1, 2. ¿Diosta sirvijcunaca imamantataj cuidadota charina canchij? (Jahuapi tiyaj fotocunata ricui).

ACHCA doctorcuna, enfermeracunaca contagiajlla ungüita charijcunatami atindina can. Paicunaca chai gentecunata ayudasha nishcamantami jambincuna. Pero chai ungüicunahuan ama contagiaringapajmi cuidadota charina can. Diosta mana rijsij gentecunaca contagiajlla ungüicunata charij shinami can. Testigo de Jehovacunaca paicunapurapimi causana canchij, trabajana canchijpish. Chaimantami paicunapaj panda yuyaicunahuan, mana alli munaicunahuan ama contagiaringapaj cuidadota charina canchij.

² Cunan punllacunapica gentecunaca Diospaj mandashcacunata mana cazuncunachu. Shinallataj ima alli cashcatapish ima mana alli cashcatapish mana ricuncunachu. Apóstol Pabloca Timoteoman shuj cartata quillcacushpaca Diosta mana rijsij gentecuna ima shina canatami huillarca. Shinallataj chashna gentecuna ashtahuan miranatami nirca (2 Timoteo 3:1-5, 13-ta leyipai). Ñucanchij paicuna shina canata mana munashpapish, mana cuidadota charishpaca paicuna shinami tucuita rurai callarishun (Proverbios 13:20). Chaimantami cai  temapica Diosta sirvijcunapish Diosta mana sirvijcunapish ima laya gentecuna cashcata ricushun. Shinallataj Diosta mana rijsij gentecuna shina ama cangapajca imata ruranatami yachashun. Diosta rijsichun shujtajcunatapish ayudana cashcatami ricushun.

3. ¿2 Timoteo 3:2-5-pi nishca shinaca gentecunaca ima shinataj cana carca?

³ Pabloca ‘tucuri punllacunapica llaqui punllacunami shamunga’ nircami. Caita nishca qꞌuipaca 2 Timoteo 3:2-5-pica gentecuna ima shina canatami nirca. Romanos 1:29-31-pipish chashna laya gentecunallamantatajmi Pabloca parlarca. Pero 2 Timoteo 3:2-5-pi ricurij huaquin shimicunaca Mushuj Testamento shujtaj librocunapica mana ricurinchu. Cai versocunapi nishca shinaca mana alli gentecunami tiyana carca. ¿Shinapish tucui gentecunachu mana allicuna cana carca? Mana. Diosta sirvijcunaca shujtaj laya gentecunami cana carca (Malaquías 3:18-ta leyipai).

4. ¿Jatun tucushca, valishca tucuj gentecunaca ima shinataj cancuna?

⁴ Quiquinlla alli canata munajcunamanta, quiquinpajlla charinata munajcunamanta parlashca qꞌuipaca Pabloca, jatun tucushcacunamanta, valishca tucujcunamantapishmi parlarca. Cai gentecunaca imatapish alli rurai tucushcamanta, imalla charishcacunamanta, achca cullquita charishcamanta o guapo cashcamantami shujtajcunamanta yalli cashcata yuyancuna. Chaimantami paicunata alli nichun, diosta shina adorachun munancuna. Shuj yachaj runaca: “Jatun tucushcacunaca Diosta adoranapaj randica paicunallatajmi shuj dios shina tratarincuna” nircami. Cutin, maijancunaca: “Jatun tucunaca mana alli canchu. Chaimantami shuj jatun tucushca runaca shujtaj jatun tucushcata ricushpaca paillataj pꞌiñarin” nincunami.

5. ¿Uziaspish, Ezequiaspish imataj tucurcacuna?

⁵ Bibliapi nishca shinaca Jehová Diosca jatun tucushcacunataca pꞌiñanmi (Proverbios 6:16, 17). Jatun tucushpaca Jehová Diosmantami caruyashun (Salmo 10:4). Diablomi jatun tucushca can (1 Timoteo 3:6). Huaquincunaca Diosta alli sirvicushpapish jatun tucushpami paimanta caruyashcacuna. Uzías runamanta parlashun. Paica Judá llajtata mandajmi carca. Achca huatacunatami Jehová Diosta sirvirca. Shinapish Bibliapica: ‘Ña tucuita mandai callarishpaca, jatun tucushpami llaqui tucurca. Taita Diosta cꞌariyashpami, temploman yaicushpa altarpi inciensota rupachirca’ ninmi (2 Crónicas 26:16). Huaquin huatacuna qꞌuipaca rey Ezequiaspishmi asha tiempotaca jatun tucurca (2 Crónicas 32:25, 26).

6. a) ¿Davidca imallatataj charirca? b) ¿Tucuita charishpapish Davidca imamantataj humilde carca?

⁶ Maijancunaca guapo cashcamanta, tucuicuna rijsishca cashcamanta, alli cantaj cashcamanta, achca fuerzata charishcamanta o paicunata alli nishcamantami jatun tucuncuna. Rey Davidca tucuitami charirca. Pero paica humildemi carca. ¿Imamantataj chaita ninchij? Goliatta huañuchishca huashaca Saulca: ‘David, ñuca ushushihuan cazarai tucunguimi’ nircami. Pero Davidca: “Jatun mandajpaj yerno cangapajca ñucapish, ñuca yayapaj familiapish israelcunapurapica ima mana canchijchu” nircami (1 Samuel 18:18). Jehová Diosca humildemi can. Chaimantami imata mana mitsashpa Davidmanca tucuita  curca (Salmo 113:5-8). Davidca tucui pai imalla charishcacuna Diosmanta shamushcataca mana cungarircachu (1 Corintios 4:7-ta ricui). Chaimantami Davidca humilde carca.

7. ¿Ima shinataj humilde cai tucunchij?

⁷ Jehová Diosca tucuita Mandaj cashpapish humildemi can (Salmo 18:35, NM). Caita yachashpami Davidca mana jatun tucurca. Ñucanchijpish David shina humilde cangapajmi esforzarinchij. Jatun tucunapaj randica Colosenses 3:12-pi nishcatami cazunchij. Chaipica: “Shungumanta llaquij canata, cuj canata, mana jatun tucushca canata, manso shungu canata, mana pꞌiñarij canata churarichij” ninmi. Shinallataj cꞌuyaita charishpaca ‘ñucami alli cani nishpa mana jatun tucushunchu’ (1 Corintios 13:4, QC, 1989). 1 Pedro 3:1-pi nishca shinaca huarmi humilde cajpica cusapish crijmi tucunga. Pero mana huarmicunallachu humilde cana can. Tucuicuna humilde cashcata ricuchijpica shujtajcunapish Diosmanta yachasha ningacunami.

8. a) ¿Yaya mamata cazunamantaca gentecunaca imatataj nincuna? b) ¿Bibliapi nishca shinaca huahuacunaca imatataj rurana can?

⁸ Apóstol Pabloca tucuri punllacunapica gentecuna ima shina paicunapura tratanatami huillarca. Paica, ‘huahuacunaca yaya mamata mana cazungacunachu’ nircami. Cunan punllacunapica librocunapi, peliculacunapi, televisionpipish “yaya mamata cazunaca mana minishtirinchu” nincunami. ¿Chaica ciertochu can? Mana. Huahuacuna mana cazujpica tucui familiami llaquilla causancuna. Ñaupa tiempopi ima tucushcata ricushun. Por ejemplo, ñaupa Grecia llajtapica shuj churi paipaj yayata o mamata macajpica paipaj pueblopica imapi mana participai tucurcachu, ima derechotapish mana charircachu. Cutin, Roma llajtapica shuj churi paipaj yayata macajpica huañuchij runata layami castigana carca. Caipi ricushca shinaca yaya mamata mana cazunaca llaquimi can. Chaimantami Ñaupa Testamentopipish, Mushuj Testamentopipish yaya mamataca cazuchun, respetachunmi mandan (Éxodo 20:12; Efesios 6:1-3).

9. ¿Yaya mamata cazungapajca huahuacunaca imatataj mana cungarina can?

⁹ Yaya mamacunaca huahuacunaman tucui minishtishcata cungapajmi achcata esforzarincuna. Chaimantami Jehová Diosca yaya mamata cazuchun, pagui nichun mandan. Caita mana cungarishpaca huahuacunaca siempremi yaya mamata cazusha ningacuna. Shinallataj huahuacunaca paicunapaj yaya mamamantami alli parlana can. Chashnami shujtaj huahuacunapish paicunapaj yaya mamata respetasha ningacuna. Cutin, ¿yaya mamacunaca imatataj rurana can? Mana rumi shungu tucushpami huahuacunata cꞌuyaihuan tratana can. Shinami huahuacunaca siempre cazusha ningacuna. Austin shuti jovenmanta  parlashun. Paica: “Ñuca yaya mamaca siempremi cꞌuyaihuan consejota cuj carca. Ñuca yaya mama preocuparijta ricushpami mana alli ruraicuna ricurijpipish siempre paicunata cazuj carcani” ninmi.

10, 11. a) ¿Yaya mamata mana cazujcunamanta parlashca huashaca Pabloca ima shujtaj laya gentecunamantataj parlarca? b) ¿Mateo 5:43, 44-pi nishca shinaca Diosta sirvijcunaca imatataj rurana canchij?

¹⁰ Yaya mamata mana cazujcunamanta parlashca huashaca, apóstol Pabloca mana pagui nijcunamantami parlarca. Chashna laya gentecunaca paicunamanta ima allita rurajpipish mana agradicincunachu. Shinallataj Pabloca pꞌiñarishpapish manataj cungarijcunamantapishmi parlarca. Paicunaca shujtajcunahuan ima problema tiyajpica allichinataca mana mashcancunachu. Qꞌuipaca Taita Diosta cꞌamijcunamanta, quiquinpurallatataj llaquipi churajcunamantapishmi Pabloca parlarca. Chai gentecunaca Diostapish shujtajcunatapishmi mana allita rimancuna. Chashnallataj Pabloca yangamanta juchachijcunamantami parlarca. Chai gentecunaca llullacunata nishpami shujtajcunata malpi quedachincuna. *

¹¹ Achcacunami Pablo parlashca gentecuna shina can. Pero testigo de Jehovacunaca shujtajcunata shungumanta cꞌuyashcatami ricuchincuna. Jesusca, Moisesman cushca tucui leycunamantaca Diostapish shujtajcunatapish cꞌuyana ashtahuan importante cashcatami yachachirca. Shujtajcunata cꞌuyashpaca agápe nishca cꞌuyaitami ricuchinchij (Mateo 22:38, 39). Shinallataj Jesusca, caishuj chaishuj cꞌuyanacushpami Diosta alli sirvicushcata ricuchingacuna nircami (Juan 13:34, 35-ta leyipai). Mateo 5:43, 44-pi nishca shinaca Diosta alli sirvijcunaca paicunata pꞌiñajcunatapishmi cꞌuyancuna.

12. ¿Jesusca ima shinataj cꞌuyashcata ricuchirca?

¹² Jesusca shujtajcunata cꞌuyashcamantami Diosmanta huillangapaj tucui pueblocunata purirca. Ñahui mana ricujcunatapish, cojocunatapish, lepra ungüihuan cajcunatapishmi alliyachirca. Shinallataj huañushcacunatami Jesusca causachirca (Lucas 7:22). Shujtajcuna paita pꞌiñajpipish tucuicunata quishpichingapajmi paipaj causaita curca. Chashnami paipaj Yaya cꞌuyashca shinallataj cꞌuyarca. Cunan punllacunapica testigo de Jehovacunaca Jesuspaj ejemplota catishpami shujtajcunaman cꞌuyaita ricuchinchij.

13. ¿Cꞌuyaita ricuchijpica shujtajcunapish imatataj rurasha ningacuna?

¹³ Shujtajcunaman cꞌuyaita ricuchijpica paicunapish Diosmantami yachasha ningacuna. Por ejemplo, Tailandia llajtapica shuj jatun tandanacuimi tiyarca. Chai tandanacuiman shuj runa rishpaca caishujhuan chaishujhuan cꞌuyaihuan tratanacuj cashcatami ricurca. Chai tandanacui qꞌuipaca semanapi ishqui cutin Bibliamanta yachachichunmi mañarca. Yachacui callarishpallatajmi paipaj familiamanpish Diosmanta parlai callarirca. Paica 6 quillacuna qꞌuipallami tandanacuipi Bibliata leyishpa punta asignacionta curca. Shujtajcunata cꞌuyaita ricuchicushcata o mana ricuchicushcata yachangapajca tapurishunchij: “¿Ñuca familiatapish, huauqui panicunatapish, shujtaj gentecunatapish  ayudangapaj esforzarinichu? ¿Jehová Dios cꞌuyashcata ricuchishca shinachu ñucapish shujtajcunaman cꞌuyaita ricuchini?”

14, 15. a)  Pablo nishca shinaca ¿gentecunaca ima shinataj cancuna? b) ¿Achca gentecunaca ima cambiocunatataj rurashca?

¹⁴ Pabloca allita pꞌiñajcunamantapishmi parlarca. Chai gentecunaca alli ruraicunataca mana alli ricuncunachu. Shinallataj Pabloca, gentecunaca mana jarcari tucujcuna, pꞌiña millaicunami cangacuna nircami. Cutin, shujtajcunaca jahualla pꞌiñarijcunami canga nircami. Cai gentecunaca griego rimaipi nishca shinaca jahualla pꞌiñarishpami chai rato imatapish rurancunalla, qꞌuipa llaqui tucunapica mana yuyancunachu. Cai tucuri punllacunapica chashna comportarij gentecunatami ricunchij. Chaimantami Pablo nishca shinaca paicunamanta anchurina canchij.

¹⁵ Bibliapica, atujca ovejahuan, leonca bizihuanmi tandalla puringacuna ninmi (Isaías 11:6, 7-ta leyipai). Cunan punllacunapica cai profeciami pajtaricun. Achca gentecunaca sacha animalcuna layami comportarijcuna carca. Pero Bibliata yachashpami cunanca alli, manso gentecuna tucushca. Ñallami cai pachapica alli, manso gentecunalla causanga. ¿Imamantataj chaita ninchij? Isaías 11:9-pica: “Tucui cai pachapimi Mandaj Diosta rijsishcahuan junda canga” ninmi. Animalcunaca Diosmantaca mana yachai tucunchu. Chaimantami cai profeciapica millai gentecuna cambianamanta parlacushcata yachanchij.

16. ¿Achca gentecunaca Bibliata yachashpaca ima shinataj cambiashcacuna?

 ¹⁶ Achca gentecunaca ñaupaca atujcuna shinami pꞌiña, millaicuna carca. Pero cunanca shujtajcunahuan alli apanacushpami causancuna. Ima shina paicuna cambiai tucushcata yachangapajca jw.org paginapimi “Bibliata yachashpami cambiashcacuna” nishcata ricui tucungui. Cai tiempopi achca gentecunaca Dios yuyailla caj shinami cancuna. Shinapish paicuna rurashcahuanca Diosca mana tiyashcatami ricuchincuna. Pero Diosta sirvijcunaca mana chai gentecuna shinachu can. Ashtahuanpish ‘mushuj causaita churarishcamantami cashcata ruraj cashcatapish, Diospajlla cashcatapish, mana llullaj cashcatapish ricuchincuna’ (Efesios 4:23, 24, QC, 1989). Gentecunaca Bibliamanta yachai callarishpami Dios mandashcata cazuna alli cashcata intindincuna. Shinallataj paicunapaj panda yuyaicunata, mapa ruraicunatapish saquina cashcatami intindincuna. Cashna mana alli yuyaicunata, ruraicunata saquinaca mana jahualla canchu. Pero Diospaj espíritu ayudajpimi achcacunaca chai mana allicunata saqui tucushcacuna. Chashnami cunanca tucui shunguhuan Diospaj munaita pajtachishpa causacuncuna.

17. ¿Diosta sirvijcunaca mana alli gentecuna laya ama tucungapajca imatataj rurana canchij?

¹⁷ Diosta sirvijtapish, Diosta mana sirvijtapish cunan punllapica ricunallami can. ¿Diosta sirvijcunaca mana alli gentecuna laya ama tucungapajca imatataj rurana canchij? 2 Timoteo 3:5-pi nishca shinaca paicunamanta anchurinami canchij. Shinapish paicunapurapimi causana, trabajana, estudianapish canchij. ¿Shinaca imatataj rurai tucunchij? Paicuna shina ama yuyangapaj, ama rurangapajmi cuidari tucunchij. Chaipajca Diospajman ashtahuan cꞌuchuyangapajmi Bibliata estudiana canchij. Shinallataj Diosta tucui shunguhuan sirvij amigocunatami mashcana canchij.

18. ¿Alli shimicunahuan parlashpa, alli comportarishpaca ima shinataj shujtajcunata ayudai tucushun?

¹⁸ ¿Diosta sirvijcunaca imatataj ashtahuan rurai tucunchij? Diosmanta yachachunmi shujtajcunatapish ayudana canchij. Chaimantami tucui gentecunaman huillangapaj esforzarina canchij. Gentecunaman alli shimicunahuan parlangapajmi Jehová Diosta ayudahuai nishpa mañana canchij. Shinallataj maipi cashpapish testigo de Jehovacuna cashcatami huillana canchij. Allicunata rurashpaca Jehová Diostami jatunyachishun. Jehová Diosca ‘cai pachapaj millai munaicunatapish saquishpa, alli yuyaihuan cashcata rurachun, paipajlla causachunmi yachachin’ (Tito 2:11-14). Jehová Dios shina cꞌuyaita ricuchijpi, paipaj mandashcacunata cazujpica shujtaj gentecunaca: ‘Diosca cancunahuan cashcatami yachaj chayashcanchij. Chaimantami cancunahuan rishun ninchij’ ningacunachari (Zacarías 8:23).