). Cunan punllapipish mana imata shuyashpami tucui shunguhuan Jehová Diosman ñucanchij charishca cosascunata cunchij. Chashnami Diosta adoranchij, cai Allpapi paipaj munai pajtarichunpish ayudanchij.

6. ¿Imamantataj shungumanta cushicushpa cuna canchij? (Página 15-pi tiyaj fotota ricui).

⁶ Imata ñucanchijman cujpica cushillami sintirinchij. Chashnallatajmi ñucanchijpish cushicushpa cuna canchij (Hechos 20:35-ta leyipai). Yuyashun. Shuj huahuamanca paipaj yaya mamami asha cullquita cun. Chai cullquillahuantaj randishpa paicunaman shuj regalota cujpipish ¿manachu yaya mamaca cushicunga? Ari. Cutin, shuj joven precursorpi yuyashun. Paica paipaj yaya mamahuanmi causan. Arriendomanta, micunamanta pagachunchari yaya mamaman asha cullquita cun. Chashnami churica yaya mamata agradicishcata ricuchin. Chaimantami chai cullquita mana minishtishpapish yaya mamaca chasquincuna. Cai yaya mamacuna  shinallatajmi Jehová Diospish shungumanta ñucanchij charishca cosascunata paiman cuchun munan.

7, 8. a) ¿Israelitacunaca imallata rurangapajtaj ayudarcacuna? b) ¿Antioquiapi caj huauqui panicunaca ima shinataj shujtaj crijcunata ayudarcacuna? c) ¿Levitacunatapish, Jesustapish, apostolcunatapish ima shinataj huaquincunaca ayudarcacuna?

⁷ Bibliapica, Diosta sirvijcuna paicunapaj charishca cosascunahuan ayudashcatami parlan. Por ejemplo, Moisesca Diospaj carpa huasita shayachingapajmi israelitacunataca paicunapaj charishca cosascunahuan ayudachun mañarca. Chashnallatajmi Rey Davidpish Diospaj templota shayachingapaj israelitacunata ayudachun mañarca (Éxodo 35:5; 1 Crónicas 29:5-9). Rey Joas (Jehoás) causashca punllacunapipish, israelitacuna cushca cullquihuanmi sacerdotecunaca Diospaj templota allichircacuna (2 Reyes 12:4, 5). Jesusta punta catijcuna causashca punllacunapica Judea llajtapimi shuj jatun yaricai tiyarca. Chaita yachaj chayashpami Antioquiapi caj huauqui panicunaca ‘imallata cui tucushcahuan’ paicunata ayudarcacuna (Hechos 11:27-30).

⁸ Moisesman cushca leypi nishca shinaca, levitacunaca shujtaj familiacuna shina ima herenciata mana japijcunachu carca. Chaimantami caishuj israelitacunaca imallata cui tucushcahuan paicunata ayudajcuna carca. Chashna ayudajpimi levitacunaca mana preocuparishpa, Diospaj carpa huasipi alli sirvi tucurcacuna (Números 18:21). Shinallataj maijan huarmicunaca ‘paicuna imalla charishcacunahuanmi’ Jesustapish apostolcunatapish ayudarcacuna (Lucas 8:1-3).

9. ¿Diosta sirvijcunaca Diosman cungapajca maimantataj japijcuna carca?

⁹ ¿Ñaupa tiempopi Diosta sirvijcunaca Diosman cungapajca maimantataj japijcuna carca? Diospaj carpa huasita rurangapajca israelitacunaca Egipto llajtamanta apamushca cosascunatami cushca canga (Éxodo 3:21, 22; 35:22-24). Apostolcuna causashca punllacunapica huaquincunaca allpacunata, huasicunata cꞌatushpami apostolcunapaj ñaupajman cullquita apamujcuna carca. Chaimi apostolcunaca imata mana charij huauqui panicunaman chaupishpa cujcuna carca (Hechos 4:34, 35). Cutin, shujtajcunaca Diospaj obrata rurashpa catichunmi siempre asha cullquita chꞌicanchishpa cujcuna carca (1 Corintios 16:2). Caipi ricushca shinaca achcata o ashallata charishpapish tucuicunami imallahuanpish ayudajcuna carca (Lucas 21:1-4).

10, 11. a) ¿Ñaupa punllacunapi Diosta sirvijcuna shina ima shinataj ayudai tucunchij? b) ¿Diospaj obrata apoyacushpaca ima shinataj sintiringui?

¹⁰ ¿Shuj Tandanacuna Huasita shayachina o allichina cajpica ima shinataj ayudai tucunchij? Shinallataj, ¿Betel huasicunata allichingapaj, shuj jatun tandanacuita rurangapaj o llaqui tiyajpi huauqui panicunata ayudangapajca imatataj rurai tucunchij? Ñaupa  punllacunapi Diosta sirvijcuna shinami ñucanchijpish charishca cosascunahuan ayudai tucunchij. Ñucanchij cushca cullquica misionerocunata, betelcunapi trabajajcunata, precursor especialcunata, superintendente huauquicunata ayudangapajpishmi valin. Congregacioncunapica ancianocunami cada quilla mashna cullquita sucursalman cachanata decidincuna. Chai cullquihuanmi tucui muyundij Allpapi Tandanacuna Huasicunata rurai tucuncuna. ¿Cai ruraicunata apoyacunchijchu?

¹¹ Cai tucuri punllacunapica tucuicunami Diospaj obrata rurashpa catichun apoyai tucunchij. Tandanacuicunapimi ñucanchij cullquita cajitacunapi churai tucunchij. Shinallataj jw.org paginaman yaicushpami cullquita cachai tucunchij. Mashna cullquita churashcata o cachashcataca mana piman huillana minishtirinchu. Maipica: “Ñucaca ashallatami cuni. Imapaj mana avanzangachu” nishpachari yuyanchij. Chashna cajpipish yuyari, tucuicuna ashallatapish cushcamantami Diospajta rurashpa cati tucunchij. Tucuicunami ashallata charishpapish ñaupa punllacunapi Macedoniamanta crijcuna shina ayudai tucunchij. Paicunaca ‘mana imata charishpapish’ tucui shunguhuanmi ayudasha nircacuna (2 Corintios 8:1-4).

12. ¿Gentecuna shungumanta cushca cullquita alli utilizangapajca Diospaj pueblopica imatataj rurancuna?

¹² Cuerpo Gobernantepi caj huauquicunaca shungumanta cushca cullquita alli utilizangapajmi esforzarincuna (Mateo 24:45). Cai huauquicunaca Diosta mañashpami chai cullquita imapi utilizanata alli ricuncuna (Lucas 14:28). Ñaupa punllacunapica chasquishca cullquita ima shina utilizanata ricuchunca huaquin cꞌaricunatami agllajcuna carca. Paicunami chai cullquita Diospajta rurangapajlla alli utilizanata ricujcuna carca. Por ejemplo, shuj punllaca Esdrasca Persia llajtata Mandaj cushca cosascunahuanmi Jerusalenman tigramurca. Chai cosascunaca oro, cullqui, shujtaj cosascunapishmi carca. Cunan punllacunapica chai tucuica 100 millón dolarcunami valinman carca. Chai cosascuna Jehovapaj cashcamantami Esdrasca viajepi ricurachun, cuidarachunpish mandarca (Esdras 8:24-34). Achca huatacuna qꞌuipaca Judea llajtamanta crijcunata ayudangapajmi Pabloca cullquihuan ayudachun mañarca. Chai cullquita chaupijcunataca Pabloca, ‘Diospaj ñaupajpipish gentecunapaj ñaupajpipish honradosmi cana canguichij’ nircami (2 Corintios 8:18-21, QC, 1989). Cunan punllacunapipish Diospaj pueblopica Esdraspaj, Pablopaj ejemplotami catincuna. Chashnami shungumanta cushca cullquitaca imapi gastanata alli ricuncuna.

13. ¿Cunan huatacunapica imamantataj Diospaj pueblopica huaquin cambiocunata rurashca?

¹³ Maijan familiacunaca ganashcata yallimi gastancuna. Chaimantami ama yallitaj gastangapaj, minishtishcallahuan causangapaj imata ruranata alli ricuna can. Chashnami Diosta ashtahuan sirvi tucuncuna. Diospaj pueblopipish huaquinpica cullqui ama yallitaj gastarichunmi alli ricuna can. Cunan huatacunapica Diospaj pueblopica achca mushuj ruraicunami tiyashca. Chai ruraicunapimi tiyashca cullquimanta yalli gastaricushca. Chaimantami huaquin cambiocunata rurashcacuna. Chai cambiocunata rurashcamantami cullquitaca ashtahuan alli utilizacuncuna.

14-16. a) ¿Cunan huatacunapica imallatataj cushca cullquihuanca rurashca? b) ¿Diospaj pueblopi cai tucui ruraicunaca ima shinataj canta ayudashca?

¹⁴ Achca huauqui panicunaca ñami achca huatacunata Diosta sirvicuncuna. Paicunaca: “Cunan huatacunapica sumaj regalocunatami chasquishcanchij” nincunami. ¿Imamantataj chashna nincuna? Cunan huatacunapica jw.org paginapish, JW Broadcasting programapishmi Internetpi tiyan. Shinallataj Traducción del Nuevo Mundo de las Santas Escrituras Bibliatapish ashtahuan shimicunapimi traducishcacuna. Chashnallataj 2014 y 2015 huatapica 14 llajtacunapimi “Sigamos buscando primero el Reino de Dios” nishca jatun tandanacuicuna tiyarca. Chaimanca chꞌican chꞌican llajtacunamanta huauqui panicunami rircacuna. Tucuicunami cushilla sintirircacuna.

¹⁵ Cai tucui sumaj regalocunata chasquishcamantaca achca huauqui panicunaca agradicishcami sintirincuna. Por ejemplo, shuj cusa huarmica Asia llajta shuj uchilla pueblopimi sirvincuna. Paicunaca: “Huaquinpica ñucanchijllami sintirinchij. Pero JW Broadcasting programata ricushpaca muyundij Allpapi cꞌuyaj huauqui panicunata charishcatami yuyarinchij. Caishuj huauqui panicunapish cai programata ricushpaca cushillami sintirincuna. Paicunaca: ‘Cuerpo Gobernante huauquicunapaj ladopi cashca layami sintirinchij’ nincunami. Diospaj pueblopi cashcamantaca achcatami cushicuncuna” nircacunami.

¹⁶ Muyundij Allpapimi casi 2.500 Tandanacuna Huasicunata shayachicun o allichicuncunapish. Por ejemplo, Honduras llajtapica shuj mushuj Tandanacuna Huasitami rurarcacuna. Chai llajtapi causaj huauqui panicunaca: “Cai sumaj Tandanacuna Huasita charinataca mana yuyarcanchijllapishchu. Diospaj pueblopi  cashcamanta, huauqui panicunahuan Diosta tandalla sirvicushcamantami cushilla sintirinchij” nircacunami. Shujtaj lado huauqui panicunapish cushillami sintirincuna. ¿Imamantataj chashna sintirincuna? Huaquincunaca paicunapaj shimipimi Bibliata, publicacioncunatapish chasquishcacuna. Cutin, shujtajcunaca llaqui tiyajpica ayudatami chasquishcacuna. Shinallataj maijancunaca carritocunahuan huillajpi achca gentecuna Diosmanta yachacujta ricushpami cushilla sintirincuna.

17. ¿Jehová Dios paipaj pueblota ayudacushcataca ima shinataj yachanchij?

¹⁷ Testigo de Jehovacunaca shungumanta cushca cullquillahuanmi achcata rurashcanchij. Pero shujtaj gentecunaca caita rurai tucushcataca mana crincunachu. Por ejemplo, shuj jatun fabricapi trabajaj runami testigo de Jehovacunapaj shuj imprentata visitarca. Chaipimi gentecuna cushca cullquillahuan ruraj cashcata, chaipi trabajajcunapish mana cobraj cashcata, cullquita tandangapaj ima programatapish mana ruraj cashcatami yachaj chayarca. Chaimantami paica: “Cancunalla cai tucuita ruranataca mana crinichu” nircami. Cai runa nishca shinaca ñucanchijllaca imata mana rurai tucunchijmanchu. Pero Jehová Dios ayudajpimi cai tucuita rurashcanchij (Job 42:2).

18. a) ¿Diospaj obrata apoyashpaca ima bendicioncunatataj charishun? b) ¿Huahuacunamanpish mushujcunamanpish ima shinataj cushicushpa cunata yachachi tucunchij?

¹⁸ Cunan punllacunapica Jehová Diospaj obrata apoyana oportunidadtami charinchij. Chaita tucui shunguhuan rurajpica ima mana faltachunmi Diosca bendicianga (Malaquías 3:10; Proverbios 11:24, 25-ta leyipai). Shinallataj Diospaj ruraicunata apoyashpaca cushillami sintirishun. Bibliapica: “Imatapish cujmi, cushcata japijta yalli cushicun” ninmi (Hechos 20:35). Huahuacunapish mushujcunapish Diospaj obrata apoyai tucuncunami. Chaimantami ñucanchij rimashcahuan, rurashcacunahuan shungumanta cuna alli cashcata yachachina canchij. Chashnami paicunapish achca bendicioncunata chasquingacuna.

19. ¿Cai temapica imallatataj yachashcanchij?

¹⁹ Tucui ñucanchij ima charishcapish Jehovamantami shamun. Ñucanchij charishcacunata paiman cushpaca paita cꞌuyashcata, agradicishcatapishmi ricuchishun (1 Crónicas 29:17). Diospaj templota rurangapajca israelitacunaca ‘tucui shunguhuan, tucui munaihuanmi curcacuna. Chaimantami tucuicuna cushicurcacuna’ (1 Crónicas 29:9). Israelitacuna shinallataj ñucanchijpish Jehová Diosman shungumanta cushpa catishunchij. Chashnami cushilla sintirishun.